Pamatud-i nga Ikaw Andam Alang sa Adlaw ni Jehova

‘Pamatud-i ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.’—MATEO 24:44.

1. Nganong angay natong hatagan ug pagtagad ang adlaw ni Jehova?

 KANA unya maoy usa ka adlaw sa pakiggubat ug kapungot, sa kagul-anan ug kasakitan, sa kangitngitan ug kalaglagan. Ang “dako ug makalilisang nga adlaw” ni Jehova tinong modangat niining daotang sistema sa mga butang, sama ra gayod nga gilumsan sa Baha ang daotang kalibotan sa adlaw ni Noe. Segurado kining moabot. Bisan pa niana, “ang matag usa nga magatawag sa ngalan ni Jehova maluwas.” (Joel 2:30-32; Amos 5:18-20) Laglagon sa Diyos ang iyang mga kaaway ug luwason ang iyang katawhan. Uban ang pagkaamgo sa pagkadinalian sa panahon, ang manalagnang si Sofonias nagpahayag: “Ang dakong adlaw ni Jehova haduol na. Kini haduol na, ug nagadali sa hilabihan.” (Sofonias 1:14) Apan, kanus-a ba ipahamtang sa Diyos ang maong paghukom?

2, 3. Nganong kinahanglang mag-andam kita alang sa adlaw ni Jehova?

² “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang,” matod ni Jesus. (Mateo 24:36) Sanglit wala man kita mahibalo sa eksaktong takna, kinahanglang mamati  kita sa mga pulong sa atong tinuig nga teksto sa 2004: ‘Magpadayon sa pagbantay . . . Pamatud-i ninyo nga kamo andam.’—Mateo 24:42, 44.

³ Sa pagpaila nga kalit kaayong pagatigomon kadtong andam alang sa kaluwasan samtang pagabiyaan ang uban, si Jesus miingon: “Duha ka tawo ang anaa sa uma: ang usa pagadad-on ug ang usa pagabiyaan; duha ka babaye magagaling sa galingang demano: ang usa pagadad-on ug ang usa pagabiyaan.” (Mateo 24:40, 41) Nianang makuyawng panahon, unsa ba unya ang atong personal nga kahimtang? Andam ba kita, o makurat kita sa pag-abot nianang adlawa? Depende gayod kana sa mga lakang nga atong ginahimo karon. Sa pagpamatuod nga kita andam alang sa adlaw ni Jehova, kinahanglan natong likayan ang usa ka tinamdan nga kaylap karong adlawa, nga makasukol sa pagkatumpawak ngadto sa usa ka linaing kahimtang sa espirituwal, ug likayan ang pipila ka estilo-sa-kinabuhi.

Likayi ang Pagkatagbaw-sa-Kaugalingon nga Tinamdan

4. Unsay tinamdan sa mga tawo sa adlaw ni Noe?

⁴ Palandonga ang mga adlaw ni Noe. “Tungod sa pagtuo si Noe, human hatagi sa Diyos ug pasidaan mahitungod sa mga butang nga wala pa makita, nagpakitag diyosnong kahadlok ug nagtukod ug arka aron sa pagluwas sa iyang panimalay,” nag-ingon ang Bibliya. (Hebreohanon 11:7) Kadto nga arka maoy talagsaon ug himatikdan. Dugang pa, si Noe maoy “usa ka magwawali sa pagkamatarong.” (2 Pedro 2:5) Ang pagtukod ni Noe ug arka o ang iyang pagwali wala makapatandog sa mga tawo sa iyang adlaw aron mag-usab sa ilang pagkinabuhi. Ngano? Tungod kay sila ‘nangaon ug nanginom, ang mga lalaki nagminyo ug ang mga babaye gihatag sa kaminyoon.’ Kadtong giwalihan ni Noe napuliki kaayo sa personal nga mga kalihokan ug sa mga kalingawan mao nga “wala sila magtagad hangtod nga miabot ang baha ug gibanlas silang tanan.”—Mateo 24:38, 39.

