Ang Panihapon sa Ginoo—Unsaon Pagsaulog?

AGIG katin-awan sa pagsaulog sa Panihapon sa Ginoo, ang Kristohanong apostol Pablo nagsulat: “Gikan sa Ginoo akong nadawat kanang akong gihatag usab kaninyo, nga ang Ginoong Jesus sa gabii nga siya igatugyan nagkuhag tinapay ug, human makapasalamat, siya nagpikaspikas niini ug miingon: ‘Kini nagkahulogan sa akong lawas nga maoy alang kaninyo. Ipadayon ninyo ang pagbuhat niini sa paghandom kanako.’ Iyang gibuhat ang sama niana maylabot sa kopa usab, human siya manihapon, nga nag-ingon: ‘Kini nga kopa nagkahulogan sa bag-ong pakigsaad tungod sa akong dugo. Ipadayon ninyo ang pagbuhat niini, ingon kamakanunayon sa inyong pag-inom niini, sa paghandom kanako.’ Kay ingon kamakanunayon sa inyong pagkaon niini nga tinapay ug pag-inom niini nga kopa, padayon ninyong gimantala ang kamatayon sa Ginoo, hangtod nga siya moabot.”—1 Corinto 11:23-26.

Sumala sa giingon ni Pablo, gisugdan ni Jesus ang Panihapon sa Ginoo “sa gabii nga . . . igatugyan” si Jesus ni Judas Iskariote ngadto sa Hudiyong relihiyosong mga lider nga nagpugos sa mga Romano sa paglansang kang Kristo. Kanang maong panihapon nahitabo sa ulahing bahin sa kagabhion sa Huwebes, Marso 31, 33 K.P. Si Jesus namatay sa kahoyng estaka sa Biyernes sa hapon, Abril 1. Sanglit ang mga adlaw sa kalendaryo sa Hudiyo magsugod man gikan sa gabii sa usa ka adlaw hangtod sa pagkasunod gabii, ang Panihapon sa Ginoo ug ang kamatayon ni Jesu-Kristo nahitabo sa mao gihapong adlaw—Nisan 14, 33 K.P.

Ang mga mag-aambit sa tinapay ug bino gisugo sa ‘pagpadayon sa pagbuhat niini’ sa paghandom kang Jesus. Sumala sa laing hubad, si Jesus miingon: “Padayon sa pagbuhat niini sa paghinumdom kanako.” (1 Corinto 11:24, The Jerusalem Bible) Ang Panihapon sa Ginoo gitawag usab ug Memoryal sa kamatayon ni Kristo.

Nganong Saulogon ang Kamatayon ni Jesus?

Ang tubag mabatonan pinaagi sa pagsabot sa kahulogan sa kamatayon ni Jesus. Si Jesus namatay ingong pangunang magdadapig sa pagkasoberano ni Jehova. Busa, iyang napamatud-an nga si Satanas bakakon sa pagpangakusar nga ang tawo nag-alagad lamang sa Diyos tungod sa hakog nga mga motibo. (Job 2:1-5; Proverbio 27:11) Pinaagi sa iyang kamatayon ingong tawong hingpit, si Jesus usab ‘naghatag sa iyang kalag nga usa ka lukat baylo sa daghan.’ (Mateo 20:28) Sa dihang nakasala si Adan batok sa Diyos, giwala niya ang hingpit nga tawhanong kinabuhi ug ang mga palaaboton niini. Apan “gihigugma pag-ayo sa Diyos ang kalibotan [sa katawhan] nga gihatag niya  ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Sa pagkatinuod, “ang suhol nga gibayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”—Roma 6:23.

Ang kamatayon ni Jesu-Kristo sa ingon nalangkit sa duha ka kinadak-ang mga pasundayag sa gugma—ang dakong gugma nga gipakita ni Jehova alang sa katawhan pinaagi sa paghatag sa iyang Anak ug ang nagsakripisyo-sa-kaugalingong gugma nga gipakita ni Jesus sa katawhan pinaagi sa mainandamon niyang paghalad sa iyang tawhanong kinabuhi. Ang Memoryal sa kamatayon ni Jesus nagpadako niining duha ka pasundayag sa gugma. Kay kita mga magdadawat man niining maong gugma, dili ba angay nga ipakita nato ang atong pagpasalamat niana? Ang usa ka paagi sa paghimo niini mao ang pagtambong sa kasaulogan sa Panihapon sa Ginoo.

