Ang Paghatag nga Modulot ug Kalipay

SI Genival, kinsa nagpuyo sa eskuwater sa amihanan-sidlakang Brazil, nagbuhi sa iyang asawa ug mga anak pinaagi sa iyang gamayng kinitaan ingong security guard sa usa ka ospital. Bisan pa sa iyang kakabos, si Genival way-palta nga naghatag ug ikapulo. “Usahay magutman ang akong pamilya,” siya nahinumdom samtang naghapohap sa iyang tiyan, “apan gusto nakong ihatag ang akong kinamaayohan sa Diyos, bisan pag nagkinahanglan kinig sakripisyo.”

Human mawad-i sa iyang trabaho, si Genival nagpadayon sa paghatag sa iyang ikapulo. Ang iyang ministro nag-awhag kaniya nga sulayan ang Diyos pinaagi sa paghatag ug dakong donasyon. Ang klerigo nagpasalig nga seguradong panalanginan siya sa Diyos. Busa nakahukom si Genival sa pagbaligya sa iyang balay ug ihatag ang halin ngadto sa simbahan.

Dili lamang si Genival ang sama niana ka sinserong mohatag. Daghang kabos kaayong mga tawo ang matinumanong mohatag sa ikapulo tungod kay gitudloan sila sa ilang relihiyon nga gibaod sa Bibliya ang paghatag ug ikapulo. Tinuod ba kana?

Ang Paghatag ug Ikapulo ug ang Balaod

Ang sugo sa paghatag ug ikapulo maoy bahin sa Balaod nga gihatag ni Jehova nga Diyos sa 12 ka tribo sa karaang Israel kapin sa 3,500 ka tuig kanhi. Ang Balaod nagmando nga ang ikapulo sa abot sa yuta ug mga bunga sa kahoy ug ang ikapulo sa nadugang sa panon sa mga hayop ihatag ngadto sa tribo ni Levi agig pagsuportar sa ilang mga serbisyo sa tabernakulo.—Levitico 27:30, 32; Numeros 18:21, 24.

Si Jehova nagpasalig sa mga Israelinhon nga ang Balaod ‘dili hilabihan ka lisod alang kanila.’ (Deuteronomio 30:11) Basta sila matinumanong magtuman sa mga sugo ni Jehova, lakip na sa paghatag ug ikapulo, ilang matagamtam ang dagayang mga ani sumala sa iyang gisaad. Ug agig panagana, dihay dugang tinuig nga ikapulo nga kanunayng ilain, nga kasagarang gamiton sa nasod kon magtigom alang sa relihiyosong mga kapistahan niini. Sa ingon ‘ang langyaw nga pumoluyo, ang batang ilo-sa-amahan, ug ang babayeng balo’ matagbaw.—Deuteronomio 14:28, 29; 28:1, 2, 11-14.

Ang Balaod wala maghisgot ug espesipikong silot alang niadtong dili makahatag ug ikapulo, apan ang matag Israelinhon nailalom sa dakong moral nga obligasyon sa pagsuportar sa matuod nga pagsimba niining paagiha. Gani, ang mga Israelinhon nga wala mohatag ug ikapulo sa panahon ni Malaquias giakusar ni Jehova nga ‘nangawat kaniya ug mga ikapulo ug mga amot.’ (Malaquias 3:8) Ikasumbong ba usab kini batok sa mga Kristohanon nga dili mohatag ug ikapulo?

Buweno, hunahunaa kini. Ang mga balaod sa usa ka nasod kasagarang dili na balido sa gawas sa mga utlanan niini. Pananglitan, ang balaod nga nag-obligar sa mga motorista sa Britanya sa pagdrayb sa walang bahin sa dalan dili mapadapat sa mga drayber sa Pransiya. Sa susama, ang balaod nga nag-obligar sa paghatag ug ikapulo maoy bahin sa eksklusibong pakigtugon tali sa Diyos ug sa nasod sa Israel. (Exodo 19:3-8; Salmo 147:19, 20) Ang mga Israelinhon lamang maoy obligado sa pagtuman nianang balaora.

