Ang Bulawanong Lagda—Mapuslanon Kini

Bisan tuod kadaghanang tawo nag-isip sa Bulawanong Lagda ingong usa ka pagtulon-an sa moral nga gisulti ni Jesus, siya mismo nag-ingon: “Ang gitudlo ko dili akoa, kondili iya sa nagpadala kanako.”—Juan 7:16.

OO, ANG Magmumugna sa gitudlo ni Jesus, lakip ang nailhan sa ulahi nga Bulawanong Lagda, mao ang usa nga nagpadala kang Jesus, nga mao, ang Maglalalang, si Jehova nga Diyos.

Orihinal nga katuyoan sa Diyos nga ang tanang tawo magtratar sa usag usa sa paagi nga buot nilang trataron sila. Iyang gipakita ang labing maayong panig-ingnan sa pagpahayag ug kabalaka alang sa kaayohan sa uban sa paagi nga iyang gilalang ang mga tawo: “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.” (Genesis 1:27) Kini nagpasabot nga ang Diyos mahigugmaong naghatag sa mga tawo ug usa ka sukod sa iya mismong talagsaong mga hiyas aron ilang matagamtam  ang kinabuhi nga malinawon, malipayon, ug may panag-uyon—nga mahimong posible sa walay kataposan. Ang ilang hinatag-sa-Diyos nga tanlag, kon bansayon pag-ayo, maggiya kanila sa pagtratar sa uban sa paagi nga sila buot nga trataron.

Nangibabaw ang Kahakog

Kay nindot man diay ang kahimtang sa mga tawo sa sinugdanan, unsa man ang nahitabo? Sa yanong pagkasulti, ang mga tawo nagsugod sa pagpasundayag sa mangil-ad nga kinaiya sa pagkahakog. Ang kadaghanang tawo sinati sa asoy sa Bibliya bahin sa gihimo sa unang tawhanong magtiayon, ingon sa natala sa Genesis kapitulo 3. Kay giagni ni Satanas, usa ka magsusupak sa tanang matarong nga mga sukdanan sa Diyos, si Adan ug Eva mahakogong misalikway sa pagmando sa Diyos ug mipili sa pagkaindependente ug pagbuot sa kaugalingon. Ang ilang mahakogon ug rebelyosong lihok miresulta dili lamang sa dakong kapildihan kanila kondili sa makalilisang usab nga mga sangpotanan alang sa tanan nilang mga kaliwat sa umaabot. Kana maoy tin-awng pamatuod sa malaglagong resulta kon dili panumbalingon ang pagtulon-an nga nailhan sa ulahi ingong ang Bulawanong Lagda. Ingong resulta, “ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

Bisan tuod gitalikdan sa mga tawo sa katibuk-an ang mahigugmaong mga dalan ni Jehova nga Diyos, wala niya sila biyai. Pananglitan, gihatagan ni Jehova ang nasod sa Israel sa iyang Balaod sa paggiya kanila. Nagtudlo kini kanila sa pagtratar sa uban sa paagi nga buot nila nga sila pagatrataron. Ang Balaod naghatag ug instruksiyon kon unsaon pagtratar ang mga ulipon, mga bata nga ilo sa amahan, ug mga balo. Gilatid niini kon sa unsang paagi dumalahon ang mga kaso sa pagdagmal, pagpangidnap, ug pagpangawat. Ang mga balaod bahin sa sanitasyon nagpakitag kabalaka sa panglawas sa uban. May mga balaod gani bahin sa seksuwal nga mga butang. Gisumaryo ni Jehova ang iyang Balaod pinaagi sa pag-ingon ngadto sa mga tawo: “Higugmaon mo ang imong isigkatawo sama sa imong kaugalingon,” mga pulong nga  gikutlo sa ulahi ni Jesus. (Levitico 19:18; Mateo 22:39, 40) Ang Balaod naglakip usab ug mga regulasyon kon unsaon pagtratar ang langyawng mga pumoluyo taliwala sa mga Israelinhon. Ang Balaod nagsugo: “Dili mo lupigan ang langyaw nga pumoluyo, sanglit kamo nahibalo sa kalag sa langyaw nga pumoluyo, tungod kay kamo nahimong langyaw nga mga pumoluyo sa yuta sa Ehipto.” Sa ato pa, ang mga Israelinhon kinahanglang magpakita ug kalulot nga may empatiya ngadto sa mga makaluluoy.—Exodo 23:9; Levitico 19:34; Deuteronomio 10:19.

