Pahimusli ang Bag-ong mga Kahimtang

Si Pum, Jan, Dries, ug Otto, upat ka Kristohanong mga ansiyano nga nagpuyo sa Netherlands, managsama sa daghang paagi. Ang upat minyo ug dunay mga anak. Dugang pa, sa nangaging mga tuig, silang tanan dunay bug-os-panahong sekular nga mga trabaho ug nagpuyo sa maanindot nga mga balay. Apan, silang tanan mihunong sa pagtrabaho ug nagsugod sa paggugol sa ilang panahon ug kusog sa pagpalambo sa mga intereses sa Gingharian. Unsay nagtukmod kanila sa paghimo niini nga kausaban? Gipahimuslan nilang upat ang bag-ong mga kahimtang.

ANG kadaghanan kanato sa ngadtongadto maapektohan sa bag-ong mga kahimtang. Daghang kausaban, sama sa pagminyo, pagpanganak, o pag-atiman ug tigulang nga mga ginikanan, makahatag ug dugang nga mga responsibilidad. Ang uban, hinunoa, makahatag kanato ug dugang kagawasan sa pagpadako sa atong Kristohanong ministeryo. (Mateo 9:37, 38) Pananglitan, ang atong dagko nang mga anak tingali magkinaugalingon na, o kaha kita tingali moretiro na sa trabaho.

Dugang pa, bisan tuod ug mausab ang atong mga kahimtang gusto man nato ug dili, ang ubang mga Kristohanon milampos sa paghimog mga kausaban sa ilang mga kahimtang nga nakabukas ug mga kahigayonan sa paghimo ug dugang pa diha sa ministeryo. Mao gayod kanay gihimo ni Pum, Jan, Dries, ug Otto. Sa unsang paagi?

Sa Dihang Nagkinaugalingon na ang mga Anak

Si Pum nagtrabaho ingong tighupot ug kuwenta sa libro sa usa ka kompaniya sa parmasya. Siya ug ang iyang asawa, si Anny, kanunayng mag-alagad ingong oksilyare payunir uban sa ilang duha ka anak nga babaye. Si Pum ug Anny naghikay usab ug panahon sa paglulinghayaw uban sa payunir nga pag-alagad. “Kini nahimong proteksiyon batok sa mga problema nga ipatungha sa ubang mga matang sa pag-ubanay,” matod pa nila. Kay nadasig sa panig-ingnan sa ilang mga ginikanan, ang duha ka anak nahimong mga regular payunir dihang nakatapos sa pagtungha sa hayskul.

Sa dihang nagkinaugalingon na ang ilang mga anak, si Pum ug Anny nakaamgo nga duna na silay dugang kagawasan ug panalapi gumikan niining nabag-ong mga kahimtang nga sa ingon makabiyahe na sila ngadto sa nindot nga mga lugar o makalingawlingaw. Apan, ang magtiayon midesidir hinuon sa paggamit sa ilang bag-ong mga kahimtang sa pagpadako sa ilang Kristohanong ministeryo. Busa nangayog permiso si Pum sa iyang amo nga dili motrabaho ug usa ka adlaw sa usa ka semana. Sa ulahi, si Pum naghimog kahikayan nga siya makasugod sa pagtrabaho sa alas 7:00 s.b. ug makahunong sa alas 2:00 s.h. Siyempre, kinahanglang paigoon ang menos nga kita tungod kay namenosan ang oras sa pagtrabaho. Bisan pa niana, sila nakatigayon ra, ug sa 1991, si Pum miduyog sa iyang asawa ingong regular payunir.

Sunod, si Pum gihangyo nga mahimong luyoluyong tig-atiman sa Assembly Hall sa mga Saksi ni Jehova. Kana nagpasabot nga kinahanglang biyaan sa magtiayon ang balay diin sila nagpuyo sulod sa 30 ka tuig ug sa pagbalhin ngadto sa usa  ka apartment diha sa nataran sa Assembly Hall. Sila mibalhin. Lisod ba kadto? Si Anny mitubag nga sa matag panahong mingawon siya, pangutan-on niya ang iyang kaugalingon, ‘Nahisama ba ako sa asawa ni Lot?’ Siya midumili sa ‘paglingi.’—Genesis 19:26; Lucas 17:32.