5. Unsay panghunahuna sa mga molupyo sa Sodoma sa adlaw ni Lot?

⁵ Ingon usab niadto ang kahimtang sa mga adlaw ni Lot. Ang Kasulatan nagsulti kanato: “Sila nanagpangaon, sila nanag-inom, sila nanagpamalit, sila nanagbaligya, sila nanagtanom, sila nanagpanukod. Apan sa adlaw nga si Lot migula sa Sodoma, miulan ug kalayo ug asupre gikan sa langit ug gilaglag silang tanan.” (Lucas 17:28, 29) Human pasidan-i si Lot sa mga manulonda bahin sa umaabot nga kalaglagan, iyang gisultihan ang iyang mga umagad-nga-lalaki kon unsay hapit nang mahitabo. Apan, sa ilang mga mata, “siya daw usa ka tawo nga nagtiawtiaw.”—Genesis 19:14.

6. Unsang tinamdan ang kinahanglan natong likayan?

⁶ Maingon sa mga adlaw ni Noe ug ni Lot, “mao man usab unya ang presensiya sa Anak sa tawo,” matod ni Jesus. (Mateo 24:39; Lucas 17:30) Sa pagkamatuod, ang kaylap nga tinamdan sa daghang tawo karon mao ang pagkatagbaw-sa-kaugalingon. Kinahanglang magbantay kita nga dili maimpluwensiyahan sa maong panghunahuna. Dili man daotan ang pagkaon ug lamiang mga pagkaon ug pag-inom nga kasarangan sa isog nga ilimnon. Sa susama, ang pagminyo maoy kahikayan sa Diyos. Apan, kon kanang mga butanga nahimong labing hinungdanon sa atong kinabuhi ug napadaplin na lang ang espirituwal nga intereses, sa personal kita ba andam alang sa makalilisang nga adlaw ni Jehova?

7. Unsang hinungdanong pangutana ang angay natong isukna sa dili pa mosugod sa bisan unsang proyekto, ug ngano?

⁷ “Ang panahong nabilin mubo na,” matod ni apostol Pablo. “Sukad karon kadtong mga may asawa manig-ingon sa mga walay asawa.” (1 Corinto 7:29-31) Mubo na lang ang panahon nga nabilin aron taposon nato ang atong hinatag-sa-Diyos nga buluhatong pagwali sa Gingharian. (Mateo 24:14) Si Pablo nagtambag bisan sa mga magtiayon nga dili bug-os malinga sa ilang kapikas nga ang intereses sa Gingharian ilang gibutang na lang sa ikaduhang dapit diha sa ilang kinabuhi. Tin-aw, ang hilig sa panghunahuna nga gisugyot ni Pablo mao ang kaatbang sa pagkatagbaw-sa-kaugalingon. Si Jesus miingon: “Nan, magpadayon sa pagpangita pag-una sa gingharian ug sa pagkamatarong [sa Diyos].” (Mateo 6:33) Sa dihang mohimog desisyon o dili pa mosugod sa bisan unsang proyekto, ang hinungdanong pangutana mao, ‘Sa unsang paagi maapektohan niini ang padayon nakong  pag-una sa intereses sa Gingharian diha sa akong kinabuhi?’

8. Kon kita napuliki na kaayo sa matag-adlaw nga mga kalihokan sa kinabuhi, unsay angay natong buhaton?

⁸ Unsa na man kon makaamgo kita nga kita napuliki na kaayo sa matag-adlaw nga mga kalihokan sa kinabuhi sa gidak-ong ang espirituwal nga mga butang nahiklin na? Gamay na lang ba ang kalainan sa atong estilo-sa-kinabuhi ug ang iya sa atong mga silingan nga walay tukmang kahibalo bahin sa Kasulatan ug dili mga magwawali sa Gingharian? Kon kana ang kahimtang, nan kinahanglang ilakip nato kini sa pag-ampo. Si Jehova sarang makapahinabo nga makabaton kitag hustong tinamdan sa hunahuna. (Roma 15:5; Filipos 3:15) Siya makatabang kanato sa pag-una kanunay sa intereses sa Gingharian, pagbuhat kon unsay matarong, ug pagtuman sa atong obligasyon kaniya.—Roma 12:2; 2 Corinto 13:7.

