Mga Batan-on—Kamo ba Nag-uswag sa Espirituwal?

“BISAN tuod nagtambongan ako sa Kristohanong mga tigom, wala akoy kusganong tinguha sa pag-alagad kang Jehova,” matod pa ni Hideo sa paghinumdom niya sa panahon nga siya tersero anyo sa hayskul. “Subsob nakong gihanduraw ang akong kaugalingon nga popular sa akong mga klasmet ug mapagarbohong naglakawlakaw sa karsada uban sa akong trato. Wala akoy espesipikong mga tumong, ug wala akoy tinguha nga mouswag sa espirituwal.” Sama kang Hideo, daghang batan-on ang nagkinabuhi nga walay direksiyon, nga walay tinguha sa pagkab-ot ug bisan unsang mapuslanong mga tumong o sa paghimog bisan unsang pag-uswag.

Kon ikaw batan-on, lagmit malipay ka sa dihang ikaw makigbahin sa mga esport o sa usa ka pasatiempo. Apan, maylabot sa espirituwal nga mga kalihokan dili tingali ingon niana ang imong bation. Posible kaha nga mobatig kalipay labot sa espirituwal nga mga tumong? Tagda kining mga pulonga sa salmista: “Ang pahinumdom ni Jehova kasaligan, nga nagahimo nga maalamon sa walay kasinatian. . . . Ang kasugoan ni Jehova hinlo, nga nagapadan-ag sa mga mata.” (Salmo 19:7, 8) Ang Pulong sa Diyos makatultol sa “walay kasinatian” sa paglihok nga maalamon, ‘nga magapadan-ag sa iyang mga mata.’ Oo, ang espirituwal nga mga butang makahatag kanimog tumang kalipay. Apan unsay gikinahanglan aron mobati kag kalipay? Asa ka magsugod?

Mapalihok sa Pag-alagad sa Diyos

Una, kinahanglang mapalihok ka. Tagda ang kaso sa batan-ong Haring Josias sa Juda. Sa dihang ang basahon sa Balaod ni Jehova nakit-an diha sa templo, gipabasa kini ni Josias ug natandog siya pag-ayo sa iyang nadungog. Tungod niini, “gikuha ni Josias ang tanang dulumtanang butang gikan sa tanang kayutaan nga ila sa mga anak sa Israel.” (2 Cronicas 34:14-21, 33) Ang pagbasa sa Pulong sa Diyos nagpalihok kang Josias sa paghimo ug labaw pa sa pagpalambo sa putling pagsimba.

Ikaw usab makaugmad ug tinguha nga moalagad kang Jehova kon ikaw regular nga nagabasa sa Bibliya ug namalandong sa imong nabasa. Mao kana ang nagpalihok kang Hideo. Nagsugod siya sa pagpakigsuod sa usa ka tigulang nga payunir, usa ka bug-os-panahong ministro sa mga Saksi ni Jehova. Ang payunir maoy makugihong estudyante sa Bibliya ug naningkamot sa pagpadapat sa mga pagtulon-an niini sa iyang kinabuhi. Kay nadasig pag-ayo sa panig-ingnan sa payunir, si Hideo misugod sa paghimo sa samang butang ug nakaugmad ug kusganong tinguha sa pag-alagad sa Diyos ug sa ubang mga tawo. Ang iyang pag-uswag sa espirituwal miresulta sa mas makahuloganong kinabuhi.

Ang pagbasa sa Bibliya adlaw-adlaw makapalihok sa mga batan-on. Si Takahiro miingon: “Sa dihang  mohigda na ko ug unya maamgohan nako nga wala pa diay ko makabasa sa Bibliya nianang adlawa, mobangon ko ug buhaton kana. Tungod niini, gibati nako ang paggiya ni Jehova. Ang adlaw-adlaw nga pagbasa sa Bibliya nakatabang gayod kanako sa pag-uswag sa espirituwal. Kay determinado nga mogugol ug mas dakong panahon sa pag-alagad kang Jehova, nagregular payunir ako wala madugay human sa paggraduwar nako sa hayskul. Ug mibati gayod ako ug katagbawan niini.”