Kahulogan sa Tinapay ug Bino

Sa dihang gisugdan ang Panihapon sa Ginoo, gigamit ni Jesus ang tinapay ug kopa sa pula nga bino ingong mga emblema, o mga simbolo. Si Jesus mikuhag tinapay, ug “human makapasalamat, siya nagpikaspikas niini ug miingon: ‘Kini [nga tinapay] nagkahulogan sa akong lawas nga maoy alang kaninyo.’” (1 Corinto 11:24) Ang tinapay kinahanglang pikaspikason ug iapod-apod ug kaonon tungod kay kini medyo kagumkom nga ginama sa harina ug tubig nga walay lebadura, o igpatubo. Sa Kasulatan, ang lebadura nagsimbolo sa sala. (Mateo 16:11, 12; 1 Corinto 5:6, 7) Si Jesus dili makasasala. Busa, ang iyang hingpit nga tawhanong lawas nagsilbing takos nga halad lukat alang sa katawhan. (1 Juan 2:1, 2) Pagkatukma nga ang tinapay nga gigamit sa paghawas sa walay sala nga unodnong lawas ni Kristo kinahanglang walay lebadura!

Si Jesus nagpasalamat usab alang sa kopa sa walay-sambog nga pula nga bino ug miingon: “Kini nga kopa nagkahulogan sa bag-ong pakigsaad tungod sa akong dugo.” (1 Corinto 11:25) Ang pula nga bino diha sa kopa naghawas sa dugo ni Jesus. Sama nga ang dugo sa gihalad nga mga torong baka ug mga kanding nagpabalido sa Balaod sa pakigsaad tali sa Diyos ug sa nasod sa Israel sa 1513 W.K.P., sa ingon ang giula nga dugo ni Jesus diha sa kamatayon nagpabalido sa bag-ong pakigsaad.

Kinsa ang Angayng Moambit?

Aron maila kon kinsa ang angayng moambit sa mga emblema sa Memoryal, kinahanglang makasabot kita kon unsa ang bag-ong pakigsaad ug kinsa ang mag-aambit sa pakigsaad. Ang Bibliya nag-ingon: “‘Tan-awa! Moabot ang mga adlaw,’ mao ang giingon ni Jehova, ‘ug pagahimoon ko uban sa balay sa Israel ug uban sa balay sa Juda ang usa ka bag-ong pakigsaad . . . Ibutang ko ang akong balaod sa sulod nila, ug isulat ko kini sa ilang kasingkasing. Ug ako mahimong ilang Diyos, ug sila mahimong akong katawhan. . . . Akong pasayloon ang ilang kasaypanan, ug dili ko na hinumdoman ang ilang sala.’”—Jeremias 31:31-34.

Ang bag-ong pakigsaad nagpaposible sa linaing matang sa relasyon uban kang Jehova nga Diyos. Pinaagi niini nga pakigsaad, usa ka grupo sa indibiduwal mahimong iyang katawhan ug siya mahimong ilang Diyos. Ang balaod ni Jehova nahisulat sa sulod nila, diha sa ilang kasingkasing, ug bisan ang dili-tinuli nga mga Hudiyo makabaton ug bag-ong pakigsaad nga relasyon uban sa Diyos. (Roma 2:29) Ang magsusulat sa Bibliya nga si Lucas naghisgot bahin sa katuyoan sa Diyos sa ‘pagliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan.’ (Buhat 15:14) Sumala sa 1 Pedro 2:10, sila ‘kanhi dili usa ka katawhan, apan karon sila maoy katawhan sa Diyos.’ Ang Kasulatan naghisgot kanila ingong ang “Israel sa Diyos,” sa ato pa, espirituwal nga Israel. (Galacia 6:16; 2 Corinto 1:21) Nan, ang bag-ong pakigsaad maoy pakigsaad  tali kang Jehova nga Diyos ug sa espirituwal nga Israel.

