Tinuod ba Alang Kanimo ang Pagpanguna ni Kristo?

“Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo.”—MATEO 23:10.

1. Kinsa lamang ang Pangulo sa matuod nga mga Kristohanon?

 MARTES kadto, Nisan 11. Tulo ka adlaw sa ulahi, si Jesu-Kristo pagapatyon. Kini ang iyang kataposang pagduaw sa templo. Niining adlawa, si Jesus naghatag ug usa ka hinungdanong pagtulon-an ngadto sa mga tawo nga nagtigom didto ug ngadto sa iyang mga tinun-an. Siya miingon: “Ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo.” (Mateo 23:8-10) Tin-aw, si Jesu-Kristo mao ang Pangulo sa matuod nga mga Kristohanon.

2, 3. Unsay epekto diha sa atong mga kinabuhi ang pagpamati kang Jehova ug pagdawat sa Pangulo nga iyang gitudlo?

² Pagkadaghang kaayohan ang maangkon sa pagpanguna ni Jesus diha sa atong mga kinabuhi kon dawaton nato kini! Nagtagna bahin sa pag-abot niini nga Pangulo, si Jehova nga Diyos miingon pinaagi kang manalagnang Isaias: “Hoy, kamong tanan nga ginauhaw! Umari kamo sa tubig. Ug ang mga walay salapi! Umari kamo, palit ug kaon. Oo, umari kamo, palit ug bino ug gatas bisag walay salapi ug walay bayad. . . . Pamati pag-ayo kanako, ug kaon kon unsay maayo, ug tugoting makakaplag ang inyong kalag sa tumang kalipay niini diha sa katambok mismo. . . . Tan-awa! Ingong saksi ngadto sa nasodnong mga pundok akong gihatag siya, ingong pangulo ug komandante ngadto sa nasodnong mga pundok.”—Isaias 55:1-4.

³ Gigamit ni Isaias ang ordinaryong mga likido—tubig, gatas, ug bino—ingong sumbingay aron sa pagpakita kon sa unsang paagi ang atong kinabuhi mismo maapektohan kon kita mamati kang Jehova ug mosunod sa Pangulo ug Komander nga iyang gihatag kanato. Ang resulta makaparepresko. Sama kinig nag-inom ug usa ka basong bugnawng tubig sa mainit nga adlaw. Ang atong kauhaw sa kamatuoran ug pagkamatarong matagbaw. Maingon nga ang gatas makapalig-on sa mga masuso ug makatabang kanila sa pagtubo, ‘ang gatas sa pulong’ makapalig-on kanato ug makapakusog sa espirituwal nga pagtubo diha sa atong relasyon sa Diyos. (1 Pedro 2:1-3) Ug kinsay makalimod nga ang bino makahatag ug kalipay sa mga salosalo? Sa samang paagi, ang pagsimba sa matuod nga Diyos ug ang pagsunod sa mga tunob sa iyang tinudlong Pangulo maghimo sa kinabuhi nga ‘malipayon gayod.’ (Deuteronomio 16:15) Nan, hinungdanon nga kitang tanan—bata ug tigulang, lalaki ug babaye—magpakita nga ang pagpanguna ni Kristo tinuod kanato. Apan, sa unsang paagi atong ikapasundayag diha sa atong adlaw-adlaw nga kinabuhi nga ang Mesiyas mao ang atong Pangulo?

Mga Batan-on—Padayon sa “Pag-uswag sa Kaalam”

4. (a) Unsay nahitabo sa dihang ang 12-anyos nga Jesus miduaw sa Jerusalem panahon sa Paskuwa? (b) Unsa ka daghan ang nahibaloan ni Jesus sa 12 anyos pa lang ang edad?

