Sila Nag-alagad sa Kristohanong Kapunongan sa mga Igsoon sa Ubang mga Nasod

NAKADUNGOG ka na ba sa mga terminong “internasyonal nga mga alagad” ug “internasyonal nga mga boluntaryo”? Ang mga Saksi ni Jehova nga naglangkob niining mga pundoka naghatag sa ilang panahon ug kahanas sa pagtabang sa pagtukod sa mga pasilidad nga gamiton sa pagpatik ug pag-apod-apod sa mensahe sa Gingharian nga anaa sa Bibliya. Ang maong mga boluntaryo motabang usab sa pagtukod ug mga Assembly Hall ug mga Kingdom Hall, nga nagsilbing mga sentro sa pagtudlo ug Bibliya. Sa pagkakaron, kining maong mga boluntaryo nagaabag sa mga proyekto sa pagtukod diha sa 34 ka lainlaing mga nasod, kadaghanan diha sa mga nasod nga kulang ang kahinguhaan. Unsang espesipikong mga problema ug mga kalipay ang naeksperyensiyahan nianang maong mga ministro samtang sila nag-alagad sa Kristohanong kapunongan sa mga igsoon sa ubang mga nasod? Unsay ilang gibati sa “sagradong pag-alagad” nga ilang gihimo? (Pinadayag 7:9, 15) Aron mahibaloan, himamaton nato ang pipila ka boluntaryo nga nag-alagad sa Mexico.

Ang mga boluntaryo gikan sa laing mga nasod unang nangabot sa Mexico sa Mayo 1992. Wala madugay human niana, sila nanguna sa buluhaton sa pagpadako sa sangang buhatan, nga maoy nagdumala sa mga kalihokan sa mga Saksi ni Jehova sa Mexico. Ang proyekto gilangkoban sa 14 ka bag-ong gitukod nga mga bilding, lakip na sa mga puy-anan alang sa mga boluntaryo nga nag-alagad diha sa sangang buhatan, usa ka imprentahanan, ug bilding nga dunay mga opisina.

Aron sa pag-abag niining maong proyekto sa pagtukod, kapin sa 730 ka boluntaryo gikan sa Canada, Gran Britanya, Tinipong Bansa, ug sa ubang mga nasod nagkigtambayayong sa gatosan ka boluntaryo gikan sa tanang bahin sa Mexico. Gawas pa niana, kapin sa 28,000 ka Saksi nga nakig-uban sa mga 1,600 ka kongregasyon nga nahimutang duol sa sangang buhatan miabag sa mga buluhaton sa pagtukod panahon sa mga hinapos sa semana. Ang tanan nag-alagad uban ang andam nga espiritu ug nagtanyag sa ilang mga kahanas nga walay bayad. Giisip nilang pribilehiyo nga mag-alagad kang Jehova niining paagiha. Sa tibuok proyekto sa pagtukod, ilang gihunahuna kanunay ang inspiradong mga pulong nga makita diha sa Salmo 127:1: “Gawas nga si Jehova ang magatukod sa balay, kawang lamang ang paghago sa mga magtutukod niini.”

Mga Problema nga Ilang Giatubang

Unsa ang mga problema nga giatubang sa internasyonal nga mga boluntaryo samtang sila nag-alagad sa usa ka langyawng asaynment? Aniay  pipila sa ilang mga obserbasyon. Si Curtis ug Sally, usa ka magtiayon nga taga-Tinipong Bansa, mitabang sa mga proyekto sa pagtukod sa Alemanya, India, Mexico, Paraguay, Romania, Rusya, Senegal, ug Zambia. Si Curtis nag-ingon: “Ang unang problema mao ang pagbiya sa among anak nga babaye, kinsa nag-alagad ingong payunir [bug-os-panahong ministro], ug sa among kongregasyon sa Minnesota. Ang akong asawa ug ako nakig-uban nianang kongregasyona sulod sa 24 ka tuig, ug naanad na kami didto.”

Si Sally nag-ingon: “Usa ka problema ang pagkinabuhi ilalom sa dili pamilyar nga mga kahimtang, tingali labi na sa usa ka babaye kay sa lalaki, apan nakat-onan nako nga posibleng mopasibo. Nakakat-on gani ako sa pag-agwanta sa daghan kaayong insekto!” Miingon pa siya: “Sa usa ka nasod, napulo kanamong mga boluntaryo ang nag-uban sa usa ka apartment nga walay kosina ug duha lamang ang mga kaligoanan. Didto nakakat-on ako sa pagkahimong mas mapailobon.”

Ang pagtuon ug bag-ong pinulongan maoy lain usab nga problema nga nagkinahanglag paningkamot ug pagpaubos. Si Sharon, kinsa nag-alagad uban sa iyang bana sa mga proyekto sa pagtukod diha sa lainlaing mga nasod, nag-ingon: “Lisod nga dili ka mahibalo sa pinulongan sa nasod nga imong gialagaran. Sa sinugdan, lisod ang pagpakigsuod sa imong espirituwal nga mga igsoong lalaki ug babaye kon dili ka kaayo makapahayag sa imong pagbati. Makapahigawad kana. Apan ang mga igsoon nga among nahimamat sa among langyawng mga asaynment mapailobon kaayo kanamo ug interesado kaayo sa among kaayohan. Sa wala madugay, nagsugod na kami sa pagpakig-estorya bisan pag managlahi kamig mga pinulongan.”

