Kon sa Unsang Paagi Nadawat sa Uban ang mga Tubag

MILYONMILYONG tawo ang mag-ampo. Ang pipila kombinsido nga gitubag ang ilang pag-ampo. Ang uban nagduhaduha kon dunggon ba gayod ang ilang pag-ampo. Ang uban pa nangitag mga tubag apan wala makahunahuna nga iampo ang ilang mga hangyo ngadto sa Diyos.

Ang Bibliya nagpaila sa matuod nga Diyos ingong ang “Tigpatalinghog sa pag-ampo.” (Salmo 65:2) Kon ikaw mag-ampo, segurado ka ba nga ikaw nagtanyag sa imong mga pag-ampo ngadto sa matuod nga Diyos? Ang imong mga pag-ampo mao ba ang matang nga iyang pagatubagon?

Alang sa daghang tawo sa tanang bahin sa yuta, ang tubag maoy oo! Sa unsang paagi nila nadawat ang mga tubag? Unsay ilang nakat-onan?

Ang Diyos—Kinsa Siya?

Usa ka magtutudlo sa Portugal nga giedukar kanhi sa mga madre ug pari sinsero nga nagtuman sa iyang relihiyon. Sa dihang giusab ug gitalikdan sa maong relihiyon ang mga tulumanon nga gitudlo kaniya kanhi nga hinungdanon, siya nalibog. Tungod sa pagbiyahe ngadto sa laing nasod, nasinati siya sa mga paagi sa pagsimba sa Asia, ug siya nagsugod sa pagduhaduha kon duna bay usa ra ka tinuod nga Diyos. Sa unsang paagi siya mosimba? Sa dihang siya nangutana sa pari bahin sa mga butang diha sa Bibliya, ang iyang mga pangutana wala panumbalinga, ug siya nahigawad.

Ang Katolikong simbahan nag-apod-apod ug pulyeto diha sa siyudad sa maong magtutudlo sa pagpasidaan sa mga membro sa parokya nga dili makig-estorya sa mga Saksi ni Jehova. Apan wala gihapon matubag ang iyang mga pangutana. Usa ka adlaw niana sa dihang ang mga Saksi miduaw sa iyang balay, siya naminaw ug nagpakitag interes sa iyang nadungog. Mao kadto ang unang higayon nga siya nakapakig-estorya kanila.

Aron matubag ang iyang daghang pangutana, kining babayhana nagsugod sa pagtuon sa Bibliya uban sa mga Saksi. Kada semana, daghan siyag pangutana kanila. Buot niyang mahibaloan ang ngalan sa Diyos, kon usa lang ba ang matuod nga Diyos, kon mouyon ba siya sa paggamit ug mga imahen sa pagsimba, ug daghang  uban pa. Iyang namatikdan nga ang tanang tubag nga iyang nadawat maoy gikan sa Bibliya, ug dili personal nga mga opinyon, busa siya nahingangha ug nalipay sa iyang nakat-onan. Anam-anam nga natubag ang iyang daghang pangutana. Karon, siya nagsimba kang Jehova uban sa espiritu ug kamatuoran, nga maoy giingon ni Jesu-Kristo nga himoon sa “matuod nga mga magsisimba.”—Juan 4:23.

Sa Sri Lanka, usa ka pamilya kanunayng mag-usa sa pagbasa sa Bibliya, apan sila wala makakaplag ug mga tubag sa daghang pangutana nga hinungdanon alang kanila. Bisan pag nagkinahanglan sila ug tabang, ang ilang pari walay tubag nga ikahatag kanila. Apan, ang mga Saksi ni Jehova miduaw ug nagbilin ug mapuslanong literatura sa Bibliya sa maong pamilya. Sa ulahi, sa dihang ang mga Saksi ni Jehova mihatag ug makapatagbawng mga tubag sa ilang mga pangutana bahin sa Bibliya, sila midawat ug pagtuon sa Bibliya. Ang ilang nakat-onan sa ilang pagtuon nakapaikag gayod kanila.