Gawas pa sa pagbasa sa Bibliya, unsa pay makatabang kanimo sa pagpalig-on sa imong tinguha nga dayegon si Jehova? Si Tomohiro gitudloan sa iyang inahan sa kamatuoran sa Bibliya. Siya miingon: “Sa diha nang natun-an nako sa bug-os ang librong Life Does Have a Purpose sa edad nga 19 nga natandog ako pag-ayo sa gugma ni Jehova ug sa halad lukat ni Jesus. Ang maong apresasyon sa gugma sa Diyos nagpalihok kanako sa paghimo ug labaw pa sa pag-alagad kang Jehova.” (2 Corinto 5:14, 15) Sama kang Tomohiro, daghang batan-on ang nadasig sa pag-uswag sa espirituwal pinaagi sa paghimog personal nga pagtuon sa Bibliya.

Bisan pa niana, komosta kon nakulangan gihapon ka sa kinasingkasing nga tinguha sa pag-alagad kang Jehova? Duna ka bay kapangayoan ug tabang? Si apostol Pablo misulat: “Kay ang Diyos . . . nagalihok sa sulod ninyo aron kamo magtinguha ug ingon man mobuhat.” (Filipos 2:13) Kon mag-ampo ka kang Jehova alang sa tabang, siya dagayang mohatag kanimo sa iyang balaang espiritu, nga magpalig-on kanimo dili lang sa ‘pagbuhat’ kondili usab sa ‘pagtinguha.’ Nagpasabot kini nga ang balaang espiritu sa Diyos magpalig-on sa imong tinguha sa paghimo sa imong kinamaayohan sa pag-alagad kang Jehova ug motabang kanimo nga motubo sa espirituwal. Nan, salig gayod sa gahom ni Jehova ug palig-ona ang imong kasingkasing!

Paghimo ug Imong Kaugalingong mga Tumong

Sa dihang determinado ka nang moalagad kang Jehova nga mas bug-os pa, kinahanglang maghimo ka ug personal nga mga tumong aron mouswag sa espirituwal. Si Mana, usa ka batan-on nga Kristohanong babaye, miingon: “Ang paghimog mga tumong dako kaayong tabang kanako. Imbes mosibog, makapadayon ako nga maisogon. Nga naghunahuna sa akong mga tumong, kinasingkasing akong nag-ampo kang Jehova alang sa giya, ug nakahimo ako sa pag-uswag nga wala malinga.”

Ang imong mga tumong kinahanglang realistikanhon ug makab-ot. Ang pagbasa ug usa ka kapitulo sa Bibliya kada adlaw mahimong usa ka makataronganong tumong. Makasugod ka usab sa pagpanukiduki. Sa pag-ilustrar niini ginamit ang usa ka publikasyon nga Iningles, mahimo nimong tun-an ang mga hiyas ni Jehova nga nalista ilalom sa sub-ulohang “Qualities by Name” ilalom sa topiko nga “Jehovah” diha sa Watch Tower Publications Index. Dunay mga 40 ka topiko nga mahimo nimong konsiderahon, ug ang pagdukiduki sa walay duhaduha makapasuod kanimo kang Jehova ug makapalihok kanimo sa paghimo ug labaw pa alang kaniya. Ang ubang makab-ot nga mga tumong naglakip sa pagkomento labing menos kas-a panahon sa matag Kristohanong tigom nga nagkinahanglag pagpakigbahin sa mamiminaw, pagkasinati pa sa labing menos usa ka membro sa kongregasyon matag tigom, ug dili palabyon ang adlaw nga dili mag-ampo kang Jehova ug mosulti sa uban bahin kaniya.

Kon wala ka pa malista sa Teokratikanhong Tunghaan sa Ministeryo, maayo kanang himoon nimong tumong. Nagapakigbahin ka na ba sa publikong ministeryo? Kon wala pa, basin gusto nimong maningkamot nga mahimong dili-bawtismadong magmamantala. Siyempre, ang seryosong pagpamalandong sa imong relasyon kang Jehova ug pagpahinungod sa imong kaugalingon ngadto kaniya mao ang sunod nga lakang. Daghang batan-on ang naningkamot nga magkinabuhi sumala sa ilang pagpahinungod pinaagi sa pagpaningkamot nga makasulod sa bug-os-panahong pag-alagad.

 Bisan tuod maayo nga duna kay mga tumong sa imong kinabuhi, likayi ang pag-ugmad sa espiritu sa pagpakig-indig. Mas magmalipayon ka sa imong ginabuhat kon dili nimo itandi ang imong kaugalingon sa uban.—Galacia 5:26; 6:4.

