‘Gamita ang Pulong sa Diyos sa Hustong Paagi’

“Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 TIMOTEO 2:15.

1, 2. (a) Nganong ang mga mamumuo nagkinahanglan ug mga himan? (b) Sa unsang buluhaton nakigbahin ang mga Kristohanon, ug sa unsang paagi gipakita nila nga sila nangita pag-una sa Gingharian?

 ANG mga mamumuo nagkinahanglag mga himan sa pagtabang kanila nga matapos ang ilang mga trabaho. Apan, ang pagbaton lamang ug bisan unsang himan dili igo. Ang usa ka mamumuo nagkinahanglan sa hustong matang sa himan, ug kinahanglang gamiton niya kana sa hustong paagi. Pananglitan, kon samtang magtukod ug kamalig gusto nimong magtapot ang duha ka tabla, dili lang kay nagkinahanglan ka ra ug martilyo ug mga lansang. Kinahanglang makamao ka kon unsaon pagpukpok ang lansang aron modulot kini sa kahoy nga dili mabawog. Ang pagsulay sa pagpadulot sa lansang nganha sa kahoy nga dili ka makamao kon unsaon paggamit ug martilyo malisod kaayo, makapahigawad pa gani. Apan ang mga himan nga gigamit sa hustong paagi motabang kanato sa pagpalampos sa mga trabaho uban ang makapatagbawng mga resulta.

² Ingong mga Kristohanon, kita adunay buluhaton. Kini maoy buluhaton nga hinungdanon kaayo. Giawhag ni Jesu-Kristo ang iyang mga sumusunod sa “pagpangita pag-una sa gingharian.” (Mateo 6:33) Sa unsang paagi mahimo nato kana? Ang usa maoy pinaagi sa pagkahimong masiboton diha sa pagwali sa Gingharian ug sa paghimog mga tinun-an. Ang laing paagi mao ang paghimo sa atong ministeryo nga lig-ong gipasukad sa Pulong sa Diyos. Ang ikatulong paagi mao ang maayong panggawi. (Mateo 24:14; 28:19, 20; Buhat 8:25; 1 Pedro 2:12) Aron mahimong epektibo ug malipayon niining Kristohanong buluhaton nga gipahimo kanato, kita nagkinahanglan ug angayang mga himan ug kahibalo kon unsaon paggamit kini sa hustong paagi. Bahin niini, si apostol Pablo nagpakita ug maayo kaayong panig-ingnan ingong Kristohanong mamumuo, ug iyang gidasig ang mga isigkamagtutuo sa pagsundog kaniya. (1 Corinto 11:1; 15:10) Busa, unsay atong makat-onan gikan kang Pablo, ang atong isigkamagbubuhat?

Si Pablo—Usa ka Masibotong Magmamantala sa Gingharian

3. Nganong ikaingon nga si apostol Pablo maoy usa ka masibotong mamumuo sa Gingharian?

³ Unsang matanga sa mamumuo si Pablo? Tino nga siya masiboton. Si Pablo nanglimbasog pag-ayo, nga nagsangyaw sa maayong balita sa dakong bahin sa palibot sa Mediteranyo. Naghatag ug katarongan  sa iyang madasigong pagmantala sa Gingharian, kining walay-paglunga nga apostol miingon: “Kon, karon, akong ginapahayag ang maayong balita, dili kini katarongan alang kanako nga manghambog, kay ang panginahanglan gikapatong ibabaw kanako. Sa pagkatinuod, alaot ako kon dili ko ipahayag ang maayong balita!” (1 Corinto 9:16) Interesado ba lamang si Pablo sa pagluwas sa iyang kaugalingong kinabuhi? Dili. Siya dili hakog nga tawo. Hinunoa, siya nagtinguha nga ang uban usab makabenepisyo gikan sa maayong balita. Siya misulat: “Gihimo ko ang tanang butang tungod sa maayong balita, aron ako mahimong mag-aambit niini sa uban.”—1 Corinto 9:23.

4. Unsang himan ang gipabilhan pag-ayo sa Kristohanong mga mamumuo?

⁴ Si apostol Pablo maoy usa ka makasaranganong mamumuo nga nakaamgo nga dili siya mahimong mosalig lamang sa mga kahanas nga iyang nabatonan. Maingon nga ang panday nagkinahanglan ug martilyo, si Pablo nagkinahanglan ug hustong matang sa himan aron sa pagtisok sa kamatuoran sa Diyos diha sa mga kasingkasing sa iyang mga mamiminaw. Unsang himan ang panguna niyang gigamit? Mao kadto ang Pulong sa Diyos, ang Balaang Kasulatan. Sa susama, ang enterong Bibliya mao ang pangunang himan nga atong gamiton sa pagtabang kanato sa paghimog mga tinun-an.

