Duna Ka bay “Mahulatong Tinamdan”?

“Angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!”—2 PEDRO 3:11, 12.

1, 2. Sa unsang paagi nato ikailustrar ang pagbaton ug “mahulatong tinamdan” maylabot sa adlaw ni Jehova?

 HANDURAWA ang usa ka pamilya nga nagpaabot ug mga bisita alang sa panihapon. Ang gitakdang panahon sa ilang pag-abot paspas nga nagsingabot. Ang asawa puliki nga naghimo sa kataposang mga pagpangandam alang sa panihapon. Ang iyang bana ug ang ilang mga anak mitabang aron sa pagseguro nga maandam ang tanan. Mahinamon ang tanan. Oo, ang tibuok pamilya maikagong naghulat sa pag-abot sa mga bisita ug naglantaw sa unahan sa lamiang pagkaon ug maayong pag-ubanay.

² Ingong mga Kristohanon, kita nagapaabot sa usa ka butang nga mas hinungdanon pa. Nagpaabot sa unsa? Aw, kitang tanan nagapaabot sa “adlaw ni Jehova”! Hangtod nga moabot kini, kita kinahanglang mahisama sa manalagnang si Miqueas, kinsa miingon: “Magalantaw ako kang Jehova. Magpakita ako ug mahulatong tinamdan sa Diyos sa akong kaluwasan.” (Miqueas 7:7) Nagpasabot ba kana ug pagkawalay-kalihokan? Wala. Daghan ang angayng buhaton.

3. Sumala sa 2 Pedro 3:11, 12, unsang tinamdan ang angayng batonan sa mga Kristohanon?

³ Si apostol Pedro motabang kanato sa pagbaton sa hustong tinamdan samtang nagapaabot. Siya miingon: “Angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Pedro 3:11, 12) Matikdi nga kini maoy usa ka pahayag nga nagpatugbaw ang tono. Si Pedro wala magpatungha ug pangutana. Diha sa iyang duha ka inspirado-sa-Diyos nga mga sulat, iyang gihubit kon unsang matanga sa mga tawo nga ang mga Kristohanon angayng mahimo. Giawhag usab niya sila nga magpadayon sa paghimog “mga buhat sa diyosnong pagkamahinalaron.” Bisan tuod duolan na sa 30 ka tuig ang milabay sukad si Jesu-Kristo naghatag sa ilhanan “sa kataposan sa sistema sa mga butang,” ang mga Kristohanon dili angayng mohunong sa pagbantay. (Mateo 24:3) Kinahanglan silang ‘magpaabot ug magbutang kanunay sa hunahuna’ sa presensiya sa adlaw ni Jehova.

4. Unsay nalangkit sa ‘pagbutang kanunay sa hunahuna sa presensiya sa adlaw ni Jehova’?

⁴ Ang Gregong pulong dinhi nga gihubad ug “nagabutang kanunay sa hunahuna” sa literal nagpasabot ug “pagpadali.” Siyempre, dili nato literal nga ‘mapadali’ ang adlaw ni Jehova. Maylabot niana, kita ‘wala mahibalo sa adlaw ug takna’ sa dihang si Jesu-Kristo moabot aron sa pagpahamtang sa paghukom nganha sa mga kaaway sa  iyang Amahan. (Mateo 24:36; 25:13) Ang usa ka reperensiyang basahon nagpatin-aw nga dinhi ang lintunganayng berbo sa ekspresyong “pagpadali” nagpasabot ug “‘pagdalidali’ ug busa nalangkit pag-ayo sa ‘pagkahimong masiboton, aktibo, mabalak-on bahin sa usa ka butang.’” Busa si Pedro nag-awhag sa mga isigkamagtutuo nga mainitong magtinguha sa presensiya sa adlaw ni Jehova. Mahimo nila kini pinaagi sa paghunahuna kanunay bahin niana. (2 Pedro 3:12) Sanglit duol na kaayo karon “ang dako ug makalilisang nga adlaw ni Jehova,” kinahanglang mabatonan nato ang susamang tinamdan.—Joel 2:31.

