Magtukaw, Abante nga Maisogon!

Taho Bahin sa Espesyal nga mga Tigom

KINSAY makapangulipas nga kita nagpuyo na sa “makuyaw nga mga panahong lisod sagubangon”? Ingong mga Saksi ni Jehova, kita wala mahigawas sa mga kapit-os sa pagkinabuhi niining “kataposang mga adlaw.” (2 Timoteo 3:1-5) Apan giila nato nga ang mga tawo nagkinahanglag tabang. Wala sila makasabot sa kahulogan sa mga hitabo sa kalibotan. Nagkinahanglan silag paghupay ug paglaom. Sa panguna, unsay atong bahin sa pagtabang sa atong isigkatawo?

Dunay sugo nga gihatag ang Diyos kanato sa pagpaambit sa maayong balita sa natukod nang Gingharian sa Diyos. (Mateo 24:14) Ang mga tawo kinahanglang mahibalo nga kining langitnong Gingharian mao ang bugtong paglaom alang sa katawhan. Apan, dili kanunayng paborable ang pagdawat sa atong mensahe. Sa ubang mga dapit ang atong buluhaton gidili ug ang atong mga igsoon gilutos. Bisan pa niana, dili kita mohunong. Uban sa bug-os nga pagsalig kang Jehova, kita determinadong magpabiling magtukaw ug magpadayon sa pag-abante nga maisogon, nga magamantala sa maayong balita nga walay hunong.—Buhat 5:42.

Kanang hugot nga determinasyon nadayag sa espesyal nga mga tigom nga gipahigayon niadtong Oktubre 2001. Sa Sabado, Oktubre 6, ang tinuig nga tigom sa Watch Tower Bible and Tract Society of Pennsylvania gihimo sa Jersey City, New Jersey, Assembly Hall of Jehovah’s Witnesses sa Tinipong Bansa. a Pagkaugma, ang dugang mga tigom gihimo diha sa upat ka dapit, tulo sa Tinipong Bansa ug usa sa Canada. b

Sa iyang pangbukas nga mga komento panahon sa tinuig nga tigom, ang tsirman, si Samuel F. Herd, usa ka membro sa Nagamandong Lawas sa mga Saksi ni Jehova, mikutlo sa Salmo 92:1, 4 ug dayon miingon: “Buot natong ipakita nga kita mapasalamaton.” Sa pagkatinuod, ang mga katarongan nga magmapasalamaton gihatag diha sa lima ka taho gikan sa lainlaing mga dapit sa kalibotan.

Mga Taho nga Naggikan sa Lainlaing mga Dapit

Si Brader Alfred Kwakye nagtaho bahin sa pag-uswag sa buluhatong pagsangyaw sa Ghana, nga kanhi nailhan ingong Gold Coast. Ang atong buluhaton nianang nasora gidili sulod sa daghang tuig. Ang mga tawo mangutana: “Nganong gidili  man? Unsa man diay inyong gibuhat?” Nagbukas kini sa mga kahigayonan nga makahatag ug pamatuod, miingon si Brader Kwakye. Sa 1991 sa dihang gitapos ang pagdili, dihay 34,421 ka mga Saksi ni Jehova sa Ghana. Sa Agosto 2001, ang katibuk-ang gidaghanon maoy 68,152—usa ka 98-porsiyentong pag-uswag. Ang mga plano gikamulo aron sa pagtukod ug usa ka Assembly Hall nga kalingkoran ug 10,000 ka tawo. Dayag nga ang atong espirituwal nga mga igsoon sa Ghana nagpahimulos gayod sa ilang relihiyosong kagawasan.

