“Magmaisogon! Gidaog Ko na ang Kalibotan”

ANG adlaw sa kamatayon ni Jesus—ika-14 nga adlaw sa Hudiyohanong bulan sa Nisan—nagsugod sa pagsalop sa adlaw sa Huwebes, Marso 31, 33 K.P. Nianang gabhiona, si Jesus ug ang iyang mga apostoles nagtigom didto sa itaas nga lawak sa usa ka balay sa Jerusalem aron sa pagsaulog sa Paskuwa. Samtang siya nangandam aron “mobiya niining kalibotana ug moadto sa Amahan,” gipakita ni Jesus nga gihigugma niya ang iyang mga apostoles hangtod sa kataposan. (Juan 13:1) Sa unsang paagi? Pinaagi sa pagtudlo kanilag talagsaong mga leksiyon, sa ingon nag-andam kanila alang sa mga kahimtang sa umaabot.

Sa nagkalalom na ang kagabhion, gisultihan ni Jesus ang iyang mga tinun-an: “Magmaisogon! Gidaog ko na ang kalibotan.” (Juan 16:33) Unsay iyang gipasabot sa maong maisogong mga pulong? Sa bahin, mao kini: ‘Ang pagkadaotan sa kalibotan wala makapahimo kanako nga masuko o manimalos. Wala ako magpaumol sa kalibotan. Mahimong tinuod usab kini sa inyong bahin.’ Ang gitudlo ni Jesus sa iyang matinumanong mga apostoles niadtong kataposang mga oras sa iyang yutan-ong kinabuhi makatabang usab kanila sa pagdaog sa kalibotan.

Kinsay makalimod nga ang pagkadaotan kaylap karon sa kalibotan? Sa unsang paagi kita mosanong sa mga inhustisya ug mga buhat sa binuang nga kapintasan? Kini ba makapalagot o makatental kanato sa pagbalos? Sa unsang paagi kita maimpluwensiyahan sa dunot nga moralidad nga naglibot kanato? Dugang pa niini mao ang atong tawhanong mga pagkadili-hingpit ug makasasalang mga hilig, busa kita nakigbugno sa duha ka panggubatan: batok sa daotang kalibotan ug batok sa daotang mga hilig sa atong pagkatawo. Makalaom kaha kita nga magmadaogon kon walay tabang sa Diyos? Sa unsang paagi madawat nato ang iyang tabang? Unsang mga hiyasa ang angay natong ugmaron aron matabangan kita sa pagpukgo sa unodnong mga hilig? Aron kini matubag, atong susihon ang gitudlo ni Jesus sa iyang hinigugmang mga tinun-an sa kataposang adlaw sa iyang kinabuhi dinhi sa yuta.

Dag-a ang Garbo Pinaagi sa Pagpaubos

Pananglitan, tagda ang suliran sa pagkagarboso, o pagkamapahitas-on. Bahin niini ang Bibliya nag-ingon: “Ang garbo nagauna sa pagkahagsa, ug ang mapahitas-ong espiritu nagauna sa pagkapukan.” (Proverbio 16:18) Ang Kasulatan nagtambag usab kanato: “Kon ang usa naghunahuna nga siya mahinungdanon samtang siya walay pulos, siya naglimbong sa iyang kaugalingong hunahuna.” (Galacia 6:3) Oo, ang garbo malaglagon ug malimbongon. Maalamon nga atong dumtan ang “pagbayaw-sa-kaugalingon ug ang pagkagarboso.”—Proverbio 8:13.

May suliran ba ang mga apostoles ni Jesus sa pagbayaw-sa-kaugalingon ug pagkagarboso? Sa labing menos usa ka okasyon, naglalis sila kon kinsay labaw kanila. (Marcos 9:33-37) Sa laing higayon, si Santiago ug Juan mihangyo ug halangdong mga katungdanan sa Gingharian. (Marcos 10:35-45) Nagtinguha si Jesus sa pagtabang sa iyang mga tinun-an aron mahanaw ang maong hilig. Busa sa nagpadayon ang ilang panihapon sa Paskuwa, siya mitindog, nagbakos ug tualya, ug gihimasaan ang iyang mga tinun-an. Daling masabtan ang leksiyon nga buot  niyang ilang makat-onan. “Kon ako, bisan tuod Ginoo ug Magtutudlo, naghugas sa inyong mga tiil,” si Jesus miingon, “kamo usab angay nga maghinugasay sa mga tiil sa usag usa.” (Juan 13:14) Ang garbo kinahanglang ilisan sa katugbang niini—ang pagpaubos.

