Ang Bibliya Makatabang sa Imong Kaminyoon

KAMINYOON—alang sa pipila, kining pulonga makapukaw ug makapalipay nga mga hunahuna. Alang sa uban, kini makapaguol. “Morag nagbulag mi sa akong bana,” mireklamo ang usa ka asawa. “Ako mibati nga ako gipasagdan na lang ug magul-anon sa tanang panahon.”

Unsay hinungdan nga ang duha ka tawo nga nanumpa kaniadto nga maghigugmaay ug magpanggaay nawad-an nag pagmahal sa usag usa? Ang usa ka hinungdan mao ang kakulang ug kahibalo sa kon unsay nalangkit sa kaminyoon. “Nagpakasal kita nga wala gayoy hibangkaagan kon unsay kaminyoon,” nag-ingon ang usa ka medikal nga magsusulat.

Napamatud-an sa usa ka pagtuon nga gihimo sa The National Marriage Project, usa ka panukiduki sa Rutgers University sa New Jersey, T.B.A., nga pipila lamang karon ang aduna niana nga kahibalo. “Daghan nga mga indibiduwal niini nga pagtuon ang nagdako uban sa mga ginikanan nga dili malipayon ang kaminyoon o kaha nagbulag,” misulat ang mga direktor sa maong proyekto. “Nahibalo sila kon unsa ang dili-malipayong kaminyoon, apan sila dili segurado kon unsa ang malipayong kaminyoon. Gihubit lang sa uban ang usa ka malipayong kaminyoon ingong ‘ang kasukwahi sa kaminyoon sa akong mga ginikanan.’”

Dili ba apektado ang mga Kristohanon sa mga problema sa kaminyoon? Apektado sila. Sa pagkatinuod, ang ubang mga Kristohanon sa unang siglo nagkinahanglan ug prangkang tambag sa ‘paghunong na sa pagtinguhang makagawas’ gikan sa ilang kaminyoon. (1 Corinto 7:27) Tin-aw, ang bisan unsang kaminyoon sa duha ka dili-hingpit nga mga tawo makaagom gayod ug mga problema, apan dunay makatabang kanato. Mapauswag sa mga bana ug asawa ang ilang relasyon pinaagi sa pagpadapat sa mga prinsipyo sa Bibliya.

Tinuod, ang Bibliya dili basahon alang sa kaminyoon. Apan, tungod kay giinspirar kini sa Usa nga maoy nagmugna sa kahikayan sa kaminyoon, kita makasalig nga mapuslanon ang mga prinsipyo niini. Pinaagi ni manalagnang Isaias, si Jehova nga Diyos nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”—Isaias 48:17, 18.

Nagkaawop na ba ang gugma nga gibati ninyo kanhi sa usag usa? Gibati ba nimo nga nabilanggo ka sa usa ka kaminyoon nga wala nay gugma? Ang usa ka asawa nga naminyo sa 26 na ka tuig miingon: “Ang kasakit nga maagoman niining matanga sa relasyon halos dili mahubit. Kini walay kausaban ug anaa kanunay.” Imbes dawaton na lang ang usa ka walay-kalipay nga kaminyoon, nganong dili mohimog paagi sa pagsulbad niini? Ang sunod nga artikulo magpakita sa mga bana ug asawa kon sa unsang paagi ang mga prinsipyo sa Bibliya makatabang sa ilang kaminyoon diha sa usa ka espesipikong bahin—ang ilang determinasyon ug tinguha nga mapatunhay ang ilang kaminyoon.