Isipa ang mga Butang Sumala sa Panglantaw sa Diyos

SA NEW YORK, T.B.A., ang Septiyembre 14, 2002, maoy usa ka mainit ug sanag nga adlaw. Nianang adlawa, nagkatigom ang 6,521 ka tawo gikan sa nagkalainlaing mga nasod didto sa Patterson Educational Center ug sa duha pa ka laing mga tinukod sa mga Saksi ni Jehova sa maong rehiyon. Nagkatigom ang daghang tawo aron sa pagsaksi sa graduwasyon sa ika-113 nga klase sa Watchtower Bible School of Gilead. Ang mga estudyante naggikan sa 14 ka nasod ug nakagugol na ug lima ka bulan nga pagpangandam alang sa misyonaryong pag-alagad sa 19 ka nasod diin sila giasayn.

Si Carey Barber, nga hapit nang mo-98 ang edad ug membro sa Nagamandong Lawas sa mga Saksi ni Jehova, mao ang tsirman sa programa. Iyang gihisgotan ang duolag 60 ka tuig nga tradisyon sa Gilead School, nga nagsangkap sa libolibo ka tawo nga mangadto sa misyonaryong kanataran. Si Brader Barber miingon: “Dili paghinobra ang pag-ingon nga maayo kaayo ang miresulta tungod sa ilang dugang nga pagbansay. Sa literal nga paagi gatosan ka libo nga mga maaghop sa tibuok yuta ang nagpahinungod sa ilang kinabuhi kang Jehova ug misagop sa iyang matuod nga pagsimba ug sagradong pag-alagad tungod sa tabang nga gihatag kanila sa nabansay nga mga misyonaryo.”

Sa wala pa motungha sa Gilead, daghan sa mga estudyante ang nagpakita nag interes sa pagpalapad sa ilang ministeryo. Usa ka magtiayon ang migugol ug kapin sa usa ka tuig sa pag-eskuyla ug Mandarin nga Ininsek agig paningkamot nga masangyawan ang dakong populasyon sa lumad nga mga Insek sa ilang dapit sa Canada. Laing magtiayon ang misugod pagtuon ug Albanian sa ilang kaugalingon ug sa ngadtongadto mibalhin sa Albania aron atimanon ang nagatubo nga interes sa Bibliya didto. Ang uban sa klase nga mitungha sa Gilead naggikan sa Hungaria, Guatemala, ug sa Dominican Republic, mga nasod nga ilang gibalhinan aron sa pag-alagad diin may dakong panginahanglan sa mga magtutudlo sa Pulong sa Diyos.

Karon, sa dili pa mogikan paingon sa ilang mga asaynment sa Aprika, Sidlakang Uropa, Sentral Amerika, Amerika del Sur, ug sa Halayong Silangan, ang tanang migraduwar nga mga estudyante gidasig nga tagdon ang Diyos sa tanan nilang kalihokan.

Isipa ang mga Butang Sumala sa Panglantaw sa Diyos

Human sa iyang pangbukas nga pakigpulong, gipailaila ni Brader Barber si Maxwell Lloyd, membro sa Komite sa Sanga sa Tinipong Bansa. Gipasiugda niya ang tema nga “Isipa ang Tanang Butang Sumala sa Panglantaw sa Diyos.” Gihisgotan ni Brader Lloyd ang mga panig-ingnan ni David ug sa Anak sa Diyos, si Jesus. (1 Samuel 24:6; 26:11; Lucas 22:42) Human pahinumdomi ang mga estudyante nga ang ilang lima-ka-bulan nga pagtuon sa Bibliya nagbansay kanila sa pag-isip sa mga butang sumala sa panglantaw sa Diyos, nangutana ang mamumulong: “Sa dihang magdumala kamog mga pagtuon sa Bibliya uban sa mga tawo diha sa inyong bag-ong asaynment, tabangan ba ninyo sila nga mangatarongan sumala sa panglantaw sa Diyos?” Ug maylabot sa pagtambag sa uban, iyang giingnan ang mga estudyante: “Ayaw pag-ingong, ‘Sa akong panglantaw, nagtuo ko . . .’ Hinunoa, tabangi sila nga makasabot kon unsay panghunahuna sa Diyos. Sa pagsunod niining paagiha, kamo mapamatud-ang tinuod nga panalangin niadtong inyong pakig-ubanan diha sa inyong asaynment.”

