“Umari Kanako, . . . ug Ako Magapalagsik Kaninyo”

Ang ‘Pagwali sa Pulong’ Makapalagsik

SIYA maoy usa ka hingpit nga tawo nga dunay hinungdanong misyon. Epektibo kaayo ang iyang mga paagi sa pagtudlo nga “ang mga panon sa katawhan nahingangha sa iyang paagi sa pagpanudlo.” (Mateo 7:28) Siya usa usab ka masibotong magwawali. Ang iyang panahon, kusog, ug mga kahinguhaan gigamit ilabina sa pagwali bahin sa Gingharian sa Diyos. Gani, si Jesu-Kristo mibiyahe sa tibuok niyang yutang natawhan ingong dili-hitupngang magwawali ug magtutudlo.—Mateo 9:35.

Ang dinaliang misyon ni Jesus mao ang pagwali sa “maayong balita sa gingharian” ngadto sa iyang mga katalirongan ug sa pagbansay sa iyang mga tinun-an alang sa mao gihapong buluhaton sa tibuok-yutang gilapdon. (Mateo 4:23; 24:14; 28:19, 20) Ang gibug-aton ba sa gisugo kanila nga pagwali ug ang pagkadinalian niini maingon man ang kadako sa maong kalihokan makapaluya sa iyang dili-hingpit ug may limitasyon nga mga sumusunod?

Siyempre dili! Human sugoa ang iyang mga tinun-an sa pag-ampo ngadto “sa Agalon sa pagpangani,” si Jehova nga Diyos, alang sa dugang mga mamumuo, gipadala sila ni Jesus sa pag-edukar sa mga tawo. (Mateo 9:38; 10:1) Dayon gipasaligan niya sila nga ang kaakohan sa pagkahimong sumusunod niya—lakip na sa sugo sa pagwali—maghatag ug tinuod nga kahayahay ug kahupayan. Miingon si Jesus: “Umari kanako, . . . ug ako magapalagsik kaninyo.”—Mateo 11:28.

Usa ka Tuboran sa Kalipay

Pagkamaluluy-on, mahigugmaon, ug maluloton ang maong pagdapit! Nagpahayag kini sa mabinationg kahangawa ni Jesus alang sa iyang mga sumusunod. Ang iyang mga tinun-an mapalagsik gayod diha sa pagtuman sa ilang kaakohan sa pagwali sa “maayong balita” sa Gingharian sa Diyos. Kini maghatag kanila ug tinuod nga kalipay ug katagbawan.—Juan 4:36.

Dugay na sa wala pa si Jesus sa yuta, ang Kasulatan nagpasiugda nga ang kalipay kinahanglang mahimong bahin sa sagradong pag-alagad sa Diyos. Gitin-aw kini sa dihang miawit ang salmista: “Singgit kamo sa kadaogan kang Jehova, kamong tibuok nga katawhan sa yuta. Alagara si Jehova uban ang pagmaya. Duol kamo sa iyang atubangan uban ang hugyaw sa kalipay.” (Salmo 100:1, 2) Karon, ang mga tawo sa tanang nasod nagmaya diha kang Jehova, ug ang ilang mga pagdayeg nahisama sa madaogong singgit sa mananaog nga kasundalohan. Kadtong tinuod nga dedikado sa Diyos moduol kaniya “uban ang hugyaw sa kalipay.” Ug haom gayod kana, kay si Jehova mao “ang malipayong Diyos,” kinsa buot nga ang iyang mga alagad makakaplag ug kalipay diha sa pagtuman sa ilang dedikasyon kaniya.—1 Timoteo 1:11.

Napalagsik nga mga Ministro

Sa unsang paagi naposible nga ang paghago diha sa kanataran dili makapaluya kanato kondili tinuod nga makapalagsik? Aw, ang paghimo sa buluhaton ni Jehova nahisama sa makapalagsik nga pagkaon alang kang Jesus. Siya miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.”—Juan 4:34.

Sa susama, ang masiboton nga Kristohanong mga magwawali karon makakaplag ug kalipay samtang sila ‘magwali sa pulong.’ (2 Timoteo 4:2) Si Connie, usa ka edaran nga Kristohanong babaye nga mogugol ug kapin sa 70 ka oras kada bulan diha sa buluhatong pagsangyaw, nag-ingon: “Human makigbahin sa ministeryo, mobati akog malipayong katagbawan, bisan pag gikapoy ko inigkatapos sa adlaw.”