Pagpaabot Uban ang “Balaang mga Buhat sa Panggawi”

5. Sa unsang paagi ikapakita nato nga kita mainitong nagatinguha nga makita ang “adlaw ni Jehova”?

⁵ Kon kita mainitong nagtinguha nga makalabang-buhi sa adlaw ni Jehova, ipadayag nato kana pinaagi sa atong “balaang mga buhat sa panggawi ug mga buhat sa diyosnong pagkamahinalaron.” Ang ekspresyong “balaang mga buhat sa panggawi” magpahinumdom kanato sa awhag ni Pedro: “Ingong masinugtanong mga anak, hunong na sa pagpaumol sumala sa mga tinguha nga inyong nabatonan kanhi sa inyong kawalay-alamag, apan, sumala sa Balaang Usa nga nagtawag kaninyo, magmabalaan usab kamo sa tanan ninyong panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’”—1 Pedro 1:14-16.

6. Aron mahimong balaan, unsay angay natong buhaton?

⁶ Aron mahimong balaan, kinahanglang huptan nato ang pisikal, mental, moral, ug espirituwal nga kahinlo. Kita ba nagaandam alang sa “adlaw ni Jehova” pinaagi sa paghupot sa atong kaugalingon nga balaan ingong mga tawo nga nagdala sa ngalan ni Jehova? Dili sayon karon ang paghupot sa maong kaputli tungod kay ang moral nga mga sukdanan sa kalibotan anam-anam nga nagakadaot. (1 Corinto 7:31; 2 Timoteo 3:13) Nakita ba nato nga nagakadako ang kalainan tali sa atong moral nga mga sukdanan ug nianang sa kalibotan? Kon wala, angay kitang mabalaka. Dili kaha nga ang atong personal nga mga sukdanan, bisan tuod mas taas kay nianang sa kalibotan, nagakadaot na? Kon mao, kita kinahanglang mohimog positibong aksiyon sa pagtul-id sa mga butang aron mapahimut-an ang Diyos.

7, 8. (a) Sa unsang paagi mahimong malimtan nato ang kahinungdanon sa paghimog “balaang mga buhat sa panggawi”? (b) Unsang mga pagtul-id ang mahimong kinahanglanon?

⁷ Tungod kay anaa na sa Internet ang pornograpiya ug makita kana sa pribado, ang uban nga sa una dili makakita sa maong imoral nga mga butang sa pagkakaron makakita na ug “walay kinutobang suplay sa seksuwal nga mga kahigayonan,” matod sa usa ka medikal nga doktor. Kon pangitaon nato kanang dili-hinlo nga mga site sa Internet, tino nga atong gibalewala ang sugo sa Bibliya nga ‘dili na mohikap ug mahugaw.’ (Isaias 52:11) Kita ba gayod ‘nagbutang kanunay sa hunahuna sa presensiya sa adlaw ni Jehova’? O kita ba nag-oktaba sa maong adlaw diha sa atong hunahuna, nga mangatarongan nga bisan pag gihugawan nato ang atong hunahuna sa law-ayng mga butang, duna pa kitay panahon sa paghinlo sa atong kaugalingon? Kon duna kitay problema niining bahina, pagkadinalian gayod nga mohangyo kang Jehova nga ‘ilikay ang atong mga mata gikan sa pagtan-aw sa butang nga walay-pulos ug tipigan kitang buhi diha sa iyang dalan’!—Salmo 119:37.

