Si Jesus Nagaluwas—Sa Unsang Paagi?

“Si Jesus nagaluwas!” “Si Jesus mao ang atong Manluluwas!” Diha sa daghang nasod sa tibuok kalibotan, ang maong mga mensahe makita diha sa mga paril sa mga tinukod ug sa ubang publikong mga dapit. Milyonmilyong tawo ang sinserong nagtuo nga si Jesus mao ang ilang Manluluwas. Kon pangutan-on nimo sila, “Sa unsang paagi luwason kita ni Jesus?” lagmit motubag sila, “Si Jesus namatay alang kanato” o, “Si Jesus namatay alang sa atong mga sala.” Oo, ang kamatayon ni Jesus nagpaposible nga kita maluwas. Apan sa unsang paagi ang kamatayon sa usa ka tawo makabayad sa mga sala sa daghan? Kon pangutan-on ka, “Sa unsang paagi ang kamatayon ni Jesus makaluwas kanato?” unsay imong isulti?

ANG tubag sa Bibliya niining pangutanaha maoy yano apan tin-aw ug makahuloganon. Apan, aron masabtan ang kahinungdanon niini, kinahanglan una natong isipon ang kinabuhi ug kamatayon ni Jesus ingong solusyon sa usa ka lisod kaayong problema. Nianang paagiha lamang nga masabtan nato sa hustong paagi ang pagkabililhon sa kamatayon ni Jesus.

Sa pagsugo kang Jesus nga ihatag ang iyang kinabuhi, ang Diyos nagdumala sa kahimtang nga mitungha sa dihang nakasala si Adan. Pagkadakong trahedya niadtong salaa! Ang unang lalaki ug ang iyang asawa, si Eva, maoy hingpit. Ang maanindot nga tanaman sa Eden mao ang ilang pinuy-anan. Gihatagan sila sa Diyos ug may-katuyoang  buluhaton sa pag-atiman sa ilang tanamang puy-anan. Kinahanglang bantayan nila sa mahigugmaong paagi ang ubang buhing mga linalang sa yuta. Ug sa dihang ang mga tawo mosanay ug pun-on nila ang yuta sa milyonmilyong sama kanilag matang, ilang pasangkaron ang paraiso sa tibuok yuta. (Genesis 1:28) Pagkamakalilipay ug pagkamakaiikag nga buluhaton ang gihatag kanila! Dugang pa, diha silay mahigugmaong panag-ubanay. (Genesis 2:18) Walay nakulang kanila. Ang malipayon nga kinabuhing dayon anaa sa unahan nila.

Lisod handurawon kon nganong nakasala pa si Adan o si Eva. Apan ang unang tawhanong magtiayon mialsa batok sa usa nga naglalang kanila—si Jehova nga Diyos. Ginamit ang bitin, ang espiritung linalang nga si Satanas nga Yawa naglimbong kang Eva aron mosupak siya kang Jehova, ug si Adan misunod kaniya.—Genesis 3:1-6.

Dili kaduhaduhaan kon unsay buhaton sa Maglalalang kang Adan ug Eva. Giklaro na niya ang sangpotanan sa ilang pagsupak, nga nag-ingon: “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:16, 17) Karon usa ka mas hinungdanong pangutana ang kinahanglang tubagon.

Ang Katawhan Nag-atubang ug Malisod nga Problema

Ang orihinal nga sala nagpatungha ug malisod kaayong problema alang sa katawhan. Nagsugod pagkinabuhi si Adan ingong hingpit nga tawo. Busa, ang iyang mga anak makatagamtam unta ug hingpit nga kinabuhing walay kataposan. Apan, si Adan nakasala una pa siya nakapatunghag mga anak. Ang tibuok tawhanong rasa diha pa sa iyang balat-ang sa dihang nadawat niya ang hukom: “Sa singot sa imong nawong ikaw magakaon sa tinapay hangtod nga ikaw mobalik sa yuta, kay gikan niini ikaw gikuha. Kay abog ikaw ug sa abog ikaw mopauli.” (Genesis 3:19) Busa sa dihang si Adan nakasala ug nagsugod pagkamatay sumala sa giingon sa Diyos nga mahitabo kaniya, ang tanang tawo gihukman ug kamatayon duyog kaniya.

