Unsay Buot Nimong Ipangutana sa Diyos?

ANG mga tawo sa tibuok kalibotan dunay importanteng mga pangutana bahin sa kinabuhi. Ikaw ba usab dunay mga pangutana? Daghan ang nagsukna sa ilang mga pangutana ngadto sa relihiyosong mga instruktor apan wala makadawat ug makapatagbawng mga tubag. Ang uban naghinuktok bahin niining mga pangutanaha sa personal. Ang pipila nag-ampo alang sa pagtultol. Posible ba gayod nga makadawat ka ug mga tubag gikan sa Diyos bahin sa mga butang nga nakapalibog kanimo? Apil sa mga pangutana nga matod pa sa daghang tawo buot nilang ipangutana sa Diyos mao kini:

Kinsa ka man gayod, Ginoo?

Ang panglantaw sa mga tawo bahin sa Diyos maimpluwensiyahan sa ilang kultura, sa relihiyon sa ilang mga ginikanan, ug tingali sa kon unsay ilang gustong tuohan. Ang ubang mga tawo mogamit ug ngalan alang sa maong Bathala; ang uban motawag ra kaniya nga Diyos. Hinungdanon ba gayod kini? Usa lang ba ang tinuod nga Diyos nga nagpadayag sa iyang kaugalingon ug sa iyang ngalan kanato?

Nganong dunay daghang pag-antos?

Kon ang dinanghag o imoral nga paagi sa pagkinabuhi sa usa ka tawo nakadaot sa iyang panglawas o nakahimo kaniyang kabos, tingali moreklamo siya. Apan tingali nasayod gayod siya kon nganong nag-antos siya.

Apan, daghan pang uban ang hilabihang nag-antos bisag dili silay hinungdan niini. Ang pipila dunay nagbalikbalik nga mga balatian. Ang uban nakigbisog batok sa daw dili-mabuntog nga mga kabilinggan aron dunay kapasilongan ug igong pagkaon ang ilang mga pamilya. Minilyon ang mga biktima sa krimen, gubat, way-piling kapintasan, kinaiyanhong mga katalagman, o inhustisya diha sa mga kamot sa mga tawong anaa sa awtoridad.

Masabtan kon nganong daghan ang mangutana: ‘Nganong mikaylap pag-ayo kining mga kahimtanga? Nganong gitugotan sa Diyos kining tanang pag-antos?’

 Nganong naglungtad ako? Unsay katuyoan sa kinabuhi?

Kining mga pangutanaha kasagarang motungha tungod sa kapakyasan nga bation sa usa ka tawo kansang adlaw-adlawng kalihokan dili makahatag ug tinuod nga katagbawan—ug mao kanay kahimtang sa daghang tawo. Minilyon pang uban nagtuo nga ang dalan sa kinabuhi sa matag tawo sa usa ka paagi gimbut-an nang daan sa Diyos. Tinuod ba kini? Kon ang Diyos duna gayoy linaing katuyoan alang kanimo, tino nga ikaw gustong mahibalo kon unsa kini.

Sa tanang libro sa kalibotan, dunay usa nga tin-awng nag-ingon nga kini inspirado sa Diyos. Sama sa imong madahom sa usa ka mensahe nga gikan gayod sa Diyos alang sa tanang tawo, kining libroha mabatonan diha sa mas daghang pinulongan kay sa bisan unsang libro nga gisulat sukad. Kini mao ang Balaang Bibliya. Dinhi, gipadayag sa Maglalalang sa langit ug yuta, ang Diyos mismo, kon kinsa siya ug kon unsay iyang ngalan. Nahibalo ka ba nianang ngalana? Nasayod ka ba sa giingon sa Bibliya kon unsang matanga sa pagka-Persona ang Diyos? Nahibalo ka ba kon unsay giingon niini bahin sa gidahom sa Diyos kanimo?

 [Picture Credit Line sa panid 2]

COVER: Chad Ehlers/Index Stock Photography

[Picture Credit Line sa panid 3]

Mountain: Chad Ehlers/Index Stock Photography