Pagpakigbahin sa Ministeryo Nagkinahanglan ug Kaisog

Bisan tuod ang maong nagsakripisyo-sa-kaugalingon nga mga boluntaryo nakatabang ug dako sa pag-uswag sa buluhaton nga pagtukod, ilang naamgohan nga sila, una sa tanan, maoy mga magwawali sa maayong balita sa Gingharian sa Diyos. Busa, sila bug-os nga nagsuportar sa buluhatong pagsangyaw nga ginahimo sa mga kongregasyon nga ilang gipakig-ubanan. Si Åke ug Ing-Mari, usa ka magtiayon nga mitabang sa mga proyekto sa pagtukod sa Guadeloupe, Malawi, Mexico, ug Nigeria,  miuyon nga ang paggamit ug laing pinulongan sa dihang nakigbahin sa ministeryo sa kanataran sa langyawng nasod nagkinahanglag kaisog.

Si Ing-Mari nag-asoy: “Sa sinugdan limitado ra ang among pagpakigbahin, tungod kay kanunay kaming mokuyog sa lokal nga mga Saksi ug, tungod sa kaulaw, subsob nga sila ray among pasultihon. Apan, usa ka buntag niana nakahukom kami sa pagsangyaw sa kanataran nga kamikami lang. Misangyaw mi, bisan tuod ug gikulbaan mi. Nahimamat namo ang usa ka batan-ong babaye nga namati pag-ayo sa akong giandam nga presentasyon. Mibasa ko ug teksto ug nagpahimutang ug pipila ka basahon. Dayon ang babaye miingon: ‘Naa koy ipangutana nimo. Duna koy paryente nga nagtuon sa Bibliya uban sa mga Saksi ni Jehova. Sa unsang paagi ako makatuon usab?’ Kay nakurat, wala ko mahibalo kon unsay akong isulti. Dayon mikalma ko ug gitanyagan nako siya ug pagtuon sa Bibliya.”

Miingon pa si Ing-Mari: “Tiaw mo kon unsa ka dako ang akong kalipay ug ang akong pasalamat kang Jehova tungod sa pagpanalangin sa among inisyatibo ug sa among tinguha sa pagpaambit sa kamatuoran.” Kining babayhana miuswag pag-ayo ug nabawtismohan ingong Saksi sa usa ka distritong kombensiyon sa Mexico City. Gisumaryo ni Åke ug Ing-Mari ang ilang ministeryo niining paagiha: “Gipabilhan gayod namo ang among mga asaynment diha sa lainlaing mga proyekto sa pagtukod, apan walay molabaw sa kalipay ug katagbawan sa pagtabang sa usa ka tawo nga modawat sa kamatuoran.”

Nagsakripisyo-sa-Kaugalingon nga Espiritu

Tinuod nga ang mga boluntaryo nga mibiya sa pamilya ug mga higala nagsakripisyo aron sa pag-alagad sa ilang mga igsoon sa langyawng mga nasod, apan sila usab nakaeksperyensiya ug dili-hitupngang mga kalipay. Unsa kini?

Si Howard, kinsa nag-alagad uban sa iyang asawa nga si Pamela sa Angola, Colombia, Ecuador, El Salvador, Guyana, Mexico, ug Puerto Rico, misaysay: “Usa ka pribilehiyo nga mahimamat ang mga igsoong lalaki ug babaye sa lainlaing mga nasod ug sa pag-eksperyensiya mismo sa bugkos sa gugma nga naglungtad sa atong internasyonal nga panag-igsoonay. Subsob nga mabasa nato kana, apan sa dihang ikaw mopuyo ug moalagad duyog sa uban nga gikan sa lainlaing mga kultura ug mga kagikan, mas maapresyar nimo ang atong bililhong panag-igsoonay.”

Si Gary, kinsa nakatabang sa mga proyekto sa pagtukod didto sa Colombia, Costa Rica, Ecuador, Mexico, ug Zambia, mibati usab nga kining maong programa nakahatag kaniyag dakong kaayohan. Siya nag-asoy: “Ang pagbansay nga akong nadawat sulod sa daghang tuig tungod sa pagpakig-uban sa hamtong nga mga igsoon nga nag-alagad sa mga sangang buhatan sa mga nasod diin ako giasayn nakatabang kanako nga mas masangkapan pa alang sa mga problema sa akong mga asaynment. Kini makapalig-on sa pagtuo tungod kay kini maghatag ug kahigayonan sa pag-eksperyensiya sa panaghiusa nga maoy ilhanan sa tibuok-kalibotang organisasyon ni Jehova—usa ka panaghiusa nga molabaw pa sa mga kalainan sa pinulongan, rasa, o kultura.”

Sa pagkakaron, ang buluhatong pagtukod sa Mexico natapos na, ug ang mas dakong mga pasilidad sa sanga gipahinungod niining tuiga. Kay gitukmod sa ilang gugma alang sa Diyos, ang internasyonal nga mga alagad ug internasyonal nga mga boluntaryo dakog natabang sa pagpauswag sa matuod nga pagsimba sa Mexico ug sa ubang dapit. Ang ilang andam ug nagsakripisyo-sa-kaugalingon nga espiritu sa pag-alagad sa ilang Kristohanong mga igsoon sa ubang mga nasod gipabilhan gayod sa mga Saksi ni Jehova sa tibuok kalibotan.

[Hulagway sa panid 25]

Ecuador

[Hulagway sa panid 25]

Colombia

[Hulagway sa panid 25]

Angola

[Hulagway sa panid 26]

Gisugdan ang pagtrabaho sa bag-ong mga pasilidad sa sangang buhatan sa Mexico

[Hulagway sa panid 26]

Ang hardin sa sangang buhatan

[Hulagway sa panid 26]

Sa ubos: Pipila ka membro sa Construction Department atubangan sa usa ka bahin sa bag-ong mga pasilidad

[Hulagway sa panid 27]

Ang mga boluntaryo sa konstruksiyon malipay sa pagsuportar sa buluhatong pagsangyaw uban sa lokal nga mga kongregasyon