Sukli ang Pagduka sa Espirituwal

9. Sumala sa Pinadayag 16:14-16, nganong kinahanglang suklan ang espirituwal nga pagduka?

⁹ Ang tagna mismo nga naghisgot bahin sa umaabot nga “gubat sa dakong adlaw sa Diyos nga Labing Gamhanan” sa Armagedon nagpasidaan nga ang pipila tingali wala magpabiling nagmata. “Tan-awa! Ako moabot ingon sa usa ka kawatan,” matod ni Ginoong Jesu-Kristo. “Malipayon ang usa nga pabiling magatukaw ug magabantay sa iyang panggawas nga mga besti, aron dili siya maglakaw nga hubo ug ang mga tawo magtan-aw sa iyang kaulawan.” (Pinadayag 16:14-16) Ang panggawas nga mga besti nga gihisgotan dinhi nagpunting sa butang nga magpaila kanato ingong Kristohanong mga Saksi ni Jehova. Naglakip kini sa atong buluhaton ingong mga magwawali sa Gingharian ug sa atong Kristohanong panggawi. Kon kita mahulog ngadto sa samag-natulog nga pagkadili-aktibo, basin kita huboan sa atong Kristohanong ilhanan. Kana makauulaw ug peligroso. Kinahanglan natong suklan ang pagkatumpawak ngadto sa espirituwal nga pagduka o kaluya. Sa unsang paagi makasukol kita sa maong kiling?

10. Nganong ang matag-adlaw nga pagbasa sa Bibliya makatabang kanato sa pagpabiling igmat sa espirituwal?

¹⁰ Gibalikbalik pagpasiugda sa Bibliya nga kita kinahanglang magpabiling magmata ug maghupot sa atong maayong panghunahuna. Pananglitan, ang mga asoy sa Ebanghelyo nagpahinumdom kanato: “Magpadayon sa pagbantay” (Mateo 24:42; 25:13; Marcos 13:35, 37); ‘pamatud-i ninyo nga kamo andam’ (Mateo 24:44); “magpadayon sa pagtan-aw, magpadayon sa pagtukaw” (Marcos 13:33); “mangandam kanunay” (Lucas 12:40). Human isulti nga ang adlaw ni Jehova modangat nga wala dahoma niining kalibotana, si apostol Pablo nag-awhag sa mga isigkamagtutuo: “Dili kita mangatulog sama  sa ginahimo sa uban, kondili magtukaw kita ug maghupot ug maayong panghunahuna.” (1 Tesalonica 5:6) Sa kataposang basahon sa Bibliya, ang hinimayang si Kristo Jesus nagpasiugda sa pagkakalit sa iyang pag-abot, nga nag-ingon: “Ako moabot sa madali.” (Pinadayag 3:11; 22:7, 12, 20) Daghang Hebreohanong manalagna ang nagbatbat ug nagpasidaan usab bahin sa dakong adlaw sa paghukom ni Jehova. (Isaias 2:12, 17; Jeremias 30:7; Joel 2:11; Sofonias 3:8) Ang pagbasa sa Pulong sa Diyos, ang Bibliya, sa matag adlaw ug ang pagpalandong sa atong nabasa makatabang pag-ayo kanato sa pagpabiling igmat sa espirituwal.

