Palig-ona ang Imong mga Kamot

SA Bibliya, ang kamot gihisgotan kapin sa 1,800 ka higayon. Ang mga idiom nga naglangkit sa kamot gigamit sa nagkalainlaing mga paagi. Pananglitan, ang hinlong kamot nagpasabot ug pagkawalay-sala. (2 Samuel 22:21; Salmo 24:3, 4) Ang pagbukhad sa kamot nagkahulogan ug pagpakitag pagkamanggihatagon sa uban. (Deuteronomio 15:11; Salmo 145:16) Ang usa ka tawo nga nagpameligro sa iyang kinabuhi gikaingon nga nagbutang sa iyang kalag diha sa iyang kamot. (1 Samuel 19:5) Ang pagluyloy sa kamot sa usa ka tawo nagkahulogan ug pagkawala sa kadasig. (2 Cronicas 15:7) Ug ang pagpalig-on sa kamot sa usa ka tawo nagpasabot nga ang usa nahimong kusgan ug gitugahan ug gahom aron molihok.—1 Samuel 23:16.

Karon adunay dinaliang panginahanglan sa pagpalig-on sa atong mga kamot. Kita nagkinabuhi sa “makuyaw nga mga panahong lisod sagubangon.” (2 Timoteo 3:1) Kon mawad-an kitag kadasig, ang tawhanong kiling mao ang pag-undang, nga magtugot sa atong mga kamot nga moluyloy. Sagad natong makita ang mga tin-edyer nga moundang sa pagtungha, mga bana nga mobiya sa ilang pamilya, ug mga inahan nga moabandonar sa ilang mga anak. Ingong mga Kristohanon, kinahanglan natong palig-onon ang atong mga kamot aron masagubang ang mga pagsulay nga atong atubangon diha sa atong pag-alagad sa Diyos. (Mateo 24:13) Sa pagbuhat niana, atong malipay ang kasingkasing ni Jehova.—Proverbio 27:11.

Kon sa Unsang Paagi Mapalig-on ang mga Kamot

Ang mga Hudiyo sa adlaw ni Esdras kinahanglang magpalig-on sa ilang mga kamot aron mahuman ang pagtukod pag-usab sa templo ni Jehova sa Jerusalem. Giunsa nila pagpalig-on ang ilang mga kamot? Ang asoy nagkanayon: “Ilang gisaulog ang pista sa mga tinapay nga walay igpapatubo sa pito ka adlaw uban ang pagmaya; kay si Jehova nagpamaya kanila, ug iyang giliso ang kasingkasing sa hari sa Asirya ngadto kanila aron sa pagpalig-on sa ilang mga kamot diha sa buluhaton sa balay sa matuod nga Diyos, ang Diyos sa Israel.” (Esdras 6:22) Dayag nga pinaagi sa iyang aktibong gahom nga giaghat ni Jehova ang “hari sa Asirya” aron tugotang makabalik ang katawhan sa Diyos, ug gidasig Niya ang katawhan, aron ilang mahuman ang buluhaton nga ilang nasugdan.

Sa ulahi, sa dihang kinahanglang ayohon ang mga paril sa Jerusalem, gipalig-on ni Nehemias ang mga kamot sa iyang mga igsoon alang sa maong buluhaton. Atong mabasa: “Gisuginlan ko sila bahin sa kamot sa akong Diyos, nga kini maayo kanako, ug usab bahin sa pulong sa hari nga iyang giingon kanako. Niini sila miingon: ‘Manindog kita ug magtukod.’ Busa ilang gipalig-on ang ilang mga kamot alang sa maayong buhat.” Kay napalig-on na ang mga kamot, si Nehemias ug ang iyang kaubang mga Hudiyo nakaarang sa pagtukod sa mga paril sa Jerusalem sulod lang sa 52 ka adlaw!—Nehemias 2:18; 6:9, 15.

Sa samang paagi, si Jehova nagpalig-on sa atong mga kamot aron sa pagwali sa maayong balita sa Gingharian. (Mateo 24:14) Gihimo niya kana pinaagi sa ‘pagsangkap kanato sa matag maayong buhat aron sa pagbuhat sa iyang kabubut-on.’ (Hebreohanon 13:21) Gihatagan niya kita ug dekalidad nga mga galamiton. Aduna kitay Bibliya ug pinasukad-sa-Bibliya nga mga libro, magasin, brosyur, tract, ug mga rekording sa audio ug video nga atong magamit  sa pag-abot sa mga tawo sa tibuok kalibotan. Gani, ang atong mga publikasyon mabatonan diha sa kapin sa 380 ka pinulongan. Dugang pa, pinaagi sa mga tigom sa kongregasyon, mga asembliya, ug mga kombensiyon, si Jehova nagtagana ug teokratikanhong edukasyon ug pagbansay kon sa unsang paagi gamiton kining maayong mga kasangkapan sa pagpalampos sa atong ministeryo.