Apan, lisod dag-on ang garbo. Sa nagkalalom na ang gabii human pagawsa ni Jesus si Judas Iskariote, nga hapit nang magbudhi kaniya, ang mainit nga panaglalis miulbo taliwala sa iyang 11 ka apostoles. Ang ilang gilalisan? Kon kinsa kahay labing dako kanila! Inay kasab-an sila, sa makausa pa si Jesus mapailobong nagpasiugda sa kabililhon sa pagsilbi sa uban. Siya miingon: “Ang mga hari sa mga nasod mahariharion kanila, ug kadtong adunay awtoridad ibabaw kanila gitawag nga mga Tigpanalangin. Apan dili kamo angay nga manig-ingon niana. Kondili siya nga labing dako kaninyo mahimong sama sa kamanghoran, ug ang nagasilbi nga pangulo sama sa usa nga nagaalagad.” Sa nagpahinumdom kanila sa iyang panig-ingnan, siya midugang: “Ako ania sa inyong taliwala ingon nga usa nga nagaalagad.”—Lucas 22:24-27.

Nasabtan ba kadto sa mga apostoles? Nasabtan gayod. Katuigan sa ulahi si apostol Pedro misulat: “Kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna.” (1 Pedro 3:8) Pagkahinungdanon nga dag-on usab nato ang garbo pinaagi sa pagpaubos! Maalamon nga kita dili magpalinga sa pagpangagpas sa kabantog, gahom, o posisyon. “Ang Diyos magabatok sa mga mapahitas-on,” nag-ingon ang Bibliya, “apan siya magahatag ug dili-takos nga kalulot sa mga mapainubsanon.” (Santiago 4:6) Sa susama, ang karaang maalamong proverbio nag-ingon: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Proverbio 22:4.

Dag-a ang Pagdumot—Sa Unsang Paagi?

Matikdi ang laing tinamdan nga komon sa kalibotan—ang pagdumot. Gipahinabo man kini sa kahadlok, kaignorante, kamapihigon, pagdaogdaog, inhustisya, nasyonalismo, tribalismo, o rasismo, ang pagdumot daw naglibot kanato. (2 Timoteo 3:1-4) Ang pagdumot kaylap usab sa mga adlaw ni Jesus. Ang mga maniningil ug buhis maoy gidumtan nga mga sinalikway sa Hudiyohanong katilingban. Ang mga Hudiyo walay pagpakiglabot sa mga Samarianhon. (Juan 4:9) Ug ang mga Hentil, o mga dili-Hudiyo, gitamay usab sa mga Hudiyo. Apan, ngadtongadto, ang paagi sa pagsimba nga gisugdan ni Jesus maglakip sa mga tawo gikan sa tanang nasod. (Buhat 10:34, 35; Galacia 3:28) Busa sa kamahigugmaon gihatagan niya ang iyang mga tinun-an ug usa ka butang nga bag-o.

Si Jesus miingon: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” Kinahanglang makakat-on sila sa pagpakita niining gugmaha, kay siya nagpadayon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Bag-o ang maong sugo kay kini naglangkit dili lamang sa paghigugma sa “imong isigkatawo sama sa imong kaugalingon.” (Levitico 19:18) Sa unsang paagi? Gipatin-aw kini ni Jesus sa pag-ingon: “Mao kini ang akong sugo, nga maghigugmaay kamo sa usag usa ingon sa akong paghigugma kaninyo. Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 15:12, 13) Kinahanglang andam sila nga ibuhis ang ilang kinabuhi alang sa usag usa ug alang sa uban.

