Kon sa Unsang Paagi Pagawad-on ang mga Depekto sa Lawas

HANDURAWA nga ang mga mata sa buta makakita na, ang mga dalunggan sa bungol makadungog na sa tanang tingog, ang dila sa amang makaawit sa kalipay, ug ang mga tiil sa bakol molig-on ug makalakawlakaw na! Wala kita maghisgot bahin sa bag-ong mga diskobre sa medikal nga siyensiya, kondili bahin sa mga resulta sa pagsalga mismo sa Diyos alang sa kaayohan sa mga tawo. Ang Bibliya nagtagna: “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 35:5, 6) Apan sa unsang paagi kita makaseguro nga matuman unya kining kahibulongan kaayong tagna?

Una, sa dinhi si Jesu-Kristo sa yuta, iyang giayo ang tanang matang sa sakit ug mga depekto sa lawas sa tawo. Dugang pa, ang kadaghanan sa iyang mga milagro nakita sa daghang saksi—bisan sa iyang mga kaaway. Sa pagkatinuod, sa labing menos usa ka higayon, gisusi pag-ayo sa maduhaduhaong mga magsusupak ang pagpang-ayo nga gibuhat ni Jesus aron daoton unta ang iyang dungog. Apan naulawan gayod sila tungod kay napamatud-an hinuon nila nga tinuod ang iyang milagro. (Juan 9:1, 5-34) Human mahimo ni Jesus ang laing tinuod nga milagro, sa kahigawad sila miingon: “Unsay atong buhaton, tungod kay kining tawhana nagbuhat ug daghang ilhanan?” (Juan 11:47) Apan, ang ordinaryong mga tawo masanongon ug dili sama kanila, tungod kay daghan ang nagsugod sa pagtuo kang Jesus.—Juan 2:23; 10:41, 42; 12:9-11.

Mga Milagro ni Jesus—Pasiuna sa Tibuok-Kalibotang Pagpang-ayo

Ang mga milagro ni Jesus labaw pa ug nahimo kay sa pagpamatuod nga si Jesus mao ang Mesiyas ug ang Anak sa Diyos. Kini naghatag ug pasikaranan sa pagtuo sa mga saad sa Bibliya nga ang masinugtanong katawhan pagaayohon sa umaabot. Kining mga saara nag-apil sa tagna diha sa Isaias kapitulo 35, nga gihisgotan sa unang parapo. Ang Isaias 33:24 nag-ingon mahitungod sa umaabot nga panglawas sa mahinadlokon-sa-Diyos nga mga tawo: “Walay pumoluyo nga moingon: ‘Ako masakiton.’” Sa susama, ang Pinadayag 21:4 nagsaad: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang [mga pagsulay ug mga pag-antos karon] nangagi na.”

Ang mga tawo kanunayng nag-ampo nga matuman kining mga tagnaa sa dihang ilang sumaysumayon ang sulondang pag-ampo ni Jesus, nga ang usa ka bahin niini nag-ingon: “Umanhi ang imong  gingharian. Matuman ang imong pagbuot dinhi sa yuta, maingon man usab sa langit.” (Mateo 6:10, King James Version) Oo, ang kabubut-on sa Diyos maglakip sa yuta ug sa mga tawo. Ang sakit ug mga depekto sa lawas, bisan pag may hinungdan nga gitugotan, sa dili madugay mawala na; kini dili magdaot sa ‘tumbanan sa tiil’ sa Diyos hangtod sa hangtod.—Isaias 66:1. a

Giayo nga Walay Kasakit o Bayad

Bisag unsa pang kasakitan ang giantos sa mga tawo, giayo sila ni Jesus nga wala nila batia ang kasakit, giayo sila dihadiha, ug walay bayad. Dili kalikayan nga ang balita bahin niini kusog kaayong mikaylap, ug wala magdugay “ang dakong mga panon sa katawhan miduol kaniya, nga nagdala ug mga tawong bakol, pungkol, buta, amang, ug daghang uban pa, ug ilang gibutang sila sa iyang tiilan, ug iyang giayo sila.” Unsay sanong sa mga tawo? Ang asoy sa nakakita mismo nga si Mateo nagpadayon: “Ang panon sa katawhan nahibulong sa nakita nila ang mga amang nga nagsulti ug ang mga bakol nga naglakaw ug ang mga buta nga nakakita, ug ilang gihimaya ang Diyos sa Israel.”—Mateo 15:30, 31.