⁴ Palandonga ang panig-ingnan nga gipasundayag sa atong Pangulo alang sa mga batan-on. Bisag wala kaayoy makuhang impormasyon bahin sa pagkabatan-on ni Jesus, usa ka hitabo ang mabutyagon kaayo. Sa 12-anyos pa si Jesus, gipauban siya sa iyang mga ginikanan sa ilang tinuig nga pagduaw ngadto sa Jerusalem alang sa Paskuwa. Niining okasyona nalinga kaayo siya sa pagpakighisgot bahin sa Kasulatan, ug wala tuyoa nga nabiyaan siya sa iyang pamilya. Tulo ka adlaw sa ulahi, nakit-an siya sa iyang nabalakang mga ginikanan, si Jose ug Maria, diha sa templo nga “naglingkod taliwala  sa mga magtutudlo ug nagpatalinghog kanila ug nangutana kanila.” Dugang pa, “kadtong tanan nga nagpatalinghog kaniya nahibulong kanunay sa iyang pagsabot ug sa iyang mga tubag.” Hunahunaa, sa 12 anyos pa lang ang edad, si Jesus dili lamang makasukna nag makapukaw sa hunahuna, espirituwal nga mga pangutana kondili makahatag pa gayod ug maalamong mga tubag! Dayag nga siya nabansay sa iyang mga ginikanan.—Lucas 2:41-50.

5. Sa unsang paagi matimbangtimbang sa mga batan-on ang ilang tinamdan sa pagtuon sa pamilya sa Bibliya?

⁵ Tingali usa ikaw ka batan-on. Kon ang imong mga ginikanan maoy debotadong mga alagad sa Diyos, malagmit nga adunay regular nga programa sa pagtuon sa Bibliya sa pamilya diha sa imong balay. Unsay imong tinamdan sa pagtuon sa pamilya? Nganong dili palandongon ang mga pangutana sama sa: ‘Kinasingkasing ba akong nagasuportar sa kahikayan sa pagtuon sa Bibliya sa akong pamilya? Nakigkooperar ba ako niana, nga dili mohimog bisan unsa nga makabalda sa rutina?’ (Filipos 3:16) ‘Ako ba aktibong nakigbahin sa pagtuon? Kon nahiangay, mopatugbaw ba ako ug pangutana labot sa materyal nga gitun-an ug mokomento bahin sa pagpadapat niini? Samtang nagauswag ako sa espirituwal, ako bang giugmad ang gana sa “gahing pagkaon . . . alang sa mga tawong hamtong”?’—Hebreohanon 5:13, 14.

6, 7. Unsa ka hinungdanon ang programa sa adlaw-adlawng pagbasa sa Bibliya sa mga batan-on?

⁶ Ang programa may kalabotan sa adlaw-adlawng pagbasa sa Bibliya hinungdanon usab. Ang salmista miawit: “Malipayon ang tawo nga wala maglakaw sa tambag sa mga daotan, . . . hinunoa ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.” (Salmo 1:1, 2) Ang manununod ni Moises, si Josue, “nagabasa sa hinayng tingog sa adlaw ug gabii.” Kini nakatabang kaniya sa paglihok nga maalamon ug nagmalamposon sa pagtuman sa iyang hinatag sa Diyos nga buluhaton. (Josue 1:8) Ang atong Pangulo, si Jesu-Kristo, miingon: “Kini nahisulat, ‘Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.’” (Mateo 4:4) Kon kita nagkinahanglan ug pisikal nga pagkaon adlaw-adlaw, labi nang nagkinahanglan kita ug espirituwal nga pagkaon sa regular nga paagi!

⁷ Kay nahibalo sa iyang espirituwal nga panginahanglan, ang 13-anyos nga si Nicole nagsugod sa pagbasa sa Bibliya kada adlaw. a Karon, sa edad nga 16, nabasa na niya ang tibuok Bibliya kausa ug anaa na sa katunga sa ikaduhang higayon niana. Simple lang ang iyang paagi. “Maneguro gayod ako nga makabasa labing menos usa ka kapitulo sa usa ka adlaw,” siya miingon. Sa unsang paagi natabangan siya sa iyang adlaw-adlaw nga pagbasa sa Bibliya? Siya mitubag: “Ang daotang mga impluwensiya karong panahona daghan kaayo. Adlaw-adlaw akong nag-atubang ug mga pag-ipit diha sa eskuylahan ug sa ubang dapit nga maghagit  sa akong pagtuo. Ang pagbasa sa Bibliya sa adlaw-adlaw nakatabang kanako sa paghinumdom dayon sa mga kasugoan sa Bibliya ug sa mga prinsipyo nga nagdasig kanako sa pagsukol sa mga pag-ipit. Tungod niini, mas nasuod ako kang Jehova ug kang Jesus.”

