Mga Batan-on nga Makapalipay sa Kasingkasing ni Jehova

Kining tun-anang mga artikulo gisulat alang gayod sa mga batan-on taliwala sa mga Saksi ni Jehova. Busa, among gidasig ang mga batan-on sa pagtuon ug maayo niining mga artikuloha ug sa pagkomento kanunay sa panahong pagatun-an kini diha sa Pagtuon sa Bantayanang Torre sa kongregasyon.

“Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”—PROVERBIO 27:11.

1, 2. (a) Ipatin-aw kon ang yanong pagkadani sa mga butang sa kalibotan nagpasabot bang dili ka na gayod maayong Kristohanon. (Roma 7:21) (b) Unsay imong makat-onan gikan sa panig-ingnan ni Asap? (Tan-awa ang kahon, panid 13.)

 HANDURAWA nga nangita ka ug sinina nga buot nimong paliton. Samtang nagtan-aw ka sa mga baligya, imong nakit-an ang usa ka sinina nga nakadani dayon kanimo. Daw mobagay gayod kanimo ang kolor ug tabas niana, ug barato kaayo ang prisyo. Unya imo kining tan-awon pag-ayo. Sa dako nimong katingala, namatikdan nimong ang sidsid ug mga daplin halaghag, ug pinadagan ang tinahian. Ang sinina, bisag maanindot, dili pulidong pagkatahi. Usikan mo ba ang imong kuwarta sa maong barot nga produkto?

² Itandi kini sa usa ka kahimtang nga tingali giatubang nimo isip Kristohanong batan-on. Sa unang pagtan-aw, ang mga butang niining kalibotana—sama gayod niadtong sininaa—daw maanindot kaayo. Pananglitan, ang imong mga kauban sa tunghaan tingali tigtambong ug sadyang mga parti, tiggamit ug mga droga, tig-inom ug isog nga ilimnon, tigpakigdeyt isip lingawlingaw lamang, ug nagpakigsekso bisag wala pa maminyo. Madani ka ba usahay nianang estiloha sa kinabuhi? Nangandoy ka bang makasulay unta sa ila konong kagawasan? Kon mao, ayaw dayon ihinapos nga daotan ka na ug dili na maayong Kristohanon. Sa pagkatinuod, gipadayag sa Bibliya nga ang kalibotan mahimong makapadani kaayo—bisan alang sa usa ka tawong buot magpahimuot sa Diyos.—2 Timoteo 4:10.

3. (a) Nganong kawang nga tinguhaon ang mga butang sa kalibotan? (b) Giunsa pagbatbat sa usa ka Kristohanon ang kakawangan sa kalibotanong mga pangagpas?

³ Karon tan-awa pag-ayo kining kalibotana, sama sa imong himoon sa sinina nga buot nimong paliton. Suknaa ang imong kaugalingon, ‘Unsa ang kalidad niining sistemaha sa mga butang?’ Ang Bibliya nag-ingon nga “ang kalibotan nagakahanaw.” (1 Juan 2:17) Temporaryo lamang ang kalipayan nga matagamtam gikan niini bisan ubos sa labing maayong kahimtang. Dugang pa, daotan kaayo ang sangpotanan sa dili-diyosnong panggawi. Kini dili gayod makapaayo. Usa ka Kristohanon, nga labihang nag-antos sa gitawag niya nga “mga kasakitan nga sangpotanan sa giusikang pagkabatan-on,” nag-ingon: “Ang kalibotan daw makalilipay ug maanindot. Ug patuohon ka nga imong matagamtam ang matang sa kalingawan niini nga walay kasakitan. Apan dayag nga kana dili mahitabo. Ikaw gamiton sa kalibotan, ug pagkahuman ug gamit kanimo,  ikaw ilabay.” a Nganong usikan ang imong pagkabatan-on sa maong dili-maayong pagkinabuhi?

Panalipod Batok sa “Usa nga Daotan”

4, 5. (a) Sa hapit na siyang mamatay, unsay gihangyo ni Jesus diha sa pag-ampo kang Jehova? (b) Nganong kadto nahiangay man nga hangyo?