Dugang pa, bisag tinuod nga ang Diyos dili gayod mausab, ang iyang mga kinahanglanon mausab usahay. (Malaquias 3:6) Klarong gisulti sa Bibliya nga ang haladnong kamatayon ni Jesus, sa 33 K.P., ‘nagpapas,’ o ‘naghanaw,’ sa Balaod ug lakip niana ang “sugo sa pagkolekta ug ikapulo.”—Colosas 2:13, 14; Efeso 2:13-15; Hebreohanon 7:5, 18.

Kristohanong Paghatag

Apan, ang mga kontribusyon sa pagsuportar sa matuod nga pagsimba gikinahanglan gihapon. Si Jesus nagsugo sa iyang mga tinun-an nga ‘mahimong mga saksi hangtod sa kinalay-ang dapit sa yuta.’ (Buhat 1:8) Samtang nagkadaghan ang mga magtutuo, midaghan usab ang panginahanglan  alang sa Kristohanong mga magtutudlo ug mga magtatan-aw sa pagduaw ug pagpalig-on sa mga kongregasyon. Usahay ang mga balo, ilo, ug ubang nanginahanglan kinahanglang atimanon. Sa unsang paagi gisuportahan sa unang-siglo nga mga Kristohanon ang galastohon nga nalangkit niini?

Niadtong mga 55 K.P., dihay hangyo nga gipaabot ngadto sa Hentil nga mga Kristohanon sa Uropa ug Asia Minor alang sa kabos nga kongregasyon sa Judea. Sa iyang mga sulat sa kongregasyon sa Corinto, gihubit ni apostol Pablo kon sa unsang paagi giorganisar kining “pagpangolekta alang sa mga balaan.” (1 Corinto 16:1) Basin matingala ka sa kon unsay gipadayag sa mga pulong ni Pablo bahin sa Kristohanong paghatag.

Si apostol Pablo wala mag-ulog-ulog sa mga isigkamagtutuo aron mohatag. Gani, ang mga Kristohanon sa Macedonia kinsa ‘nag-antos sa kasakitan’ ug “hilabihang kakabos” kinahanglang ‘magpadayon sa paghangyo kaniya uban ang tumang pagpangaliyupo alang sa pribilehiyo sa malulotong pagpanghatag ug sa pag-ambit sa ministeryo nga gitagana alang sa mga balaan.’—2 Corinto 8:1-4.

Tinuod, gidasig ni Pablo ang mas adunahang mga taga-Corinto sa pagsundog sa ilang mahinatagong mga igsoon sa Macedonia. Bisan pa niana, ang usa ka reperensiya nag-ingon nga siya ‘midumili sa paghimog mga lagda, kay mas gusto niyang mohangyo, mosugyot, modasig, o magpakiluoy. Dili unta kinabubut-on ug mainiton ang paghatag sa mga taga-Corinto kon sila gipugos pa.’ Si Pablo nasayod nga “gihigugma sa Diyos ang malipayong maghahatag,” dili ang usa nga mohatag nga “kontragusto o pinugos.”—2 Corinto 9:7.

Ang dagayang pagtuo ug kahibalo inubanan sa tinuod nga gugma alang sa mga isigka-Kristohanon mao ang nakapalihok sa mga taga-Corinto sa paghatag nga kinabubut-on. —2 Corinto 8:7, 8.

‘Sumala sa Iyang Gihukom Diha sa Iyang Kaugalingong Kasingkasing’

Imbes isulti ang espesipikong kantidad o porsiyento, si Pablo igo lang misugyot nga “sa unang adlaw sa matag semana, ang usag-usa . . . kinahanglan maggahin ug kuwarta sumala sa inyong kinitaan.” (Italiko amoa; 1 Corinto 16:2, Maayong Balita Bibliya) Pinaagi sa pagplano ug paggahin ug kantidad sa regular nga paagi, dili bation sa mga taga-Corinto nga napugos sila sa paghatag o natukmod lang sa emosyon sa dihang miabot si Pablo. Alang sa matag Kristohanon, ang desisyon kon pilay ihatag maoy usa ka personal nga butang, usa ka butang nga “iyang gihukom diha sa iyang kasingkasing.”—2 Corinto 9:5, 7.