Bisan pa sa kagubot sa politika, ang atong mga igsoon sa Irlandia aktibong nakigbahin sa ministeryo, ug sila gitahod tungod sa ilang neyutral nga baroganan. Ang Irlandia dunay 115 ka kongregasyon diha sa 6 ka sirkito, miingon ang koordinetor sa Komite sa Sanga nga si Peter Andrews. Si Brader Andrews nag-asoy sa usa ka kasinatian bahin kang Liam, usa ka diyes-anyos nga batang lalaki nga maisogong mosangyaw diha sa eskuylahan. Si Liam nakapahimutang sa librong Akong Basahon sa mga Estorya sa Bibliya, nga gipatik sa mga Saksi ni Jehova, ngadto sa 25 ka klasmet maingon man sa iyang magtutudlo. Gustong magpabawtismo ni Liam, apan dihay nangutana kon dili kaha bata pa siya kaayo. Si Liam mitubag: “Dili ang akong edad kondili ang akong gugma alang kang Jehova ang angayng himoon nga sukdanan. Ang akong bawtismo magpakita kon unsa ka dako ang akong gugma kaniya.” Ang tumong ni Liam mao ang pagkahimong misyonaryo.

Sa 1968 dihay 5,400 ka magmamantala sa maayong balita sa Venezuela. Apan duna na karoy kapin sa 88,000, miingon si Stefan Johansson, koordinetor sa Komite sa Sanga. Ug dunay kalaoman sa dugang pag-uswag tungod kay kapin sa 296,000 ang mitambong sa Memoryal sa 2001. Sa Disyembre 1999, ang pagbunok sa ulan maoy nakaingon sa mga pagdahili sa lapok nga nakapatay sa gibanabanang 50,000 ka tawo, lakip sa pipila ka mga Saksi. Usa ka Kingdom Hall ang napuno sa lapok nga miabot ug duha ka piye gikan sa kisame. Sa dihang may misugyot nga biyaan ang maong bilding, ang mga igsoon mitubag: “Dili na mahimo! Amo kining Kingdom Hall, ug dili namo gustong biyaan kini karon.” Misugod sila sa pagtrabaho, nga naghakot ug tinoneladang lapok, mga bato, ug ubang guba nga bahin sa bilding. Ang bilding giayo, ug ang mga igsoon nakaingon nga mas nindot kini karon kay sa wala pa mahitabo ang katalagman!

Dunay 87 ka pinulongan ug mga diyalekto nga gisulti sa Pilipinas, miingon si Brader Denton Hopkinson, koordinetor sa Komite sa Sanga. Sulod sa milabayng tuig sa pag-alagad, ang kompletong New World Translation of the Holy Scriptures giluwatan diha sa tulo ka dagkong mga pinulongan sa nasod—Cebuano, Iloko, ug Tagalog. Si Brader Hopkinson nag-asoy sa kasinatian sa usa ka nuybe-anyos nga batang lalaki nga mibasa sa  librong Good News—To Make You Happy, nga gipatik sa mga Saksi ni Jehova. Mikuha pa siya ug ubang mga publikasyon gikan sa sangang buhatan, nga gibasa usab niya, apan gisupak siya sa iyang pamilya. Daghang tuig sa ulahi sa dihang nagtungha na siya sa medisina, gikontak niya ang sanga ug mihangyo nga magtuon sa Bibliya. Nabawtismohan siya sa 1996 ug sa wala madugay misulod sa bug-os-panahong ministeryo. Karon nag-alagad na siya uban sa iyang asawa diha sa sangang buhatan.

‘Ang Puerto Rico “nag-eksportar” ug daghang Saksi sa laing mga nasod,’ miingon ang koordinetor sa Komite sa Sanga nga si Ronald Parkin. Dunay mga 25,000 ka magmamantala sa maong isla, ug ang gidaghanon wala mouswag sulod sa daghang tuig. Ngano? Aw, gibanabana nga ang Puerto Rico “nakaeksportar” na ug mga 1,000 ka magmamantala kada tuig sa Tinipong Bansa, daghan kanila namalhin tungod sa kalisod sa panginabuhi. Gihisgotan ni Brader Parkin ang usa ka hinungdanong desisyon sa korte nga naglangkit kang Luis, usa ka 17-anyos nga Saksi nga dunay leukemia. Tungod kay si Luis wala magpaabono ug dugo, ang iyang kaso gipasaka sa korte. Gustong makig-estorya kaniya mismo ang huwes, busa iyang giduaw siya diha sa ospital. Gipangutana siya ni Luis: “Ngano man nga kon makahimo ako ug bug-at nga krimen, hukman ko nimo ingong usa ka hamtong, apan kon gusto nakong tumanon ang Diyos, trataron ko nimo ingong usa ka bata?” Ang huwes nakombinsir nga si Luis maoy usa ka hamtong nga menor de edad ug makaarang sa pagdesisyon alang sa iyang kaugalingon.