5. Aron mahimong epektibo nga mga ministro, unsay kinahanglan natong buhaton gawas pa sa pagkutlo gikan sa kasulatan?

⁵ Si Pablo nahibalo nga ang paggamit sa Pulong sa Diyos sa hustong paagi naglangkit ug labaw pa kay sa pagkutlo gikan niana. Siya ‘nangombinsir.’ (Buhat 28:23) Sa unsang paagi? Si Pablo malamposong naggamit sa sinulat nga Pulong sa Diyos sa pagkombinsir sa daghan nga modawat sa kamatuoran sa Gingharian. Siya nangatarongan kanila. Sulod sa tulo ka bulan diha sa usa ka sinagoga sa Efeso, si Pablo ‘naghatag ug mga pakigpulong ug nangombinsir mahitungod sa gingharian sa Diyos.’ Bisan tuod ang “pipila nagpatig-a ug wala motuo,” ang uban namati. Tungod sa ministeryo ni Pablo sa Efeso, “ang pulong ni Jehova padayong mikaylap ug nagmadaogon.”—Buhat 19:8, 9, 20.

6, 7. Sa unsang paagi gihimaya ni Pablo ang iyang ministeryo, ug sa unsang paagi mahimo usab nato kana?

⁶ Ingong masiboton nga magmamantala sa Gingharian, si Pablo ‘naghimaya sa iyang ministeryo.’ (Roma 11:13) Sa unsang paagi? Siya dili interesado sa pagtuboy sa iyang kaugalingon; ni siya naulaw nga mailhan sa mga tawo ingong usa sa mga isigkamagbubuhat sa Diyos. Hinunoa, iyang gilantaw ang iyang ministeryo ingong dako kaayong kadungganan. Gigamit ni Pablo ang Pulong sa Diyos sa hanas ug epektibo nga paagi. Ang iyang mabungahong kalihokan nakapadasig sa uban, nga nakatabang sa pagpalihok kanila sa pagtuman sa ilang ministeryo sa mas bug-os pa. Niining paagiha usab, gihimaya ang iyang ministeryo.

⁷ Sama kang Pablo, atong mahimaya ang atong buluhaton ingong mga ministro pinaagi sa kanunay ug epektibo nga paggamit sa Pulong sa Diyos. Sa tanang bahin sa atong pagministeryo sa kanataran, angay nga himoon natong tumong nga aduna kitay ikapaambit gikan sa Kasulatan ngadto sa daghang tawo kutob sa mahimo. Sa unsang paagi mahimo nato kini uban ang pagpangombinsir? Tagda ang tulo ka hinungdanong mga paagi: (1) Ipunting ang pagtagad nganha sa Pulong sa Diyos sa paagi nga magpatunghag pagtahod niana. (2) Mataktikanhong ipatin-aw ug ipadapat ang giingon sa Bibliya. (3) Pangatarongan pinasukad sa Kasulatan sa paagi nga makapakombinsir.

8. Unsang mga himan sa pagwali sa Gingharian ang atong nabatonan karon, ug sa unsang paagi gigamit nimo kana?

⁸ Ang presenteng-adlaw nga mga magmamantala sa Gingharian adunay mga himan nga wala mabatoni ni Pablo panahon sa iyang ministeryo. Naglakip kini sa mga libro, magasin, brosyur, pulyeto, tract, ug mga audio ug video nga mga rekording. Sa miaging siglo, ang mga tarhetang pamatuod, ponograpo, sakyanang may trompa, ug mga sibya sa radyo gigamit usab. Siyempre, ang atong kinamaayohang himan mao ang Bibliya, ug kinahanglang gamiton nato kanunay ug sa hustong paagi kining hinungdanong himan.

Ang Atong Ministeryo Kinahanglang Nakasukad sa Pulong sa Diyos

9, 10. Mahitungod sa paggamit sa Pulong sa Diyos, unsay atong makat-onan gikan sa tambag ni Pablo kang Timoteo?

⁹ Sa unsang paagi magamit nato ang Pulong sa Diyos ingong epektibong himan? Pinaagi sa pagpatalinghog niining mga pulonga nga gisulti ni Pablo sa iyang isigkamagbubuhat nga si Timoteo: “Buhata ang kutob sa imong maarangan nga itanyag ang  imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.” (2 Timoteo 2:15) Unsay nalakip sa ‘paggamit sa pulong sa kamatuoran sa hustong paagi’?

