Mga Dapit sa Pagsimba—Gikinahanglan ba Nato Kini?

‘Linibong peregrino nga buloknon ug besti gikan sa nagkalainlaing bahin sa nasod, mga grupo sa mga Indian nga nagsayaw sa gituohang mga sayaw panahon sa wala pay mga Katsila, nga dinuyogan sa pagbasal sa mga bombo, ug mga debotado nga nagping-it sa kasakit samtang nagluhod paingon sa sagradong dapit agi sa mga panon sa katawhan maoy nakapuno sa sawang ug sa kadalanan duol sa basilika.’

KANA ang pagbatbat sa mantalaang El Economista sa nagpunsisok nga katawhan niadtong Disyembre 2001. Mga tulo ka milyong tawo ang miduaw sa basilika sa Mexico City aron ipasundayag ang ilang pagtuo sa Birhen sa Guadalupe. Ang ubang relihiyosong mga edipisyo, sama sa St. Peter’s Basilica sa Roma, nakadani usab ug panonpanon nga mga dumuduaw.

Gibati sa daghang tawo nga buot mosimba sa Diyos nga ang relihiyosong mga tinukod maoy espesyal ug angay pabilhan. “Alang kanako, ang simbahan maoy usa ka dapit diin ako mahimong suod sa Diyos,” matod ni Maria nga taga-Brazil. “Kana usa ka balaang dapit. Nagtuo ako nga ang pag-adto sa simbahan naghinlo sa kalag ug nga sala ang dili pagtambong sa Misa ug pagkompisal kada Dominggo.” Si Consuelo nga taga-Mexico misugid: “Ang simbahan nakapukaw sa akong mga pagbati; gipabilhan ko pag-ayo kini. Samtang didto ako, gibati ko nga didto ako sa langit.”

Bisan pag ang mga simbahan gipabilhan pag-ayo sa pipila ka tawo, ang uban nagduhaduha kon gikinahanglan ba kini isip mga dapit sa pagsimba. Sa paghisgot bahin sa diyutay nga mga manimba, si Peter Sibert, paring Katoliko sa Inglaterra, nag-ingon: “Pilion [sa mga tawo] ang mga bahin sa relihiyon nga ilang gusto. Ang daghang tigulang maoy Katoliko ug sila nagtuman sa ilang relihiyon—apan ang mga batan-on dili mahunahunaon sa obligasyon.” Ang Daily Telegraph sa London sa Nobyembre 20, 1998, mipahayag: “Sukad sa 1979 mga 1,500 ka simbahan ang gisirhan sa Inglaterra kon  itandi sa 495 ka simbahan nga gibuksan ug 150 nga giayo.”

Niadtong 1997 ang mantalaang Süddeutsche Zeitung sa Munich, Alemanya, mitaho: “Ang mga simbahan gihimong mga sinehan ug mga apartment: Ang mga magtutuo wala na magsimba, ang mga dapit sa pagsimba ginagamit alang sa laing mga katuyoan. . . . Ang naandang buhat sa Netherlands o Inglaterra ginahimo na usab sa Alemanya.” Midugang kini: “Makaplagan sa usa ka tawo ang mga 30 o 40 ka talagsaong pagbaligyag mga simbahan sa Alemanya sa miaging pipila ka tuig.”

Tinuod bang gikinahanglan ang mga simbahan alang sa pagsimba sa Diyos? May mga sumbanan ba ang mga basilika ug maartehong mga simbahan diha sa Kasulatan? Unsang matang sa mga tinukod ang nalangkit sa pagsimba sa matuod ug buhi nga Diyos? Unsay makat-onan nato gikan sa maong mga tinukod bahin sa panginahanglan sa mga dapit sa pagsimba ug kon unsay angayng buhaton sulod niana?