Matikdi nga kadtong giayo ni Jesus wala pilia nga linain gikan sa panon—usa ka paagi sa pagpanikas nga gigamit sa mga mangingilad. Hinunoa, ang daghang paryente ug mga higala sa mga masakiton ‘nagbutang kanila sa tiilan ni Jesus, ug siya nag-ayo kanila.’ Karon atong sublion ang pipila ka espesipikong mga pananglitan sa katakos ni Jesus sa pagpang-ayo.

Pagkabuta: Samtang didto sa Jerusalem, giayo ni Jesus ang mga mata sa usa ka tawong “buta sukad sa pagkahimugso.” Kining tawhana ilado sa siyudad ingong buta nga makililimos. Busa imong mahanduraw ang kaukyab ug kaguliyang sa dihang nakita siya sa mga tawo nga naglakawlakaw nga makakita na! Apan, dili malipayon ang tanan. Naglagot tungod sa pagyagyag ni Jesus sa ilang pagkadaotan una pa niana, ang pipila ka sakop sa usa ka prominente ug impluwensiyal nga Hudiyohanong sekta nga gitawag ug mga Pariseo nangitag paagi aron makakitag ebidensiya sa pagpamatuod nga nanglimbong si Jesus. (Juan 8:13, 42-44; 9:1, 6-31) Busa, ilang gisukitsukit ang giayo nga tawo, dayon ang iyang mga ginikanan, ug dayon ang maong tawo na usab. Apan sa pagpangutana sa mga Pariseo napamatud-an hinuon nga tinuod ang milagro ni Jesus, nga nakapasuko kanila. Nalibog sa pagkahiwi sa maong relihiyosong mga salingkapaw, ang giayo nga tawo miingon: “Sukad sa kakaraanan wala pay gidungog nga may nagpabuka sa mga mata sa usa nga natawo nga buta. Kon kining tawhana dili gikan sa Diyos, siya wala gayoy arang mahimo.” (Juan 9:32, 33) Tungod nianang prangka ug intelihente nga pagpahayag sa pagtuo, ‘gipapahawa siya’ sa mga Pariseo, nga mahimong nagpasabot nga ilang gipalagpot ang kanhing-buta nga tawo gikan sa sinagoga.—Juan 9:22, 34.

Pagkabungol: Samtang si Jesus didto sa Decapolis, usa ka rehiyon nga sidlakan sa Suba sa Jordan, “gidad-an nila siya ug usa ka tawong bungol ug may babag sa pagsulti.” (Marcos 7:31, 32) Dili lamang kay giayo ni Jesus kining tawhana kondili gipakita usab niya nga nakasabot siya sa kinailadmang pagbati niining bungol nga tawo, kinsa maulaw tingali taliwala sa daghang tawo. Gisultihan kita sa Bibliya nga gikuha ni Jesus ang tawong bungol palayo “sa panon sa katawhan” ug giayo siya. Sa makausa pa, ang mga tawong nakasaksi “nahingangha sa labing talagsaong paagi,” nga miingon: “Maayo gayod ang pagbuhat niya sa tanang butang. Ginahimo gani niya nga ang mga bungol makadungog ug ang mga amang makasulti.”—Marcos 7:33-37.