Samtang ang Israel matinumanong nagsunod sa Balaod, gipanalanginan ni Jehova ang nasod. Ilalom sa paghari ni David ug Solomon, ang nasod miuswag ug ang mga tawo malipayon ug matagbawon. Gisuginlan kita sa usa ka makasaysayanhong asoy: “Ang Juda ug Israel daghan, sama sa mga balas nga anaa sa daplin sa dagat ang gidaghanon, nga nangaon ug nanginom ug nagmaya. Ug ang Juda ug Israel nagpadayon sa pagpuyo sa kasegurohan, ang matag usa ilalom sa iyang kaugalingong paras ug ilalom sa iyang kaugalingong kahoyng igos.”—1 Hari 4:20, 25.

Ikasubo, ang kalinaw ug kasegurohan sa nasod wala magdugay. Bisan pag nagbaton sa Balaod sa Diyos, wala kini tumana sa mga Israelinhon; tungod sa ilang kahakog nawala na ang ilang kabalaka sa uban. Kini, lakip ang apostasya, miresulta sa kalisdanan sa matag usa kanila ug ingong usa ka nasod. Sa kataposan, sa tuig 607 W.K.P., gitugotan ni Jehova ang mga Babilonyanhon sa paglaglag sa gingharian sa Juda, ang siyudad sa Jerusalem, ug bisan sa maanindot nga templo didto. Sa unsang katarongan? “‘Tungod kay kamo wala motuman sa akong mga pulong, ania, ako magpasugo ug akong kuhaon ang tanang kabanayan sa amihanan,’ mao ang giingon ni Jehova, ‘nga magpasugo gayod ngadto kang Nabucodonosor nga hari sa Babilonya, nga akong alagad, ug dad-on ko sila batok niining yutaa ug batok sa mga molupyo niini ug batok niining tanang kanasoran sa palibot; ug itugyan ko sila sa kalaglagan ug himoon sila nga usa ka butang nga makapahingangha ug pagataghoyan ug mga dapit nga gun-ob hangtod sa panahong walay tino.’” (Jeremias 25:8, 9) Pagkadakong kapildihan ang naagoman tungod kay gitalikdan ang putli nga pagsimba ni Jehova!

Usa ka Panig-ingnan nga Angayng Sundogon

Si Jesu-Kristo, sa laing bahin, wala lamang magtudlo sa Bulawanong Lagda kondili nagpakita usab sa labing maayong panig-ingnan sa pagsunod niini. Siya may tinuod nga kahingawa sa kaayohan sa uban. (Mateo 9:36; 14:14; Lucas 5:12, 13) Kas-a, duol sa siyudad sa Nain, nakita ni Jesus ang usa ka masulub-ong babayeng balo diha sa prosesyon sa lubong sa iyang bugtong anak nga lalaki. Ang asoy sa Bibliya nag-ingon: “Sa nakit-an siya sa Ginoo, siya giabot ug kaluoy kaniya.” (Lucas 7:11-15) Ang ekspresyong “giabot ug kaluoy,” sumala sa Vine’s Expository Dictionary of Old and New Testament Words, nagpasabot ug “pagkatandog sa galamhan.” Iyang gibati ang kasakit sa kasingkasing sa balo, ug nakapalihok kini kaniya sa paghimog positibong mga lakang aron mahupay ang kasakit sa balo. Pagkadakong kalipay ang gibati niana nga balo sa dihang gibanhaw ni Jesus ang batan-ong lalaki ug “gihatag siya ngadto sa iyang inahan”!

Sa kataposan, uyon sa katuyoan sa Diyos, si Jesus kinabubut-on nga nag-antos ug naghatag sa iyang kinabuhi ingong lukat aron ang mga tawo mapahigawas sa pagkaulipon ilalom sa sala ug kamatayon. Kini mao ang kinalabwang panig-ingnan sa pagkinabuhi sumala sa Bulawanong Lagda.—Mateo 20:28; Juan 15:13; Hebreohanon 4:15.

