Ipadayag ang Imong Pagmahal Diha sa Pamilya

“HALA sunoga kana! Sunoga!” Gihagit ni Tohru ang iyang asawang si Yoko. a “Ako gyod ning sunogon,” mitubag siya ug mikadlit ug posporo aron sunogon ang letrato nilang duha. Dayon misinghag si Yoko, “Hasta kining balay akong sunogon!” Gisagpa ni Tohru ang iyang asawa, ug ang ilang panaglalis misangpot sa kapintasan.

Tulo ka tuig una pa niana, malipayon ang pagsugod sa kinabuhi ni Tohru ug Yoko ingong magtiayon. Nan, nganong nausab man ang kahimtang? Bisan tuod daw maayohong tawo si Tohru, gibati sa iyang asawa nga wala siya pakitaig pagmahal ni Tohru ug nga wala kaayo siya magpakabana kon unsay pagbati ni Yoko. Morag dili siya mahibalong mosanong sa dihang pakitaan siyag pagmahal ni Yoko. Kay dili na niya kini maantos, si Yoko kanunay nang mayugot ug masuko. Nanungha ang iyang mga problema sama sa pagkadili-makatulog, kabalaka, pagkawalay ganang mokaon, pagkasapoton, ug depresyon ug atakehon pa gani siya sa kalisang. Bisan pa niana, si Tohru morag wala manumbaling sa lisod kaayong kahimtang nga naglungtad diha sa iyang panimalay. Alang kaniya morag natural ra kini.

“Makuyaw nga mga Panahong Lisod Sagubangon”

Ang maong mga problema kasagaran na karon. Si apostol Pablo nagtagna nga ang ilhanan sa atong panahon mao ang mga tawong “walay kinaiyanhong pagbati.” (2 Timoteo 3:1-5) Ang orihinal nga Gregong pulong dinhi nga gihubad ug “walay kinaiyanhong pagbati” suod nga nalangkit sa pulong nga naghubit sa kinaiyanhong pagmahal nga makaplagan tali sa mga membro sa pamilya. Sa atong panahon makita gayod ang kakulang sa maong pagmahal. Bisan pag dunay pagmahal, ang mga membro sa pamilya tingali talagsa rang magpadayag niini sa usag usa.

Daghang ginikanan karon ang dili mahibalong mopadayag ug gugma ug pagmahal ngadto sa ila mismong mga anak. Ang uban nanagko diha sa usa ka pamilyang walay pagmahal ug wala nila maamgohi nga mas malipayon ug mas nindot unta ang kinabuhi kon mabati ug mapadayag ang pagmahal. Mopatim-aw nga mao kana ang kahimtang ni Tohru. Sa bata pa siya, ang iyang amahan kanunayng puliki sa trabaho ug gabii na kaayong mopauli. Panagsa ra siyang makigsulti kang Tohru, ug sakit siyang manulti kon siya makigsulti man ugaling. Ang inahan ni Tohru nagtrabaho usab sa tibuok panahon ug wala kaayoy panahon sa pagpakig-uban kaniya. Ang telebisyon maoy iyang yaya. Walay komendasyon ni komunikasyon diha sa pamilya.

Ang kultura usab mahimong usa ka hinungdan. Sa pipila ka bahin sa Latin Amerika, kinahanglang supakon sa usa ka lalaki ang naandang kostumbre aron makapadayag sa iyang pagbati ngadto sa iyang asawa. Sa daghang nasod sa Asia ug Aprika, supak sa tradisyon nga isulti o ipakita ang pagmahal. Bakikaw tingali alang sa mga bana ang pagsultig “Gihigugma ko ikaw” ngadto sa ilang mga asawa o mga anak. Bisan pa niana, makakuha kita ug pagtulon-an gikan sa kinalabwan nga sumbanang  relasyon sa pamilya nga nakalahutay sa taas na nga panahon.

Sulondang Relasyon sa Pamilya

Ang kinamaayohang sumbanan alang sa pamilya mao ang suod nga relasyon ni Jehova nga Diyos ug sa iyang bugtong Anak. Sila nagpadayag ug gugma sa usag usa sa hingpit nga paagi. Latas sa dili-maihap nga libolibo ka tuig, ang espirituhanong linalang nga sa ulahi nahimong si Jesu-Kristo nagtagamtam ug malipayong relasyon uban sa iyang Amahan. Iyang gihubit ang maong bugkos niining paagiha: “Ako iyang gikahinangpan pag-ayo sa matag adlaw, ako nagakalipay sa iyang atubangan sa tanang panahon.” (Proverbio 8:30) Naseguro kaayo sa Anak ang gugma sa iyang Amahan mao nga siya makasulti sa uban nga siya gikahinangpan pag-ayo ni Jehova sa matag adlaw. Siya malipayon sa presensiya sa iyang Amahan sa tanang panahon.