Aron moani ug dagaya, ang mga taga-Corinto kinahanglang mopugas ug dagaya. Wala gayod isugyot ang paghatag ug labaw kay sa maarangan. ‘Dili ko tuyo nga malisdan kamo,’ si Pablo nagpasalig kanila. Ang mga amot “ilabinang dalawaton sumala sa nabatonan sa usa, dili sumala sa wala kaniya.” (2 Corinto 8:12, 13; 9:6) Sa usa ka sulat sa ulahi, ang apostol nagpasidaan: “Kon adunay si bisan kinsa nga wala magtagana alang . . . sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Timoteo 5:8) Si Pablo wala magdasig sa paghatag nga magsupak niining prinsipyoha.

Makahuloganon nga gidumalahan ni Pablo ang ‘pagpangolekta alang sa mga balaan’ nga  nanginahanglan. Wala kitay mabasa sa Kasulatan bahin kang Pablo o sa ubang mga apostoles nga nag-organisar ug mga koleksiyon o nagdawat ug ikapulo aron masuportahan ang ilang kaugalingong mga ministeryo. (Buhat 3:6) Kanunayng mapasalamaton sa pagdawat sa mga gasa nga ipadala kaniya sa mga kongregasyon, gilikayan gayod ni Pablo nga makahatag ug “gastosong pabug-at” sa iyang mga igsoon.—1 Tesalonica 2:9; Filipos 4:15-18.

Boluntaryong Paghatag Karon

Tin-aw nga niadtong unang siglo, ang mga sumusunod ni Kristo nagbuhat ug boluntaryong paghatag, dili paghatag ug ikapulo. Apan, tingali ikaw maghunahuna kon kini ba epektibo gihapong paagi sa pagsuportar sa pinansiyal sa pagsangyaw sa maayong balita ug sa pag-atiman sa mga Kristohanong nanginahanglan.

Tagda ang mosunod. Sa 1879 ang mga editor niining magasina dayag nga nag-ingong sila “dili gayod magpakilimos ni mangayo sa mga tawo alang sa suporta.” Kana ba nga desisyon nakababag sa mga paningkamot sa mga Saksi ni Jehova sa pagpakaylap sa kamatuoran sa Bibliya?

Sa pagkakaron, ang mga Saksi nag-apod-apod ug mga Bibliya, Kristohanong mga libro, ug ubang mga publikasyon sa 235 ka nasod. Ang Bantayanang Torre, usa ka edukasyonal nga magasin sa Bibliya, matag bulan may sirkulasyon nga 6,000 ka kopya sa sinugdanan ug giimprenta diha sa usa ka pinulongan. Sukad niadto kining magasina kaduha na mogula sa usa ka bulan ug giimprenta sa kapin sa 24,000,000 ka kopya nga mabasa sa 146 ka pinulongan. Aron maorganisar ang ilang tibuok-kalibotan nga buluhaton sa edukasyon sa Bibliya, ang mga Saksi nagtukod o nagbaton ug mga sangang buhatan sa 110 ka nasod. Dugang pa, sila nagtukod ug libolibo ka lokal nga mga tigomanan maingon man dagkong mga assembly hall aron matigoman niadtong interesado sa pagdawat ug dugang instruksiyon sa Bibliya.

Bisan tuod ang pag-atiman sa espirituwal nga mga panginahanglan sa mga tawo maoy prioridad, ang mga Saksi ni Jehova wala magpabaya sa materyal nga mga panginahanglan sa ilang mga isigkamagtutuo. Kon ang ilang mga igsoon mag-antos sa mga epekto sa mga gubat, linog, hulaw, ug mga bagyo, sila magtagana dayon ug medikal  nga mga suplay, pagkaon, besti, ug ubang mga kinahanglanon. Kini gisuportahan sa mga donasyon sa indibiduwal nga mga Kristohanon ug sa mga kongregasyon.