Human sa mga taho gikan sa halayong kayutaan, si Harold Corkern, sa Komite sa Sanga sa T.B., nag-interbiyo sa upat ka dugay nang mga alagad ni Jehova. Si Arthur Bonno migugol ug 51 ka tuig sa bug-os-panahong pag-alagad ug karon nag-alagad na sa Komite sa Sanga sa Ecuador. Si Angelo Catanzaro migugol ug 59 ka tuig sa bug-os-panahong pag-alagad, nga dakong bahin niana gigugol ingong nagapanawng magtatan-aw. Si Richard Abrahamson migraduwar sa Gilead School sa 1953, ug siya nakapribilehiyo sa pagdumala sa buluhaton sa Denmark sulod sa 26 ka tuig una pa mibalik sa Brooklyn Bethel. Sa kataposan, ang tanan nalipay sa pagkadungog sa 96-anyos nga Carey W. Barber. Nabawtismohan sa 1921, si Brader Barber nakagugol na ug 78 ka tuig diha sa bug-os-panahong ministeryo ug nahimong membro sa Nagamandong Lawas sukad sa 1978.

Makapapukaw nga mga Pakigpulong

Ang tinuig nga tigom naglakip sa serye sa makapukaw-sa-hunahuna nga mga pakigpulong. Si Brader Robert W. Wallen misulti bahin sa ulohang “Usa ka Katawhan Alang sa Iyang Ngalan.” Kita maoy katawhan alang sa ngalan sa Diyos, ug makaplagan kita diha sa kapin sa 230 ka kayutaan. Gihatagan kita ni Jehova ug “kaugmaon ug paglaom.” (Jeremias 29:11) Kinahanglang ipadayon nato ang pagmantala sa Gingharian sa Diyos, nga magpaambit sa kahibulongang mensahe sa paghupay. (Isaias 61:1) “Hinaot kita sa adlaw-adlaw magpadayon sa pagkinabuhi sumala sa ngalan nga gitawag kanato, mga Saksi ni Jehova,” matod pa ni Brader Wallen agig pagtiklop sa iyang pakigpulong.—Isaias 43:10.

Ang kataposang bahin sa programa mao ang simposyum sa tulo ka membro sa Nagamandong Lawas. Nag-ulohan kini ug “Karon na ang Panahon nga Magtukaw, Mobarog nga Malig-on, ug Magmakusganon.”—1 Corinto 16:13.

Una, si Brader Stephen Lett naghisgot bahin sa ulohan nga “Pagpabiling Magtukaw Niining Ulahing Takna.” Ang pisikal nga pagkatulog maoy usa ka gasa, matod pa ni Brader Lett. Kini makapalagsik kanato. Apan, ang espirituwal nga pagkatulog dili gayod makaayo. (1 Tesalonica 5:6) Nan, unsaon man nato pagpabiling nagtukaw sa espirituwal? Gihisgotan ni Brader Lett ang tulo ka espirituwal nga “mga pildoras”: (1) Kanunayng magmapuliki diha sa buluhaton sa Ginoo. (1 Corinto 15:58) (2) Magmahunahunaon sa imong espirituwal nga panginahanglan. (Mateo 5:3) (3) Magmasanongon sa binase-sa-Bibliya nga tambag aron molihok nga maalamon.—Proverbio 13:20.

