“Andam Alang sa  Tanang Maayong Buhat”

“MAGPADAYON ka sa pagpahinumdom kanila nga magpasakop ug magmasinugtanon sa mga kagamhanan ug sa mga awtoridad ingon nga mga magmamando, nga andam alang sa tanang maayong buhat.” (Tito 3:1) Unsang maayong buhat ang diha sa hunahuna ni apostol Pablo sa dihang iyang gisulat ang maong mga pulong ngadto sa iyang mga isigkamagtutuo? Gipunting sa eskolar sa Bibliya nga si E. F. Scott ang usa ka matang sa maayong buhat, nga nag-ingon: “Ang mga Kristohanon dili lang angay nga magmasinundanon sa awtoridad, apan sila kinahanglang andam sa bisan unsang maayong buhat. . . . Kon gikinahanglan sa higayon, ang mga Kristohanon angayng manguna sa pagpakitag kaikag sa kaayohan sa katilingban. Kanunayng may mahitabong sunog, hampak, lainlaing matang sa katalagman, ug sa maong mga panahon ang tanang maayong lungsoranon matinguhaon nga motabang sa ilang mga silingan.”

Ang mga Kristohanon makig-ambit sa pipila ka buluhaton nga makaayo sa katilingban kon ang maong mga buluhaton dili supak sa mga balaod sa Diyos. (Buhat 5:29) Pananglitan, ingong pagsunod sa pagtultol sa lokal nga departamento sa bombero, ang sangang buhatan sa mga Saksi ni Jehova sa Japan, nga nahimutang sa Ebina, adunay pagbansaybansay matag tuig kon unsay buhaton panahon sa sunog. Sa maong mga okasyon, ang tanang membro sa pamilyang Bethel magtigom aron maminaw sa mga instruksiyon nga ihatag sa hawas sa lokal nga departamento sa bombero.

Dugang pa, sulod sa kapig usa ka dekada, ang sangang buhatan sa Japan nakigkooperar uban sa lokal nga mga awtoridad sa usa ka publikong pasundayag nga gipaluyohan aron sa pagpauswag sa pagkamahunahunaon sa pagsanta sa sunog. Sa maong publikong pasundayag, ang mga kompaniya sa siyudad magpakita sa ilang pagkaandam sa pagpalong ug pagkontrolar sa sunog. Ang sangang buhatan kanunayng hatagag komendasyon tungod sa kahanas ug kooperasyon sa mga membro niini. Sa 2001, gihatag kanila ang unang ganti sa publikong pasundayag. Andam sila sa pagbuhat ug maayo nga makaluwas ug kinabuhi kon ugaling may sunog.

Usa ka Bililhong Pag-alagad

Hinuon, ang mga Saksi ni Jehova interesado sa mas hinungdanong matang sa maayong buhat, nga makaluwas usab ug kinabuhi. Regular silang nagaduaw sa ilang mga silingan aron ipaambit ang maayong balita sa Gingharian sa Diyos. (Mateo 24:14) Gidasig sa mga Saksi ang mga tawo sa pagkat-on ug pagpadapat sa mga prinsipyo sa Bibliya diha sa ilang kinabuhi aron sa pagpauswag sa kalidad sa ilang kinabuhi karon ug makabaton ug paglaom nga kinabuhing walay kataposan sa usa ka kalibotan diin maglungtad ang tinuod nga kalinaw ug kasegurohan.

Ang pipila tingali wala makaapresyar sa bili sa pag-alagad nga ginahimo sa mga Saksi ni Jehova, nga nag-isip kanila nga mga samokan. Hinuon, si Huwes Jean Crepeau sa Hataas nga Korte sa Quebec, Canada, lahi ug opinyon. Ang mga Saksi ni Jehova didto mitutol sa usa ka balaod sa siyudad sa Blainville, Quebec, nga nagsugo sa pagbatog permiso alang sa ilang pultahan-sa-pultahan nga mga pagduaw. Sa desisyon sa korte, si Huwes Crepeau nag-ingon: “Ang mga pagduaw sa mga Saksi ni Jehova maoy usa ka Kristohanong pag-alagad sa komunidad ug . . . ang mga publikasyon nga gitanyag sa mga Saksi ngadto sa interesadong mga lungsoranon maoy bililhon kaayong literatura, nga naghisgot sa mga ulohan sama sa relihiyon, Bibliya, mga droga, alkoholismo, edukasyon sa kabataan, mga problema sa kaminyoon ug diborsiyo.” Ang desisyon nagpadayon: “Ang korte makahinapos gayod nga ang pagtandi sa mga Saksi ni Jehova sa mga tigbaligya maoy mainsultohon, makapaubos, masakit, ug makadaot sa dungog.”

Ang mga Saksi ni Jehova nakapauswag sa komunidad nga ilang gipuy-an pinaagi sa pagtabang sa mga tawo nga masagubang ang mga suliran sa ilang adlaw-adlaw nga pagkinabuhi ug sa pagtagana kanilag paglaom sa umaabot. Ang Bibliya nagsangkap kanila aron molampos ang maong buluhaton. “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—2 Timoteo 3:16, 17.

Buot ba nimong masayod kon sa unsang paagi ang mga Saksi ni Jehova nahimong “andam alang sa tanang maayong buhat”? Gidapit ka namo sa pagdawat sa ilang tabang sa pagkat-og dugang bahin sa Bibliya ug sa ingon makapahimulos nianang hinungdanong pag-alagad sa komunidad nga ilang ginahimo diha sa imong dapit ug sa tibuok kalibotan.

Mga hulagway sa panid 30]

Ang mga Saksi ni Jehova naninguha sa pagkooperar sa sekular nga mga awtoridad

[Hulagway sa panid 31]

Ilado ang mga Saksi ni Jehova tungod sa ilang pagtabang sa ilang mga silingan