Bisan niadtong dinhi pa sa yuta ingong tawo, ang Anak sa Diyos gipasaligan sa halalom nga gugma sa iyang Amahan. Human mabawtismohi si Jesus, nadungog niya ang tingog sa iyang Amahan: “Kini mao ang akong Anak, ang hinigugma, nga akong giuyonan.” (Mateo 3:17) Pagkamakapadasig nga pagpadayag ug gugma sa pagsugod sa misyon ni Jesus sa yuta! Tino nga natandog ang iyang kasingkasing nga nadungog ang pag-uyon sa iyang Amahan samtang mibalik kaniya ang tanang handomanan sa iyang kinabuhi sa langit.

Busa, gipakita ni Jehova ang kinamaayohang panig-ingnan sa pagpadayag ug gugma alang sa iyang unibersohanong pamilya sa bug-os gayod nga sukod. Kon atong dawaton si Jesu-Kristo, atong matagamtam usab ang pagmahal ni Jehova. (Juan 16:27) Bisan pag kita walay madungog nga tingog gikan sa langit, atong makita ang gugma ni Jehova nga gipadayag diha sa kinaiyahan, sa pagtagana sa halad lukat ni Jesus, ug sa uban pang mga paagi. (1 Juan 4:9, 10) Maminaw pa gani si Jehova sa atong mga pag-ampo ug motubag niini sa paagi nga labing mapuslanon kanato. (Salmo 145:18; Isaias 48:17) Samtang atong giugmad ang suod nga relasyon uban kang Jehova, molalom ang atong apresasyon sa iyang mahigugmaong pag-atiman.

Nakat-onan ni Jesus gikan sa iyang Amahan kon sa unsang paagi ipakita ang empatiya, konsiderasyon, kalulot, ug halalom nga kabalaka alang sa uban. Siya nagpatin-aw: “Bisan unsa nga butang nga ginabuhat [sa Amahan], kining mga butanga ginabuhat usab sa Anak sa samang paagi. Kay ang Amahan nagmahal sa Anak ug nagpakita kaniya sa tanang butang nga iyang ginabuhat.” (Juan 5:19, 20) Sa baylo, kita makakat-on kon sa unsang paagi ipadayag ang pagmahal pinaagi sa pagtuon sa panig-ingnan nga gipakita ni Jesus sa dinhi pa siya sa yuta.—Filipos 1:8.

Pagpakitag Pagmahal Diha sa Pamilya—Sa Unsang Paagi?

Sanglit “ang Diyos gugma” ug kita gilalang “sa iyang larawan,” kita dunay katakos sa pagbati ug pagpadayag ug gugma. (1 Juan 4:8; Genesis 1:26, 27) Apan, ang maong katakos dili awtomatiko. Aron ikapadayag ang pagmahal, kita kinahanglang mobati una ug pagmahal ngadto sa atong kapikas ug mga anak. Magmapaniiron, ug matikdi ang ilang nindot nga mga hiyas, bisan ug sa sinugdanan kini tingali morag dili importante, ug pamalandonga ang maong mga hiyas. ‘Walay maayo bahin sa akong bana [asawa o mga anak],’ tingali moingon ka. Kadtong nangaminyo tungod kay gibuya tingali gamay rag pagmahal sa ilang mga kapikas. Ang uban tingali dili gustong manganak. Apan, tagda kon unsay pagbati ni Jehova sa iyang mahulagwayong asawa, ang nasod sa Israel, niadtong ikanapulo nga siglo W.K.P. Bisan tuod ang manalagnang si Elias nakahinapos nga wala nay ubang magsisimba si Jehova taliwala sa napulo-ka-tribong nasod sa Israel, kini gisusi pag-ayo ni Jehova ug siya nakakaplag ug ubay-ubayng tawo—7,000 tanan—kinsa alang kaniya may maayong mga hiyas . Imo bang masundog si Jehova pinaagi sa pagpangita sa maayong  mga hiyas sa mga membro sa imong pamilya?—1 Hari 19:14-18.

