Imo Bang Ginaugmad ang Pagbati sa Kahibulong?

NAKAMATIKOD ka ba nga ang mga magsusulat sa Bibliya sublisubling nagpukaw ug pagbati sa kahibulong sa dihang miila sa mga buhat ug hiyas sa Diyos? “Ako katingalahan nga pagkabuhat,” nagsulti ang salmista. (Salmo 139:14) “Oh Jehova,” misulat ang manalagnang si Isaias, “ikaw ang akong Diyos. Bayawon ko ikaw, dayegon ko ang imong ngalan, kay ikaw nakabuhat ug katingalahang mga butang.” (Isaias 25:1) O hunahunaa ang kahibulong ug kahingangha nga gipahayag sa mga pulong ni apostol Pablo: “Oh pagkalawom sa bahandi ug sa kaalam ug sa kahibalo sa Diyos!”—Roma 11:33.

Ang The Oxford Encyclopedic English Dictionary naghubit sa pulong “kahibulong” ingong “usa ka pagbati nga mapukaw sa butang nga wala damha, dili pamilyar, o dili ikapatin-aw, ilabina ang katingala nga may pagdayeg o pagkamaukiton, ug uban pa.”

Dili ba makapalipay nga makita ang gagmayng mga bata nga mosiga ang mga mata sa kahibulong sa dihang sila makakita, makabatyag, o makadungog ug bag-ong mga butang? Ikasubo, ang maong kahibulong tungod sa pagkamaukiton o tungod sa bag-ong butang anam-anam nga mawala inigkadako sa bata.

Apan, alang sa mga magsusulat sa Bibliya nga bag-o pang gikutlo, ang pagbati sa kahingangha maoy kinaiya na nila. Nagpabilin kini latas sa katuigan. Ngano man? Ilang giugmad ang ilang pagbati sa kahibulong pinaagi sa mapabilhong pagpamalandong sa mga buhat sa Diyos. Miampo ang salmista: “Nahinumdoman ko ang katuigan sa dugay na kaayong panahon, ang tanan mong gibuhat; ang mga kahibulongan sa imong kalalangan gihunahuna ko kanunay.”—Salmo 143:5, The New English Bible.

Pagkadalayegon nga kining maong pagbati sa kahibulong nabatonan sa modernong-adlaw nga mga magsisimba sa Diyos! Duna ka ba niini? Ginaugmad mo ba kini?