Sa unsang paagi ang dili-hingpit nga mga tawo makahanaw sa makadaot nga pagdumot gikan sa ilang kinabuhi? Pinaagi sa pag-ilis niini ug nagasakripisyo-sa-kaugalingon nga gugma. Milyonmilyon nga sinserong mga tawo gikan sa tanang etniko,  kultural, relihiyoso, ug politikanhong mga kagikan ang nagabuhat gayod niana. Sa pagkakaron sila natigom diha sa usa ka nahiusa, walay-pagdumot nga katilingban—ang tibuok-kalibotang panag-igsoonay sa mga Saksi ni Jehova. Gisunod nila ang inspiradong mga pulong ni apostol Juan: “Ang matag usa nga nagadumot sa iyang igsoon maoy usa ka mamumuno, ug kamo nahibalo nga walay mamumuno nga kaniya nagpabilin ang kinabuhing walay kataposan.” (1 Juan 3:15) Ang tinuod nga mga Kristohanon dili lamang modumili sa pagpakiggubat kondili maningkamot usab sila sa pagpakitag gugma sa usag usa.

Apan, unsay angay natong tinamdan sa mga tawong dili nato kauban sa pagtuo ug basin nagdumot pa kanato? Samtang nagbitay diha sa estaka, si Jesus nag-ampo alang sa iyang mga mamumuno, nga nag-ingon: “Amahan, pasayloa sila, kay wala sila mahibalo sa ilang ginabuhat.” (Lucas 23:34) Sa dihang ang gigamhan-sa-pagdumot nga mga tawo mibato sa tinun-an nga si Esteban hangtod sa kamatayon, ang iyang kataposang mga pulong mao: “Jehova, ayaw idat-og kanila kining salaa.” (Buhat 7:60) Si Jesus ug si Esteban nanghinaot gihapon ug kaayohan sa mga tawong nagdumot kanila. Walay pagdumot diha sa ilang kasingkasing. “Buhaton nato ang maayo ngadto sa tanan,” ang Bibliya nagpahimangno kanato.—Galacia 6:10.

‘Usa ka Magtatabang Hangtod sa Kahangtoran’

Samtang nagpadayon ang miting uban sa iyang 11 ka matinumanong mga apostoles, si Jesus nagpahibalo kanila nga sa di madugay dili na siya makauban nila diha sa unod. (Juan 14:28; 16:28) Apan iyang gipasaligan sila: “Hangyoon ko ang Amahan ug hatagan kamo niya ug laing magtatabang nga magauban kaninyo hangtod sa kahangtoran.” (Juan 14:16) Ang gisaad nga magtatabang mao ang balaang espiritu sa Diyos. Tudloan sila niini sa laglom nga mga butang sa Kasulatan ug magpahinumdom kanila sa gitudlo ni Jesus panahon sa iyang yutan-ong ministeryo.—Juan 14:26.

Sa unsang paagi ang balaang espiritu makatabang kanato karon? Buweno, ang Bibliya mao ang inspiradong Pulong sa Diyos. Ang mga tawo nga gigamit sa pagtagna ug pagsulat sa Bibliya “giagak sa balaang espiritu.” (2 Pedro 1:20, 21; 2 Timoteo 3:16) Ang atong pagtuon sa Kasulatan ug pagpadapat sa atong nakat-onan maghatag kanatog kahibalo, kaalam, pagsabot, idlot nga panabot, pag-ila, ug katakos sa panghunahuna. Nan, dili ba kita mas andam pa unya sa pag-atubang sa mga pagpig-ot sa daotang kalibotan?

Ang balaang espiritu maoy magtatabang usab sa laing paagi. Ang balaang espiritu sa Diyos maoy usa ka mapuslanon ug gamhanang puwersa, mao nga kadtong ubos sa impluwensiya niini makapakitag diyosnong mga hiyas. “Ang bunga sa espiritu mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon,” nag-ingon ang Bibliya. Dili ba mao man kini ang mga hiyas nga atong gikinahanglan aron mabuntog ang unodnong mga hilig nga mosangpot sa imoralidad, panag-away, pangabugho, mga pagsinta sa kasuko, ug susamang mga butang?—Galacia 5:19-23.

Pinaagi sa pagsalig sa espiritu sa Diyos, madawat usab nato ang “gahom nga labaw sa kasarangan” aron masagubang ang bisan unsang kasamok o kasakit. (2 Corinto 4:7) Bisan tuod ang balaang espiritu tingali dili maghanaw sa mga pagsulay o mga tentasyon, kini makatabang gayod kanato sa pagsagubang niini. (1 Corinto 10:13) “Sa tanang butang ako adunay kusog pinaagi kaniya nga naghatag ug gahom kanako,” misulat si apostol Pablo. (Filipos 4:13) Ang Diyos mohatag sa maong gahom pinaagi sa iyang balaang espiritu. Mapasalamaton gayod kita tungod sa balaang espiritu! Kini gisaad alang niadtong ‘nahigugma kang Jesus ug nagsunod sa iyang mga sugo.’—Juan 14:15.

