“Pangandam, Basig Masakitan Ka Niini”

NADUNGOG na ba nimo kanang mga pulonga? Tingali usa ka doktor o nars ang nagsulti niana sa wala pa idapat ang girekomendar nga pagtambal.

Lagmit, wala nimo balibari ang maong pagtambal aron lang malikayan ang gidahom nga kasakit. Hinunoa, giantos nimo ang kasakit aron maangkon nimo ang mga kaayohan sa panglawas sa umaabot. Sa grabeng mga kaso, ang pagdawat o pagdumili sa di-komportableng pagtambal mahimong magkahulogag kinabuhi o kamatayon.

Bisan tuod dili tingali nato gikinahanglan kanunay ang pag-atiman sa usa ka doktor, kitang tanan ingong dili hingpit nga mga tawo nagkinahanglag disiplina, o pagtul-id, bisan pag kana masakit tingali usahay. (Jeremias 10:23) Nga nagpasiugda niining panginahanglana sa bahin sa mga anak, ang Bibliya nag-ingon: “Ang mga binuang nabugkos sa kasingkasing sa usa ka bata; ang bunal sa disiplina mao ang magpahilayo niana gikan kaniya.”—Proverbio 22:15.

Niining bahina, ang bunal mao ang simbolo sa awtoridad sa mga ginikanan. Tinuod nga pipila lang ka bata ang gustong disiplinahon. Mahimong mapikal sila niini kon naglangkit kini ug usa ka matang sa silot. Apan, ang maalamon ug mahigugmaon nga mga ginikanan maghatag ug pagtagad dili lang sa nasakitang pagbati sa bata kondili sa kaayohan sa bata sa kapulihay. Nahibalo ang Kristohanong mga ginikanan nga husto ang Pulong sa Diyos sa dihang kini nag-ingon: “Sa pagkakaron walay disiplina nga daw makapalipay, hinunoa makapaguol; apan pagkahuman niini alang kanila nga nabansay niini kini magpatunghag madaitong bunga, nga mao, ang pagkamatarong.”—Hebreohanon 12:11; Proverbio 13:24.

Siyempre, dili lang mga bata ang nagkinahanglag disiplina. Ang mga hamtong nagkinahanglan usab niini. Ang mga hamtong mao ang gitumong sa Bibliya sa dihang kini nag-ingon: “Hawiri ang disiplina; ug ayaw kini buhii. Ampingi kini, kay kini maoy imong kinabuhi.” (Proverbio 4:13) Oo, ang maalamong mga tawo—bata ug tigulang—modawat sa disiplina nga binase sa Pulong sa Diyos, ang Bibliya, tungod kay ang pagbuhat niana, sa ngadtongadto, magatipig sa ilang kinabuhi.