 Ang sunod nga mamumulong mao si Gerrit Lösch, membro sa Nagamandong Lawas. Namulong bahin sa tema nga “Ako Magauban Kanimo,” iyang gihisgotan ang mga okasyon diin si Jehova miingon sa iyang matinumanong mga alagad, “Ako magauban kanimo.” (Genesis 26:23, 24; 28:15; Josue 1:5; Jeremias 1:7, 8) Sa atong adlaw, mabatonan usab nato ang samang pagsalig kang Jehova kon magpabilin kitang matinumanon. Matod ni Brader Lösch: “Nabalaka ba kamo kon makakaplag ba kaha kamog mga tawo nga inyong katun-an sa Bibliya? Hinumdomi nga si Jehova nag-ingon, ‘Ako magauban kanimo.’ Nabalaka ba kamo kon makabaton ba kaha kamog igong materyal nga tagana? Si Jehova nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’” (Hebreohanon 13:5) Si Brader Lösch mitapos pinaagi sa pagpahinumdom sa mga estudyante nga misaad si Jesus nga siya magauban sa iyang matinumanong mga sumusunod diha sa buluhaton nga paghimog tinun-an.—Mateo 28:20.

“Makaplagan ba Nimo ang Imong Kasegurohan Diha sa Kalayo?” mao ang tema sa instruktor sa Gilead nga si Lawrence Bowen. Siya miingon nga tungod sa mga isyu nga gipatungha didto sa Eden, ang tanang buot mohatag kang Jehova ug eksklusibong debosyon makaagom ug mga kalisdanan ug, usahay, kalayonhong mga pagsulay. Gidasig niya ang migraduwar nga mga estudyante sa pagsunod sa panig-ingnan ni Jesus, kinsa nakakaplag  ug tinuod nga kasegurohan pinaagi sa bug-os nga pagsalig kang Jehova ug sa pag-atubang sa kalayonhong mga pagsulay nga gitugotan ni Jehova aron mahingpit ang pagkamasinugtanon sa iyang Anak. (Hebreohanon 5:8, 9) Si Jehova ikapanig-ingon sa usa ka tiglunsay ug bulawan nga naggamit lamang ug hustong kainiton aron makuha ang mga hugaw. Siyempre, ang pagtuo nga nasulayan pinaagig kalayo makahatag ug mas dakong kasegurohan kay sa nalunsay nga bulawan. Ngano? “Tungod kay ang nalunsay nga pagtuo makalahutay sa bisan unsang pagsulay,” matod ni Brader Bowen, “ug kini magsangkap kanato sa paglahutay hangtod gayod sa ‘kataposan.’”—Mateo 24:13.

Ang laing instruktor sa Gilead, si Mark Noumair, nangutana: “Mahimo ba Kamong Kahimut-anan?” Ang iyang tema nasentro diha sa mga pulong sa 1 Samuel 2:26, nga naghubit kang Samuel ingong “gikahimut-an sa panglantaw ni Jehova ug sa mga tawo.” Human hisgoti ang panig-ingnan ni Samuel, si Brader Noumair, kinsa migugol ug kapin sa 10 ka tuig diha sa misyonaryong pag-alagad sa Aprika, miingon: “Kamo usab mahimong kahimut-anan pag-ayo sa mga mata sa Diyos pinaagi sa pagpabilin diha sa buluhaton nga gipabuhat sa Diyos kaninyo. Gihatagan niya kamog usa ka bililhon nga misyonaryong asaynment.” Dayon gidasig ni Brader Noumair ang migraduwar nga klase sa pag-isip sa ilang mga asaynment ingong sagradong buluhaton nga gipiyal sa Diyos kanila ug sa pagsagop sa panghunahuna sa Diyos sa pagtuman sa ilang mga asaynment.