Si Brader Theodore Jaracz nagpahayag ug usa ka makapapukaw nga pakigpulong nga nag-ulohang “Barog nga Malig-on Ilalom sa Pagsulay.” Nagtumong sa Pinadayag 3:10, si Brader Jaracz nangutana: “Unsa ang ‘takna sa pagsulay’?” Ang maong pagsulay moabot “sa adlaw sa Ginoo,” ang panahon diin kita nagkinabuhi karon. (Pinadayag 1:10) Ang pagsulay nalangkit sa hinungdanong isyu—kita ba dapig sa natukod nang Gingharian sa Diyos o sa daotang sistema sa mga butang ni Satanas? Hangtod matapos kanang takna sa pagsulay, kita makaatubang gayod ug mga  pagsulay ug mga kalisdanan. Magpabilin ba kitang maunongon kang Jehova ug sa iyang organisasyon? ‘Kinahanglang ang matag usa kanato magpasundayag sa maong pagkamaunongon,’ miingon si Brader Jaracz.

Sa kataposan, si Brader John E. Barr naghisgot sa ulohan nga “Magmakusganon Ingong Espirituwal nga Tawo.” Nagpunting sa Lucas 13:23-25, siya miingon nga kinahanglang manlimbasog kita “sa pagsulod agi sa sigpit nga pultahan.” Daghan ang wala makasulod tungod kay sila kulang sa kakugi aron magmakusganon. Aron mahimong hamtong nga mga Kristohanon, kinahanglang makakat-on kita sa pagpadapat sa mga prinsipyo sa Bibliya sa tanang bahin sa kinabuhi. Si Brader Barr nag-awhag: “Ako nakaseguro nga mouyon kamo nga karon na ang panahon nga (1) unahon si Jehova labaw sa tanan; (2) magmakusganon; ug (3) manlimbasog sa pagtuman sa kabubut-on ni Jehova. Niining paagiha kita makahimo sa pagsulod agi sa sigpit nga pultahan nga motultol ngadto sa kahibulongang kinabuhi nga walay kataposan.”

Sa dihang natapos na ang tinuig nga tigom, dihay usa ka pangutana nga wala pa matubag: Unsa ang tinuig nga teksto sa 2002 nga tuig sa pag-alagad? Ang maong pangutana gitubag pagkaugma.

Dugang nga Tigom

Hilabihan ang kahinam nga gibati sa nanambong sa Dominggo sa buntag samtang misugod ang programa alang sa dugang tigom. Gisugdan kini pinaagi sa usa ka sumaryo sa leksiyon nianang semanaha sa Bantayanang Torre, nga gisundan sa mubong presentasyon sa pipila ka haylayt sa tinuig nga tigom. Dayon, ang tanan nalipay sa pagkadungog ug pakigpulong bahin sa tinuig nga teksto alang sa 2002: “Umari kanako, . . . ug ako magapalagsik kaninyo.” (Mateo 11:28) Ang pakigpulong gibase sa tun-anang mga artikulo nga sa ulahi gipatik diha sa Disyembre 15, 2001, nga gula sa Ang Bantayanang Torre.

Human niana, ang uban nga nahimong mga delegado sa espesyal nga “Mga Magtutudlo sa Pulong sa Diyos” nga mga Kombensiyon sa Pransiya ug Italya niadtong Agosto 2001 nagpaambit sa ilang mga hunahuna. c Sa kataposan, ingong haylayt sa programa sa maong adlaw, duha ka kataposang mga pakigpulong ang gipahayag sa nagaduawng mga mamumulong gikan sa Brooklyn Bethel.