8. Unsay nabatasan ni Jesus diha sa sinagoga, ug sa unsang paagi ang mga batan-on makasundog kaniya?

⁸ Batasan na ni Jesus ang pagpamati ug pagpakigbahin sa pagbasa sa Kasulatan diha sa sinagoga. (Lucas 4:16; Buhat 15:21) Pagkamaayong sundon sa mga batan-on kanang maong panig-ingnan pinaagi sa regular nga pagtambong sa Kristohanong mga tigom, nga diha niana gibasa ug gitun-an ang Bibliya! Nagpabili niining mga tigoma, ang 14-anyos nga si Richard miingon: “Bililhon kanako ang mga tigom. Ako mapahinumdoman kanunay didto bahin sa kon unsa ang maayo ug daotan, kon unsa ang moral ug imoral, kon unsa ang samag-Kristo ug kon unsa ang dili. Dili kinahanglang makahibalo ako bahin niana sa mapait nga paagi—pinaagi sa pagkaagom niana.” Oo, “ang pahinumdom ni Jehova kasaligan, nga nagahimo nga maalamon sa walay kasinatian.” (Salmo 19:7) Naningkamot usab si Nicole nga makatambong sa tanang lima ka tigom sa kongregasyon matag semana. Siya mogugol usab ug duha o tulo ka oras aron mangandam alang sa tigom.—Efeso 5:15, 16.

9. Sa unsang paagi ang mga batan-on makapadayon sa “pag-uswag sa kaalam”?

⁹ Ang pagkabatan-on mao ang labing maayong panahon sa ‘pagkuha ug kahibalo sa bugtong matuod nga Diyos, ug sa usa nga iyang gipadala, si Jesu-Kristo.’ (Juan 17:3) Tingali duna kay nailhan nga mga batan-on nga daghan kaayog panahon sa pagbasag komiks, pagtan-awg telebisyon, pagdulag mga dula sa video, o sa pagsusi sa Internet. Nganong sundon man nimo sila nga mahimo man nimong sundon ang hingpit nga panig-ingnan sa atong Pangulo? Sa bata pa, malipay siya nga magtuon bahin kang Jehova. Ug unsay miresulta? Tungod sa iyang gugma alang sa espirituwal nga mga butang, “si Jesus nagpadayon sa pag-uswag sa kaalam.” (Lucas 2:52) Ikaw mahimong mouswag usab sa kaalam.

“Magpasakop sa Usag Usa”

10. Unsay makatabang sa kinabuhi sa pamilya nga mahimong tuboran sa kalinaw ug kalipay?

¹⁰ Ang balay mahimong usa ka dangpanan sa kalinaw ug katagbawan o usa ka panggubatan sa panagbingkil ug panag-away. (Proverbio 21:19; 26:21) Ang atong pagdawat sa pagpanguna ni Kristo mopalambo sa kalinaw ug kalipay sa pamilya. Sa pagkatinuod, ang pananglitan ni Jesus mao ang sulondan sa mga relasyon sa pamilya. Ang Kasulatan nag-ingon: “Magpasakop sa usag usa diha sa kahadlok kang Kristo. Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana maoy ulo sa iyang asawa ingon nga si Kristo usab maoy ulo sa kongregasyon, sanglit siya mao ang manluluwas niining maong lawas. . . . Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efeso 5:21-25) Ngadto sa kongregasyon sa Colosas, si apostol Pablo nagsulat: “Kamong mga anak, magmasinugtanon sa inyong mga ginikanan sa tanang butang, kay kini makapahimuot kaayo sa Ginoo.”—Colosas 3:18-20.