Si Pum ug Anny nagtuo nga ang ilang desisyon mibunga ug daghang panalangin. Lakip sa daghan pang ubang mga butang, sila nalipay sa ilang pag-alagad diha sa Assembly Hall, pagpangandam alang sa distritong mga kombensiyon, ug pagpakigkita sa mga magtatan-aw sa sirkito (nagapanawng mga ministro) nga mohatag ug mga pakigpulong sa Assembly Hall. Matag karon ug unya, sila moduaw sa nagkalainlaing mga kongregasyon sa dihang si Pum mag-alagad ingong kapuling magtatan-aw sa sirkito.

Sa unsang paagi kining magtiayon malamposon sa pagpadako sa ilang pag-alagad? Si Pum miingon: “Kon may dakong kausaban nga mahitabo sa imong kinabuhi, kinahanglang ikaw determinado sa pagpahimulos ug maayo sa bag-ong mga kahimtang.”

Pagpasimple sa Kinabuhi

Si Jan ug ang iyang asawa, si Woth, dunay tulo ka anak. Sama kang Pum ug sa iyang pamilya, maalamong gipahimuslan ni Jan ang bag-ong mga kahimtang. Sulod sa daghang katuigan, si Jan dunay dakog-suweldo nga posisyon sa usa ka bangko ug nakahatag ug haruhayng paagi sa kinabuhi sa iyang pamilya. Apan, ang iyang tinguha sa pagpadako sa iyang ministeryo misamot. Siya miingon: “Sa pagdagan sa panahon sa akong kinabuhi, ang akong apresasyon sa kamatuoran nagkalalom, ug ang akong gugma kang Jehova nagkadako.” Busa sa 1986, si Jan naghimog kausaban sa iyang mga kahimtang. Siya miingon: “Gipahimuslan nako ang higayon dihang giorganisar pag-usab ang opisina ug nagsugod sa paggugol ug gamayng oras sa pagtrabaho. Gianggaan ako sa akong nahibulong nga mga kauban ug Diwodo tungod kay motrabaho lamang ako sa dinsdag [Martes], woensdag [Miyerkoles], ug donderdag [Huwebes]. Ang akong suweldo miubos ug 40 porsiyento. Akong gibaligya ang among balay ug nagpalit ug barkong-balay aron makaalagad kami sa dapit nga mas dako ang panginahanglag mga magmamantala sa Gingharian. Dayon, akong gipahimuslan ang pagretiro ug sayo; ang akong kita miubos ug laing 20 porsiyento, apan sa 1993, nakasugod ako sa pag-alagad ingong regular payunir.”

Karon, si Jan maoy usa ka membro sa Hospital Liaison Committee ug regular nga nag-alagad ingong magtatan-aw sa kombensiyon. Bisan pa sa dili maayong panglawas, si Woth matag karon ug unya regular nga mag-oksilyare payunir. Ang tanang  tulo ka anak karon minyo na ug sila, uban sa ilang mga kapikas, maoy kugihang mga ministro sa Gingharian.

Sa unsang paagi si Jan ug Woth nakapaangay sa ubos nga sukdanan sa pagkinabuhi? “Sa dihang sapian pa kami,” si Jan mitubag, “among gipaneguro nga dili kaayo namo hatagan ug importansiya ang materyal nga mga butang. Sa pagkakaron medyo lisod ang paghulat ug diyutay hangtod nga makapalit ug usa ka butang, apan ang among nadawat nga espirituwal nga mga panalangin ug mga pribilehiyo daghan kaayo.”

Sama kang Jan ug Woth, si Dries ug ang iyang asawa, si Jenny, midesisyon usab sa pagpasimple sa ilang kinabuhi aron makahatag ug mas daghang panahon sa mga intereses sa Gingharian. Si Dries ug Jenny nag-alagad ingong mga payunir hangtod nga nahimo silang mga ginikanan. Dayon, aron makaatiman sa iyang pamilya, si Dries nagtrabaho ingong administrador sa usa ka dakong kompaniya. Ang iyang mga amo nalipay sa iyang trabaho ug gitanyagan siya ug taas nga puwesto. Apan, gibalibaran ni Dries ang tanyag tungod kay mas gamayng panahon na lang unya ang iyang magugol alang sa Kristohanong mga kalihokan.