Sa iyang kataposang gabii uban sa iyang mga tinun-an, si Jesus mismo naghimo usab ug lahi nga pakigsaad kanila. “Nagahimo ako ug pakigsaad uban kaninyo,” sila iyang giingnan, “maingon nga ang akong Amahan naghimo ug usa ka pakigsaad kanako, alang sa usa ka gingharian.” (Lucas 22:29) Kini mao ang pakigsaad sa Gingharian. Ang gidaghanon sa dili-hingpit nga mga tawo nga pagadalhon ngadto sa pakigsaad sa Gingharian maoy 144,000. Human banhawon ngadto sa langit, sila magmando uban ni Kristo ingong mga hari ug mga saserdote. (Pinadayag 5:9, 10; 14:1-4) Busa, kadtong nailalom sa bag-ong pakigsaad uban kang Jehova nga Diyos nailalom usab sa pakigsaad sa Gingharian uban ni Jesu-Kristo. Sila lamang ang angayng moambit sa mga emblema sa Panihapon sa Ginoo.

Sa unsang paagi kadtong may katungod sa pag-ambit sa mga emblema sa Memoryal nahibalo nga sila adunay talagsaong relasyon uban sa Diyos ug nga sila mga manununod uban ni Kristo? Si Pablo nagpatin-aw: “Ang [balaang] espiritu mismo nagpamatuod uban sa atong espiritu [atong disposisyon sa hunahuna] nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.”—Roma 8:16, 17.

Pinaagi sa iyang balaang espiritu, o aktibong gahom, gidihogan sa Diyos ang kaubang mga manununod ni Kristo. Kini ang nagpatino kanila nga sila maoy mga manununod sa Gingharian. Kini nakamugna diha sa dinihogang mga Kristohanon ug langitnong paglaom. Ilang gilantaw nga diha kanila napadapat ang tanang gipamulong sa Bibliya bahin sa langitnong kinabuhi. Dugang pa, sila andam sa pagsakripisyo sa tanang butang maylabot sa yutan-ong kinabuhi, lakip sa kinabuhi dinhi sa yuta ug sa tanang tawhanong mga relasyon. Bisan pag ang dinihogan-sa-espiritu nga mga Kristohanon nahibalo nga ang kinabuhi sa Paraiso sa yuta maanindot kaayo, dili kini ilang paglaom. (Lucas 23:43) Dili tungod sa sayop nga relihiyosong mga panghunahuna kondili ingong resulta sa paglihok diha kanila sa balaang espiritu sa Diyos, sila adunay dili-mabag-o nga langitnong paglaom ug busa angayng moambit sa mga emblema sa Memoryal.

Unsay ikaingon kon ang tawo wala gayod makaseguro kon siya nailalom ba sa bag-ong pakigsaad ug sa pakigsaad sa Gingharian. Komosta kon siya usab walay pamatuod sa balaang espiritu sa Diyos nga siya maoy usa ka kaubang manununod ni Kristo? Nan daotan nga moambit siya sa mga emblema sa Memoryal. Sa pagkatinuod, ang Diyos dili gayod mahimuot kon ang tawo motuyo sa paghawas sa iyang kaugalingon ingong usa nga tinawag nga mahimong langitnong hari ug saserdote kon siya dili gayod tinawag.—Roma 9:16; Pinadayag 22:5.

Kapila Kini Saulogon?

Ang kamatayon ni Jesus pagasaulogon ba nga senemana o tingali sa matag adlaw? Aw, gisugdan ni Kristo ang Panihapon sa Ginoo ug dili-makataronganong gipapatay sa Adlaw sa Paskuwa. Nga gihimo lamang kas-a sa usa ka tuig, sa Nisan 14, ang Paskuwa nagsaulog sa kagawasan sa Israel gikan sa pagkaulipon sa Ehipto. (Exodo 12:6, 14; Levitico 23:5) Busa ang kamatayon ni “Kristo nga atong inihaw sa paskuwa” saulogon kausa lamang sa usa ka tuig, dili senemana o adlaw-adlaw. (1 Corinto 5:7) Sa pagsaulog sa Panihapon sa Ginoo, sundon sa mga Kristohanon ang samang paagi sa pagsaulog niini ni Jesus dihang iyang gisugdan kini.