11. Nganong gikinahanglan ang personal nga pagtuon sa Bibliya alang sa espirituwal nga pagtukaw?

¹¹ Tinuod, makapadasig gayod sa atong espirituwal nga pagtukaw sa dihang ang usa makugihong magtuon sa personal sa Kasulatan nga magagamit sa binase-sa-Bibliya nga mga basahon nga gitagana sa “matinumanon ug maalamong ulipon”! (Mateo 24:45-47) Apan, ang personal nga pagtuon magpatungha lamang ug mga kaayohan kon kini maoy progresibo ug makanunayon. (Hebreohanon 5:14–6:3) Kinahanglang regular kitang mokaon ug gahing espirituwal nga pagkaon. Ang pagkaplag ug panahon alang niini tingali lisod karong mga adlawa. (Efeso 5:15, 16) Bisan pa niana, dili igo ang pagbasa lamang sa Bibliya ug sa Kasulatanhong mga basahon sa dihang kombenyente tingali kini. Gikinahanglan ang makanunayong personal nga pagtuon aron kita magpabiling ‘mahimsog sa pagtuo’ ug magpadayong nagtukaw.—Tito 1:13.

12. Sa unsang paagi ang Kristohanong mga tigom, mga asembliya, ug mga kombensiyon makatabang kanato sa pagbuntog sa espirituwal nga pagduka?

¹² Ang Kristohanong mga tigom, mga asembliya, ug mga kombensiyon makatabang usab kanato sa pagbuntog sa espirituwal nga pagduka. Sa unsang paagi? Pinaagi sa instruksiyon nga atong madawat. Panahon sa maong mga panagkatigom, dili ba kita kanunayng pahinumdoman bahin sa pagkaduol na sa adlaw ni Jehova? Ang Kristohanong mga tigom kada semana mohatag usab ug mga kahigayonan sa ‘pagdasig sa usag usa ngadto sa gugma ug sa maayong mga buhat.’ Ang maong pagdasig, o pagpukaw, makatabang sa pagpabiling nagtukaw. Dili katingad-anan, gisugo kita nga kanunayng magtigom samtang atong ‘makita nga ang adlaw nagkaduol na.’—Hebreohanon 10:24, 25.

13. Sa unsang paagi ang Kristohanong ministeryo motabang kanato sa pagpabiling nagmata sa espirituwal?

¹³ Gitabangan usab kita sa pagpabiling nagmata sa dihang kita bug-os-kasingkasing nga nakig-ambit sa Kristohanong ministeryo. Aduna bay mas maayong paagi nga magmahunahunaon bahin sa mga ilhanan sa kapanahonan ug sa kahulogan niana kay sa pagpakigsulti sa uban bahin niana? Ug sa dihang atong makita nga kadtong gitun-an nato sa Bibliya mouswag ug mosugod sa pagpadapat kon unsay ilang nakat-onan, modako ang atong pagkaamgo bahin sa pagkadinalian sa panahon. “Andama ang inyong kaisipan alang sa buluhaton,” matod ni apostol Pedro, “hupti ninyo sa bug-os ang maayong panghunahuna.” (1 Pedro 1:13) Ang ‘kanunayng pagkapuliki diha sa buluhaton sa Ginoo’ maoy usa ka maayong tambal sa espirituwal nga pagkaluya.—1 Corinto 15:58.

Likayi ang mga Estilo-sa-Kinabuhi nga Makadaot sa Espirituwalidad

14. Sumala sa gibatbat sa Lucas 21:34-36, unsang mga estilo-sa-kinabuhi nga batok niana nagpasidaan si Jesus?

¹⁴ Sa iyang talagsaong tagna bahin sa ilhanan sa iyang presensiya, si Jesus mihatag ug lain pang pasidaan. Matod niya: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag. Kay moabot kini sa tanang nagapuyo ibabaw sa tibuok nawong sa yuta. Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Lucas 21:34-36) Si Jesus tukmang nagbatbat sa mga estilo-sa-kinabuhi nga gisunod sa kadaghanang tawo: pagpatuyang sa pagkaon, paghuboghubog, ug paagi sa kinabuhi nga naghatag ug mga kabalaka.