Ang pag-atiman ug pamilya—maingon man ang pag-atiman sa masakitong inahan ni Jenny—nagkinahanglan ug dakong panahon ug kusog sa magtiayon. Bisan pa niana, padayon nilang giugmad ang espiritu sa pagpayunir. Unsay nakatabang kanila sa pagbuhat niini? Si Jenny miingon: “May mga payunir nga among gipapuyo uban namo, manapit kami ug mga payunir sa pagpangaon, ug magtanyag sa pagpasaka sa mga magtatan-aw sa sirkito.” Si Dries midugang: “Gipasimple namo ang among kinabuhi ug naglikay sa pagpangutang. Midesisyon kami nga dili mosulod ug dagkong mga negosyo o mopalit ug balay, aron nga sa umaabot nga mga adlaw dili kami magapos niining mga butanga.”

Ang desisyon ni Dries ug Jenny sa pagmugna ug mga kahimtang nga magtugot kanila nga makagugol ug mas daghang panahon alang sa intereses sa Gingharian mibungag maayo. Ang duha nila ka anak karon nag-alagad ingong mga ansiyano, ug ang usa nagpayunir uban sa iyang asawa. Si Dries ug Jenny nag-alagad ingong mga espesyal payunir, ug sa ulahi si Jenny nag-uban-uban kang Dries sa sirkitong buluhaton. Karon sila maoy mga boluntaryo sa Bethel, diin si Dries nag-alagad ingong membro sa Komite sa Sanga.

Sayo nga Pagretiro

Sama kang Dries ug Jenny, si Otto ug ang iyang asawa, si Judy, nagpayunir sa wala pa matawo ang ilang duha ka anak nga babaye. Sa nagsabak pa si Judy sa ilang kamagulangan, si Otto nakakitag trabaho ingong maestro.

Samtang nagdako ang mga bata, si Otto ug Judy kasagarang mangimbitar ug mga payunir sa ilang balay aron ang ilang mga anak makakita sa kalipay sa bug-os-panahon nga Kristohanong mga magbubuhat. Sa ngadtongadto, ang ilang kamagulangan misulod sa payunir nga pag-alagad. Sa ulahi, siya mieskuyla sa Gilead School ug karon nag-alagad  uban sa iyang bana ingong misyonaryo sa usa ka nasod sa Aprika. Ang ilang kamanghoran nagsugod sa pagpayunir sa 1987, ug si Judy miduyog kaniya.

Sa dihang ang nabag-ong kahimtang ni Otto nagtugot kaniya sa pagtrabahog menos nga oras diha sa eskuylahan, iyang gigamit ang ubang oras sa pagpayunir. Wala magdugay, mihunong na gayod siya sa iyang trabaho. Karon, diha sa nagapanawng buluhaton, gigamit ni Otto ang iyang katakos ingong maestro sa paglig-on sa mga kongregasyon sa espirituwal nga paagi.

Unsay tambag ni Otto alang niadtong moretiro ug sayo sa ilang sekular nga trabaho? “Inigretiro nimo, ayaw pagdesisyon nga magrelaks-relaks una ka ug usa ka tuig o kapin pa. Maanad ka na unyang ‘magparelaks-relaks.’ Sa ngadtongadto, malimot ka bahin sa pagpayunir. Hinunoa, sugdi dayon ang imong gipadakong mga kalihokan sa pag-alagad.”

Gamitang Maalamon ang Imong Kasinatian sa Kinabuhi

Siyempre, ang mga igsoong sama kang Pum, Jan, Dries, ug Otto dili na kaayo lagsik ug lig-on karon sama niadtong batan-on pa sila. Apan sila mas hamtong, mas daghag kasinatian, ug mas maalamon. (Proverbio 20:29) Sila nahibalo kon unsay kahulogan sa pagkahimong mga amahan, ug tungod sa pagtrabaho uban sa ilang mga asawa, sila may ideya nga daghan ang nalangkit sa pagkahimong inahan. Uban sa ilang mga asawa, malamposon nilang giatubang ang mga problema sa pamilya ug nagbutang ug teokratikanhong mga tumong sa ilang mga anak. Si Otto miingon: “Sa dihang ako mohatag ug tambag ingong magtatan-aw sa sirkito bahin sa pagdumalag pamilya, ang akong kasinatian sa pag-atiman ug pamilya nakatabang sa paghimo sa akong tambag nga mas praktikal.” Sa susama, ang kasinatian ni Dries ingong amahan karon naghimo kaniya nga usa ka bililhong membro sa pamilyang Bethel, uban sa daghang batan-ong mga boluntaryo niini.