Bisan pa niana, tungod kay natisok sa hunahuna ang doktrina nga gitudlo sa simbahan sukad pa sa pagkabata, ang asawa naglisod sa pagdawat nga ang Amahan ni Jesu-Kristo mao ang “bugtong matuod nga Diyos,” nga maoy giingon mismo ni Jesus. (Juan 17:1, 3) Siya gitudloan kanhi nga si Jesus katupong sa iyang Amahan ug nga kining maong “misteryo” dili angayng dudahan. Kay nawad-ag paglaom, siya kinasingkasing nga nag-ampo kang Jehova, nga nagsangpit sa iyang ngalan, ug mihangyo kaniya nga ipasabot kaniya kon kinsa si Jesus. Dayon iya na usab nga gisusi pag-ayo ang mga teksto nga nagpamatuod niini. (Juan 14:28; 17:21; 1 Corinto 8:5, 6) Morag nabuksan ang iyang mga mata ug klaro na niyang nasabtan nga si Jehova—ang Maglalalang sa langit ug yuta ug ang Amahan ni Jesu-Kristo—mao ang matuod nga Diyos.—Isaias 42:8; Jeremias 10:10-12.

Nganong Dunay Pag-antos?

Grabe kaayo ang pag-antos sa tawong si Job. Ang tanan niyang anak namatay sa bagyo, ug siya nahimong kabos. Nakaagom usab siya ug grabeng sakit ug nag-antos sa pagpit-os sa iyang mini nga mga higala. Tungod niining tanan, si Job nakasultig mga pulong nga wala una hunahunaag maayo. (Job 6:3) Apan gikonsiderar sa Diyos ang mga kahimtang. (Job 35:15) Nasayod siya kon unsay anaa sa kasingkasing ni Job ug mihatag ug tambag nga gikinahanglan ni Job. Mao usab kini ang iyang ginahimo alang sa mga tawo karon.

Sa Mozambique, diyes anyos lang si Castro sa dihang namatay ang iyang inahan. Nahugno siya. “Ngano man nga kinahanglan pang mamatay si Mama ug biyaan kami?” siya nangutana. Bisan pag gimatuto siya sa mga ginikanan nga mahinadlokon sa Diyos, siya nalibog. Unsay makahupay sa iyang hunahuna ug kasingkasing? Siya nahupay tungod sa pagbasa sa usa ka gamayng Chichewa nga Bibliya ug sa pagpakighisgot niini uban sa iyang mga magulang nga lalaki.

Anam-anam nga nasabtan ni Castro nga ang iyang inahan namatay, dili tungod sa inhustisya sa Diyos, kondili tungod sa napanunod nga pagkadili-hingpit. (Roma 5:12; 6:23) Ang saad sa Bibliya bahin sa pagkabanhaw nakahatag kaniyag dako kaayong kahupayan tungod kay siya nakaamgo nga pinaagi niini siya makasalig nga makita niya pag-usab ang iyang inahan. (Juan 5:28, 29; Buhat 24:15) Ikasubo, upat lang ka tuig sa ulahi, namatay ang iyang amahan. Apan niining higayona mas naagwanta ni Castro ang kaguol nga gidulot sa kamatayon sa iyang amahan. Karon, siya nahigugma kang Jehova ug maunongong naggamit sa iyang kinabuhi sa pag-alagad sa Diyos. Ang tanang nakaila kaniya makakita sa iyang kalipay.

Daghang tawo nga namatyan ug mga hinigugma nahupayan sa maong mga kamatuoran sa Bibliya nga nakahupay kang Castro. Ang uban nga nakasinati ug grabeng kalisdanan tungod sa gibuhat sa mga daotan mangutana, sama kang Job: “Ngano man nga ang mga daotan nagpadayong buhi?” (Job 21:7) Kon maminaw gayod ang mga tawo sa isulti sa Diyos agig tubag diha sa iyang Pulong, ilang masayran nga ang paagi sa Diyos sa pagdumala sa mga butang sa pagkatinuod mohatag kanilag kaayohan.—2 Pedro 3:9.