⁴ Kay nakaamgo nga walay ikatanyag nga dekalidad nga butang kining sistemaha sa mga butang, ang mga batan-on taliwala sa mga Saksi ni Jehova naningkamot sa paglikay sa pagpakighigala niining kalibotana. (Santiago 4:4) Usa ka ba nianang matinumanong mga batan-on? Kon mao, ikaw angayng pagadayegon. Tinuod, ang pagsukol sa pagpamit-os sa isigkabatan-on ug pagpalahi maoy dili sayon, apan adunay makatabang kanimo.

⁵ Sa hapit na siyang mamatay, si Jesus miampo nga “bantayan” unta ni Jehova ang iyang mga tinun-an “tungod sa usa nga daotan.” (Juan 17:15) Mihangyo niana si Jesus tungod sa maayong katarongan. Nahibalo siya nga ang dalan sa pagkamatinumanon maoy dili sayon alang sa iyang mga sumusunod, bisan kon unsay ilang edad. Ngano man? Usa sa mga katarongan, sumala sa giila ni Jesus, mao nga ang iyang mga tinun-an makaatubang sa gamhanan, dili-makitang kaaway—“ang usa nga daotan,” si Satanas nga Yawa. Ang Bibliya nag-ingon nga kining daotang espiritung linalang “nagasuroysuroy sama sa usa ka leyon nga nagangulob, nga nagapangitag matukob.”—1 Pedro 5:8.

6. Nganong nahibalo kita nga si Satanas walay kaluoy sa mga batan-on?

⁶ Sa tibuok kasaysayan, si Satanas nagkalipay sa pagpahamtang ug kinagrabehang mga kapintasan diha sa mga tawo. Hunahunaa ang mangilngig nga mga katalagmang gipahamtang ni Satanas kang Job ug sa iyang pamilya. (Job 1:13-19; 2:7) Tingali mahinumdoman nimo ang gibalita nga mga hitabo nga nagpaila sa mabangisong espiritu ni Satanas panahon mismo sa imong pagkinabuhi. Ang Yawa nagasuroysuroy, ug sa iyang pagpangita ug matukob, siya walay kaluoy sa mga batan-on. Pananglitan, sa sinugdan sa unang siglo K.P., si Herodes mimugnag usa ka laraw sa pagpatay sa tanang batang lalaki nga nag-edad ug dos anyos paubos sa Betlehem. (Mateo 2:16) Lagmit si Satanas ang nagdasig kang Herodes—tungod kadto sa tinguha nga patyon ang bata nga sa usa ka adlaw mahimong sinaad-sa-Diyos nga Mesiyas ug maoy magpatuman sa paghukom sa Diyos kang Satanas! (Genesis 3:15) Tin-aw, si Satanas walay gugma alang sa mga batan-on. Ang iyang bugtong katuyoan mao ang pagtukob sa daghan kaayong tawo kutob sa maarangan. Ilabinang nahitabo kini karon, kay si Satanas gitambog na sa yuta gikan sa langit, nga “may dakong kasuko, kay nahibalo nga hamubo na lamang ang iyang panahon.”—Pinadayag 12:9, 12.

7. (a) Sa unsang paagi si Jehova lahi kaayo kay ni Satanas? (b) Unsay pagbati ni Jehova bahin sa imong pagkalipay sa kinabuhi?