Komosta kon ang mensahe sa Gingharian wala dawata? Si Connie nagpadayon: “Bisag unsa pay reaksiyon, wala gayod ako magbasol sukad nga nakigbahin sa ministeryo. Gawas pa sa pagkahibalo nga akong ginabuhat ang makapahimuot kang Jehova, giisip ko nga kalipay ang pagsulti bahin sa kamatuoran tungod kay samtang ginabuhat ko kana, ang kahibulongang  paglaom gikan sa Bibliya napalig-on diha sa akong kasingkasing.”

Nakaplagan sa uban nga ang pagtabang sa mga tawo sa pagbaton ug tukmang kahibalo sa Diyos maghatag ug kahulogan sa ilang kinabuhi. Si Meloney, usa ka batan-ong babaye nga kanunayng mogugol ug kapin sa 50 ka oras kada bulan diha sa buluhatong pagsangyaw, nag-ingon: “Ang ministeryo makapalagsik tungod kay naghatag kini ug direksiyon ug katuyoan sa akong kinabuhi. Ang personal nga mga problema ug ang mga kapit-os sa adlaw-adlaw dili na kaayo bug-at sa dihang makig-ambit ako sa pag-alagad.”

Si Millicent, laing masibotong ministro sa mga Saksi ni Jehova, nag-ingon: “Ang ministeryo nakapahimong bililhon sa kada adlaw nga akong gigugol sa pagsulti sa uban bahin sa katuyoan sa Diyos alang sa katawhan ug sa pagpatin-aw kon sa unsang paagi ang Paraiso mapasig-uli sa yuta. Naghimo kini kang Jehova nga tinuod alang kanako sa adlaw-adlaw ug naghatag kanako ug kalinaw ug usa ka sukod sa pangsulod nga kalipay nga dili makab-ot sa bisan unsang laing paagi.”

Mga Tawong Nakadawat sa Pagpalagsik

Ang mga magwawali sa Gingharian napalagsik gayod sa Kristohanong ministeryo, ug kadtong modawat sa nagahatag-kinabuhi nga mensahe nahupay niana. Bisan tuod ang usa ka magtutudlo sa Portugal gibansay sa mga madre ug pari, gibati niya nga wala matagbaw sa simbahan ang iyang espirituwal nga mga panginahanglan. Ang iyang mga pangutana sa Bibliya wala gihapon matubag. Ang usa ka regular nga pagtuon sa Bibliya nga gidumala sa usa sa mga Saksi ni Jehova naghatag kaniyag mauswagong pagsabot sa Kasulatan. Ang magtutudlo nalipay. “Naghinamhinam akong magpaabot sa akong pagtuon kada Miyerkoles,” matod niya, “tungod kay ang matag pangutana nako tubagon pinaagig makapakombinsir nga pamatuod sa Bibliya.” Karon, kining babayhana maoy dedikadong alagad ni Jehova, ug siya usab nagapalagsik sa uban pinaagi sa kamatuoran sa Bibliya.

Nan, tin-aw nga ang mga Saksi ni Jehova wala malumsi sa pagkaugdang sa gisugo kanila nga pagwali o sa kadako sa ilang tibuok-yutang teritoryo. Ang kawalay-pagtagad ug ang pagsupak wala makapahigawad kanila. Sila nagkugi pag-ayo sa pagtuman sa gisugo kanila nga pagwali sa Gingharian. Ilang gipaambit ang maayong balita ngadto sa mga tawo bisan asa sila makaplagan—sa hunonganan ug trak sa Tinipong Bansa (1), sa usa ka erport sa Korea (2), sa Andes (3), o sa usa ka merkado sa London (4). Ang presenteng-adlaw nga mga sumusunod ni Jesus malipayong nagpadayon sa ilang magantihong buluhaton sa tibuok kalibotan. Ug sumala sa gisaad niya, iyang gipalagsik sila ug gigamit sila sa pagpalagsik sa daghang uban pa.—Pinadayag 22:17.