⁸ Ang kadaghanang Saksi ni Jehova, mga bata ug tigulang, nagpabilin sa taas nga moral nga mga sukdanan sa Diyos ug naglikay sa imoral nga mga panghaylo niining kalibotana. Kay nakaamgo sa pagkadinalian sa atong kapanahonan ug sa pasidaan ni Pedro nga “ang adlaw ni Jehova moabot ingon sa usa ka kawatan,” sila nagpadayon sa paghimo ug “balaang mga buhat sa panggawi.” (2 Pedro 3:10) Ang ilang mga buhat nagpamatuod nga sila “nagapaabot ug nagabutang kanunay sa hunahuna sa presensiya sa adlaw ni Jehova.” a

 Pagpaabot Uban ang “mga Buhat sa Diyosnong Pagkamahinalaron”

9. Ang diyosnong pagkamahinalaron angayng magtukmod kanato sa pagbuhat sa unsa?

⁹ Ang “mga buhat sa diyosnong pagkamahinalaron” hinungdanon usab kon buot natong ibutang sa hunahuna ang adlaw ni Jehova. Ang “diyosnong pagkamahinalaron” naglangkit ug pagtahod sa Diyos nga magtukmod kanato sa pagbuhat kon unsay makapahimuot sa iyang mga mata. Ang pagkamaunongon kang Jehova mao ang nagapalihok nga puwersa sa maong mga buhat sa diyosnong pagkamahinalaron. Iyang kabubut-on nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Ang Diyos “wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Nan, dili ba ang atong diyosnong pagkamahinalaron angayng magpalihok kanato sa pagpaningkamot pag-ayo sa pagtabang sa mga tawo sa pagkakat-on bahin kang Jehova ug pagsundog kaniya?—Efeso 5:1.

10. Nganong angay kitang magbantay batok sa “malimbongong gahom sa mga bahandi”?

¹⁰ Ang atong kinabuhi matugob sa mga buhat sa diyosnong pagkamahinalaron kon unahon nato pagpangita ang Gingharian sa Diyos. (Mateo 6:33) Naglakip kini sa atong pagbaton ug timbang nga panglantaw sa materyal nga mga butang. Si Jesus nagpasidaan: “Bukha kanunay ang inyong mga mata ug pagbantay batok sa tanang matang sa hakog nga pangibog, tungod kay bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Bisan tuod lisod tingaling handurawon ang atong kaugalingon nga mabutaan sa gugma sa salapi, maayong atong matikdan nga “ang kabalaka niining sistema sa mga butang ug ang malimbongong gahom sa mga bahandi” ‘makatuok sa pulong’ sa Diyos. (Mateo 13:22) Dili tingali sayon ang pagpanginabuhi. Busa, sa pipila ka dapit sa kalibotan daghan ang mangatarongan nga aron moarang-arang ang kinabuhi, kinahanglang mobalhin sila sa mas adunahang nasod, tingali mahimulag sa ilang pamilya sulod sa pipila ka tuig. Bisan ang pipila sa katawhan sa Diyos nangatarongan niining paagiha. Pinaagi sa pag-adto sa laing nasod, tingali makatagana sila sa ilang pamilya sa modernong mga kasangkapan. Apan, unsay mahimong mahitabo sa espirituwal nga kahimtang sa ilang mga minahal nga nahibilin sa balay? Kon walay hustong pagpangulo diha sa panimalay, mabatonan ba nila ang espirituwalidad nga gikinahanglan aron makalabang-buhi sa adlaw ni Jehova?

11. Sa unsang paagi ang usa ka tawo nga nanarbaho sa laing nasod nagpasundayag nga ang mga buhat sa diyosnong pagkamahinalaron mas hinungdanon kay sa mga bahandi?

¹¹ Usa ka Pilipino nga nanarbaho sa laing nasod nakakat-on sa kamatuoran sa Bibliya gikan sa mga Saksi ni Jehova sa Japan. Sa pagkahibalo bahin sa Kasulatanhong mga responsibilidad sa pagkaulo, iyang naamgohan nga kinahanglang tabangan niya ang iyang pamilya nga mahimong mga magsisimba ni Jehova. (1 Corinto 11:3) Ang iyang asawa nga nahibilin sa balay misupak gayod sa iyang bag-ong-kaplag nga pagtuo ug gustong magsige siyag padala ug kuwarta inay kay mopauli aron sa pagtudlo sa pamilya sa iyang pinasukad-sa-Bibliya nga mga pagtuo. Apan, tungod kay napalihok sa pagkadinalian sa kapanahonan ug sa kahingawa alang sa iyang mga minahal, siya mipauli. Ang iyang pagpailob diha sa mahigugmaong pagpakiglabot sa mga membro sa pamilya gigantihan. Ngadtongadto, ang iyang pamilya nahiusa sa matuod nga pagsimba, ug ang iyang asawa misulod sa bug-os-panahong ministeryo.