 ⁷ Nga lahi kaayo kang Satanas, kinsa may “dakong kasuko,” si Jehova may “malumong kaluoy.” (Lucas 1:78) Siya mao gayod ang sumbanan sa gugma. Sa pagkamatuod, kining talagsaong hiyas nagpaila gayod sa atong Maglalalang nga ang Bibliya nag-ingon: “Ang Diyos gugma.” (1 Juan 4:8) Pagkalahi sa diyos niining sistema sa mga butang kay sa Diyos nga imong gisimba sa madungganong paagi! Samtang si Satanas nagtinguha sa pagpanukob, si Jehova “wala magtinguha nga adunay malaglag.” (2 Pedro 3:9) Iyang giisip ang matag tawhanong kinabuhi ingong bililhon—lakip ang imoha. Sa dihang gitambagan ka ni Jehova diha sa iyang Pulong nga dili mahimong bahin sa kalibotan, siya wala magtinguha nga piotan ang imong pagkalipay sa kinabuhi o limitahan ang imong kagawasan. (Juan 15:19) Sa kasukwahi, siya nagabantay kanimo tungod sa usa nga daotan. Gitinguha sa imong langitnong Amahan nga imong mabatonan ang mas maayong butang kay sa umalaging mga kalipayan niining kalibotana. Ang iyang tinguha mao nga makaangkon ka sa “tinuod nga kinabuhi”—ang kinabuhing walay kataposan diha sa usa ka paraisong yuta. (1 Timoteo 6:17-19) Gusto ni Jehova nga ikaw molampos, ug siya nagaawhag kanimo ngadto sa maong tumong. (1 Timoteo 2:4) Dugang pa, si Jehova adunay espesyal nga imbitasyon kanimo. Unsa ba kana?

“Lipaya ang Akong Kasingkasing”

8, 9. (a) Unsang gasa ang imong ikahatag kang Jehova? (b) Sa unsang paagi si Satanas nagatamay kang Jehova, sumala sa gipakita sa kahimtang ni Job?

⁸ Ikaw ba nakapalit sukad ug gasa alang sa usa ka suod nga higala ug unya nakakita ug dakong pahiyom diha sa nawong sa imong higala kay siya nasorpresa ug mapasalamaton nga nakadawat niana? Lagmit dugay ug nalisdan kang naghunahuna kon unsang matanga sa gasa ang angay sa maong tawo. Karon palandonga kining pangutanaha: Unsang matanga sa gasa ang ikahatag nimo ngadto sa imong Maglalalang, si Jehova nga Diyos? Sa sinugdan, ang ideya basin daw kataw-anan. Unsa ang gikinahanglan sa Labing Gamhanan gikan sa yanong tawo? Unsa ang imong ikahatag kaniya nga wala niya mabatoni? Ang Bibliya nagtubag diha sa Proverbio 27:11: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”

⁹ Sumala sa lagmit imo nang nasayran gikan sa imong pagtuon sa Bibliya, si Satanas nga Yawa nagatamay kang Jehova. Iyang gipatuo nga ang mga alagad sa Diyos nag-alagad, dili tungod sa gugma, kondili tungod sa hinakog nga mga katarongan. Paantosa ra god na sila, nag-ingon si Satanas, kon dili ba sila motalikod dayon sa matuod nga pagsimba. Pananglitan, palandonga ang gisulti ni Satanas kang Jehova bahin sa matarong nga tawong si Job: “Dili ba ikaw nagbutang man ug alad libot niya ug libot sa iyang balay ug libot sa tanang butang nga anaa kaniya sa tibuok palibot? Ang buhat sa iyang mga kamot imong gipanalanginan, ug ang iyang kahayopan mikaylap sa ibabaw sa yuta. Apan, ingon nga kausaban, palihog bakyawa ang imong kamot, ug tandoga ang tanang butang nga anaa kaniya ug tan-awa kon dili ka ba niya tunglohon sa imong nawong mismo.”—Job 1:10, 11.

10. (a) Nganong nahibalo kita nga gikuwestiyon ni Satanas ang pagkamatinumanon sa uban pang mga tawo gawas kang Job? (b) Sa unsang paagi ikaw nalangkit sa isyu sa pagkasoberano?