¹⁰ Ang Gregong pulong nga gihubad ug ‘paggamit sa hustong paagi’ sa literal nagkahulogan ug “tul-id nga pagtabas” o “paghimog tul-id nga dalan.” Diha lamang sa tambag ni Pablo kang Timoteo nga ang maong termino gigamit diha sa Kristohanon Gregong Kasulatan. Kanang pulonga mahimong gamiton usab sa paghubit sa pagdaro ug tul-id nga tudling latas sa umahan. Ang baliko nga tudling seguradong magpakaulaw sa usa ka eksperyensiyadong mag-uuma. Aron mahimong “mamumuo nga walay angayng ikaulaw,” si Timoteo gipahinumdoman nga dili motipas gikan sa matuod nga mga pagtulon-an sa Pulong sa Diyos. Giingnan si Timoteo nga dili niya pasagdan ang iyang kaugalingong mga panglantaw nga moimpluwensiya sa iyang pagpanudlo. Kinahanglang ibase niya ang iyang pagwali ug pagpanudlo diha lamang sa Kasulatan. (2 Timoteo 4:2-4) Niining paagiha, ang matinud-anog-kasingkasing nga mga tawo matultolan nga huptan ang hunahuna ni Jehova bahin sa mga butang, ug dili sagopon ang pilosopiya sa kalibotan. (Colosas 2:4, 8) Mao man usab karon.

Kinahanglang Maayo ang Atong Panggawi

11, 12. Unsay epekto sa atong panggawi diha sa atong paggamit sa Pulong sa Diyos sa hustong paagi?

¹¹ Dili lang kay gamiton nato ang Pulong sa Diyos sa hustong paagi pinaagi sa pagwali sa mga kamatuoran niini. Ang atong panggawi kinahanglang mahiuyon niini. ‘Kita mga isigkamagbubuhat sa Diyos,’ busa kita dili angay nga mahimong salingkapaw nga mga mamumuo. (1 Corinto 3:9) Ang Pulong sa Diyos nag-ingon: “Hinunoa, ikaw ba nga nagatudlo sa uban, dili magtudlo sa imong kaugalingon? Ikaw nga nagawali nga ‘Ayaw pangawat,’ nagapangawat ka ba? Ikaw nga nagaingon ‘Ayaw panapaw,’ nagapanapaw ka ba? Ikaw nga nagapahayag ug kasilag sa mga idolo, nagapanulis ka ba sa mga templo?”  (Roma 2:21, 22) Busa, ingong modernong-adlaw nga mga mamumuo sa Diyos, ang usa ka paagi nga atong magamit ang Pulong sa Diyos sa hustong paagi maoy pinaagi sa pagpatalinghog niining maong tambag: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”—Proverbio 3:5, 6.

¹² Unsang mga resulta ang atong madahom gumikan sa paggamit sa Pulong sa Diyos sa hustong paagi? Hunahunaa ang gahom sa sinulat nga Pulong sa Diyos diha sa kinabuhi sa matinud-anog-kasingkasing nga mga tawo.

Ang Pulong sa Diyos Adunay Makapabag-o nga Gahom

13. Ang pagpadapat sa Pulong sa Diyos magpatungha ug unsa diha sa usa ka tawo?

¹³ Kon dawaton ingong kasaligan, ang mensahe sa Pulong sa Diyos adunay kusganong impluwensiya nga motabang sa mga tawo sa paghimog talagsaong mga kausaban sa ilang kinabuhi. Si Pablo nakakita nga nagalihok ang pulong sa Diyos ug nakasaksi sa maayong epekto niini niadtong nahimong mga Kristohanon sa karaang Tesalonica. Busa giingnan niya sila: “Kami usab sa walay-hunong nagpasalamat sa Diyos, tungod kay dihang nadawat ninyo ang pulong sa Diyos, nga inyong nadungog gikan kanamo, inyong gidawat kini, dili ingong pulong sa mga tawo, kondili, ingon sa kon unsa kini sa pagkatinuod, ingong pulong sa Diyos, nga naglihok usab diha kaninyo nga mga magtutuo.” (1 Tesalonica 2:13) Para niadtong maong mga Kristohanon—sa pagkatinuod, para sa tanang matuod nga mga sumusunod ni Kristo—ang ubos nga pangatarongan sa tawo dili ikatandi sa labawng kaalam sa Diyos. (Isaias 55:9) Ang mga taga-Tesalonica ‘midawat sa pulong ilalom sa daghang kasakitan nga may kalipay sa balaang espiritu’ ug nahimong mga panig-ingnan sa ubang mga magtutuo.—1 Tesalonica 1:5-7.

