Ang Hustong Katarongan nga Motuo sa Diyos

ANG Koreanong basahong 31 Reasons Why Young People Leave the Church nagpatuo nga ang daghan mohunong sa pagsimba tungod kay sila wala makakaplag sa makapatagbawng mga tubag sa ilang mga pangutana. Pananglitan, sila nangutana, ‘Nganong nag-antos man ang mga tawo nga nagtuo sa Diyos?’ ug ‘Nganong angayng motuo kita sa tanan nga gitudlo sa mga simbahan sa dihang daghan sa mga pagtulon-an niini makalilibog man ug nagkasumpakiay?’

Kay nahigawad sa mga tubag nga gihatag sa ilang klero, ang daghan mohinapos nga ang tubag wala diha sa Bibliya. Sa dihang ang usa ka klerigo mohatag ug katin-awan nga gibase lamang sa iyang personal nga hunahuna, kasagarang moresulta ang dili pagsinabtanay, bisan pa gani ang dili pagtuo sa Diyos ug sa Bibliya.

Kana ang kaagi ni Abel, kinsa gimatuto ingong Lutheran sa Habagatang Aprika. Nahinumdom siya: “Ang simbahan nagtudlo nga ang tanan nga namatay ‘gikuha’ sa Diyos. Apan dili ako makasabot kon nganong ang Diyos sa gugma ‘magkuha’ sa mga ginikanan gikan sa ilang mga anak. Sa kabanikanhan sa Aprika diin nagtubo ako, dili kami moihaw ug himungaan hangtod dagko na ang mga piso. Kon mahibalo kami nga mabdos ang usa ka bayeng baka, ioktaba namo ang pag-ihaw niana hangtod ipanganak ug malutas na ang nating baka. Dili ko masabtan kon nganong ang mahigugmaong Diyos dili magpakita sa samang konsiderasyon alang sa mga tawo.”

Si Aram, nga usa ka Canadiano, may susamang mga pagduhaduha. “Sa dihang 13 anyos pa ako, ang akong amahan namatay,” misugid siya. “Sa serbisyo sa paglubong, usa ka inilang klerigo misaysay nga gusto sa Diyos nga mamatay ang akong amahan aron siya mahiduol sa Diyos didto sa langit. ‘Kuhaon sa Diyos ang maayong mga tawo,’ matod niya, ‘kay gihigugma sa Diyos ang mga matarong.’ Dili ko masabtan kon nganong hakog kaayo ang Diyos.”

 Ngadtongadto, si Abel ug si Aram nakahimamat ug mga Saksi ni Jehova, nagtuon sa Bibliya kauban nila ug, sa kataposan, nakakaplag sa mga tubag sa ilang mga pangutana. Ilang naugmad ang gugma alang sa Diyos ug ang lig-ong pagtuo kaniya. Sa kataposan, ilang gipahinungod ang ilang kinabuhi kang Jehova ug nahimong maunongon niyang mga alagad.

Tukmang Kahibalo—Usa ka Hinungdanong Katarongan nga Motuo sa Diyos

Unsay makat-onan nato sa maong mga kaagi? Nagpadayag kana kanato nga kon bahin sa pagtuo sa Diyos, gikinahanglan ang tukmang kahibalo sa Bibliya. Gisultihan ni apostol Pablo ang mga Kristohanon sa karaang siyudad sa Filipos: “Mao kini ang padayon ko nga ginaampo, nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.” (Filipos 1:9) Gipasiugda dinhi ni Pablo nga ang gugma alang sa Diyos ug alang sa isigkamagtutuo suod kaayong nalangkit sa tukmang kahibalo bahin sa Diyos ug katakos sa pag-ila kon unsa ang iyang kabubut-on.