Haom nga misulat si apostol Pablo sa ulahi: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Oo, tungod sa orihinal nga sala, ang mga anak nga mangatawo untang hingpit uban ang walay-kataposang kinabuhi sa unahan nila gipanganak uban ang sakit, pagkatigulang, ug kamatayon ingong ilang palaaboton.

“Dili kana makataronganon,” duna tingaliy moingon. “Wala kami mosupak sa Diyos—si Adan ra. Nganong mawad-an man mi sa among palaaboton nga kinabuhing walay kataposan ug kalipay?” Kita nahibalo nga kon ang korte magpabilanggo sa usa ka anak tungod kay ang iyang amahan nangawat ug awto, ang anak angayang moreklamo: “Dili kana makataronganon! Wala koy gibuhat nga daotan.”—Deuteronomio 24:16.

Pinaagi sa paghaylo sa unang lalaki ug babaye sa pagpakasala, si Satanas lagmit mihinapos nga ibutang niya ang Diyos sa kompromiso. Ang Yawa miatake sayo pa kaayo sa kasaysayan sa tawhanong rasa—una pa mangatawo ang mga anak. Sa dihang nakasala si Adan, ang usa ka hinungdanong pangutana mao, Unsay buhaton ni Jehova bahin sa mga anak nga ipatungha ni Adan ug Eva?

Gihimo ni Jehova nga Diyos kon unsay makiangayon ug makataronganon. “Halayo ra sa matuod nga Diyos nga mobuhat sa pagkadaotan, ug sa Labing Gamhanan nga mobuhat sa kawalay-hustisya!” miingon ang matarong nga tawong si Elihu. (Job 34:10) Ug bahin kang Jehova, si manalagnang Moises misulat: “Ang Bato, hingpit ang iyang kalihokan, kay ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.” (Deuteronomio 32:4) Ang solusyon nga gitagana sa matuod nga Diyos sa  problema nga gipatungha sa sala ni Adan dili magkuha sa atong kahigayonan nga mabuhi sa walay kataposan diha sa usa ka paraisong yuta.

Nagtagana ang Diyos ug Hingpit nga Solusyon

Tagda ang solusyon nga gihikay sa Diyos diha sa hukom nga gipahayag niya kang Satanas nga Yawa. Si Jehova miingon kang Satanas: “Ibutang ko ang panag-away tali kanimo ug sa babaye [langitnong organisasyon sa Diyos] ug tali sa imong binhi [ang kalibotan ilalom sa pagmando ni Satanas] ug sa iyang binhi [si Jesu-Kristo]. Siya magsamad kanimo [Satanas] sa ulo ug ikaw magsamad kaniya sa tikod [kamatayon ni Jesus].” (Genesis 3:15) Niining tagnaa sa Bibliya, gipasumbingay ni Jehova ang iyang katuyoan nga paanhion niya sa yuta ang iyang langitnong espiritung Anak ingong ang hingpit nga tawong si Jesus ug dayon mamatay—samaran sa tikod—nianang walay-sala nga kahimtang.

Nganong gikinahanglan sa Diyos ang kamatayon sa usa ka hingpit nga tawo? Aw, unsay silot ni Jehova nga Diyos kang Adan kon siya makasala? Dili ba kamatayon man? (Genesis 2:16, 17) “Ang suhol nga ginabayad sa sala mao ang kamatayon,” misulat si apostol Pablo. (Roma 6:23) Gibayran ni Adan ang iyang sala pinaagi sa iyang kamatayon. Gihatagan siyag kinabuhi, gipili niya nga magpakasala, ug namatay siya ingong silot sa iyang sala. (Genesis 3:19) Komosta ang hukom nga kinahanglang antoson sa enterong tawhanong rasa tungod nianang salaa? Gikinahanglan ang usa ka kamatayon aron sa pagtabon sa ilang mga sala. Apan kang kansang kamatayon ang legal nga magtabon sa mga kalapasan sa tanang tawo?