Apan, aron mabati sa ubang mga membro sa pamilya ang imong pagmahal, kinahanglang imong tuyoon nga ipabati kini. Sa matag higayon nga ikaw dunay mamatikdang butang nga dalayegon, isulti ang imong apresasyon. Sa paghubit sa may-katakos nga asawa, ang Pulong sa Diyos naghisgot sa usa ka makaiikag nga kinaiya sa iyang pamilya: “Ang iyang mga anak mobangon ug magpahayag kaniya nga malipayon; ang iyang tag-iya mobangon, ug siya magdayeg kaniya.” (Proverbio 31:28) Matikdi kon sa unsang paagi ang mga membro sa maong pamilya wala magpanuko sa pagpadayag sa ilang apresasyon sa usag usa. Pinaagi sa pagdayeg sa iyang asawa, ang usa ka amahan nagpakita ug maayong panig-ingnan alang sa iyang anak nga lalaki, nga magdasig kaniya nga kanunayng mohatag ug komendasyon sa iyang kapikas sa dihang siya magminyo na.

Dugang pa, ang mga ginikanan kinahanglang mohatag ug komendasyon sa ilang mga anak. Makatabang kana nga matisok ang pagtahod sa kaugalingon diha sa kasingkasing sa mga anak. Kay unsaon man sa usa ka tawo ‘paghigugma sa iyang silingan sama sa iyang kaugalingon’ kon siya walay pagtahod sa iyang kaugalingon? (Mateo 22:39) Sa laing bahin, kon kanunayng sawayon sa mga ginikanan ang ilang mga anak, nga dili gayod maghatag kanila ug komendasyon, ang mga bata daling mawad-an sa ilang pagtahod sa kaugalingon ug basin malisdan sila sa pagmahal sa uban.—Efeso 4:31, 32.

Ikaw Makakaplag ug Tabang

Komosta kon ikaw wala mamatuto diha sa usa ka mahigugmaong panimalay? Ikaw makakat-on gihapon sa pagpadayag ug pagmahal. Ang unang lakang mao ang pag-ila sa problema ug sa panginahanglang mouswag. Ang Pulong sa Diyos, ang Bibliya, dakog ikatabang niining bahina. Kini ikatandi sa usa ka salamin. Sa dihang atong susihon ang atong kaugalingon diha sa samag-salamin nga mga pagtulon-an sa Bibliya, ang mga depekto, o mga sayop, diha sa atong hunahuna madayag kanato. (Santiago 1:23) Uyon sa mga pagtulon-an sa Bibliya, atong matul-id ang bisan unsang sayop nga mga kiling. (Efeso 4:20-24; Filipos 4:8, 9) Kinahanglang himoon nato kini kanunay, nga dili gayod “mohunong sa pagbuhat ug maayo.”—Galacia 6:9.

Ang uban tingali malisdan sa pagpakitag pagmahal tungod sa paagi sa pagmatuto kanila o tungod sa kultura. Apan, gipakita sa bag-ong mga pagtuon nga ang maong mga kababagan mahimong mabuntog. Si Dr. Daniel Goleman, usa ka espesyalista sa mental nga kahimsog, nagpatin-aw nga ‘bisan ang natisok pag-ayong mga batasan sa kasingkasing nga nakat-onan sa pagkabata puwedeng mausab.’ Kapin sa 19 ka siglo kanhi, gipakita sa Bibliya nga sa tabang sa espiritu sa Diyos, bisan ang nakagamot pag-ayong mga kiling sa kasingkasing puwedeng mausab. Kini nagtambag kanato: “Hukasa ang daang pagkatawo uban ang mga buhat niini, ug isul-ob ang bag-ong pagkatawo.”—Colosas 3:9, 10.

Sa dihang mahibaloan na ang problema, ang pamilya magtuon sa Bibliya nga maghunahuna sa ilang mga pauswagonon. Pananglitan, nganong dili susihon kon unsay ikasulti sa Bibliya bahin sa ‘pagmahal’? Tingali ikaw makakaplag ug teksto sama niini: “Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.” (Santiago 5:11) Dayon tagda ang asoy sa Bibliya bahin kang Job, ug isentro ang pagtagad diha sa pagpakita ni Jehova ug malumong pagmahal ug pagkamaluluy-on kang Job. Tino nga buot nimong sundogon si Jehova pinaagi sa pagkahimong malumo kaayo sa pagmahal ug maluluy-on sa imong pamilya.

Apan, tungod kay dili hingpit, “kitang tanan mangapandol sa makadaghan” sa atong paggamit sa dila. (Santiago 3:2) Diha sa pamilya, tingali dili  nato magamit ang atong dila sa makapadasig nga paagi. Dinhi gikinahanglan ang pag-ampo ug pagsalig kang Jehova. Ayawg undang. “Pag-ampo nga walay-hunong.” (1 Tesalonica 5:17) Si Jehova magtabang niadtong nangandoy ug pagmahal diha sa pamilya maingon man niadtong gustong magpakita niini apan malisdan sa paghimo niini.