Bisan tuod ug gipalig-on ni Jehova ang atong mga kamot sa daghang paagi, gidahom usab niya nga maningkamot kita. Hinumdomi kon unsay gisulti ni manalagnang Eliseo kang Haring Jehoas, kinsa nangayog tabang kang Eliseo aron sa pagpakig-away sa nanulong nga mga Siryanhon. Giingnan ni Eliseo ang hari nga mokuhag mga pana ug ibunal kini sa yuta. Ang asoy sa Bibliya nag-ingon: “Siya mibunal sa tulo ka higayon ug mihunong. Ug ang tawo sa matuod nga Diyos nasuko kaniya; busa siya miingon: ‘Kadto unta ibunal sa lima o unom ka higayon! Sa maong kahimtang ikaw maghampak gayod sa Sirya hangtod matibawas, apan karon sa tulo lamang ka higayon nga ikaw maghampak sa Sirya.’” (2 Hari 13:18, 19) Tungod kay napakyas sa pagpasundayag ug kasibot, naangkon lamang ni Jehoas ang limitadong kalamposan sa pagpakig-away batok sa mga Siryanhon.

Ang mao gihapong prinsipyo mapadapat kanato kon buot natong tumanon ang gipabuhat ni Jehova kanato. Imbes mabalaka bahin sa mga babag nga atong atubangon o bahin sa kalisod sa atong asaynment, angay natong buhaton kini nga masiboton ug kinasingkasing. Kinahanglan natong palig-onon ang atong mga kamot ug mosalig kang Jehova alang sa tabang.—Isaias 35:3, 4.

Si Jehova Magapalig-on sa Atong mga Kamot

Si Jehova dili mapakyas sa pagtabang ug sa pagpalig-on sa atong mga kamot sa pagbuhat sa iyang kabubut-on. Siyempre, ang Diyos dili mohimog milagro ug mohimo sa tanan alang kanato. Siya nagdahom kanato nga mobuhat sa atong bahin—magbasa sa Bibliya adlaw-adlaw, regular nga mangandam ug motambong sa mga tigom, kanunayng makig-ambit sa ministeryo kutob sa maarangan, ug magpadayon sa pag-ampo kaniya. Kon matinumanon ug makugihon natong buhaton ang atong bahin samtang aduna kitay kahigayonan, si Jehova mohatag kanatog kusog sa pagbuhat kon unsay iyang gidahom kanato.—Filipos 4:13.

Tagda ang kahimtang sa usa ka Kristohanon nga namatyan sa iyang asawa ug inahan sulod sa usa ka tuig. Di pa dugay niyang nasinati ang kasakit sa dihang ang iyang umagad nga babaye mibiya sa iyang bana ug sa Kristohanong paagi sa pagkinabuhi. “Akong nakat-onan nga dili kita makapili sa atong mga pagsulay, ni sa panahon kon kanus-a kini moabot ug kon unsa kini ka subsob,” matod niining igsoona. Sa unsang paagi iyang nakaplagan ang kalig-on aron makalahutay? “Ang pag-ampo ug personal nga pagtuon maoy nakatabang kanako aron makalahutay. Ug ang pagpaluyo sa akong espirituwal nga mga igsoong lalaki ug babaye nakahatag kanakog dakong kahupayan. Labaw sa tanan, naamgohan ko ang kahinungdanon sa pag-ugmad ug maayong personal nga relasyon uban kang Jehova sa dili pa motungha ang malisod nga mga kahimtang.”

Bisan unsa pay imong eksperyensiya sa kinabuhi, magmadeterminado sa pagsalig kang Jehova sa bug-os ug pahimusli ang tanan niyang mga tagana alang sa pagpalig-on sa imong mga kamot. Unya makaarang ka sa pagtanyag ug dekalidad nga pag-alagad kang Jehova ug sa ingon madayeg ug mapasidunggan ang iyang bililhong ngalan.—Hebreohanon 13:15.

[Hulagway sa panid 31]

Tungod kay napakyas sa pagpasundayag ug kasibot, naangkon lamang ni Jehoas ang limitadong kalamposan sa pagpakig-away batok sa mga Siryanhon