15. Nganong angay natong likayan ang pagpatuyang sa pagkaon ug pag-inom?

¹⁵ Ang hinobrang pagkaon ug hinobrang pag-inom dili uyon sa mga prinsipyo sa Bibliya ug angayng likayan. “Ayaw pagpakig-uban sa mga labihan ka hinginom ug bino, taliwala sa mga ulitan nga tigkaon ug unod,” nag-ingon ang Bibliya. (Proverbio 23:20) Hinuon, ang usa dili kinahanglang modangat sa punto nga maghinobra sa pagkaon ug mahimong labihan ka hinginom aron siya mameligro  sa espirituwal. Ang pagkaon ug pag-inom makapaduka ug makapatapolan sa usa sa dili pa gayod makadangat sa maong punto. “Ang tapolan nagatinguha,” nag-ingon ang usa ka proverbio sa Bibliya, “apan ang iyang kalag walay bisan unsa.” (Proverbio 13:4) Kanang tawhana tingali buot mobuhat sa kabubut-on sa Diyos, apan ang iyang tinguha magpabiling dili matuman tungod sa pagpasagad.

16. Sa unsang paagi makalikay kita nga mabug-atan sa mga kabalaka bahin sa atong pamilya?

¹⁶ Unsa ang mga kabalaka sa kinabuhi nga batok niana nagpasidaan si Jesus? Naglakip kana sa personal nga mga kabalaka, pagsuportar sa pamilya, ug susamang mga butang. Pagkadili-maalamon nga mabug-atan kita niini! “Kinsa ba kaninyoy makadugang ug usa ka maniko sa gitas-on sa iyang kinabuhi?” nangutana si Jesus. Iyang gitambagan ang mga nagpatalinghog kaniya: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga.” Ang pag-una sa intereses sa Gingharian diha sa atong kinabuhi ug ang pagsalig nga si Jehova motagana sa atong mga panginahanglan makapugong sa mga kabalaka ug makatabang nga kita magpabiling nagtukaw.—Mateo 6:25-34.

17. Sa unsang paagi maghatag ug kabalaka ang materyalistikong mga pangagpas?

¹⁷ Ang materyalistikong mga pangagpas makahatag usab ug kabalaka. Pananglitan, gihimo sa uban ang ilang kinabuhi nga komplikado pinaagi sa pagpamalit ug mas daghang butang kay sa ilang maabot. Nahaylo ang uban sa daling-madato nga mga pangagpas ug sa dakog-risgo nga pagpamuhonan sa pinansiyal. Ang uban pa gayod nalit-agan sa sekular nga edukasyon kay ilang giisip kini nga usa ka paagi aron molampos sa panalapi. Itugot nato, ang usa ka kurso tingali mapuslanon sa pagpanarbaho. Apan, ang tinuod mao nga tungod sa makahurot-sa-panahon nga pagbaton ug taas nga edukasyon, nadaot ang espirituwalidad sa pipila. Kini makuyaw kaayong kahimtang nga maagoman  samtang ang adlaw ni Jehova haduol na! Ang Bibliya nagpasidaan: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.”—1 Timoteo 6:9.

18. Aron dili mahaylo sa materyalistikong estilo-sa-kinabuhi, unsang katakos ang atong pagaugmaron?

¹⁸ Gikinahanglan nga ugmaron ang katakos sa pag-ila sa matarong ug daotan sa dihang mohimog mga desisyon aron dili mahaylo sa materyalistikong paagi sa kinabuhi. Maugmad ang maong katakos pinaagi sa regular nga pagkaon ug ‘gahing espirituwal nga pagkaon nga maoy alang sa mga tawong hamtong’ ug pinaagi sa ‘pagbansay sa atong mga gahom sa pagsabot pinaagi sa paggamit niini.’ (Hebreohanon 5:13, 14) Ang pagtino sa “mas hinungdanong mga butang” sa dihang hikayon ang mga prioridad manalipod usab kanato batok sa paghimog sayop nga mga desisyon.—Filipos 1:10.

19. Kon masabtan nato nga gamay na lang ang atong panahon alang sa espirituwal nga mga kalihokan, unsay angay natong buhaton?