11. Sa unsang paagi ikapasundayag sa bana nga ang pagpanguna ni Kristo tinuod para niya?

¹¹ Ang pagsunod niining tambaga nagpasabot nga ang bana maoy manguna sa pamilya, ang iyang asawa maunongong motabang kaniya, ug ang kabataan mosunod sa ilang mga ginikanan. Apan, ang pagkaulo sa lalaki moresulta lamang ug kalipay kon kini dumalahon sa hustong paagi. Ang usa ka maalamong bana kinahanglang magtuon sa pagpasundayag sa pagkaulo pinaagi sa pagsundog sa iyang kaugalingong Ulo ug Pangulo, si Kristo-Jesus.  (1 Corinto 11:3) Bisan tuod si Jesus sa ulahi nahimong ‘ulo ibabaw sa tanang butang ngadto sa kongregasyon,’ siya mianhi sa yuta, “dili aron pagaalagaran, kondili aron sa pag-alagad.” (Efeso 1:22; Mateo 20:28) Sa samang paagi, ang Kristohanong bana magpasundayag sa iyang pagkaulo, dili tungod sa hinakog nga bentaha, kondili sa pag-atiman sa intereses sa iyang asawa ug sa mga anak—oo, sa tibuok pamilya. (1 Corinto 13:4, 5) Siya maningkamot sa pagsundog sa diyosnong mga hiyas sa iyang ulo, si Jesu-Kristo. Sama kang Jesus, siya malumo ug mapainubsanon ug kasingkasing. (Mateo 11:28-30) Ang mga pulong sama sa “Pasayloa ko” o “husto ka” dili lisod isulti para niya kon siya masayop. Ang iyang maayong panig-ingnan mas magpasayon sa iyang asawa sa pagkahimong “katabang,” usa ka “katimbang,” ug “kauban” sa maong lalaki, sa pagkakat-on gikan kaniya ug pagtrabaho uban kaniya.—Genesis 2:20; Malaquias 2:14.

12. Unsay makatabang sa asawa sa pagsunod sa prinsipyo sa pagkaulo?

¹² Ang asawa, sa iyang bahin, kinahanglang magpasakop sa iyang bana. Apan, kon siya natakdan sa espiritu sa kalibotan, kini magsugod sa pagdaot sa iyang panglantaw sa prinsipyo sa pagkaulo, ug dili siya moangay sa ideya nga kinahanglang magpasakop sa usa ka lalaki. Ang Kasulatan wala magsugyot nga ang lalaki kinahanglang magharihari, apan nagsugo kini nga ang mga asawa magpasakop sa ilang mga bana. (Efeso 5:24) Gipadayag usab sa Bibliya nga ang bana o amahan adunay tulubagon, ug kon ipadapat ang tambag niini, mohatag kinig kalinaw ug kahusay sa pamilya.—Filipos 2:5.

13. Unsang panig-ingnan sa pagpasakop ang gihatag ni Jesus alang sa mga anak?

¹³ Ang mga anak gisugo usab nga magmasinugtanon sa ilang mga ginikanan. Niining bahina, si Jesus naghatag ug usa ka maayo kaayong panig-ingnan. Human sa nahitabo didto sa templo sa dihang nabiyaan ang 12-anyos nga Jesus sa tulo ka adlaw, “siya milugsong uban [sa iyang mga ginikanan] ug nahiabot sa Nasaret, ug siya nagpadayon sa pagpasakop kanila.” (Lucas 2:51) Ang pagpasakop sa mga anak sa ilang mga ginikanan makahatag ug kalinaw ug panaghiusa sa pamilya. Kon ang tanan sa pamilya magpasakop sa pagpanguna ni Kristo, ang resulta maoy usa ka malipayong pamilya.

14, 15. Unsay makatabang kanato aron molampos sa dihang mag-atubang ug malisod nga kahimtang sa balay? Paghatag ug usa ka pananglitan.