Paralisis: Samtang si Jesus didto sa Capernaum, giduol siya sa mga tawo nga nagdalag tawong paralitiko nga naghigda sa usa ka higdaanan. (Mateo 9:2) Ang mga bersikulo 6 ngadto sa 8 nagbatbat sa nahitabo. “[Si Jesus] miingon sa paralitiko: ‘Bangon, alsaha ang imong higdaanan, ug pauli sa inyong balay.’ Ug siya mibangon ug mipauli sa iyang balay. Sa pagkakita niini giabot ug kahadlok ang mga panon sa katawhan, ug ilang gihimaya ang Diyos, nga naghatag sa maong awtoridad ngadto sa mga tawo.” Kining maong milagro gihimo usab diha sa presensiya sa mga tinun-an ni Jesus ug sa iyang mga kaaway. Matikdi nga ang mga tinun-an, kinsa wala mabutai sa pagdumot ug pagkamapihigon, ‘naghimaya sa Diyos’ tungod sa ilang nasaksihan.

Sakit: “Dihay miduol usab [kang Jesus] nga usa ka sanlahon, nga nangaliyupo kaniya nga nagluhod, nga nag-ingon kaniya: ‘Kon buot mo lamang, ikaw makahinlo kanako.’ Tungod niana siya giabot ug kaluoy, ug iyang gituy-od ang iyang kamot  ug gihikap siya, ug miingon kaniya: ‘Buot ko. Mamahinlo ka.’ Ug dihadiha nahanaw ang sanla gikan kaniya.” (Marcos 1:40-42) Matikdi nga si Jesus wala magpanuko sa pag-ayo niining tawhana kondili giayo niya kini uban ang kinasingkasing nga kaluoy. Handurawa nga ikaw usa ka sanlahon. Unsay imong bation kon ikaw giayo dihadiha ug sa paagi nga ikaw walay gibating kasakit gikan sa usa ka gikahadlokang sakit nga anam-anam nga nagdaot sa porma sa imong lawas ug naghimo kanimo nga inayran sa katilingban? Walay duhaduha nga imong masabtan kon nganong ang laing sanlahon nga milagrosong giayo “mihapa sa tiilan ni Jesus, nga nagpasalamat kaniya.”—Lucas 17:12-16.

Pagkasamad: Ang kataposang milagro ni Jesus una pa siya gidakop ug gilansang maoy usa ka buhat sa pagpang-ayo. Tungod sa hinarabharab nga lihok batok niadtong miaksiyon sa pagdakop kang Jesus, si apostol Pedro, “sanglit may espada man siya, mihulbot niini ug gitigbas ang ulipon sa hataas nga saserdote ug naputlan sa iyang tuong dalunggan.” (Juan 18:3-5, 10) Ang samang asoy diha sa Lucas nagtug-an kanato nga “gihikap [ni Jesus] ang dalunggan ug giayo siya.” (Lucas 22:50, 51) Sa makausa pa, kining malulotong buhat gihimo sa atubangan sa mga higala maingon man sa mga kaaway ni Jesus—niining higayona, sa mga tawong midakop kaniya.

Oo, kon atong susihon pag-ayo ang mga milagro ni Jesus, mas makita nato ang mga timailhan sa pagkatinuod niini. (2 Timoteo 3:16) Ug sama sa gihisgotan dili pa dugay, ang maong pagtuon angayng magpalig-on sa atong pagtuo sa saad sa Diyos sa pag-ayo sa masinugtanong mga tawo. Ang Bibliya naghubit sa Kristohanong pagtuo ingong “ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.” (Hebreohanon 11:1) Tin-aw nga wala dasiga sa Diyos ang basta pagtuo o pagpanghinaot na lang, kondili ang lig-ong pagtuo nga pinasukad sa pamatuod. (1 Juan 4:1) Samtang atong ugmaron ang maong pagtuo, atong makita ang atong kaugalingon nga nagakalig-on, mas himsog, ug mas malipayon sa espirituwal.—Mateo 5:3; Roma 10:17.

Ang Espirituwal nga Pagpang-ayo Kinahanglang Maoy Unang Mahitabo!

Daghang tawo nga himsog sa pisikal ang dili malipayon. Ang uban mosulay pa gani sa paghikog tungod kay sila walay paglaom sa umaabot o tungod kay ilang gibati nga sila nahupngan sa mga problema. Sa ingon, sila may depekto sa espirituwal nga panglawas—usa ka mas grabeng kahimtang sa mga mata sa Diyos kay sa pisikal nga depekto sa lawas. (Juan 9:41) Sa laing bahin, daghang may depekto sa pisikal, sama ni Christian ug Junior nga gihisgotan sa unang artikulo, ang may malipayon, makapatagbaw nga kinabuhi. Ngano kaha? Tungod kay sila maoy himsog sa espirituwal ug napabaskog tungod sa lig-ong paglaom nga pinasukad sa Bibliya.