¹⁹ Ang materyalistikong estilo-sa-kinabuhi makapabuta kanato, tungod kay kini magbilin ug gamayng panahon o wala na kitay panahon alang sa espirituwal nga mga kalihokan. Sa unsang paagi makasusi kita sa atong kaugalingon ug makalikay nga malit-agan sa maong estilo-sa-kinabuhi? Kinahanglang palandongon nato uban ang pag-ampo kon unsaon ug sa unsang gidak-on atong mapayano ang atong kinabuhi. Si Haring Solomon sa karaang Israel miingon: “Matam-is ang pagkatulog sa usa nga nagaalagad, walay sapayan kon diyutay o daghan ang iyang gikaon; apan ang kadagaya sa dato dili magpakatulog kaniya.” (Ecclesiastes 5:12) Mahutdan ba kitag dakong panahon ug kusog tungod sa pag-atiman sa dili-kinahanglanong materyal nga mga butang? Kon daghan kitag kabtangan, daghan kitag mentinahon, bayranan sa insyurans, ug panalipdan. Mas mahayahay ba ang atong kahimtang kon payanohon nato ang atong kinabuhi pinaagi sa paghiklin sa pipila ka butang?

Sa Tanang Paagi, Pamatud-i nga Ikaw Andam

20, 21. (a) Unsang pasalig ang gihatag ni apostol Pedro mahitungod sa adlaw ni Jehova? (b) Unsang mga kalihokan ug mga buhat ang kinahanglang ipadayon nato sa pagbuhat samtang gipamatud-an nato nga kita andam alang sa adlaw ni Jehova?

²⁰ Ang panahon sa kalibotan sa adlaw ni Noe natapos ra gayod, ug ang panahon sa presenteng sistema sa mga butang matapos usab. Si apostol Pedro nagpasalig kanato: “Ang adlaw ni Jehova moabot ingon sa usa ka kawatan, diin ang mga langit mahanaw uban ang nagsagitsit nga kabanha, apan ang mga elemento tungod sa hilabihang kainit mangatunaw, ug ang yuta ug ang mga buhat diha niana mahikyad.” Ang simbolikong mga langit, nga mao ang daotang mga kagamhanan, ug ang simbolikong yuta, nga mao ang katawhan nga bulag sa Diyos, dili gayod maluwas sa kainit sa nagdilaab nga kasuko sa Diyos. Sa pagpasabot kon sa unsang paagi makapamatuod kita nga kita andam alang nianang adlawa, si Pedro mipatugbaw: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!”— 2 Pedro 3:10-12.

²¹ Ang atong regular nga pagtambong sa Kristohanong mga tigom ug pagpakig-ambit sa pagwali sa maayong balita nahilakip sa maong mga kalihokan ug mga buhat sa diyosnong pagkamahinalaron. Hinaot nga atong buhaton kana uban ang kinasingkasing nga pagkamahinalaron ngadto sa Diyos samtang kita mapailobong nagapaabot sa dakong adlaw ni Jehova. Atong ‘buhaton ang kutob sa atong maarangan nga sa kataposan makaplagan sa Diyos nga walay buling ug walay lama ug anaa sa pakigdait.’—2 Pedro 3:14.

Nahinumdom Ka Ba?

• Nganong angay natong pamatud-an nga kita andam alang sa adlaw ni Jehova?

• Kon kita napuliki na kaayo sa naandang mga kalihokan sa kinabuhi, unsay angay natong buhaton?

• Unsay makatabang kanato sa pagbuntog sa espirituwal nga pagduka?

• Unsang makadaot nga mga estilo-sa-kinabuhi ang angay natong likayan, ug sa unsang paagi?

[Mga Pangutana sa Pagtuon]

[Mga hulagway sa panid 20, 21]

Ang mga tawo sa adlaw ni Noe wala magtagad sa umaabot nga paghukom—nagtagad ka ba?

[Hulagway sa panid 23]

Mapayano mo ba ang imong kinabuhi aron ikaw daghan ug panahon alang sa espirituwal nga mga kalihokan?