Mga Tawong Nagpadapat sa Bulawanong Lagda

Aduna bay mga tawo sa atong panahon nga nagkinabuhi gayod sumala sa Bulawanong Lagda? Oo, ug dili lamang sa panahon nga kombenyente. Pananglitan, panahon sa Gubat sa Kalibotan II sa Nazi Alemanya, ang mga Saksi ni Jehova padayong naghupot sa ilang pagtuo sa Diyos ug gugma alang sa isigkatawo ug midumili sa pagkompromiso sa Bulawanong Lagda. Bisan tuod gipatuman sa Estado ang usa ka kampanya sa pagdumot ug pagpihig batok sa tanang Hudiyo, ang mga Saksi nagpadayon sa pagsunod sa Bulawanong Lagda. Bisan diha sa mga kampo konsentrasyon, sila nagpadayon sa pag-atiman sa ilang mga isigkatawo, nga nagpaambit sa ilang pagkaon, bisag nihit, uban sa nalunosan nga mga Hudiyo ug mga dili-Hudiyo. Dugang pa, bisag gimandoan sa Estado sa pagsundalo aron patyon ang uban, midumili sila sa pagbuhat niana, maingon nga dili nila gusto nga patyon sila sa uban. Makaako ba sila sa pagpatay niadtong angay nilang higugmaon sama sa ilang kaugalingon? Tungod sa ilang pagdumili, daghan kanila ang wala lamang ibalhog ngadto sa mga kampo konsentrasyon kondili gipamatay usab.—Mateo 5:43-48.

 Samtang nagbasa ka niining artikuloha, nagpahimulos ka sa laing pananglitan sa Bulawanong Lagda nga gipadapat. Nakita sa mga Saksi ni Jehova nga daghang tawo karon ang nag-antos nga walay paglaom ug walay mahimo. Tungod niini, ang mga Saksi boluntaryong naghimo ug positibong aksiyon sa pagtabang sa uban aron makakat-on bahin sa paglaom ug sa mapuslanong pagtultol nga makaplagan diha sa Bibliya. Kining tanan maoy bahin sa tibuok-kalibotang edukasyonal nga buluhaton nga ginahimo karon sa dili-hitupngang sukod. Ang resulta? Ingon sa gitagna sa Isaias 2:2-4, “daghang katawhan,” sa pagkatinuod kapin sa unom ka milyon ka tawo sa tibuok kalibotan, ang ‘natudloan bahin sa mga dalan ni Jehova ug naglakaw sa iyang mga alagianan.’ Sa mahulagwayong paagi, nakakat-on sila ‘sa pagsalsal sa ilang mga espada nga mga punta sa daro ug ang ilang mga bangkaw nga mga galab.’ Nakakaplag sila ug kalinaw ug kasegurohan niining malisod nga mga panahon.

Komosta ang Bahin Kanimo?

Palandonga sa makadiyot ang kasakit ug pag-antos nga midangat sa mga tawo tungod kay wala panumbalinga ang Bulawanong Lagda sukad pa sa rebelyon sa Eden, nga gisugdan ni Satanas nga Yawa. Tuyo ni Jehova nga balihon ang kahimtang sa dili madugay. Sa unsang paagi? “Tungod niini nga katuyoan nga gipadayag ang Anak sa Diyos, nga mao, aron sa pagbungkag sa mga buhat sa Yawa.” (1 Juan 3:8) Mahitabo kini ilalom sa pagmando sa Gingharian sa Diyos, diha sa maalamon ug may-katakos nga mga kamot ni Jesu-Kristo, ang usa nga nagtudlo ug nagkinabuhi sumala sa Bulawanong Lagda.—Salmo 37:9-11; Daniel 2:44.

Si Haring David sa karaang Israel nag-ingon: “Batan-on ako kaniadto, ako natigulang na usab, apan wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay. Sa tibuok nga adlaw siya nagapakitag kaluoy ug nagapahulam, ug busa ang iyang kaliwat makadawat ug panalangin.” (Salmo 37:25, 26) Dili ka ba mouyon nga kadaghanang tawo karon nanguha ug nangilog imbes nga ‘magpakitag kaluoy ug magpahulam’? Tin-aw nga ang pagsunod sa Bulawanong Lagda motultol sa matuod nga kalinaw ug kasegurohan tungod kay nagpaarang kini sa usa sa pagtagamtam ug mga panalangin karon ug sa umaabot ilalom sa Gingharian sa Diyos. Wagtangon sa Gingharian sa Diyos ang tanang kahakog ug pagkadaotan dinhi sa yuta ug ang presenteng sistema sa dunot nga hinimo-sa-tawong balaod pulihan sa bag-ong sistema nga pagahimoon sa Diyos. Dayon, ang tanang tawo malipayong magkinabuhi unya sumala sa Bulawanong Lagda.—Salmo 29:11; 2 Pedro 3:13.

[Mga hulagway sa panid 4, 5]

Si Jesus wala lamang magtudlo sa Bulawanong Lagda kondili nagpakita usab sa labing maayong panig-ingnan sa pagbuhat niini

[Mga hulagway sa panid 7]

Ang pagsunod sa Bulawanong Lagda motultol sa matuod nga kalinaw ug kasegurohan