14, 15. Unsa ka gamhanan ang mensahe sa Pulong sa Diyos, ug ngano?

¹⁴ Ang Pulong sa Diyos gamhanan, sama sa Tuboran niini, si Jehova. Naggikan kini sa “buhi nga Diyos,” ang usa kinsa pinaagi sa iyang pulong “nabuhat ang mga langit,” ug ang maong pulong kanunayng ‘magpalampos sa butang nga tungod niana kana gipadala.’ (Hebreohanon 3:12; Salmo 33:6; Isaias 55:11) Ang usa ka eskolar sa Bibliya mikomento: “Ang Diyos dili mobulag sa iyang Pulong. Dili niya kana ilimod nga daw kana walay kalabotan kaniya. . . . Busa kana dili patay, ug maapektohan gayod sa mahitabo niana human kana gisulti; kay kana nabugkos uban sa buhi nga Diyos.”

¹⁵ Unsa ka gamhanan ang mensahe nga naggikan sa Pulong sa Diyos? Kini gamhanan kaayo. Sa kahaom, si Pablo misulat: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.”—Hebreohanon 4:12.

16. Unsa ka bug-os nga mabag-o sa Pulong sa Diyos ang usa ka tawo?

¹⁶ Ang mensahe diha sa sinulat nga Pulong sa Diyos “mahait pa kay sa espada nga duhay-sulab.” Busa, hilabihan ka puwersado ang pagdulot niini nga kini molabaw pa kay sa bisan unsang tawhanong instrumento o himan. Ang Pulong sa Diyos modulot sa kinasulorang mga bahin sa usa ka tawo ug makapabag-o sa iyang pagkatawo, nga mag-apektar kon sa unsang paagi siya maghunahuna ug kon unsay iyang higugmaon, nga maghimo kaniyang usa ka dalawaton, diyosnon nga mamumuo. Pagkagamhanang himan!

17. Ipatin-aw ang makapabag-o nga gahom sa Pulong sa Diyos.

¹⁷ Ang Pulong sa Diyos magyagyag sa kinasulorang bahin sa usa ka tawo nga lahi sa kon unsay iyang gihunahuna nga kinsa siya o sa iyang gitugot sa uban nga makita diha kaniya. (1 Samuel 16:7) Bisan ang usa ka daotang tawo makatago usahay sa iyang pagkatawo pinaagi sa pagpakaaron-ingnong maluloton o relihiyoso. Ang mga daotan magtakoban tungod sa daotang mga katarongan. Ang mapahitas-ong mga tawo magpakaaron-ingnong mapaubsanon apan sa samang higayon nangandoy nga dayegon sa mga tawo. Apan, pinaagi sa pagbutyag kon unsa gayoy anaa sa kasingkasing, ang Pulong sa Diyos sa gamhanang paagi makapalihok sa mapaubsanong mga tawo sa paghukas sa daan nga pagkatawo ug ‘pagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’ (Efeso 4:22-24) Ang mga pagtulon-an sa Pulong sa Diyos makapabag-o usab sa mga tawong maulawon aron mahimong maisogong mga Saksi ni Jehova ug masibotong mga magmamantala sa Gingharian.—Jeremias 1:6-9.

18, 19. Pinasukad niining maong mga parapo o sa kaugalingong kasinatian sa kanataran, ipakita kon sa unsang paagi ang kamatuoran sa Kasulatan makapabag-o sa tinamdan sa usa ka tawo.

 ¹⁸ Ang makapabag-o nga gahom sa Pulong sa Diyos adunay maayong epekto diha sa mga tawo bisan asa. Pananglitan, ang mga magmamantala sa Gingharian nga taga-Phnom Penh, Cambodia, magsangyawan sa probinsiya sa Kompong Cham kaduha sa usa ka bulan. Human makadungog sa ubang mga pastor nga nagdaot sa mga Saksi ni Jehova, gihikay sa usa ka lokal nga pastora nga makigkita sa mga Saksi sa sunod higayon nga moduaw sila sa probinsiya. Nagpusotpusot ang iyang mga pangutana kanila bahin sa pagsaulog sa mga pista opisyal ug namati siya pag-ayo samtang nangatarongan sila kaniya pinasukad sa Kasulatan. Dayon siya mipatugbaw: “Karon nahibalo na ko nga dili diay tinuod ang giingon sa akong kaubang mga pastor bahin kaninyo! Matod nila dili kono mo mogamit sa Bibliya, apan niining buntaga mao ra kanay inyong gigamit!”