Makataronganon kini, sanglit ang unang kinahanglanon sa pagbaton sa pagsalig ug kompiyansa diha sa usa ka tawo mao ang pagkaila nianang tawhana—kon mas bug-os ug tukma ang imong pagkaila nianang tawhana, mas modako ang imong pagsalig. Sa susamang paagi, ang tukmang kahibalo gikinahanglan aron matukmod ka sa pagtuo sa Diyos. “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita,” matod ni Pablo. (Hebreohanon 11:1) Ang pagtuo sa Diyos nga walay tukmang kahibalo sa Bibliya nahisamag balay-balay nga baraha. Ang hinayng paghuyop makaguba na niana.

Ang pagtuon sa Bibliya makatabang kanimo aron makaplagan ang mga tubag sama niadtong dugay nang nakapalibog kang Abel ug Aram, Nganong mamatay ang mga tawo? Ang Bibliya nagpatin-aw nga “ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Ang mga tawo matigulang ug mamatay, dili tungod kay sila kuhaon sa Diyos aron makauban niya, kondili tungod kay si Adan nakasala. (Genesis 2:16, 17; 3:6, 17-19) Dugang pa, gipadayag sa Bibliya ang matuod nga paglaom nga gitanyag ni Jehova nga Diyos. Pinaagi sa iyang Anak, si Jesu-Kristo, iyang gitagana ang paglaom sa pagkabanhaw alang sa makasasalang mga tawo.—Juan 5:28, 29; Buhat 24:15.

Aron katabangan kita sa pagsabot sa kamatuoran bahin sa pagkabanhaw, ang talaan sa Bibliya adunay daghang pananglitan sa mga tawo nga gibanhaw ni Jesus. (Lucas 7:11-17; 8:40-56; Juan 11:17-45) Samtang imong basahon kining mga asoya sa Bibliya, matikdi ang kangaya ug kalipay nga gibati sa mga higala ug pamilya sa mga tawo nga gibanhaw. Matikdi usab nga sila natandog sa pagdayeg sa Diyos ug sa pagtuo kang Jesus.

Ang tukmang kahibalo bahin sa Diyos ug sa iyang mga katuyoan mahimong adunay samang epekto diha sa mga tawo karon. Daghan ang kanhi nalibog, nabug-atan, ug napandol pa gani tungod kay sila wala makakaplag sa makapatagbawng mga tubag sa ilang hinungdanong mga pangutana. Apan samtang ilang gitun-an ang Bibliya, ilang nakaplagan ang mga tubag, ug kana bug-os nag-usob sa ilang kinabuhi.

Gugma Alang sa Diyos—Kinalabwang Katarongan nga Moalagad Kaniya

Bisan pag gikinahanglan ang tukmang kahibalo aron motuo sa Diyos, labaw pa ang gikinahanglan aron matandog ang usa ka tawo sa pagsugot ug pag-alagad kaniya. Sa gipangutana kon unsa ang labing dakong sugo sa Diyos, si Jesus miingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:30) Kon ang usa ka tawo nahigugma sa Diyos sa paagi nga gipaila ni Jesus, siya andam kaayo nga mosugot ug moalagad Kaniya. Matuod ba kana kanimo?

Si Rachel, kinsa nag-alagad nga misyonarya sa Korea sulod na sa ubay-ubayng katuigan, naghatag niini nga katarongan sa iyang pagtuo: “Ako makahunahuna sa pagkamahinatagon ni Jehova ngadto sa iyang mga linalang, sa iyang pagkamapinasayloon diha sa pagpakiglabot sa iyang katawhan, ug sa iyang tinguha nga kita makabatog kaayohan pinaagi sa pagpahibalo kanato kon unsay iyang gikinahanglan kanato. Tungod nianang mga butanga ang akong gugma sa Diyos midako. Ug tungod sa maong gugma gusto ko nga moalagad kaniya.”

Si Martha, usa ka biyuda nga taga-Alemanya,  nag-alagad kang Jehova sulod na sa 48 ka tuig. Nag-ingon siya: “Nganong nag-alagad ako kang Jehova? Kay nahigugma ako kaniya. Kada gabii makigsulti ako kang Jehova diha sa pag-ampo ug mosulti kaniya kon unsa ka dulot ang akong pagkamapasalamaton tungod sa tanan niyang panalangin, ilabina tungod sa halad lukat.”

