Kahupayan Alang sa mga Sinakit

SA DIHANG ang matinumanong mga lalaki ug babaye sa nangagi nag-antos ug kasakitan, sila tim-os nga nag-ampo sa Diyos alang sa giya. Apan, gihimo usab nila ang kinahanglanong mga tikang aron mapagaan ang kasakitan, sama sa pagkamamugnaon aron makaikyas gikan sa mga tigdaogdaog. Pananglitan, ang pagsalig kang Jehova uban ang personal nga paningkamot nakapaarang kang David sa pag-antos sa iyang kalisdanan. Komosta kita karon?

Sa dihang masugamak ug kasakitan, lagmit himoon nimo ang kinahanglanong mga tikang sa pagsulbad sa imong problema. Pananglitan, kon ikaw mawad-ag trabaho, dili ka ba maningkamot sa pagpangitag angay nga trabaho nga makasustento kanimo ug sa imong pamilya? (1 Timoteo 5:8) O kon ikaw mag-antos sa sakit, dili ka ba mangitag igong medikal nga tabang? Makapadasig nga si Jesus, kinsa adunay gahom gikan sa Diyos sa pag-ayo sa tanang sakit, miadmitir nga ang ‘mga masakiton magkinahanglan ug mananambal.’ (Mateo 9:12) Sa gihapon, ang imong mga kalisdanan tingali dili gayod mahanaw; ikaw tingali magpadayon sa pag-antos niini sa usa ka sukod.

Nganong dili nimo kana iampo kang Jehova nga Diyos? Pananglitan, sa dihang mangita ug trabaho, ang mainampoong pagsalig sa Diyos motabang kanato sa pagdumili sa bisan unsang tentasyon sa pagdawat ug trabaho nga supak sa mga prinsipyo sa Bibliya. Makalikay usab kita nga ‘mahisalaag gikan sa pagtuo’ tungod sa kahakog o gugma sa salapi. (1 Timoteo 6:10) Sa pagkatinuod, sa paghimog hinungdanong mga desisyon bahin sa panarbaho o pamilya o pagpatambal, kita makasunod sa tambag ni David: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”—Salmo 55:22.

Ang kinasingkasing nga pag-ampo motabang usab kanato nga mahuptan ang atong timbang nga panghunahuna aron ang atong kasakitan dili makapabug-at pag-ayo kanato. Ingong tinuod nga Kristohanon, si apostol Pablo misulat: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” Sa unsang paagi ang tim-os nga pag-ampo makapahupay kanato? “Ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip  pinaagi kang Kristo Jesus.” (Filipos 4:6, 7) Ang kalinaw sa Diyos “labaw sa tanang panghunahuna.” Busa, kini makapalig-on kanato sa dihang kita mabug-atanan sa makapaguol nga mga pagbati. Kini ‘magbantay sa atong mga kasingkasing ug mga gahom sa pangisip,’ sa ingon motabang kanato nga makalikay sa paglihok nga mahinaykon o dili-maalamon, nga makadugang lamang sa atong kasakitan.

Ang pag-ampo mahimong makapausab pa gani sa mga kahimtang. Sa dihang si apostol Pablo nabilanggo sa Roma, siya mapaubsanong naghangyo sa mga isigka-Kristohanon sa pag-ampo alang kaniya. Nganong mihangyog ingon niadto si Pablo? “Ako nagaawhag kaninyo sa pagbuhat niini,” siya misulat kanila, “aron ako mahibalik kaninyo sa labing madali.” (Hebreohanon 13:19) Sa laing pagkasulti, nahibalo si Pablo nga ang pagpatalinghog ni Jehova sa mapinadayonong mga pag-ampo sa iyang mga isigkamagtutuo mahimong makapausab sa kahimtang kon kanus-a siya mapagawas.—Filemon 22.

Mausab kaha sa pag-ampo ang sangpotanan sa atong kasakitan? Mahimong mausab. Apan, angay natong masayran nga mahimong dili tubagon ni Jehova nga Diyos ang atong mga pag-ampo sumala sa atong gusto. Si Pablo nag-ampo sa daghang higayon bahin sa iyang “tunok sa unod,” tingali usa ka pisikal nga suliran. Apan, inay hanawon ang kasakitan, ang Diyos miingon kang Pablo: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.”—2 Corinto 12:7-9.

Kon mao, ang atong kasakitan mahimong dili mahanaw dayon. Bisan pa niana, kita makabatog kahigayonan sa pagpamatuod sa atong pagsalig sa atong langitnong Amahan. (Santiago 1:2-4) Magmasaligon nga bisan kon si Jehova nga Diyos dili maghanaw sa kasakitan, siya “magtaganag kalingkawasan aron [kita] makahimo sa pag-antos niini.” (1 Corinto 10:13) Angayng matikdan nga si Jehova gitawag nga ‘Diyos sa tanang paghupay, kinsa nagahupay kanato sa tanan natong kasakitan.’ (2 Corinto 1:3, 4) Ang Diyos makahatag kanato sa atong gikinahanglan sa paglahutay, ug kita may paglaom sa kinabuhing walay-kataposan.

Ang Pulong sa Diyos, ang Bibliya, nagsaad nga “pagapahiran [ni Jehova] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.” (Pinadayag 21:3, 4) Lisod bang tuohan nga may usa ka kalibotan nga walay kasakitan? Daw lisod tuohan kon ikaw naanad na sa pagkinabuhi sa kasakitan. Apan, ang kagawasan gikan sa kahadlok ug kalamidad maoy gisaad sa Diyos, ug ang iyang katuyoan magmalamposon gayod.—Isaias 55:10, 11.

[Mga hulagway sa panid 9]

Gikan sa kawalay-paglaom ngadto sa kahupayan