Mga Pangutana Gikan sa mga Magbabasa

Aduna bay daotang epekto sa pagsamkon kang Jesus ang pagkadili-hingpit sa ulay nga babayeng si Maria?

Mahitungod sa ‘pagkatawo ni Jesus,’ ang dinasig nga rekord nag-ingon: “Sa panahong ang iyang inahan nga si Maria gikasaad sa kaminyoon kang Jose, nakaplagan siya nga mabdos pinaagi sa balaang espiritu sa wala pa sila mahiusa.” (Mateo 1:18) Dayag nga dunay hinungdanon kaayong papel nga gidula ang balaang espiritu sa Diyos sa pagmabdos ni Maria.

Apan, komosta si Maria? Aduna ba gayoy bisan unsang papel nga gidula ang iyang binhi nganha sa iyang pagmabdos? Mahitungod sa mga saad sa Diyos ngadto kang Abraham, Isaac, Jacob, Juda, ug kang Haring David—mga katigulangan ni Maria—ang bata nga matawo kinahanglang gikan gayod sa ilang kaliwat. (Genesis 22:18; 26:24; 28:10-14; 49:10; 2 Samuel 7:16) Aduna pa bay laing paagi aron ang anak nga matawo kang Maria mahimong takos nga manununod nianang mga saad sa Diyos? Siya kinahanglan nga iya gayong anak.—Lucas 3:23-34.

Ang manulonda ni Jehova nagpakita ngadto sa ulay nga babayeng si Maria, nga nag-ingon: “Ayaw kahadlok, Maria, kay ikaw nakakaplag ug pabor sa Diyos; ug, tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus.” (Lucas 1:30, 31) Ang pagsamkon nagkinahanglan nga mapertilisar una ang binhi. Tin-aw nga si Jehova nga Diyos nagpaturok sa binhi diha sa tagoangkan ni Maria, nga nagpalampos niini pinaagi sa pagbalhin sa kinabuhi sa iyang bugtong Anak gikan sa espiritung dominyo nganhi sa yuta.—Galacia 4:4.

Ang bata ba nga gisamkon niining paagiha pinaagi sa dili-hingpit nga babaye mahimong hingpit ug walay sala diha sa iyang pisikal nga lawas? Sa unsang paagi moobra ang mga balaod sa kaliwat kon magkahiusa ang hingpit ug dili-hingpit? Hinumdomi nga gigamit ang balaang espiritu sa pagbalhin sa hingpit nga puwersa sa kinabuhi sa Anak sa Diyos ug nagpahinabo sa pagsamkon. Kini nagpapas sa tanang pagkadili-hingpit nga naglungtad sa binhi ni Maria, sa ingon nakapatunghag henetikong sumbanan nga hingpit sukad sa pagturok niini.

Kon giunsa man ugaling pagsamkon ni Maria, makatino kita nga ang paglihok sa balaang espiritu sa Diyos niadtong panahona nagpaneguro sa kalamposan sa katuyoan sa Diyos. Ang manulondang si Gabriel nag-ingon kang Maria: “Pagakunsaran ikaw sa balaang espiritu, ug pagalandongan ikaw sa gahom sa Labing Hataas. Tungod niana usab ang matawo pagatawgong balaan, Anak sa Diyos.” (Lucas 1:35) Oo, ang balaang espiritu sa Diyos naghimo, ingnon ta, ug usa ka babag aron walay pagkadili-hingpit o kadaot nga moapektar sa nagtubo nga binhi diha sa tagoangkan sukad sa pagsamkon.

Dayag nga utang ni Jesus ang iyang hingpit nga tawhanong kinabuhi sa iyang langitnong Amahan, dili ni bisan kinsang tawo. Si Jehova “nag-andam ug lawas” alang kaniya, ug si Jesus—sukad sa pagsamkon kaniya—“wala [gayod] mahugawi, nahimulag sa mga makasasala.”—Hebreohanon 7:26; 10:5.

[Hulagway sa panid 19]

“Ikaw manamkon sulod sa imong tagoangkan ug manganak ug usa ka anak nga lalaki”