¹⁹ Kining maong babaye nagpadayon sa iyang pagpakighisgot bahin sa Bibliya uban sa mga Saksi ug wala mohunong bisan pa sa mga panghulga nga taktakon siya sa pagkapastora. Iyang giestorya ang iyang Kasulatanhong mga panaghisgot ngadto sa usa ka higala, kinsa misugod dayon sa pagtuon sa Bibliya uban sa mga Saksi. Ang higala nahinam kaayo sa iyang nakat-onan nga panahon sa usa sa iyang mga serbisyo sa simbahan, natukmod siya sa pag-ingon, “Tun-i ninyo ang Bibliya uban sa mga Saksi ni Jehova!” Sa wala madugay, miluwat siya sa iyang pagkamembro sa simbahan. Ang kanhing pastora, iyang higala, ug ang uban pa nagsugod sa pagtuon sa Bibliya uban sa mga Saksi ni Jehova.

20. Sa unsang paagi ang eksperyensiya sa usa ka babaye sa Ghana nag-ilustrar sa gahom sa Pulong sa Diyos?

²⁰ Ang gahom sa Pulong sa Diyos giilustrar usab sa kaso ni Paulina, usa ka babaye sa Ghana. Ang usa ka bug-os-panahong magmamantala sa Gingharian nagdumala ug panagtuon sa Bibliya uban kaniya ginamit ang librong Kahibalo nga Motultol sa Kinabuhing Walay Kataposan. a Si Paulina usa sa daghang asawa sa iyang bana ug nakakita sa panginahanglan nga magbag-o, apan ang iyang bana ug ang tanan niyang mga paryente kusganong misupak kaniya. Ang iyang apohang lalaki, nga usa ka huwes sa korte suprema ug ansiyano sa simbahan, misulay sa pag-usab sa iyang hunahuna pinaagi sa sayop nga pagpadapat sa Mateo 19:4-6. Ang huwes morag segurado sa iyang gisulti, apan naamgohan dayon ni Paulina nga susama kini sa pagtuis ni Satanas sa Kasulatan sa dihang iyang gitental si Jesu-Kristo. (Mateo 4:5-7) Nahinumdoman niya ang klarong giingon ni Jesus bahin sa kaminyoon, nga nag-ingon nga sa sinugdan gilalang sa Diyos ang mga tawo nga lalaki ug babaye, dili lalaki ug mga babaye, ug nga ang duha, dili ang tulo, mahimong usa ka unod. Siya nagpabilin sa iyang desisyon ug sa kataposan gitugotan sa naandang pagpakigdiborsiyo sa bana nga daghag asawa. Sa wala madugay, siya nahimong malipayon nga bawtismadong magmamantala sa Gingharian.

Padayon sa Paggamit sa Pulong sa Diyos sa Hustong Paagi

21, 22. (a) Ingong mga magmamantala sa Gingharian unsay angay natong determinasyon? (b) Unsay atong konsiderahon sa sunod nga artikulo?

²¹ Ang sinulat nga Pulong sa Diyos sa pagkatinuod maoy gamhanang himan nga magamit nato sa pagtabang sa uban sa pagbag-o sa ilang kinabuhi aron masuod kang Jehova. (Santiago 4:8) Maingon nga ang hanas nga mga mamumuo mogamit ug mga himan aron makab-ot ang maayong mga resulta, hinaot nga determinado kitang manglimbasog pag-ayo sa paggamit sa Pulong sa Diyos, ang Bibliya, sa hanas nga paagi diha sa atong hinatag-sa-Diyos nga buluhaton ingong mga magmamantala sa Gingharian.

²² Sa unsang paagi magamit nato ang Kasulatan sa mas epektibong paagi diha sa atong buluhatong paghimog mga tinun-an? Ang usa ka paagi mao ang pag-ugmad sa atong mga katakos ingong makapakombinsir nga mga magtutudlo. Palihog tagda ang sunod nga artikulo, kay kini nagsugyot ug mga paagi sa pagtudlo ug pagtabang sa uban sa pagdawat sa mensahe sa Gingharian.

[Footnote]

Nahinumdom Ka Ba?

• Unsang mga himan ang mahimong mabatonan sa mga magmamantala sa Gingharian?

• Sa unsang mga paagi nga si Pablo usa ka panig-ingnan ingong mamumuo sa Gingharian?

• Unsay nalangkit sa paggamit sa Pulong sa Diyos sa hustong paagi?

• Unsa ka gamhanan nga himan ang sinulat nga Pulong ni Jehova?

[Mga Pangutana sa Pagtuon]

[Mga hulagway sa panid 10]

Ang pipila ka mga himan nga gigamit sa mga Kristohanon diha sa buluhatong pagmantala sa Gingharian