¹⁴ Kon may motunghang mga problema sa panimalay, ang yawi sa kalamposan mao ang pagsundog kang Jesus ug pagdawat sa iyang pagtultol. Pananglitan, ang kaminyoon sa 35-anyos nga si Jerry ngadto kang Lana, nga inahan sa usa ka tin-edyer nga dalaga, nakahatag kanila ug problema nga wala damha nilang duha. Si Jerry miingon: “Ako nahibalo nga aron mahimong maayong ulo, kinahanglang ipadapat nako ang mao gihapong mga prinsipyo sa Bibliya nga nakahatag ug kalamposan sa ubang mga pamilya. Apan akong nadiskobrehan sa ulahi nga kinahanglang ipadapat nako kini nga may dakong kaalam ug pagsabot.” Gilantaw siya sa iyang humabdos nga babaye nga maoy hinungdan nga ang iyang Mama napalayo gikan kaniya ug siya nasuko pag-ayo kaniya. Si Jerry nagkinahanglan ug pagsabot aron makakita nga kini nga tinamdan nakaapekto sa gisulti ug gihimo sa dalagita. Giunsa niya pagsulbad ang kahimtang? Si Jerry mitubag: “Si Lana ug ako nagkasabot nga labing menos sa pagkakaron, si Lana ang bahala sa pagdisiplina agig ginikanan samtang ako ang bahala sa pagtukod ug maayong relasyon uban sa akong humabdos nga babaye. Sa ngadtongadto, kining paagiha miresulta ug maayo.”

¹⁵ Kon mag-atubang ug malisod nga mga kahimtang diha sa balay, kita nagkinahanglan ug pagsabot aron masuta kon nganong ang mga sakop sa pamilya mosulti ug molihok sa ingon nga paagi. Kita nagkinahanglan usab ug kaalam sa pagpadapat sa mga prinsipyo sa Diyos sa hustong paagi. Si Jesus, pananglitan, nakasabot gayod kon nganong ang babaye nga gitalinug-an mihikap kaniya, ug gitagad siya nga maalamon ug mahangawaon. (Levitico 15:25-27; Marcos 5:30-34) Ang kaalam ug pagsabot maoy mga kinaiyahan sa atong Pangulo. (Proverbio 8:12) Kita mahimong malipayon kon kita molihok sama sa iyang paglihok.

‘Padayon sa Pagpangita Pag-una sa Gingharian’

16. Unsay angay natong unahon sa atong mga kinabuhi, ug sa unsang paagi gipakita kini ni Jesus pinaagi sa iyang panig-ingnan?

¹⁶ Gipadayag ni Jesus kon unsa ang angayng unahon diha sa mga kinabuhi niadtong modawat sa iyang pagpanguna. Siya miingon: “Nan, magpadayon  sa pagpangita pag-una sa gingharian ug sa iyang [sa Diyos] pagkamatarong.” (Mateo 6:33) Ug pinaagi sa iyang panig-ingnan, iyang gipakita kanato kon unsaon paghimo niana. Sa natapos ang 40-ka adlawng yugto sa pagpuasa, pagpamalandong, ug pag-ampo human nga siya gibawtismohan, si Jesus gitental. Si Satanas nga Yawa nagtanyag kaniya ug pagkamagmamando ibabaw sa “tanang gingharian sa kalibotan.” Handurawa lang ang kinabuhi nga maangkon unta ni Jesus kon midawat pa siya sa tanyag sa Yawa! Apan, si Kristo okupado sa pagtuman sa kabubut-on sa iyang Amahan. Siya nahibalo usab nga mubo ra ang maong kinabuhi diha sa kalibotan ni Satanas. Iya dayong gibalibaran ang tanyag sa Yawa, nga nag-ingon: “Kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” Wala magdugay human niadto, si Jesus “misugod sa pagwali ug nag-ingon: ‘Paghinulsol kamo, kay ang gingharian sa mga langit haduol na.’” (Mateo 4:2, 8-10, 17) Sa nahibiling bahin sa iyang yutan-ong kinabuhi, si Kristo maoy usa ka bug-os-panahong magwawali sa Gingharian sa Diyos.

17. Sa unsang paagi ikapasundayag nato nga ang intereses sa Gingharian maoy atong giuna sa atong mga kinabuhi?

¹⁷ Maayong atong sundogon ang atong Pangulo ug dili tugotan ang kalibotan ni Satanas nga magdani kanato sa paghimo sa dakong-suweldo nga trabaho ug karera nga atong pangunang tumong sa kinabuhi. (Marcos 1:17-21) Pagkabinuang nga magpalinga kita sa kalibotanong mga pangagpas nga mahimong ikaduhang dapit na lamang ang intereses sa Gingharian! Gipiyalan kita ni Jesus ug buluhatong pagwali sa Gingharian ug paghimog-tinun-an. (Mateo 24:14; 28:19, 20) Oo, tingali kita dunay pamilya o ubang mga responsibilidad nga atimanon, apan dili ba kita malipayon nga gigamit nato ang mga gabii ug mga hinapos sa semana aron atong matuman ang atong Kristohanong responsibilidad nga pagsangyaw ug pagtudlo? Ug pagkamakapadasig nga sa 2001 nga tuig sa pag-alagad, duolan sa 780,000 ang nakaalagad ingong bug-os panahong mga ministro, o mga payunir!

