Salig Kang Jehova—Ang Matuod nga Diyos

Nakasud-ong ka na ba sa langit sa walay panganod nga kagabhion ug nakita ang gatosan ka bituon? Unsaon nimo pagpatin-aw ang paglungtad niini?

SA KAHILOM sa kagabhion, ang mga bituon mahulagwayong misulti kang Haring David sa karaang Israel, nga nagtukmod kaniya sa pagsulat: “Ang kalangitan nagapahayag sa himaya sa Diyos; ug ang kawanangan nagasaysay sa buhat sa iyang mga kamot.” (Salmo 19:1) Oo, ang Maglalalang inay ang linalang maoy takos “nga modawat sa himaya ug sa dungog ug sa gahom.”—Pinadayag 4:11; Roma 1:25.

“Siya nga nagtukod sa tanang butang mao ang Diyos,” nag-ingon ang Bibliya. (Hebreohanon 3:4) Sa pagkatinuod, ang matuod nga Diyos, ‘kansang ngalan mao si Jehova, mao ang Labing Hataas ibabaw sa tibuok yuta.’ (Salmo 83:18) Ug siya dili usa ka handurawan—usa ka hulagway nga minatamata. Si Jesu-Kristo miingon bahin sa iyang langitnong Amahan, si Jehova: “Siya nga nagpadala kanako maoy tinuod.”—Juan 7:28.

Si Jehova—Ang Magtutuman sa Iyang mga Katuyoan

Ang talagsaong ngalan sa Diyos nga Jehova makita duolan sa 7,000 ka beses diha sa Hebreohanong Kasulatan lamang. Kanang ngalana nagpunting sa kamatuoran nga siya tinuod nga naglungtad. Ang ngalan sa Diyos literal nga nagkahulogang “Iyang Gipahinabo nga Mamao.” Busa gipaila ni Jehova nga Diyos ang iyang kaugalingon ingong Magtutuman sa iyang mga katuyoan. Sa dihang gipangutana ni Moises ang Diyos sa iyang ngalan, si Jehova mihatag ug detalye sa kahulogan niini niining paagiha: “Ako mamao kon unsay mamao ako.” (Exodo 3:14) Ang hubad ni Rotherham direktang nag-ingon: “Ako Mamahimong bisan unsa nga gusto nako.” Si Jehova mamao, o mopiling mamao, bisan unsay gikinahanglan sa pagtuman sa iyang matarong nga mga katuyoan ug mga saad. Busa, nahuptan niya ang daghan kaayong titulo, sama sa Maglalalang, Amahan, Soberanong Ginoo, Magbalantay, Jehova sa mga panon, Tigpatalinghog sa pag-ampo, Maghuhukom, Dakong Instruktor, Manlulukat.—Maghuhukom 11:27; Salmo 23:1; 65:2; 73:28; 89:26; Isaias 8:13; 30:20; 40:28; 41:14.

Ang matuod nga Diyos lamang ang angayang maghupot sa ngalang Jehova, kay ang mga tawo dili gayod makaseguro nga molampos ang ilang mga plano. (Santiago 4:13, 14) Si Jehova lamang ang makaingon: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga niini ug magpasalingsing, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:10, 11.

Si Jehova tino gayong magtuman sa iyang katuyoan nga bisan ang usa ka butang nga daw dili tinuod para sa mga tawo maoy tinuod sa iyang  panglantaw. Dugay nang panahon human sa kamatayon ni Abraham, Isaac, ug Jacob, gihisgotan sila ni Jesus ug miingon: “Siya [si Jehova] maoy Diyos, dili sa mga patay, kondili sa mga buhi, kay alang kaniya silang tanan buhi.” (Lucas 20:37, 38) Ang tulo ka matinumanong mga patriarka patay na, apan ang katuyoan sa Diyos sa pagbanhaw kanila segurado gayong matuman nga kaniya sila sama rag buhi. Dili malisod ang pagbanhaw ni Jehova niining matinumanong karaan nga mga alagad maingon nga dili malisod ang paglalang niya sa unang tawo gikan sa abog sa yuta.—Genesis 2:7.

Si apostol Pablo naghatag ug laing pananglitan sa kamatuoran nga ipahinabo sa Diyos nga matuman ang iyang mga katuyoan. Diha sa Kasulatan, si Abraham gitawag ug “amahan sa daghang kanasoran.” (Roma 4:16, 17) Samtang si Abram wala pay anak, giusab ni Jehova ang iyang ngalan ngadto sa Abraham, nga nagkahulogang “Amahan sa Usa ka Panon.” Gipahinabo ni Jehova nga matinuod ang kahulogan nianang ngalana pinaagi sa milagrosong pagpasig-uli sa mga gahom sa pagsanay sa tigulang nga si Abraham ug sa iyang tigulang nga asawa nga si Sara.—Hebreohanon 11:11, 12.

Kay gitugahan ug dakong gahom ug awtoridad, si Jesu-Kristo naghisgot bahin sa tinuod nga mga butang gikan sa mas labaw nga panglantaw kay nianang iya sa mga tawo. Bisan tuod ang iyang suod nga higala nga si Lazaro patay na, giingnan ni Jesus ang iyang mga tinun-an: “Si Lazaro nga atong higala nagpahulay, apan moadto ako didto aron pukawon siya gikan sa pagkatulog.” (Juan 11:11) Nganong si Jesus naghisgot bahin sa usa ka tawong patay nga natulog lamang?