Tungod sa atong gugma alang sa Diyos buot nato nga moalagad nga kinasingkasing kaniya. Apan sa unsang paagi maugmad sa usa ka tawo ang maong gugma? Ang labing kusganon nga panukmod aron maugmad ang gugma alang sa Diyos mao ang dulot nga pagkamapasalamaton tungod sa gugma nga iyang gipakita kanato. Matikdi kining makapalipay nga pahinumdom gikan sa Bibliya: “Siya nga wala mahigugma wala makaila sa Diyos, tungod kay ang Diyos gugma. Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.”—1 Juan 4:8-10.

Naamgohan mo ba kon unsa ka dako ang maong gugma? Ihulagway sa hunahuna nga ikaw hapit nang malumos sa kusog-ug-agos nga suba ug gipameligro sa usa ka tawo ang iyang kinabuhi aron luwason ka. Hikalimtan mo ba siya, o dili ba hinuon nga ikaw magmapasalamaton kaayo kaniya? Dili ba andam ka nga buhaton ang tanan nimong maarangan alang kaniya? Ang gugma nga gipakita sa Diyos diha sa pagtagana sa iyang Anak, si Jesu-Kristo, ingong halad lukat mas labaw nga walay ikatandi. (Juan 3:16; Roma 8:38, 39) Sa dihang ang imong kasingkasing matandog sa gugma sa Diyos, ikaw madasig sa paghigugma ug pag-alagad kaniya sa bug-os nga kasingkasing.

Mga Panalangin Karon ug sa Umaabot

Bisan pag ang atong gugma alang sa Diyos angay nga maoy kinalabwang katarongan sa pagbuhat sa iyang kabubut-on, makalilipay ang pagkahibalo nga gantihan sa Diyos kadtong nag-alagad kaniya. Si apostol Pablo mipahayag: “Kon walay pagtuo imposible ang pagpahimuot kaniya, kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—Hebreohanon 11:6.

 Kadtong nahigugma ug nagsugot sa Diyos gipanalanginan gayod niya. Gipahimuslan sa daghan ang mas maayong panglawas tungod sa pagsunod sa mga prinsipyo sa Bibliya. (Proverbio 23:20, 21; 2 Corinto 7:1) Kadtong nagpadapat sa mga prinsipyo sa Bibliya mahitungod sa pagkamatinud-anon ug pagkakugihan kasagarang gisaligan sa ilang mga amo ug busa mobatig mas dakong kasegurohan bahin sa panginabuhian. (Colosas 3:23) Tungod sa pagbutang sa ilang pagsalig kang Jehova, ang mga alagad sa Diyos nagpahimulos sa kalinaw sa hunahuna bisag nakasinatig masulayong mga kahimtang. (Proverbio 28:25; Filipos 4:6, 7) Labaw sa tanan, sila masaligong nagpaabot sa panalangin nga kinabuhing walay kataposan diha sa umaabot nga yutang Paraiso.—Salmo 37:11, 29.

Unsay pagbati bahin kaniya sa mga nagtagamtam sa maong mga panalangin nga gikan ni Jehova? Si Jacqueline, usa ka Kristohanon sa Canada, nagpahayag sa iyang pagkamapasalamaton sa Diyos: “Siya kanunayng naghatag kanato ug talagsaon kaayong mga gasa, ug siya nagtagana sa seguradong paglaom nga kinabuhing walay kataposan.” Si Abel, kinsa nagpahayag na nga sayosayo, nagbatbat sa iyang pagbati niining paagiha: “Ang palaaboton nga mabuhing walay kataposan sa usa ka paraisong yuta wala ko madungog kanhi, ug ako nagapaabot niana. Apan, bisan pag walay Paraiso, ikalipay ko gihapon ang pagpakita sa akong gugma alang sa Diyos pinaagi sa pag-alagad kaniya.”