Dugang pa, si Jehova malulotong naghatag ug tabang diha sa Kristohanong kongregasyon. Si Santiago misulat: “Aduna bay masakiton [sa espirituwal] kaninyo? Magpatawag siyag mga ansiyano sa kongregasyon, ug paampoa sila alang kaniya, nga maghaplas kaniya ug lana sa ngalan ni Jehova.” (Santiago 5:14) Oo, ang mga ansiyano diha sa mga kongregasyon sa mga Saksi ni Jehova dakog ikatabang sa mga pamilya nga ang mga membro nalisdan sa pagpakitag pagmahal sa usag usa. Bisag sila dili mga sikologo, ang mga ansiyano mapailobong makatabang sa ilang mga isigkamagtutuo, nga dili sila sultihan kon unsay angay nilang buhaton, apan magpahinumdom kanila sa panglantaw ni Jehova ug mag-ampo uban kanila ug alang kanila.—Salmo 119:105; Galacia 6:1.

Sa kahimtang ni Tohru ug Yoko, kanunayng gipaminawan sa Kristohanong mga ansiyano ang ilang mga problema ug gihupay sila. (1 Pedro 5:2, 3) Usahay, moduaw ang usa ka ansiyano ug ang iyang asawa aron makabenepisyo si Yoko sa pagpakig-uban sa usa ka eksperyensiyado nga Kristohanong babaye nga magpahinumdom kang Yoko ‘sa paghigugma sa iyang bana.’ (Tito 2:3, 4) Pinaagi sa pagkamasinaboton ug pagpakitag simpatiya sa mga pag-antos ug kaguol sa mga isigka-Kristohanon, ang mga ansiyano mahimong “usa ka tagoanang dapit gikan sa hangin ug usa ka salipdanang dapit gikan sa bagyo.”—Isaias 32:1, 2.

Sa tabang sa malulotong mga ansiyano, si Tohru nakaamgo nga siya may problema sa pagpadayag sa iyang emosyon ug nga sa “kataposang mga adlaw,” si Satanas nag-atake sa kahikayan sa pamilya. (2 Timoteo 3:1) Nakahukom si Tohru sa pagbuntog sa iyang problema. Iyang nasabtan nga siya dili makapadayag ug gugma tungod kay siya wala pakitai ug gugma samtang nagdako. Pinaagi sa seryosong pagtuon sa Bibliya ug pag-ampo, si Tohru anam-anam nga misanong sa emosyonal nga mga panginahanglan ni Yoko.

Bisag nasuko siya kaniadto kang Tohru, sa dihang nasabtan ni Yoko ang kasaysayan sa pamilya ni Tohru ug nakita ang iyang kaugalingong sayop, siya naningkamot pag-ayo nga makita ang maayo diha sa iyang bana. (Mateo 7:1-3; Roma 5:12; Colosas 3:12-14) Siya kinasingkasing nga nangayog kusog kang Jehova nga siya makapadayon sa paghigugma sa iyang bana. (Filipos 4:6, 7) Ngadtongadto, si Tohru misugod sa pagpadayag sa iyang pagmahal, ug nalipay gayod ang iyang asawa.

Oo, bisan pag nalisdan ka sa pagbati ug pagpadayag ug pagmahal diha sa pamilya, tino nga mabuntog nimo ang maong problema. Ang Pulong sa Diyos naghatag kanato ug maayong giya. (Salmo 19:7) Pinaagi sa pag-ila sa pagkaseryoso niini, sa pagpaningkamot nga makita ang maayo diha sa mga membro sa imong pamilya, sa pagtuon ug pagpadapat sa Pulong sa Diyos, sa pagsalig kang Jehova pinaagig kinasingkasing nga pag-ampo, ug pinaagi sa pagpangayog tabang sa hamtong nga Kristohanong mga ansiyano, imong mabuntog ang morag sama sa usa ka dakong babag nga nagpataliwala kanimo ug sa imong pamilya. (1 Pedro 5:7) Ikaw usab malipay, sama sa gibating kalipay sa usa ka bana didto sa Tinipong Bansa. Gidasig siya sa pagpadayag sa iyang pagmahal ngadto sa iyang asawa. Sa dihang sa ulahi siya nakabaton ug kaisog sa pagsultig “gimahal ko ikaw,” nakuratan siya sa sanong sa iyang asawa. Samtang naghilak sa kalipay, ang iyang asawa miingon: “Gimahal ko usab ikaw, apan mao kini ang unang higayon sulod sa 25 ka tuig nga imong nasulti kini nianang paagiha.” Ayaw palabya ang ingon niana ka dugayng panahon una pa nimo ipadayag ang imong pagmahal sa imong kapikas ug mga anak!

[Footnote]

[Hulagway sa panid 28]

Si Jehova naghatag ug tabang diha sa iyang Pulong, ang Bibliya