Naghisgot bahin sa atong talagsaong panginahanglan ingong mga tawo, si Jesus nag-ingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Oo, dili sama sa mga hayop, ang mga tawo nagkinahanglan ug labaw pa kay sa materyal nga pagkaon. Kay gilalang sa “larawan” sa Diyos, kita nagkinahanglan ug espirituwal nga pagkaon—ang kahibalo bahin sa Diyos ug kon sa unsang paagi kita mohaom sa iyang katuyoan maingon man ang paghimo sa iyang kabubut-on. (Genesis 1:27; Juan 4:34) Ang kahibalo sa Diyos mohatag sa atong kinabuhi ug kahulogan ug espirituwal nga kusog. Naghatag usab kini ug pasikaranan alang sa walay kataposang kinabuhi diha sa paraisong yuta. “Kini nagkahulogan ug kinabuhing walay kataposan,” matod ni Jesus, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Makaiikag nga ang mga katalirongan ni Jesus wala magtawag kaniya nga “Mananambal” kondili “Magtutudlo.” (Lucas 3:12; 7:40) Ngano man? Tungod kay si Jesus nagtudlo sa mga tawo bahin sa permanenteng solusyon sa mga problema sa mga tawo—ang Gingharian sa Diyos. (Lucas 4:43; Juan 6:26, 27) Kining langitnong gobyerno diha sa mga kamot ni Jesu-Kristo magamando sa tibuok yuta ug magatuman sa tanang saad sa Bibliya maylabot sa bug-os ug malungtarong pagpasig-uli sa matarong nga mga tawo ug sa ilang yutan-ong puy-anan. (Pinadayag 11:15) Mao nga si Jesus, diha sa iyang sulondang pag-ampo, naglangkit sa pag-abot sa Gingharian diha sa pagkatuman sa kabubut-on sa Diyos dinhi sa yuta.—Mateo 6:10.

Alang sa daghang tawo nga may mga depekto  sa lawas, ang pagkat-on bahin niining makapadasig nga paglaom naghimo sa ilang mga luha sa kasubo nga mga luha sa kalipay. (Lucas 6:21) Sa pagkatinuod, ang Diyos mohimog labaw pa kay sa pagwagtang sa sakit ug depekto sa lawas; iyang wad-on ang hinungdan mismo sa pag-antos sa tawo—ang sala. Oo, ang Isaias 33:24 ug Mateo 9:2-7, nga gikutlo ganina, naglangkit sa sakit ngadto sa atong makasasalang kahimtang. (Roma 5:12) Busa, kay nabuntog na ang sala, ang mga tawo sa kataposan magtagamtam unya “sa mahimayaong kagawasan sa mga anak sa Diyos,” usa ka kagawasan nga maglakip sa kahingpitan sa hunahuna ug lawas.—Roma 8:21.

Ibalewala ra niadtong nagtagamtam ug maayong panglawas ang pagkabililhon sa ilang kahimtang. Apan sukwahi niana ang bation niadtong nag-antos sa kagul-anan tungod sa mga depekto sa lawas. Nasayod sila kon unsa ka bililhon ang kahimsog ug kinabuhi ug kon sa unsang paagi nga ang mga kahimtang mausab sa kalit ug sa wala damha. (Ecclesiastes 9:11) Busa, kami naglaom nga ang among mga magbabasa nga may mga depekto sa lawas mohatag ug linaing pagtagad sa kahibulongang mga saad sa Diyos ingon sa gisulat diha sa Bibliya. Gihatag ni Jesus ang iyang kinabuhi aron maseguro ang katumanan niini. Aduna pa bay mas maayong garantiya nga atong mabatonan?—Mateo 8:16, 17; Juan 3:16.

[Footnote]