¹⁰ Sumala sa gipadayag sa asoy sa Bibliya, gikuwestiyon ni Satanas dili lang ang pagkamaunongon ni Job kondili ang pagkamaunongon usab sa tanang ubang mga alagad sa Diyos—apil ka. Sa pagkamatuod, nga naghisgot sa katawhan sa katibuk-an, si Satanas miingon kang Jehova: “Ang tanang butang nga anaa sa usa ka tawo [dili lang si Job kondili si bisan kinsa] iyang ihatag tungod sa iyang kalag.” (Job 2:4) Nakasabot ka ba sa imong bahin diha sa maong hinungdanong isyu? Sumala sa gipaila sa Proverbio 27:11, si Jehova nag-ingon nga adunay butang nga imong ikahatag kaniya—usa ka pasikaranan aron siya makatubag sa nagtamay kaniya, si Satanas. Tiaw mo na—ang Soberano sa Uniberso nagaawhag kanimo nga makigbahin sa pagtubag sa labing dakong isyu sa tibuok kasaysayan. Pagkatalagsaon sa imong responsabilidad ug pribilehiyo! Makatuman ka ba sa ginahangyo ni Jehova kanimo? Si Job nakatuman. (Job 2:9, 10) Ingon man si Jesus ug ang di-maihap nga uban pang mga tawo sa tibuok kasaysayan, apil ang daghang batan-on. (Filipos 2:8; Pinadayag 6:9) Ikaw makabuhat usab niana. Apan segurado ang usa ka butang, dili mahimo nga ikaw magneyutral maylabot niini. Pinaagi sa imong mga buhat, ikapakita nimo kon nagpaluyo ka ba sa pagtamay ni  Satanas o sa pagtubag ni Jehova. Hain niana ang imong paluyohan?

Si Jehova May Kahingawa Kanimo!

11, 12. Dako ba ug epekto kang Jehova kon pilion nimo ang pag-alagad kaniya o dili? Ipatin-aw.

¹¹ Hinungdanon ba gayod kang Jehova kon unsay imong pilion? Dili ba igo na ang gidaghanon sa mga tawo nga nagpabiling matinumanon aron may igo na siyang ikatubag kang Satanas? Tinuod, ang Yawa nagpatuo nga walay mag-alagad kang Jehova tungod sa gugma, nga usa ka pagbutangbutang nga napanghimakak na. Bisan pa niana, buot ni Jehova nga modapig ka kaniya bahin sa isyu sa pagkasoberano kay siya may kahingawa kanimo isip indibiduwal. Si Jesus miingon: “Dili tilinguhaong butang sa akong Amahan nga anaa sa langit nga malaglag ang usa niining mga gagmay.”—Mateo 18:14.

¹² Tin-aw, si Jehova interesado sa dalan nga imong pilion. Labaw pa niana, siya apektado niana. Gipatin-aw sa Bibliya nga si Jehova adunay dulot nga mga pagbati nga mapukaw pinaagi sa maayo o daotang binuhatan sa mga tawo. Pananglitan, sa dihang sublisubli nga misukol ang mga Israelinhon, si Jehova ‘gisakitan.’ (Salmo 78:40, 41) Sa wala pa ang Lunop sa adlaw ni Noe, sa dihang “ang pagkadaotan sa tawo dagaya,” si Jehova “nasakitan diha sa iyang kasingkasing.” (Genesis 6:5, 6) Hunahunaa kon unsay kahulogan niana. Kon sundon nimo ang daotang paagi sa kinabuhi, ikaw makapaguol sa imong Maglalalang. Kini wala magpasabot nga ang Diyos mahuyang o madaog sa emosyon. Hinunoa, siya nahigugma kanimo ug may kahingawa sa imong kaayohan. Sa laing bahin, sa dihang imong buhaton ang matarong, ang kasingkasing ni Jehova malipay. Malipay siya dili lang tungod kay siya adunay dugang ikatubag kang Satanas kondili tungod usab kay siya karon mahimong imong Tigganti. Ug gusto niyang siya mahimong ingon. (Hebreohanon 11:6) Pagkamahigugmaon sa imong Amahan nga si Jehova nga Diyos!