Tingali bation nimo nga ikaw walay kasinatian ug nalisdan sa paghimog makataronganong mga tumong. Nan sunda ang tambag sa Bibliya: “Ikiling ang imong igdulungog ug pamati sa mga pulong sa mga maalamon.” (Proverbio 22:17) Pangayog tabang sa imong mga ginikanan o sa ubang hamtong nga mga Kristohanon. Siyempre, ang mga ginikanan ug ang uban kinahanglang makataronganon ug makapadasig niining bahina. Ang pagbating napugos sa pagpaningkamot sa pagkab-ot sa usa ka tumong nga gihimo sa uban alang kanila mahimong maghikaw sa mga batan-on sa kalipay ug mawalay-pulos ang katuyoan sa paghimog mga tumong. Nahitabo kana sa usa dalagita, kinsa miingon: “Ang akong mga ginikanan naghimog daghang tumong alang kanako, sama sa pagpalista sa Teokratikanhong Tunghaan sa Ministeryo, pagpakigbahin sa pag-alagad sa kanataran, pagpabawtismo, ug pagpayunir. Naningkamot ko pag-ayo nga makab-ot ang matag usa niana. Sa dihang nakab-ot na nako ang usa ka tumong, wala ako dayega sa akong mga ginikanan kondili, hinunoa, naghatag sila kanako ug laing tumong nga kab-oton. Tungod niini, napugos ako kanunay sa pagkab-ot sa mga tumong. Gikapoy ko ug wala mobati ug kalamposan.” Unsay diperensiya? Maayo ang tanang tumong, apan dili kini iyaha. Aron molampos, ikaw kinahanglang mapalihok sa paghimog tumong alang sa imong kaugalingon!

Hunahunaa ra si Jesu-Kristo. Sa dihang mianhi siya sa yuta, nahibalo siya kon unsay gidahom kaniya sa iyang Amahan, si Jehova. Ang pagtuman sa kabubut-on ni Jehova, dili lang kay usa ka tumong alang kang Jesus, kondili usa ka misyon usab nga pagatumanon. Giunsa paglantaw ni Jesus ang iyang asaynment? Siya miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Si Jesus nalipay sa paghimo sa kabubut-on ni Jehova ug nagtuman sa gidahom sa iyang Amahan. Sama kinig pagkaon alang kang Jesus—nakakaplag siya ug kahimuot ug katagbawan sa pagtapos sa buluhaton nga gidahom kaniya. (Hebreohanon 10:5-10) Ikaw usab makakaplag ug kahimuot sa dihang ikaw hustong napalihok sa pagbuhat kon unsay gidasig kanimo sa imong mga ginikanan nga imong buhaton.

Ayaw Paghunong sa Pagbuhat Kon Unsay Maayo

Sa dihang duna ka nay gihunahunang tumong, panglimbasog nga makab-ot kana. Ang Galacia 6:9 nag-ingon: “Dili kita mohunong sa pagbuhat ug maayo, kay sa takdang panahon kita moani kon kita dili molunga.” (Galacia 6:9) Ayaw pagsalig sa imong kaugalingong kusog o abilidad lamang. Lagmit kaayong masugamak ka sa kababagan ug usahay makasinati ka pa gani ug temporaryong pagbati ug kapakyasan. Apan gipasaligan kita sa Bibliya: “Sa tanan mong mga dalan tagda [ang Diyos], ug siya magatul-id sa imong mga alagianan.” (Proverbio 3:6) Si Jehova magpalig-on kanimo samtang nanglimbasog ka sa pagkab-ot sa imong espirituwal nga mga tumong.

Oo, pinaagi sa pag-ugmad sa tinguha nga moalagad kang Jehova ug pinaagi sa pagpaningkamot nga makab-ot ang espirituwal nga mga tumong, makahimo ka sa ‘pagpadayag sa imong pag-uswag ngadto sa tanang tawo.’ (1 Timoteo 4:15) Unya matagamtam nimo ang makahuloganong kinabuhi sa pag-alagad sa Diyos.

[Hulagway sa panid 9]

Ang pagbasa sa Bibliya ug pagpalandong sa imong nabasa mopalihok kanimo sa pag-alagad kang Jehova

[Hulagway sa panid 10]

Si Jesus nagtuman sa gidahom sa iyang Amahan