Ang una nag-ulohan ug “Maisogong Nagasalig Kang Jehova Niining Makuyaw nga mga Panahon.” Ang mamumulong nagtagik sa mosunod nga pangunang mga punto: (1) Ang maisogong pagsalig kang Jehova hinungdanon gayod alang sa katawhan sa Diyos. Ang Bibliya naundan ug daghang panig-ingnan niadtong nagpasundayag ug kaisog ug pagtuo atubangan sa pagsupak. (Hebreohanon 11:1–12:3) (2) Si Jehova nagtagana ug lig-ong pasukaranan aron kita bug-os nga mosalig kaniya. Ang iyang mga buhat ug ang iyang Pulong naggarantiya nga siya may pagtagad sa iyang mga alagad ug nga siya dili gayod makalimot kanila. (Hebreohanon 6:10) (3) Ang kaisog ug pagsalig ilabinang gikinahanglan karon. Kita “pagadumtan,” sumala sa gitagna ni Jesus. (Mateo 24:9) Aron makalahutay, kita kinahanglang mosalig sa Pulong sa Diyos, may kompiyansa nga ang iyang espiritu nagauban kanato, ug may kaisog sa pagpadayon sa pagmantala sa maayong balita. (4) Ang mga panig-ingnan nagpakita nga kita nag-atubang ug paglutos bisan karon. Ang tanan natandog pag-ayo sa dihang giasoy sa mamumulong ang giantos sa atong mga igsoon sa Armenia, Georgia, Kazakhstan, Pransiya, Rusya, ug Turkmenistan. Sa pagkatinuod, karon na ang panahon sa pagpasundayag ug kaisog ug pagsalig kang Jehova!

Ang kataposang mamumulong nagtagik sa temang “Pag-abante nga Nahiusa Uban sa Organisasyon ni Jehova.” Ang pakigpulong nagkobre sa daghang nunot-sa-panahong mga puntos. (1) Ang pag-uswag sa katawhan ni Jehova naobserbahan sa daghang tawo. Ang atong buluhatong pagsangyaw ug ang atong mga kombensiyon nakadani sa pagtagad sa mga tawo. (2) Si Jehova nagtukod ug usa ka organisasyon nga nahiusa. Sa 29  K.P., si Jesus gidihogan ug balaang espiritu sa tuyo nga tigomon ang “tanang butang”—kadtong dunay langitnong palaaboton ug kadtong dunay yutan-ong paglaom—nganha sa nahiusang pamilya sa Diyos. (Efeso 1:8-10) (3) Ang mga kombensiyon maoy talagsaong pagpasundayag sa internasyonal nga panaghiusa. Kini klaro kaayo sa espesyal nga mga kombensiyon nga gipahigayon sa Pransiya ug Italya sa miaging Agosto. (4) Usa ka makapapukaw nga resolusyon ang gisagop sa Pransiya ug Italya. Ang mamumulong nagpaambit ug pipila ka kinutlo gikan sa makapapukawng resolusyon. Ang bug-os nga kaundan sa resolusyon makita sa ubos.

Sa konklusyon sa kataposang pakigpulong, ang nagaduaw nga mamumulong nagbasa sa usa ka makapahinuklog nga pahibalo nga giandam sa Nagamandong Lawas. Kini, sa bahin, nag-ingon: “Karon na ang panahon nga magpabiling magtukaw ug magbantay, nga sabton kon sa unsang paagi ang mga panghitabo sa kalibotan nagakaugmad. . . . Buot namong ipaabot kaninyo ang mahigugmaong kahingawa sa Nagamandong Lawas alang kaninyo ug alang sa tanang katawhan sa Diyos. Hinaot panalanginan niya kamo nga madagayaon samtang bug-os kalag kamong nagatuman sa iyang kabubut-on.” Ang katawhan ni Jehova bisan asa determinado nga magpabiling magtukaw niining makuyaw nga mga panahon ug magpadayon sa pag-abante nga maisogon duyog sa nahiusang organisasyon ni Jehova.

[Mga footnote]

[Kahon/Mga hulagway sa panid 29-31]

Resolusyon

Sa Agosto 2001, ang espesyal nga “Mga Magtutudlo sa Pulong sa Diyos” nga mga Kombensiyon gipahigayon sa Pransiya ug Italya. Nianang mga kombensiyona, usa ka makapapukaw nga resolusyon ang gipresentar. Ang mosunod mao ang kaundan sa maong resolusyon.