Oo, ang personal nga kasinatian makatabang sa maong mga igsoon sa pagdumala sa daghang nagkalainlaing panginahanglan sa mga kongregasyon. Ang ilang eksperyensiya, sa ato pa, nakapahait sa himan nga ilang nabatonan, busa ilang gigamit ang ilang kusog nga makahatag ug dakong kaayohan. (Ecclesiastes 10:10) Sa pagkatinuod, sila makahimo ug mas daghan pa kay sa niadtong mas lig-on ug panglawas apan mas kulang ug eksperyensiya.

Kining mga igsoona, uban sa ilang mga asawa, maoy maayong panig-ingnan sa mga batan-ong anaa taliwala sa katawhan ni Jehova. Ang mga batan-on makakita nga ang mga magtiayong sama kanila nakaeksperyensiya mismo sa daghang problema ug mga panalangin nga ginataho diha sa atong Kristohanong mga publikasyon. Makapadasig ang pagkakitag mga lalaki ug mga babaye nga nagpasundayag ug espiritu nga sama kang Caleb kinsa, bisag tigulang na, nangayog usa ka malisod nga asaynment.—Josue 14:10-12.

Sundoga ang Ilang Pagtuo

Mahimo ba nimong masundog ang pagtuo ug buhat sa mga magtiayong gihisgotan niining artikuloha? Hinumdomi, ilang gihimo ang kamatuoran nga ilang paagi sa kinabuhi. Ilang gipaugmad diha sa ilang mga anak ang tinguha sa pagpayunir. Ilang gihimo kini, sama sa pagkasulti ni Jan bahin niana, “pinaagi sa pagkahimong panig-ingnan sa gugma alang kang Jehova ug sa iyang organisasyon, pinaagi sa paghimog kahikayan alang sa maayong pag-ubanay, ug pinaagi sa pagtudlo sa ilang mga anak sa pagsuportar sa ilang kaugalingon sa pinansiyal nga paagi.” Sila magtrabaho ug maglingawlingaw ingong pamilya. “Panahon sa bakasyon,” si Pam nahinumdom, “ang tibuok pamilya kasagarang mosangyaw sa buntag ug maglingawlingaw sa hapon.”

Dugang pa, kining maong mga Kristohanon nagplanong daan, aron nga kon mabag-o ang mga kahimtang, sila andam sa pagpahimulos sa bag-ong situwasyon. Sila nagbutang ug mga tumong ug naghimog mga desisyon nga nakapadali sa pagkab-ot sa ilang mga tumong. Sila nangitag paagi nga dili makagugol ug daghang oras sa sekular nga trabaho ug andam sa pagpaigo sa menos nga kita. (Filipos 1:10) Ang mga asawa bug-os nga nagpaluyo sa ilang mga bana. Kini nga magtiayon adunay kusganong tinguha sa pagsulod sa “dakong pultahan nga nagatultol ngadto sa kalihokan” ug, tungod niini, nagatagamtam ug dagayang mga panalangin gikan kang Jehova.—1 Corinto 16:9; Proverbio 10:22.

Ikaw ba nagtinguha usab sa pagpadako sa imong bahin sa ministeryo? Kon mao, ang pagpahimulos sa bag-ong mga kahimtang basin mao lamang ang gikinahanglan sa pagkab-ot niana.

[Hulagway sa panid 20]

Si Pum ug Anny nag-areglar sa Assembly Hall

[Hulagway sa panid 20]

Si Jan ug Woth nagsangyaw

[Hulagway sa panid 21]

Si Dries ug Jenny nag-alagad sa Bethel

[Hulagway sa panid 21]

Si Otto ug Judy nangandam sa pagduaw sa sunod nga kongregasyon