Daghang Panalangin Bisan Karon

13. Sa unsang paagi ang pag-alagad kang Jehova mohatag ug mga panalangin bisan karon?

¹³ Ang mga panalangin tungod sa pag-alagad kang Jehova dili lang matagamtam sa umaabot. Daghang batan-on taliwala sa mga Saksi ni Jehova ang nagtagamtam nag kalipay ug katagbawan bisan karon, ug sa maayong katarongan. “Ang mga sugo ni Jehova matul-id, nga makapalipay sa kasingkasing,” misulat ang salmista. (Salmo 19:8) Si Jehova mas nahibalo kay ni bisan kinsang tawo kon unsay maayo alang kanato. Pinaagi ni propetang Isaias, si Jehova miingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw  mahimong sama gayod sa usa ka suba, ug ang imong pagkamatarong sama sa mga balod sa dagat.”—Isaias 48:17, 18.

14. Sa unsang paagi ang mga prinsipyo sa Bibliya makatabang kanimo sa paglikay sa kasakitan tungod sa utang?

¹⁴ Ang pagsunod sa mga prinsipyo sa Bibliya makatabang kanimo sa paglikay sa dakong kasakitan ug kahapdos sa kasingkasing. Pananglitan, ang Bibliya nag-ingon nga kadtong nakaugmad sa paghigugma sa salapi “nagtusaktusak sa ilang kaugalingon sa daghang kasakitan.” (1 Timoteo 6:9, 10) May bisan kinsa ba sa imong mga isigkabatan-on nga nakaagom sa daotang sangpotanan sa ilang paghigugma sa salapi sumala sa mga pulong sa maong kasulatan? Ang pipila ka batan-ong lalaki ug babaye daghan ug utang kay gihunahuna nila nga angay silang makabaton sa kinamodernohan, dekalidad nga mga besti ug kinabag-ohang mga kasangkapan. Ang kabug-at sa tagdugay, dakog-interes nga mga bayronon sa mga butang nga dili nimo maarangan maoy makapasakit-sa-dughan nga matang sa pagkaulipon!—Proverbio 22:7.

15. Sa unsang mga paagi ang mga prinsipyo sa Bibliya magapanalipod kanimo gikan sa kasakitan nga resulta sa seksuwal nga imoralidad?

¹⁵ Tagda usab ang bahin sa seksuwal nga imoralidad. Sa tibuok kalibotan kada tuig, ang di-maihap, dili-minyong mga tin-edyer mamabdos. Ang pipila magpahimugso ug anak nga dili nila gusto o dili sila makasarang sa pagbuhi. Ang uban magpataktak sa ilang gimabdos ug sakiton sa gitulisok nga konsensiya. Unya aduna pay batan-ong mga lalaki ug mga babaye nga matakdan sa sakit nga ipasa sa pakigsekso, sama sa AIDS. Siyempre, alang sa usa nga nakaila kang Jehova, ang labing daotang resulta mao ang nadaot nga relasyon uban kang Jehova. b (Galacia 5:19-21) May maayong katarongan nga ang Bibliya nag-ingon: “Kalagiw gikan sa pakighilawas.”—1 Corinto 6:18.

Pag-alagad sa “Malipayong Diyos”

16. (a) Nganong nahibalo kita nga buot ni Jehova nga ikaw magkalipay sa imong pagkabatan-on? (b) Nganong si Jehova nagpahimutang ug mga lagda nga angay nimong sundon?

¹⁶ Ang Bibliya nagbatbat kang Jehova ingong ang “malipayong Diyos.” (1 Timoteo 1:11) Buot niya nga ikaw usab magmalipayon. Sa pagkamatuod, ang iyang Pulong mismo nag-ingon: “Pahimusli ang imong pagkabatan-on. Magmalipayon samtang ikaw batan-on pa.” (Ecclesiastes 11:9, Today’s English Version) Apan si Jehova makakita sa unahan ug makaaninaw sa malungtarong  mga sangpotanan sa maayo ug daotang panggawi. Kana ang hinungdang siya nagtambag kanimo: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang malisod nga mga adlaw, o modangat ang mga tuig sa dihang ikaw moingon: ‘Ako walay kalipay niini.’”—Ecclesiastes 12:1.