Ang Balaod sa Diyos sa karaang nasod sa Israel nagbaod ug “kalag alang sa kalag [o, kinabuhi alang sa kinabuhi].” (Exodo 21:23) Sumala niining legal nga prinsipyo, ang kamatayon nga magtabon sa mga kalapasan sa katawhan kinahanglan nga samag bili sa giwala ni Adan. Ang kamatayon lamang sa laing hingpit nga tawo ang makabayad sa sala. Si Jesus maoy ingon niana nga tawo. Sa pagkatinuod, si Jesus maoy “katugbang nga lukat” sa pagluwas sa tanang malukat nga katawhan nga naggikan kang Adan.—1 Timoteo 2:6; Roma 5:16, 17.

Ang Kamatayon ni Jesus Bililhon Kaayo

Ang kamatayon ni Adan walay bili; takos siyang mamatay tungod sa iyang sala. Apan, ang kamatayon ni Jesus bililhon kaayo tungod kay namatay siya nga walay sala. Mahimong dawaton ni Jehova nga Diyos ang bili sa hingpit nga kinabuhi ni Jesus ingong lukat alang sa masinugtanong mga kaliwat sa makasasalang si Adan. Ug ang bili sa halad ni Jesus dili lang epektibo sa pagbayad sa atong nangaging mga kasal-anan. Kon mao pa, wala kitay kaugmaon. Tungod kay gipanganak sa sala, makasala gayod kita pag-usab. (Salmo 51:5) Pagkamapasalamaton nato nga ang kamatayon ni Jesus naghatag kanato ug kahigayonan nga makabaton sa kahingpitan nga maoy katuyoan ni Jehova sa sinugdan alang sa kaliwat ni Adan ug Eva!

Si Adan ikatandi sa usa ka amahan nga namatay ug nagbiya kanato nga nalunod pag-ayo sa utang (sala) nga walay posibleng paagi nga kita makalingkawas sa utang. Sa laing bahin, si Jesus nahisama sa usa ka maayong amahan nga namatay ug nagbilin kanato ug dagayang panulondon nga dili lamang nagpagawas kanato gikan sa dakong utang nga gipapas-an ni Adan kanato kondili nagtagana usab ug igo aron kita padayong mabuhi sa walay kataposan. Ang kamatayon ni Jesus dili lamang pagkanselar sa nangaging mga kasal-anan; kini usab maoy kahibulongang kahikayan alang sa atong kaugmaon.

Si Jesus mao ang manluluwas sa katawhan tungod kay siya namatay alang kanato. Ug pagkabililhong kahikayan ang iyang kamatayon! Sa dihang isipon nato kana ingong bahin sa solusyon sa Diyos sa komplikadong problema sa sala ni Adan, ang atong pagtuo kang Jehova ug sa iyang paagi sa pagbuhat sa mga butang mapalig-on. Oo, ang kamatayon ni Jesus maoy usa ka paagi sa pagluwas sa “tanan nga magpasundayag ug pagtuo” kaniya gikan sa sala, sakit, pagkatigulang, ug kamatayon mismo. (Juan 3:16) Mapasalamaton ka ba sa Diyos tungod sa paghimo niya niining mahigugmaong kahikayan alang sa atong kaluwasan?

[Hulagway sa panid 5]

Si Adan nagdalag sala ug kamatayon nganha sa katawhan

[Hulagway sa panid 6]

Si Jehova nagtaganag hingpit nga solusyon