Ikaw Mahimong Makabaton Usab ug Tinuod nga Pagtuo

“Si Jehova sa mga panon nagahukom uban sa pagkamatarong; siya nagausisa sa mga rinyon ug sa kasingkasing,” matod sa Bibliya. (Jeremias 11:20) Oo, si Jehova nagasusi kon unsay natago sa atong kahiladmang pagkatawo. Ang matag usa angayng magsusi sa iyang kaugalingong motibo sa pagtuo sa Diyos. Ang sayop nga mga tinuohan ug mga ideya bahin sa Diyos basin miagak sa usa ka tawo sa pagbuhat ug daotang mga buhat sa nangagi. Apan ang tukmang kahibalo sa Bibliya mahimong mosangpot sa usa ka hustong relasyon uban sa Maglalalang, si Jehova nga Diyos.—1 Timoteo 2:3, 4.

Pinaagi sa ilang kahikayan sa libreng pagtuon sa Bibliya diha sa balay, ang mga Saksi ni Jehova nagatabang sa mga tawo nga makabaton ug tukmang kahibalo bahin sa Diyos. (Mateo 28:20) Ang daghan nga midawat sa maong tabang nahidangat sa paghigugma sa Diyos ug nakaugmad ug tiunay nga pagtuo kaniya. Pinaagi sa pagtuon sa Bibliya, sila nakabaton ug “praktikal nga kaalam ug katakos sa panghunahuna,” nga motabang kanila sa ‘paglakaw nga may kasegurohan’ niining peligrosong mga adlaw. (Proverbio 3:21-23) Labaw sa tanan, gihambin nila karon ang paglaom nga “seguro ug malig-on” sa umaabot. (Hebreohanon 6:19) Ikaw mahimong makabaton usab ug tinuod nga pagtuo ug makatagamtam sa maong mga panalangin.

[Kahon sa panid 6]

Makalilibog nga mga Pangutana nga Nagkinahanglan ug mga Tubag

“Samtang ginabansay sa ospital isip estudyante sa medisina, nakita ko ang maayong mga tawo nga nag-agulo sa kasakit tungod sa mga sakit ug mga katalagman. Kon adunay Diyos, nganong nahitabo man kining mga butanga? Ang relihiyon ba usa lamang ka paagi aron mabatonan ang kalinaw sa hunahuna?”—Usa ka kanhi Presbiteryano sa Korea.

“Kanunay akong maghunahuna kon ang akong amahan, nga palainom, tua ba sa impiyerno o sa langit. Mahadlok ako sa mga patay ug sa ideya bahin sa impiyernong kalayo. Dili ko masabtan kon nganong ibalhog sa mahigugmaong Diyos ang usa ka tawo ngadto sa impiyerno aron sakiton sa walay kataposan.”—Usa ka kanhi Katoliko sa Brazil.

“Unsay umaabot sa yuta ug sa tawo? Sa unsang paagi ang tawo mabuhi sa walay kataposan? Sa unsang paagi ang tawo makabaton ug tinuod nga kalinaw?”—Usa ka kanhi Katoliko sa Alemanya.

“Ang pagtulon-an sa reinkarnasyon dili makataronganon alang kanako. Ang mga hayop dili mosimba, busa kon tungod sa usa ka hinungdan ikaw mabuhi pag-usab ingong usa ka hayop aron makabayad sa imong mga sala, unsaon nimo pagtul-id ang mga butang ug makauswag gikan nianang kahimtanga?”—Usa ka kanhi Hindu sa Habagatang Aprika.

“Ako nagtubo sa usa ka pamilya nga ang relihiyon maoy Confucianismo, ug tig-apil ako sa seremonyas alang sa kapahulayan sa among mga katigulangan. Samtang ako nag-andam sa lamesa sa halad ug nagyukbo, ako nahibulong kon moabot ba ang patayng mga katigulangan aron mokaon sa pagkaon ug makakita nga kami nagayukbo kanila.”—Usa ka kanhi Confucianista sa Korea.

Silang tanan nakakaplag sa mga tubag sa ilang mga pangutana sa dihang sila nagtuon sa Bibliya uban sa mga Saksi ni Jehova.