12. Nganong angay natong unahon ang espirituwal nga mga intereses?

 ¹² Ang atong situwasyon ikatandi nianang sa mga tawo diha sa nagdilaab nga bilding. Maalamon bang matarantar sa pagngadto-nganhi aron masalbar ang materyal nga mga butang gikan sa nagdilaab nga tinukod nga hapit nang mahugno? Hinunoa, dili ba mas hinungdanon nga maluwas ang mga kinabuhi—ang atoa ug nianang sa atong pamilya ug sa uban nga nagpuyo sa maong bilding? Aw, kining daotang sistema sa mga butang tulin nga nagapadulong sa pagkahugno niini, ug nameligro ang mga kinabuhi. Kay nakaamgo niini, segurado nga unahon nato ang espirituwal nga mga intereses ug masibotong maghatag ug pagtagad sa nagaluwas-ug-kinabuhi nga buluhatong pagsangyaw sa Gingharian.—1 Timoteo 4:16.

Kita Kinahanglang “Walay Buling”

13. Unsang kahimtang ang gusto natong maanaa kita sa dihang mahitabo ang adlaw ni Jehova?

¹³ Nagpasiugda sa kahinungdanon sa paghupot sa mahulatong tinamdan, si Pedro nag-ingon: “Mga hinigugma, sanglit nagapaabot kamo niining mga butanga, buhata ang kutob sa inyong maarangan nga sa kataposan makaplagan kamo [sa Diyos] nga walay buling ug walay lama ug anaa sa pakigdait.” (2 Pedro 3:14) Gawas pa sa iyang awhag sa paghimog balaang mga buhat sa panggawi ug mga buhat sa diyosnong pagkamahinalaron, gipasiugda ni Pedro nga hinungdanong sa kataposan makaplagan ni Jehova ingong mga tawo nga nahinloan sa bililhong dugo ni Jesus. (Pinadayag 7:9, 14) Kini nagkinahanglan nga ang usa ka tawo magpasundayag ug pagtuo sa halad ni Jesus ug mahimong dedikado ug bawtismado nga alagad ni Jehova.

14. Unsay nalangkit sa pagkahimong “walay buling”?

¹⁴ Giawhag kita ni Pedro nga buhaton ang kutob sa atong maarangan nga makaplagang “walay buling.” Gihuptan ba nato ang atong mga besti sa Kristohanong panggawi ug personalidad nga walay buling, wala mamansahi sa kalibotan? Kon duna kitay mamatikdan nga buling diha sa atong sinina, maningkamot dayon kita sa pagtangtang niana. Kon ang usa ka paboritong besti maoy nabulingan, ilabinang mag-amping kita sa paghinlo niana. Gibati ba nato ang susama niana kon ang atong Kristohanong mga besti namansahan, ingnon ta, tungod sa usa ka apan sa atong personalidad o panggawi?

15. (a) Nganong ang mga Israelinhon gisugo sa paghimog borlas sa sidsid sa ilang mga besti? (b) Nganong ang presenteng-adlaw nga mga alagad ni Jehova kinahanglang mahimong lahi?

¹⁵ Ang mga Israelinhon gisugo sa paghimog “borlas sa sidsid sa ilang mga besti” ug sa ‘pagbutang ug asul nga kordon sa ibabaw sa borlas sa sidsid.’ Ngano? Aron ilang mahinumdoman ang mga sugo ni Jehova, tumanon kini, ug “magmabalaan” alang sa ilang Diyos. (Numeros 15:38-40) Ingong presenteng-adlaw nga mga alagad ni Jehova, kita lahi sa kalibotan tungod kay kita nagtuman sa mga balaod ug prinsipyo sa Diyos. Pananglitan, kita naghupot sa moral nga kahinlo, kita nagtahod sa pagkabalaan sa dugo, ug kita naglikay sa tanang matang sa idolatriya. (Buhat 15:28, 29) Daghan ang nagtahod kanato tungod sa atong lig-ong determinasyon sa paghupot sa atong kaugalingon nga wala mahugawi.—Santiago 1:27.