Gawas nga epektibo ang boluntaryong pag-amot, dili na mabug-atan ang mga kabos sama ni Genival nga gihisgotan sa sinugdanan. Maayo na lang, sa wala pa niya ikabaligya ang iyang balay, si Genival giduaw ni Maria, usa ka bug-os-panahong ministro sa mga Saksi ni Jehova. “Tungod sa maong panaghisgot nasalbar ang akong pamilya gikan sa daghang wala-kinahanglanang kalisdanan,” nahinumdom si Genival.

Nakat-onan ni Genival nga ang buluhaton sa Ginoo wala magdepende sa mga ikapulo. Sa pagkatinuod, ang paghatag ug ikapulo dili na usa ka Kasulatanhong kinahanglanon. Iyang nakat-onan nga ang mga Kristohanon panalanginan kon sila mohatag nga madagayaon apan sila dili obligado sa paghatag ug labaw kay sa ilang maarangan.

Ang pagbatasan sa boluntaryong paghatag nakadulot ug tinuod nga kalipay kang Genival. Kini iyang gipahayag niining paagiha: “Ako mahimong mohatag o dili mohatag ug 10 porsiyento, apan ako malipay sa akong iamot, ug ako segurado nga malipay usab si Jehova.”

[Kahon/Mga hulagway sa panid 6]

Gitudlo ba sa Unang mga Amahan sa Simbahan ang Paghatag ug Ikapulo?

“Ang mga adunahan sa atong taliwala maoy magtabang sa mga kabos . . . Silang sapian, ug andam, maghatag kon unsay gituohan sa matag usa nga angay .”—The First Apology, Justin Martyr, mga 150 K.⁠P.

“Tinuod nga ang mga Hudiyo nagpahinungod sa ikapulo sa ilang mga kabtangan ngadto Kaniya, apan ang mga Kristohanon naggahin sa tanan nilang kabtangan alang sa mga katuyoan sa Ginoo, . . . sama sa gihimo niadtong kabos nga babayeng balo nga naghulog sa tanan niyang nabatonan ngadto sa panudlanag-bahandi sa Diyos.”—Against Heresies, Irenaeus, mga 180 K.⁠P.

“Bisan ug may panudlanan kita sa bahandi, ang salapi diha niini dili makapalit ug kaluwasan, nga sama sa usa ka relihiyon nga may presyo. Kausa sa usa ka bulan, kon gusto niya, ang matag usa mohatag ug gamayng amot; kon kini iyang ikalipay, ug kon siya makaarang: kay dili kini pinugsanay; ang tanan kinabubut-on.”—Apology, Tertullian, mga 197 K.⁠P.

“Samtang nagkadako ang Iglesya ug mitungha ang lainlaing mga institusyon, kinahanglang mohimog mga balaod nga magseguro sa husto ug permanenteng pinansiyal nga tabang alang sa klero. Ang paghatag ug ikapulo gisagop gikan sa Karaang Balaod . . . Ang kinaunahang rekord nga ang paghatag ug ikapulo tinong gihimo nga balaod mopatim-aw nga makita diha sa sulat sa mga obispo nga nagtigom sa Tours niadtong 567 ug diha sa [mga doktrina] sa Konseho sa Macon niadtong 585.”—The Catholic Encyclopedia.

[Credit Line]

Coin, top left: Pictorial Archive (Near Eastern History) Est.

[Hulagway sa panid 4, 5]

Ang boluntaryong paghatag modulot ug kalipay

[Mga hulagway sa panid 7]

Ang gasto alang sa buluhatong pagsangyaw, hinabang sa emerhensiya, ug pagtukod ug mga tigomanan gisuportahan sa boluntaryong mga amot