Usa ka Siyudad Ibabaw sa Bukid

“KAMO ang kahayag sa kalibotan. Ang usa ka siyudad dili matago kon mahimutang ibabaw sa bukid,” mao kini ang gisulti ni Jesus sa iyang mga tinun-an diha sa iyang nabantog nga Wali sa Bukid.—Mateo 5:14.

Daghang lungsod sa Judea ug Galilea ang nahimutang ibabaw sa mga bukid inay kay diha sa mga walog sa ubos. Ang labing hinungdanong katarongan sa pagpilig mga lokasyon ibabaw sa mga bungtod mao ang kahilwas. Gawas sa manulong nga mga sundalo, dihay mga tulisan nga naggun-ob kanhi sa mga balangay sa mga Israelinhon. (2 Hari 5:2; 24:2) Mas daling madepensahan sa maisogong mga molupyo ang nagpundok pag-ayong grupo sa mga balay ibabaw sa bukid kay sa usa ka lungsod diha sa kapatagan, nga nagkinahanglag mas dakong paril agig panalipod.

Sanglit ang mga bungbong sa mga balay sa mga Hudiyo kasagarang gibulitan ug apog, ang tibuok grupo niining pinaputi nga mga balay nga nagtapok sa ibabaw sa bungtod dali rang makita sa daghang milya sa palibot. (Buhat 23:3) Sa mahayag nga sidlak sa adlaw sa Palestina, kining mga lungsora sa bungtod nagdan-ag nga samag banwag, sama sa pagdan-ag gihapon sa kaamgid nga mga lungsod sa Mediteranyo sa atong panahon.

Gigamit ni Jesus kining makapadani nga bahin sa kabanikahan sa Galilea ug Judea sa pagtudlo sa iyang mga sumusunod sa papel sa usa ka tinuod nga Kristohanon. “Sa susama palamdaga ang inyong kahayag atubangan sa mga tawo,” iyang gisultihan sila, “aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mateo 5:16) Bisan tuod ang mga Kristohanon wala maghimog maayong mga buhat aron dayegon sa mga tawo, ang ilang maayong panggawi mamatikdan gayod.—Mateo 6:1.

Ang maong maayong panggawi ilabinang mamatikdan panahon sa distritong mga kombensiyon sa mga Saksi ni Jehova. Usa ka mantalaan sa Espanya, nga naghisgot bahin sa usa ka kombensiyon dili pa dugay, mitaho: “Bisag nagakamenos ang interes bahin sa relihiyosong mga tema diha sa ubang mga relihiyon, dili ingon niini ang kahimtang sa mga Saksi ni Jehova. Tungod kay dili nila buot nga mawala ang pagkamapuslanon sa Bibliya, ilang gipadapat ang Pulong sa Diyos.”

Si Thomas, ang tig-atiman sa usa ka estadyum sa amihanan-kasadpan sa Espanya nga regular nga gigamit sa mga Saksi, nalipayng makig-uban sa mga tawo nga nagpadapat sa Pulong sa Diyos. Iyang gilangan ug pipila ka semana ang iyang pagretiro aron presente siya sa distritong kombensiyon sa mga Saksi ni Jehova. Sa dihang daghang delegado, lakip sa mga batan-on, ang nanuol kaniya human sa kombensiyon aron pasalamatan siya sa iyang kooperasyon sulod sa daghang tuig ug aron manghinaot nga magmaayo ang iyang pagretiro, mihilak siya. “Ang pagkaila kaninyo mao ang usa sa labing maayong mga kasinatian sa akong kinabuhi,” siya miingon.

Ang usa ka siyudad sa ibabaw sa bukid makadani sa pagtagad sa nagtan-aw tungod kay bantaaw kini sa kapunawpunawan ug tungod kay ang bisan unsang puti nga mga balay diha niini mopabanaag sa kahayag sa adlaw. Sa kaamgid, ang matuod nga mga Kristohanon madayag nga lahi tungod kay sila naningkamot sa pagsunod sa tinuboy nga Kasulatanhong mga sukdanan sa pagkamatinud-anon, moralidad, ug pagkamabination.

Dugang pa, ang mga Kristohanon nagpabanaag sa kahayag sa kamatuoran pinaagi sa ilang kalihokan sa pagsangyaw. Mao kini ang gisulti ni apostol Pablo bahin sa unang-siglong mga Kristohanon: “Sanglit nakabaton man kami niini nga ministeryo sumala sa kaluoy nga gipakita kanamo, kami wala moangka . . . kondili pinaagi sa pagpadayag sa kamatuoran nagarekomendar sa among kaugalingon  ngadto sa matag tawhanong tanlag diha sa atubangan sa Diyos.” (2 Corinto 4:1, 2) Bisag nakasugamak silag pagsupak bisan diin sila mosangyaw, gipanalanginan ni Jehova ang ilang ministeryo, mao nga sa mga tuig 60 K.P., si Pablo nakasulat nga ang maayong balita giwali “sa tibuok kalalangan ilalom sa langit.”—Colosas 1:23.

Karon, giisip usab nga seryoso sa mga Saksi ni Jehova ang ilang responsabilidad sa ‘pagpalamdag sa ilang kahayag atubangan sa mga tawo,’ sumala sa gisugo ni Jesus. Sa binaba ug pinaagi sa pinatik nga basahon, ang mga Saksi ni Jehova nagpakaylap sa maayong balita sa Gingharian diha sa 235 ka kanasoran sa tibuok kalibotan. Aron ang kahayag sa kamatuoran sa Bibliya makaabot sa mas daghang tawo kutob sa mahimo, ang ilang mga publikasyon sa Bibliya ilang gihimo nga mabatonan diha sa mga 370 ka pinulongan.—Mateo 24:14; Pinadayag 14:6, 7.

Sa daghang dapit, gihimo sa mga Saksi ang malisod nga tahas sa pagkat-on sa mga pinulongan sa mga tawong milalin gikan sa mga nasod diin gidili ang buluhatong pagsangyaw. Pananglitan, diha sa ubay-ubay nga dagkong mga siyudad sa Amerika del Norte, daghang tawo ang nangabot gikan sa Tsina ug Rusya. Ang lokal nga mga Saksi naningkamot sa pagkat-on ug Ininsek, Ruso, ug ubang mga pinulongan aron makasangyaw sa maayong balita ngadto sa bag-ong nangabot. Sa pagkatinuod, dunay ginadumala nga mga kurso nga gidisenyo sa pagpadali sa pag-uswag sa pagkat-on niining mga pinulongana aron nga ang maayong balita ikawali pa ngadto sa uban samtang ang kaumahan “puti na aron anihon.”—Juan 4:35.

Si manalagnang Isaias mitagna: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang tanang kanasoran magaganayan.” Pinaagi sa ilang panggawi ug pinaagi sa ilang ministeryo, ang mga Saksi ni Jehova nagatabang sa mga tawo sa tanang dapit sa pagtungas ngadto sa “bukid sa balay ni Jehova” aron matudloan bahin sa mga dalan sa Diyos ug aron makakat-on sa paglakaw diha sa alagianan sa Diyos. (Isaias 2:2, 3) Ang makapalipayng resulta mao nga, ingon sa gipunting ni Jesus, sila sa tingob ‘maghimaya sa ilang langitnong Amahan,’ si Jehova nga Diyos.—Mateo 5:16; 1 Pedro 2:12.