“Magpabilin Kamo sa Akong Gugma”

Sa iyang kataposang gabii ingon nga tawo, giingnan usab ni Jesus ang iyang mga apostoles: “Siya nga nakabaton sa akong mga sugo ug nagsunod niini, siya mao ang nahigugma kanako. Sa ingon usab siya nga nahigugma kanako higugmaon sa akong Amahan.” (Juan 14:21) “Magpabilin kamo sa akong gugma,” siya miawhag kanila. (Juan 15:9) Sa unsang paagi ang pagpabilin diha sa gugma sa Amahan ug sa Anak makatabang kanato sa pagpakigbisog sa makasasalang mga hilig sa atong pagkatawo ug sa daotang kalibotan?

Aw, makontrolar ba gayod nato ang daotang mga hilig kon kita walay kusganong panukmod sa pagbuhat sa ingon? Duna pa bay mas dakong panukmod kay sa pagtinguha nga mabatonan ang maayong relasyon uban kang Jehova nga Diyos ug sa  iyang Anak? Si Ernesto, a usa ka batan-on nga nakigbisog pag-ayo sa imoral nga pagkinabuhi sukad pa sa iyang pagkabayongbayong, misaysay: “Gusto nakong pahimut-an ang Diyos, ug akong nakat-onan gikan sa Bibliya nga wala niya mauyoni ang akong pagkinabuhi. Busa nakahukom ako nga magbag-o, nga magsunod sa mga lagda sa Diyos. Kada adlaw, kinahanglang makigbisog ako sa makadaot, malaw-ay nga mga hunahuna nga mosantop gihapon sa akong alimpatakan. Apan determinado akong makadaog niining bugnoa, ug ako nag-ampo nga walay hunong alang sa tabang sa Diyos. Human ang duha ka tuig, nawala ra ang grabeng kalisod, bisan tuod kinahanglang estriktohan gihapon nako ang akong kaugalingon.”

Kon bahin sa pagpakigbugno sa kalibotan, matikdi ang kataposang pag-ampo nga gitanyag ni Jesus sa wala pa siya mobiya niadtong itaas nga lawak sa Jerusalem. Alang sa iyang mga tinun-an, siya nag-ampo sa iyang Amahan ug nangamuyo: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan.” (Juan 17:15, 16) Pagkamakapadasig! Si Jehova nagabantay niadtong iyang gihigugma ug nagpalig-on kanila samtang sila magpabiling bulag sa kalibotan.

“Pagpasundayag ug Pagtuo”

Ang pagtuman sa mga sugo ni Jesus makatabang gayod kanato nga magmadaogon sa atong pagpakigbisog sa daotang kalibotan ug sa atong makasasalang mga hilig. Hinunoa, bisan pag mahinungdanon ang maong pagkamadaogon, kini dili makahanaw sa kalibotan ni sa atong napanunod nga sala. Apan dili kita angayng mawad-ag paglaom.

“Ang kalibotan nagakahanaw ingon man ang tinguha niini,” matod sa Bibliya, “apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Gihatag ni Jesus ang iyang kinabuhi aron “ang tanan nga magpasundayag ug pagtuo kaniya” maluwas sa sala ug kamatayon. (Juan 3:16) Busa, samtang magtubo ang atong kahibalo sa kabubut-on ug mga katuyoan sa Diyos, atong itisok sa kasingkasing ang pahimangno ni Jesus: “Pagpasundayag ug pagtuo sa Diyos, pagpasundayag usab ug pagtuo kanako.”—Juan 14:1.

[Footnote]

[Hulagway sa panid 6, 7]

“Magpabilin kamo sa akong gugma,” giawhag ni Jesus ang iyang mga apostoles

[Hulagway sa panid 7]

Ang kagawasan gikan sa sala ug sa mga epekto niini matuman ra gayod sa di madugay