“INGONG MGA SAKSI NI JEHOVA, kitang tanan nga nagtigom dinhi niining ‘Mga Magtutudlo sa Pulong sa Diyos’ nga Kombensiyon gihatagag instruksiyon pinaagi sa pagtudlo nga mapuslanon kaayo. Ang tuboran niining maong pagtudlo klarong gipaila. Ang pagtudlo wala maggikan sa tawo. Naggikan kini sa Usa nga gihubit sa karaang manalagna nga si Isaias ingong atong ‘Dakong Instruktor.’ (Isaias 30:20) Matikdi ang pahinumdom ni Jehova nga giingon diha sa Isaias 48:17: ‘Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.’ Sa unsang paagi gipalampos niya kini? Ang panguna maoy pinaagi sa labing daghag hubad ug naapod-apod nga libro sa kalibotan, ang Bibliya, diin giingnan kita sa klarong mga pulong: ‘Ang tibuok Kasulatan inspirado sa Diyos ug mapuslanon.’—2 Timoteo 3:16.

“Karong adlawa, ang katawhan nanginahanglan gayod sa maong mapuslanong pagtudlo. Ngano man? Sa pagtagad sa nag-usab-usab, makapalibog nga panghitabo niining kalibotana, unsay giila sa mga tawong dunay hait nga panabot? Kini lamang: Bisan tuod milyonmilyon ang natudloan sa edukasyonal nga mga sistema sa kalibotan, dunay dakong kakulang sa tinuod nga mga prinsipyo ug kapakyasan sa pag-ila tali sa husto ug sa sayop. (Isaias 5:20, 21) Daghan kaayo ang walay-alamag sa Bibliya. Bisan tuod ang teknolohiya nakapaarang kanato sa pagbaton ug daghan kaayong impormasyon pinaagi sa paggamit ug mga kompiyuter, hain na man ang mga tubag sa hinungdanong mga pangutana sama sa, Unsay katuyoan sa kinabuhi? Unsaon nato pagsabot ang mga hitabo sa atong panahon? Duna bay lig-ong paglaom alang sa umaabot? Mahitabo ba gayod ang kalinaw ug kasegurohan? Dugang pa, diha sa mga estante sa librarya makita ang daghang libro nga nagkobre halos sa tanang natad sa tawhanong paningkamot. Sa gihapon, ang katawhan nakahimo sa mga sayop nga nahimo na kanhi. Miusbaw ang krimen. Ang mga sakit nga gihunahuna kaniadto nga napapha na, namalik pag-usab, samtang ang uban,  sama sa AIDS, mikaylap pag-ayo. Ang kinabuhi sa pamilya tulin kaayong nagakabungkag. Ang polusyon nagdaot sa kalikopan. Ang terorismo ug mga hinagiban sa tiningob nga pagpatay nagpameligro sa kalinaw ug kasegurohan. Ang mga problema nga walay mga solusyon nagtipun-og na. Unsay atong angayang papel sa pagtabang sa atong isigkatawo niining makuyawng mga panahon? Duna bay pagtulon-an nga nagsaysay sa nakaingon sa kahimtang sa tawo ug wala lamang magpakita sa paagi nga makabaton ug mas maayong kinabuhi kondili nagtanyag usab ug masanag, segurado nga paglaom alang sa umaabot?

“Ang gisugo kanato sa Kasulatan mao ang ‘panglakaw kamo ug paghimog mga tinun-an sa mga tawo sa tanang kanasoran, nga magatudlo kanila sa pagtuman sa tanang butang nga gisugo ni Kristo.’ (Mateo 28:19, 20) Kining sugoa gihatag ni Jesu-Kristo human sa iyang kamatayon ug pagkabanhaw, sa dihang nadawat niya ang tanang awtoridad sa langit ug sa yuta. Molabaw kini sa tanang kalihokan nga gipasiugda sa mga tawo. Sa panglantaw sa Diyos, ang gisugo kanato, nga nasentro sa espirituwal nga mga panginahanglan niadtong gigutom sa pagkamatarong, maoy unahon. Duna kitay maayong Kasulatanhong mga rason sa pagtuman nianang sugoa nga kinasingkasing.