Si Barbara, nga nagdako sa Tinipong Bansa, wala mismo makasinati sa mga kalisang sa gubat. Apan nagdako siya samtang daghang nasod sa kalibotan ang naggubatay. Adlaw-adlawng gibalita ang mga kabangisan sa gubat. Sa iyang pagtuon sa tunghaan, nalibog siya bahin sa mga panghitabo sa kasaysayan nga nahitabo sa mga paagi nga morag dili matag-an. Unsay hinungdan niini? May kahingawa ba ang Diyos sa kon unsay nagakahitabo? Siya nagtuo nga naglungtad ang Diyos, apan nalibog siya bahin kaniya.

 Apan, ang panglantaw ni Barbara sa kinabuhi inanay nga nausab tungod sa iyang pagpakig-uban sa mga Saksi ni Jehova. Siya naminaw kanila ug nagtuon sa Bibliya uban kanila. Siya nagtambongan sa mga tigom sa Kingdom Hall. Mitambong pa gani siya sa usa sa ilang dagkong mga kombensiyon. Dugang pa, sa dihang nangutana siya, iyang namatikdan nga dili lainlaing mga opinyon ang iyang madunggan gikan sa lainlaing mga Saksi. Hinunoa, nagkauyon ang tubag sa mga Saksi tungod kay ang ilang panghunahuna binase sa Bibliya.

Gipakita sa mga Saksi ang pamatuod gikan sa Bibliya nga ang kalibotan giimpluwensiyahan ni Satanas nga Yawa, ang magmamando niini, ug nga gipabanaag niini ang iyang espiritu. (Juan 14:30; 2 Corinto 4:4; Efeso 2:1-3; 1 Juan 5:19) Ilang gipatin-aw nga ang mga panghitabo nga nakapalibog kang Barbara gitagna na sa Bibliya. (Daniel, mga kapitulo 2, 7, ug 8) Kini gitagna sa Diyos tungod kay siya may katakos sa pagkahibalo sa umaabot kon buot niya. Ang pipila niining maong mga panghitabo gipahinabo sa Diyos. Ang uban gitugotan lang niya nga mahitabo. Gipakita sa mga Saksi kang Barbara nga ang Bibliya nagtagna usab sa maayo ug daotang mga panghitabo sa atong panahon ug nagpatin-aw sa kahulogan niini. (Mateo 24:3-14) Gipakita nila kaniya ang mga saad sa Bibliya bahin sa usa ka bag-ong kalibotan diin ang pagkamatarong maglungtad ug ang pag-antos mahanaw na.—2 Pedro 3:13; Pinadayag 21:3, 4.

Sa hinayhinay, nasabtan ni Barbara nga bisan tuod dili si Jehova nga Diyos ang hinungdan sa pag-antos sa mga tawo, dili siya mosanta niini pinaagi sa pagpugos sa mga tawo sa pagtuman sa iyang mga sugo kon modumili sila sa pagtuman kaniya. (Deuteronomio 30:19, 20) Ang Diyos naghimog mga tagana nga pinaagi niini kita mahimong mabuhi nga walay kataposan sa kalipay, apan siya naghatag kanato ug kahigayonan karon sa pagpasundayag kon kita ba magkinabuhi uyon sa iyang matarong nga mga dalan. (Pinadayag 14:6, 7) Si Barbara nakadesisyon sa pagkat-on sa mga kinahanglanon sa Diyos ug sa pagkinabuhi subay niini. Nakita usab niya taliwala sa mga Saksi ni Jehova ang matang sa gugma nga giingon ni Jesus nga maoy magpaila sa iyang tinuod nga mga sumusunod.—Juan 13:34, 35.

Ikaw usab makabenepisyo gikan sa mga tagana nga nakatabang kaniya.