18. Unsay makatabang kanato sa pagkaplag ug kalipay sa pagsangyaw?

¹⁸ Ang mga asoy sa Ebanghelyo naglarawan kang Jesus ingong usa ka tawo nga magbubuhat maingon man usa ka tawo nga dunay malumo nga pagbati. Sa dihang nakakita sa espirituwal nga mga panginahanglan niadtong anaa sa iyang palibot, siya naluoy kanila ug maikagong mitanyag sa pagtabang kanila. (Marcos 6:31-34) Ang atong ministeryo mahimong malipayon kon atong ipakigbahin kini tungod sa gugma alang sa uban ug sa tim-os nga tinguha sa pagtabang kanila. Apan sa unsang paagi maugmad nato ang ingon niana nga tinguha? “Sa tin-edyer pa ako,” miingon ang usa ka batan-on nga ginganlag Jayson, “dili ko ganahang mosangyaw.” Unsay nakatabang kaniya aron maugmad ang gugma alang niining buluhatona? Si Jayson mitubag: “Sa akong pamilya, ang  mga Sabado sa buntag kanunay gayod nga igugol sa pag-alagad sa kanataran. Maayo kini alang kanako tungod kay sa magsige ako ug gula sa kanataran, mas dako ang akong nakitang kaayohan nga nahimo niini ug mas malipay na akong makigbahin niini.” Kita usab angayng regular ug makugihong makigbahin sa pagsangyaw.

19. Unsay angay natong tinguhaon maylabot sa pagpanguna ni Kristo?

¹⁹ Tinuod gayod nga makarepresko ug magantihon ang pagdawat sa pagpanguna ni Kristo. Kon atong dawaton kana, ang pagkabatan-on mahimong usa ka panahon sa pag-uswag sa kahibalo ug kaalam. Ang kinabuhi sa pamilya mahimong tuboran sa kalinaw ug kalipay, ug ang pagsangyaw mahimong usa ka kalihokan nga makahatag ug kalipay ug katagbawan. Nan, tinguhaon nato nga mapasundayag diha sa atong adlaw-adlawng kinabuhi ug sa mga desisyon nga atong himoon nga ang pagpanguna ni Kristo tinuod kanato. (Colosas 3:23, 24) Apan, si Jesu-Kristo nagtagana ug laing pagpanguna pinaagi sa laing natad—ang Kristohanong kongregasyon. Hisgotan sa sunod artikulo kon sa unsang paagi kita makapahimulos gikan niining maong tagana.

[Footnote]

Nahinumdom Ka Ba?

• Sa unsang paagi ang pagsunod sa atong tinudlo sa Diyos nga Pangulo makahatag kanato ug kaayohan?

• Sa unsang paagi ikapasundayag sa mga batan-on nga sila buot mosunod sa pagpanguna ni Jesus?

• Unsay epekto sa pagpanguna ni Kristo diha sa kinabuhi sa pamilya niadtong nagpasakop niana?

• Sa unsang paagi ang atong pag-alagad nagpasundayag nga ang pagpanguna ni Kristo tinuod alang kanato?

[Mga Pangutana sa Pagtuon]

[Mga hulagway sa panid 9]

Ang pagkabatan-on maoy maayong panahon sa pagkuhag kahibalo sa Diyos ug sa atong tinudlong Pangulo

[Hulagway sa panid 10]

Ang pagpasakop sa pagpanguna ni Kristo mopalambo sa kalipay sa pamilya

[Mga hulagway sa panid 12]

Giuna ni Jesus ang pagpangita sa Gingharian. Giuna ba nimo kini?