“Nagkinahanglan kini ug paghimo sa maong kalihokan nga una sa atong kinabuhi. Uban sa panalangin ug tabang sa Diyos, ang buluhaton matapos, bisan pa sa daghang makapalinga nga mga impluwensiya, babag, ug mga paglutos gikan sa relihiyoso ug politikanhon nga mga elemento, nga gidisenyo sa pagpugong sa pag-uswag niining tibuok-globo nga programa sa pagtudlo. Kita masaligon ug nagtuo nga kining buluhatona magpadayon sa paglambo ug makaabot sa dakong katumanan niini. Nganong makaseguro man gayod kita? Tungod kay ang Ginoong Jesu-Kristo nagsaad nga siya magauban kanato diha sa atong hinatag-sa-Diyos nga ministeryo hangtod sa konklusyon niining sistema sa mga butang.

“Ulahi na ang takna alang sa magul-anong katawhan. Ang gisugo kanato karon kinahanglang matuman una pa moabot ang kataposan. Busa, kita ingong mga Saksi ni Jehova, determinado nga:

“Una: Ingong dedikadong mga ministro, kita determinadong unahon ang mga intereses sa Gingharian sa atong kinabuhi ug magpadayon sa pag-uswag sa espirituwal. Aron mapalampos kana, ang atong pag-ampo nahiuyon sa mga pulong sa Salmo 143:10: ‘Tudloi ako sa pagbuhat sa imong kabubut-on, kay ikaw mao ang akong Diyos.’ Nagkinahanglan kini nga kita mahimong makugihong mga estudyante, nga maningkamot sa pagbasa sa Bibliya sa adlaw-adlaw, magahimo ug personal nga pagtuon ug panukiduki. Aron mapadayag ang atong pag-uswag sa tanang tawo, himoon nato ang tanang makataronganong paningkamot sa pagpangandam ug pagbenepisyo sa bug-os gikan sa teokratikanhong edukasyon nga gitagana diha sa mga tigom sa kongregasyon, sa mga asembliya sa sirkito, ug sa distrito, nasyonal, ug internasyonal nga mga kombensiyon.—1 Timoteo 4:15; Hebreohanon 10:23-25.

“Ikaduha: Aron matudloan sa Diyos, mokaon kita diha lamang sa iyang lamesa ug magpatalinghog pag-ayo sa pasidaan sa Bibliya bahin sa malinglahong mga pagtulon-an sa mga demonyo. (1 Corinto 10:21; 1 Timoteo 4:1) Himoon nato ang linaing pagbantay aron malikayan ang makadaot nga mga elemento, lakip na ang relihiyosong kabakakan, walay-pulos nga mga pangatarongan, makauulaw nga seksuwal nga mga kahilayan, ang hampak sa pornograpiya, makauulawng kalingawan, ug tanan nga dili ‘uyon sa makapahimsog nga pagtulon-an.’ (Roma 1:26, 27; 1 Corinto 3:20; 1 Timoteo 6:3; 2 Timoteo 1:13) Agig pagtahod sa ‘mga gasa nga mga lalaki,’ kinsa kuwalipikado nga magtudlo kon unsay maayo, kita magpabili gayod sa ilang mga paningkamot ug kinasingkasing nga makigkooperar kanila sa pagbayaw sa hinlo ug matarong nga moral ug espirituwal nga mga sukdanan sa Pulong sa Diyos.—Efeso 4:7, 8, 11, 12; 1 Tesalonica 5:12, 13; Tito 1:9.

“Ikatulo: Ingong Kristohanong mga ginikanan, ang atong kinasingkasing nga paningkamot mao ang pagtudlo sa atong mga anak dili lamang pinaagi sa pulong kondili pinaagi usab sa ehemplo. Ang atong hatagag pangunang pagtagad mao ang pagtabang kanila sukad sa ilang pagkamasuso sa ‘pagkahibalo sa balaang mga sinulat aron mahimong maalamon alang sa kaluwasan.’ (2 Timoteo 3:15) Hinumdoman gayod nato kanunay nga ang atong pagmatuto kanila sa disiplina ug sa pagdumala-sa-kaisipan ni Jehova maghatag kanila sa kinamaayohang kahigayonan sa pagsinati sa saad sa Diyos nga ‘magmauswagon sila ug molungtad  ug taas nga panahon sa yuta.’—Efeso 6:1-4.