Panahon sa pagtungha, ang mga estudyante dunay daghang kahigayonan sa mga hinapos sa semana sa pagpaambit ngadto sa mga tawo sa maong dapit sa “halangdong mga butang sa Diyos” nga gilatid sa Bibliya. (Buhat 2:11) Gani, nakaarang sila sa pagpakigsulti bahin niining mga butanga diha sa napulo ka lainlaing mga pinulongan. Si Wallace Liverance, laing instruktor sa Gilead, miinterbiyo sa usa ka grupo sa mga estudyante nga nag-asoy sa ilang mga eksperyensiya ubos sa tema nga “Ang ‘Halangdong mga Butang sa Diyos’ Nagdasig sa mga Tawo sa Paglihok.” Matod niya: “Ang espiritu nagtukmod niadtong didto sa lawak sa itaas sa panahon sa Pentekostes sa pagsulti mahitungod sa ‘halangdong mga butang sa Diyos.’ Ang maong espiritu nagalihok gihapon karon diha sa tanang matinumanong mga alagad sa Diyos.” Ang uban natukmod pa gani sa pagkat-on ug bag-ong mga pinulongan sa tuyo nga makasangyaw sa mas daghan pang mga tawo.

Praktikal nga Tambag Bahin sa Pag-isip sa mga Butang Sumala sa Panglantaw sa Diyos

Human sa nag-unang mga pakigpulong, si Gary Breaux ug William Young, mga membro sa pamilyang Bethel sa Tinipong Bansa, miinterbiyo sa mga membro sa lainlaing mga komite sa sangang buhatan sa mga nasod nga gialagaran karon sa mga misyonaryo maingon man sa usa ka magtiayon nga migugol ug 41 ka tuig diha sa misyonaryong pag-alagad. Usa ka butang nga namatikdan mao: “Kadtong wala mangitag kahamugaway mao ang milahutay. Ilang gisentro ang ilang pagtagad sa katarongan kon nganong sila atua didto. Nahibalo sila nga sila atua didto aron sa pagwali sa maayong balita ug sa pagtabang sa mga tawo nga makaila kang Jehova.”

Si David Splane, laing membro sa Nagamandong Lawas, mitapos sa programa pinaagi sa pagpakigpulong bahin sa tema nga “Kamo Dili Moadto ug Layo!” Unsay buot niyang ipasabot niana, nga sa pagkatinuod ipadala man ang 46 ka graduwado ngadto sa mga nasod sa tibuok yuta? Siya mipatin-aw: “Bisan asa kamo nahimutang niining yutaa, anaa gihapon kamo sa balay sa Diyos kon magpabilin kamong matinumanon.” Oo, ang tanang matinumanon nga mga Kristohanon, bisan asa man sila nagpuyo, nag-alagad diha sa usa ka bahin sa dakong espirituwal nga templo, o balay, sa Diyos nga natukod panahon sa bawtismo ni Jesus sa unang siglo. (Hebreohanon 9:9) Pagkamakapahupay alang sa mga nanambong ang pagkahibalo nga si Jehova haduol sa tanan niyang matinumanong mga alagad sa yuta! Maingon nga interesado si Jehova kang Jesus sa dihang dinhi siya sa yuta, interesado usab Siya kanatong tanan ug sa atong pag-alagad Kaniya, bisan diin kita nagpuyo. Busa kon bahin sa pagsimba, dili gayod kita layo sa usag usa ug kang Jehova ug Jesus.

Human dawata ang mga pangomosta gikan sa tibuok kalibotan, ang pagpahibalo sa mga asaynment, ug ang pagbasa sa usa ka sulat gikan sa klase nga nagpahayag ug apresasyon sa pagbansay nga nadawat didto sa Gilead, ang tsirman mitapos sa programa. Gidasig niya ang bag-ong mga misyonaryo sa pagpadayon sa ilang maayong buluhaton ug sa pagkalipay diha sa pag-alagad kang Jehova.—Filipos 3:1.

[Kahon sa panid 23]

ESTADISTIKA SA KLASE

Gidaghanon sa mga nasod nga gihawasan: 14

Gidaghanon sa mga nasod nga gipadalhan: 19

Gidaghanon sa mga estudyante: 46

Aberids nga edad: 35.0

Aberids nga katuigan sa kamatuoran: 17.2

Aberids nga katuigan sa bug-os-panahong ministeryo: 13.7

[Hulagway sa panid 24]

Ika-113 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.