Sa dihang nakaabot si Jesus sa lungsod nga natawhan ni Lazaro sa Betania, siya miadto sa lubnganan ug nagsugo nga kuhaon ang bato nga gitak-op sa ganghaan niini. Human moampo ug makusog, siya nagsugo: “Lazaro, gula ngari!” Ug samtang ang mga tawo nagtan-aw sa lubnganan, “ang tawo nga namatay migula nga ang iyang mga tiil ug mga kamot binugkosan ug mga igpuputos, ug ang iyang nawong giputos ug panapton.” Dayon si Jesus miingon: “Badbari siya ug palakta siya.” (Juan 11:43, 44) Gibanhaw ni Jesus si Lazaro—nga nagpasig-uli sa kinabuhi ngadto sa tawo nga upat na ka adlawng namatay! Si Kristo wala maghatag ug sayop nga ideya sa dihang siya miingon nga ang iyang higala natulog lamang. Sa panglantaw ni Jehova ug ni Jesus, ang patay nga si Lazaro sama rag natulog. Oo, si Jesus ug ang iyang langitnong Amahan nalangkit sa tinuod nga mga butang.

Si Jehova Makapatinuod sa Atong mga Paglaom

Pagkadakong kalainan tali sa malimbongong mga idolo ug sa matuod nga Diyos! Ang mga magsisimba sa mga idolo sayop nga naghunahuna nga ang ilang ginasimba adunay labaw-tawhanong mga gahom. Apan, kining masimbahong pagtahod dili makahatag ug milagrosong mga katakos niining mga idoloha. Sa laing bahin, si Jehova nga Diyos haom nga maghisgot sa iyang mga alagad nga dugay nang namatay nga sama rang buhi sila, tungod kay makahimo siya sa paghatag pag-usab kanila ug kinabuhi. “Si Jehova sa pagkatinuod Diyos,” ug dili gayod siya manglimbong sa iyang katawhan.—Jeremias 10:10.

Pagkamakapahupay ang pagkahibalo nga sa takdang panahon ni Jehova, ang mga patay nga anaa sa iyang panumdoman pagabanhawon—mapasig-uli sa kinabuhi! (Buhat 24:15) Oo, ang pagkabanhaw naglangkit ug pagpasig-uli sa mga kinaiya sa usa ka tawo. Ang paghinumdom sa mga kinaiya sa nangamatay ug pagbanhaw kanila dili lisod para sa Maglalalang, kinsa adunay walay-kinutobang kaalam ug gahom. (Job 12:13; Isaias 40:26) Tungod kay si Jehova dagaya sa gugma, gamiton  niya ang iyang hingpit nga panumdoman sa pagbanhaw sa mga patay diha sa usa ka paraisong yuta uban sa personalidad nga ilang nabatonan sa wala pa sila mamatay.—1 Juan 4:8.

Samtang nagkaduol ang kataposan sa kalibotan ni Satanas, ang kaugmaon masanag gayod alang niadtong nagasalig sa matuod nga Diyos. (Proverbio 2:21, 22; Daniel 2:44; 1 Juan 5:19) Gipasaligan kita sa salmista: “Sa dili na madugay, ug ang daotan mawala na; . . . apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:10, 11) Ang krimen ug kapintasan mahimo na unyang mga butang sa nangagi. Ang hustisya mohari, ug ang kalisdanan sa ekonomiya mawala na. (Salmo 37:6; 72:12, 13; Isaias 65:21-23) Ang tanang timailhan sa katilingbanon, rasanhon, tribonhon, ug etniko nga pagpihig mapala na. (Buhat 10:34, 35) Ang mga gubat ug mga hinagiban sa gubat mahanaw na. (Salmo 46:9) Nianang panahona “walay molupyo nga moingon: ‘Ako masakiton.’” (Isaias 33:24) Ang tanan makatagamtam sa hingpit ug himsog nga panglawas. (Pinadayag 21:3, 4) Ang paraiso sa yuta sa dili madugay matinuod na. Mao kanay katuyoan ni Jehova!

Oo, ang tanang binase-sa-Bibliya nga mga paglaom sa dili madugay matuman na. Nganong magpalimbong man ta sa giidolo niining kalibotana sa dihang makasalig man kita sa bug-os kang Jehova? Iyang kabubut-on nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:3, 4) Inay gugolon ang atong panahon ug mga kahinguhaan diha sa mga handurawan, o hulagway nga minatamata, niining sistemaha sa mga butang ug sa mga diyos niini, hinaot mouswag kita sa kahibalo sa matuod nga Diyos ug mosalig kaniya uban sa bug-os natong kasingkasing.—Proverbio 3:1-6; Juan 17:3.

[Hulagway sa panid 6]

Sa panglantaw ni Jehova ug Jesus, si Lazaro natulog lamang

[Mga hulagway sa panid 7]

Ang paraiso sa yuta matinuod sa dili madugay