“Ikaupat: Sa dihang mag-atubang ug mga kabalaka o bug-at nga mga problema, una sa tanan, ‘ipahibalo nato ang atong mga pangaliya sa Diyos,’ kay gipasaligan nga ‘ang kalinaw sa Diyos nga labaw sa tanang panghunahuna sa tawo’ magabantay kanato. (Filipos 4:6, 7) Sanglit nailalom sa yugo ni Kristo, kita makakaplag ug kahayahay. Kay nahibalo nga ang Diyos nag-atiman kanato, dili kita magpanuko sa pagtugyan ngadto kaniya sa atong mga kabalaka.—Mateo 11:28-30; 1 Pedro 5:6, 7.

“Ikalima: Sa pagpahayag sa atong pagpasalamat kang Jehova tungod sa pribilehiyo nga nahimong mga magtutudlo sa iyang Pulong, maningkamot pa kita sa ‘paggamit sa iyang pulong sa kamatuoran sa hustong paagi’ ug ‘pagtuman sa bug-os sa atong ministeryo.’ (2 Timoteo 2:15; 4:5) Tungod kay kita nahibalo gayod kon unsay nalangkit, ang atong kinasingkasing nga tinguha mao ang pagpangita sa mga takos ug pagkultibar sa binhi nga napugas. Dugang pa, pauswagon nato ang atong pagpanudlo pinaagi sa epektibong pagdumala ug dugang mga panagtuon sa Bibliya. Pinaagi niini mas mahiuyon kita sa kabubut-on sa Diyos nga ‘ang tanang matang sa mga tawo mangaluwas unta ug makadangat sa tukmang kahibalo sa kamatuoran.’—1 Timoteo 2:3, 4.

“Ikaunom: Sulod sa miaging siglo ug niining presente nga siglo, ang mga Saksi ni Jehova diha sa daghang nasod nakasinati ug lainlaing matang sa mga pagsupak ug paglutos. Apan napamatud-ang si Jehova nagauban kanato. (Roma 8:31) Ang iyang dili mapakyas nga Pulong nagpasalig kanato nga ‘walay hinagiban nga buhaton batok kanato’ sa pagbabag, pagpahinay, o pagpahunong sa atong buluhatong pagsangyaw sa Gingharian ug pagpanudlo ang molampos. (Isaias 54:17) Sa paborable o kaha sa masamok nga panahon, dili kita mohunong sa pagsulti sa kamatuoran. Ang atong determinasyon mao ang dinaliang pagtuman sa gisugo kanato nga pagsangyaw ug pagpanudlo. (2 Timoteo 4:1, 2) Ang atong tumong mao ang pagpakig-ambit kutob sa mahimo sa maayong balita sa Gingharian sa Diyos uban sa mga tawo sa tanang kanasoran. Busa, sila padayong makabaton ug kahigayonan nga makakat-on bahin sa tagana sa pagkabaton ug kinabuhing dayon diha sa usa ka matarong nga bag-ong kalibotan. Ingong nahiusa nga panon sa mga magtutudlo sa Pulong sa Diyos, kita determinadong magpadayon sa pagsunod sa ehemplo sa Dakong Magtutudlo, si Jesu-Kristo, ug pagsumbalik-silaw sa iyang diyosnong mga hiyas. Kining tanan atong buhaton sa pagpasidungog ug pagdayeg sa atong Dakong Instruktor ug Maghahatag-Kinabuhi, si Jehova nga Diyos.

“Ang tanan nga nanambong niining kombensiyona nga mouyon sa pagsagop niining maong resolusyon, palihog sa pag-ingon ug OO!”

Sa dihang ang paniklop nga pangutana sa resolusyon gipahayag ngadto sa 160,000 nga nanambong sa tulo ka kombensiyon sa Pransiya ug 289,000 sa siyam ka lokasyon sa Italya, ang lanog nga “Oo” gipatugbaw diha sa daghang pinulongan nga gihawasan sa mga delegado.