May Kahulogan ang Kinabuhi

Bisan kadtong morag malamposon sa kinabuhi tingali nangitag tubag sa mga pangutana nga nakapalibog kanila. Pananglitan, si Matthew, nga usa ka batan-on sa Britanya, kanunay gayod nga nangandoy nga makakaplag sa matuod nga Diyos ug sa katuyoan sa kinabuhi. Ang iyang amahan namatay sa 17-anyos pa si Matthew. Human niana, si Matthew mikuhag kurso sa musika sa unibersidad ug nahimong titulado. Dayon siya inanay nga nakaamgo sa kakawangan sa iyang materyalistikong paagi sa pagkinabuhi. Mibiya siya sa ilaha ug mipuyo sa London, ug didto siya nalangkit sa droga, mga naytklab, astrolohiya, espiritismo, ug sa Zen Budismo ug ubang mga pilosopiya—sa tuyo nga makakaplag ug makapatagbawng paagi sa kinabuhi. Kay nawad-ag paglaom, siya mituaw ngadto sa Diyos nga tabangan siyang makakaplag sa kamatuoran.

Duha ka adlaw sa ulahi nakigkita si Matthew sa usa ka dugay nang higala ug giasoy ang iyang kahimtang. Kining tawhana nakatuon uban sa mga Saksi ni Jehova. Sa dihang gipakita kang Matthew ang 2 Timoteo 3:1-5, natingala siya sa katukma sa paghubit sa Bibliya sa kahimtang sa kalibotan karon. Sa dihang iyang gibasa ang Wali sa Bukid, natandog ang iyang kasingkasing. (Mateo, mga kapitulo 5-7) Sa sinugdanan, nagpanuko siya tungod kay nakabasa siya ug basahong nanaway sa mga Saksi ni Jehova, apan sa ulahi nakadesisyon siya sa pagtambong sa mga tigom sa duol nga Kingdom Hall.

Si Matthew nalipay sa iyang nadungog ug nagsugod sa pagtuon sa Bibliya uban sa usa sa mga ansiyano sa kongregasyon. Wala madugay iyang naamgohan nga ang iyang nakat-onan mao ang butang nga dugay na niyang gipangita, ang tubag sa iyang pag-ampo kanhi sa Diyos. Siya nakatagamtam ug mga benepisyo tungod kay iyang gisalikway ang mga buhat nga dili kahimut-anan kang Jehova. Samtang iyang giugmad ang maayong matang sa kahadlok sa Diyos, siya napalihok sa pagpahiuyon sa iyang kinabuhi subay sa mga sugo sa Diyos. Nakat-onan ni Matthew nga ang ingon niini nga kinabuhi dunay tinuod nga kahulogan.—Ecclesiastes 12:13.

Si Matthew o ang ubang gihisgotan niining artikuloha wala but-ing daan nga makabaton ug makapatagbawng paagi sa kinabuhi. Hinunoa, ilang nakat-onan nga si Jehova nga Diyos dunay mahigugmaong  katuyoan nga naglakip sa tanan nga kinabubut-ong mopili sa pagtuman sa iyang mga sugo. (Buhat 10:34, 35) Ang maong katuyoan naglakip ug kinabuhing dayon diha sa usa ka kalibotan nga wala nay gubat, wala nay sakit ug gutom—wala na bisan kamatayon. (Isaias 2:4; 25:6-8; 33:24; Juan 3:16) Mao ba kini ang imong gusto? Kon mao, ikaw makakat-on ug dugang bahin sa pagkakaplag sa yawi sa makapatagbawng kinabuhi pinaagi sa pagtambong sa binase-sa-Bibliya nga mga tigom sa Kingdom Hall sa mga Saksi ni Jehova. Ikaw mainitong gidapit sa pagtambong.

[Hulagway sa panid 7]

Pag-ampo nga kinasingkasing sa Diyos, nga sangpiton ang iyang personal nga ngalan

[Hulagway sa panid 7]

Tun-i ang Bibliya uban niadtong tinuod nga nagtudlo sa kaundan niini

[Mga hulagway sa panid 7]

Tambong sa mga tigom sa Kingdom Hall

[Picture Credit Line sa panid 4]

Hiker: Chad Ehlers/Index Stock Photography