Kita Kinahanglang “Walay Lama”

16. Unsay nalangkit sa paghupot sa atong kaugalingon nga “walay lama”?

¹⁶ Si Pedro miingon usab nga kita kinahanglang makaplagan nga “walay lama.” Sa unsang paagi maposible kana? Ang buling kasagarang mapapha ra apan ang lama dili. Ang lama nagpakita nga dunay depekto sa sulod. Si apostol Pablo nagtambag sa mga isigka-Kristohanon sa Filipos: “Magpadayon sa pagbuhat sa tanang butang nga walay pagbagulbol ug panag-ergo, aron kamo mahimong walay-ikasaway ug inosente, mga anak sa Diyos nga walay lama taliwala sa baliko ug hiwi nga kaliwatan, nga taliwala nila kamo nagasidlak ingong mga magbabanwag  sa kalibotan.” (Filipos 2:14, 15) Kon sundon nato ang maong tambag, malikayan nato ang mga pagbagulbol ug mga panaglalis ug mag-alagad sa Diyos tungod sa putling motibo. Matukmod kita sa gugma alang kang Jehova ug sa atong mga silingan samtang kita nagsangyaw ‘niining maayong balita sa gingharian.’ (Mateo 22:35-40; 24:14) Dugang pa, magpadayon kita sa pagmantala sa maayong balita bisan pag ang kadaghanan sa mga tawo dili tingali makasabot kon nganong kita nagboluntaryo sa atong panahon sa paningkamot nga matabangan ang uban nga makakat-on bahin sa Diyos ug sa iyang Pulong, ang Bibliya.

17. Unsay angay natong motibo sa dihang kita magapangab-ot ug mga pribilehiyo diha sa Kristohanong kongregasyon?

¹⁷ Kay nagtinguha kita nga makaplagan nga “walay lama,” angay natong susihon ang atong mga motibo diha sa tanan natong mga pangagpas. Ato nang gibiyaan ang paagi sa kalibotan sa paghimo sa mga butang tungod sa hinakog nga mga hinungdan, sama sa pagpanlimbasog nga makabaton ug mga bahandi o gahom. Kon kita nagapangab-ot ug mga pribilehiyo diha sa Kristohanong kongregasyon, hinaot ang atong mga motibo magpabiling putli ug hinaot nga kita kanunayng gitukmod sa gugma alang kang Jehova ug sa uban. Makaparepresko ang pagkakita sa espirituwal nga mga lalaki nga “magapangab-ot sa katungdanan sa pagkamagtatan-aw” uban ang kalipay ug mapaubsanong tinguha nga magpaulipon kang Jehova ug sa ilang mga isigkamagtutuo. (1 Timoteo 3:1; 2 Corinto 1:24) Sa pagkatinuod, kadtong kuwalipikado nga mag-alagad ingong mga ansiyano ‘magbantay sa panon sa Diyos . . . nga kinabubut-on; dili tungod sa gugma sa kinitaan pinaagig limbong, apan maikagon; dili mahariharion ibabaw niadtong panulondon sa Diyos, apan mahimong mga panig-ingnan alang sa panon.’—1 Pedro 5:1-4.

Kita Kinahanglang Anaa “sa Pakigdait”