17, 18. Sa unsang paagi ang usa ka batan-ong Kristohanon nagpahayag sa iyang kalipay diha sa pag-alagad kang Jehova, ug sa unsang paagi makaplagan nimo ang samang kalipay?

¹⁷ Daghang batan-on karon ang nakakaplag ug dakong kalipay diha sa pag-alagad kang Jehova. Pananglitan, ang 15-anyos nga si Lina nag-ingon: “Ikapataas ko ang akong ulo. Ako adunay himsog nga panglawas tungod sa paglikay sa tabako ug sa mga droga. Aduna akoy bililhong giya nga gihatag sa kongregasyon kanako nga makatabang kanako sa pagsukol sa hingaping pagpamit-os ni Satanas. Ang panagway sa akong nawong sayag tungod sa makapalig-on nga mga kauban diha sa Kingdom Hall. Labaw sa tanan, aduna akoy walay-ingon nga paglaom nga mao ang kinabuhing dayon dinhi sa yuta.”

¹⁸ Sama kang Lina, daghang Kristohanong mga batan-on nagapakigbisog pag-ayo dapig sa pagtuo, ug kini makapalipay kanila. Nasayod sila nga ang ilang kinabuhi—bisan pag punog kapit-osan ug kalisdanan usahay—adunay matuod nga katuyoan ug matuod nga kaugmaon. Busa, magpadayon sa pag-alagad sa Diyos nga naghunahuna gayod sa imong kaayohan. Lipaya ang iyang kasingkasing, ug iya kang lipayon karon ug hangtod sa panahong walay tino!—Salmo 5:11.

[Mga footnote]

Nahinumdom Ka Ba?

• Unsang kapeligrohan ang imong giatubang gikan sa “usa nga daotan,” si Satanas?

• Sa unsang paagi makapalipay ka sa kasingkasing ni Jehova?

• Sa unsang paagi gipakita sa Bibliya nga si Jehova may kahingawa kanimo?

• Unsa ang pipila ka panalangin tungod sa pag-alagad kang Jehova?

[Mga Pangutana sa Pagtuon]

[Kahon/Hulagway sa panid 13]

Usa ka Matarong nga Tawo Hapit Mapandol

Si Asap maoy usa ka inilang Levihanon nga musikero sa templo ni Jehova sa karaang Israel. Siya nagkomposo ganig mga awit nga gigamit diha sa publikong pagsimba. Apan, bisan pa sa iyang talagsaong mga pribilehiyo sa pag-alagad, sa usa ka panahon si Asap nahaylo sa dili-diyosnong panggawi sa iyang mga katalirongan, kinsa naglapas sa mga balaod sa Diyos nga daw walay daotang sangpotanan. “Hapit na gayong matipas ang akong mga tiil, diriyot nang maligas ang akong mga lakang,” si Asap sa ulahi miadmitir. “Nasina ako sa mga hambogiro, sa dihang nakita ko ang kalinaw sa mga tawong daotan.”—Salmo 73:2, 3.

Sa ulahi, si Asap misulod sa sangtuwaryo sa Diyos ug miampo bahin niana. Kay nakatimbangtimbang na usab sa mga butang sa espirituwal nga paagi, iyang nasabtan nga gidumtan ni Jehova ang pagkadaotan ug, sa ngadtongadto, ang daotan ug ang matarong magaani kon unsay ilang gipugas. (Salmo 73:17-20; Galacia 6:7, 8) Sa pagkamatuod, ang daotan anaa sa madanglog nga dapit. Sa kataposan, sila mangapukan gayod iniglaglag na ni Jehova niining dili-diyosnong sistema.—Pinadayag 21:8.

[Mga hulagway sa panid 15]

Si Jehova mahunahunaon gayod sa imong kaayohan, samtang ang tumong ni Satanas mao ang pagtukob kanimo

[Hulagway sa panid 16]

Daghang batan-on ang nakakaplag ug labaw nga kalipay pinaagi sa pag-alagad kang Jehova uban sa mga isigka-Kristohanon