18. Sa unsang mga hiyas nga ang mga Saksi ni Jehova nailado?

¹⁸ Sa kataposan, si Pedro nag-ingon nga kita kinahanglang anaa “sa pakigdait.” Aron makatuman niining maong kinahanglanon, kita kinahanglan makigdait kang Jehova ug sa atong silingan. Gipasiugda ni Pedro ang kahinungdanon sa pagbaton ug “mainit nga gugma alang sa usag usa” ug pagpatunhay sa pakigdait uban sa atong mga isigka-Kristohanon. (1 Pedro 2:17; 3:10, 11; 4:8; 2 Pedro 1:5-7) Aron mapatunhay ang atong pakigdait, kita kinahanglang dunay gugma sa atong taliwala. (Juan 13:34, 35; Efeso 4:1, 2) Ang atong gugma ug pakigdait ilabinang nadayag sa dihang gipahigayon ang atong internasyonal nga mga kombensiyon. Sa usa ka kombensiyon sa Costa Rica sa 1999, napikal ang usa ka tawo nga naninda sa erport tungod kay ang lokal nga mga Saksi nga nag-abiabi sa nangabot nga mga delegado wala tuyoang nag-ali sa iyang tindahan mao nga dili na kaayo kini makita. Apan, sa ikaduhang adlaw iyang namatikdan ang gugma ug pakigdait nga gipasundayag diha sa madasigong pag-abiabi nga nadawat sa mga delegado, bisan tuod ang lokal nga mga Saksi wala makaila kanila sa personal. Sa kataposang adlaw, ang naninda miduyog sa pag-abiabi ug mihangyo nga magtuon sa Bibliya.

19. Nganong hinungdanon nga makigdait sa atong mga isigkamagtutuo?

¹⁹ Ang atong sinseridad sa pagpakigdait sa atong espirituwal nga mga igsoong lalaki ug babaye adunay kalabotan sa kon unsa ka tinuoray kitang nagapaabot sa adlaw ni Jehova ug sa iyang gisaad nga bag-ong kalibotan. (Salmo 37:11; 2 Pedro 3:13) Ibutang ta nga nalisdan kita sa pagpakigdait sa usa ka isigkamagtutuo. Mahanduraw ba nato ang atong kaugalingon nga magpuyo uban kaniya nga malinawon didto sa Paraiso? Kon ang usa ka igsoon dunay reklamo batok kanato, kita kinahanglang ‘makigdait dayon kaniya.’ (Mateo 5:23, 24) Ang pagbuhat niana hinungdanon kon kita buot nga makigdait kang Jehova.—Salmo 35:27; 1 Juan 4:20.

20. Ang “mahulatong tinamdan” angayng mabanaag sa unsang mga paagi?

²⁰ Kita ba mismo ‘nagapaabot ug nagabutang sa hunahuna sa presensiya sa adlaw ni Jehova’? Ang atong mainitong tinguha nga makita ang kataposan sa pagkadaotan mapadayag pinaagi sa atong pagpabiling balaan niining imoral nga kalibotan. Dugang pa, ang atong tim-os nga pangandoy sa pag-abot sa adlaw ni Jehova ug sa kinabuhi ilalom sa pagmando sa Gingharian mapadayag pinaagi sa atong mga buhat sa diyosnong pagkamahinalaron. Ug ang atong pagpaabot sa pagkinabuhi didto sa malinawong bag-ong kalibotan mabanaag diha sa atong pagpakigdait sa atong mga isigkamagsisimba karon. Pinaagi niana, atong gipakita nga kita adunay “mahulatong tinamdan” ug ‘nagabutang sa hunahuna sa presensiya sa adlaw ni Jehova.’

[Footnote]

Nahinumdom Ka Ba?

• Unsay buot ipasabot sa ‘pagbutang sa hunahuna sa adlaw ni Jehova’?

• Sa unsang paagi ang “mahulatong tinamdan” mapasundayag maylabot sa atong panggawi?

• Nganong ang “mga buhat sa diyosnong pagkamahinalaron” hinungdanon?

• Unsay angay natong buhaton aron makaplagan ni Jehova nga “walay buling ug walay lama ug anaa sa pakigdait”?

 [Mga Pangutana sa Pagtuon]

[Hulagway sa panid 11]

Ang “mahulatong tinamdan” mabanaag diha sa balaang mga buhat sa panggawi

[Mga hulagway sa panid 12]

Ang buluhatong pagsangyaw sa Gingharian makaluwas ug kinabuhi

[Hulagway sa panid 14]

Samtang kita nagapaabot sa adlaw ni Jehova, makigdait kita sa uban