Nan, unsay kahulogan sa mga pulong ni Pablo: “Kay ingon kamakanunayon sa inyong pagkaon niini nga tinapay ug pag-inom niini nga kopa, padayon ninyong gimantala ang kamatayon sa Ginoo, hangtod nga siya moabot.” (1 Corinto 11:26) Niining tekstoha gigamit ni Pablo ang pulong nga nagkahulogan nga “sa matag higayon,” o “sa matag panahon.” Busa, siya nag-ingon nga sa matag  panahon nga ang dinihogang mga Kristohanon moambit sa mga emblema, ilang gimantala ang ilang pagtuo sa halad lukat ni Jesus.

Ang dinihogang mga Kristohanon magsaulog sa kamatayon ni Kristo “hangtod nga siya moabot.” Ang pagsaulog niini magpadayon hangtod moabot si Jesus sa pagdawat sa iyang dinihogang mga sumusunod ngadto sa langit pinaagi sa pagkabanhaw ngadto sa espiritu nga kinabuhi panahon sa iyang “presensiya.” (1 Tesalonica 4:14-17) Kini nahiuyon sa mga pulong ni Kristo ngadto sa 11 ka maunongong mga apostoles: “Kon ako moadto ug mag-andam ug dapit alang kaninyo, ako moanhi pag-usab ug pagadawaton ko kamo nganhi kanako, aron nga kon asa ako kamo atua usab.”—Juan 14:3.

Unsay Kahulogan Niini Alang Kanimo?

Kinahanglan bang moambit sa mga emblema sa Memoryal aron makabaton ug kaayohan sa halad ni Jesus ug makadawat ug kinabuhing walay kataposan sa yuta? Dili. Walay giingon diha sa Bibliya nga human sila pagabanhawon dinhi sa yuta, ang mahinadlokon-sa-Diyos nga mga tawo sama kang Noe, Abraham, Sara, Isaac, Rebeca, Jose, Moises, ug David moambit niining maong mga emblema. Bisan pa niana, sila ug ang tanang uban pa nga buot makabaton ug walay-kataposang kinabuhi sa yuta kinahanglang magpasundayag ug pagtuo sa Diyos ug kang Kristo ug sa tagana ni Jehova nga halad lukat ni Jesus. (Juan 3:36; 14:1) Aron makabaton ug kinabuhing walay kataposan, ikaw usab kinahanglang magpasundayag ug pagtuo. Ang imong pagtambong sa tinuig nga pagsaulog sa kamatayon ni Kristo nagsilbing usa ka pahinumdom nianang dakong paghalad ug angayng magpalalom sa imong pagkamapasalamaton alang niana.

Gipasiugda ni apostol Juan ang pagkahinungdanon sa halad ni Jesus sa dihang siya miingon: “Ako nagsulat kaninyo [mga isigkadinihogan] niining mga butanga aron kamo dili makasala. Apan, kon adunay makasala, kita adunay usa ka magtatabang ngadto sa Amahan, si Jesu-Kristo, usa nga matarong. Ug siya usa ka halad pasig-uli alang sa atong mga sala, apan dili lamang sa atoa kondili usab nianang sa tibuok kalibotan.” (1 Juan 2:1, 2) Ang mga dinihogan makaingon nga ang halad ni Jesus maoy halad pasig-uli sa pagtabon sa ilang mga sala. Apan kini usab maoy usa ka halad alang sa sala sa tibuok kalibotan, nga nagpaposible sa masinugtanong mga tawo nga makabaton ug kinabuhing walay kataposan!

Motambong ka ba sa Abril 4, 2004, sa pagsaulog sa kamatayon ni Jesus? Kini nga kasaulogan pagahimoon sa tibuok kalibotan sa mga Saksi ni Jehova diha sa ilang mga tigomanan. Kon motambong ka, makabaton ka ug kaayohan sa pagpamati sa importante kaayong pakigpulong sa Bibliya. Ikaw mapahinumdoman kon unsa ka bililhon ang gihimo ni Jehova nga Diyos ug ni Jesu-Kristo alang kanato. Makapadasig usab sa espirituwal ang pagpakigtigom uban sa mga tawo nga dunay dakong pagtamod sa Diyos ug kang Kristo ug sa halad lukat ni Jesus. Ang okasyon makapalig-on sa imong tinguha nga mahimong magdadawat sa dili-takos nga kalulot sa Diyos, nga motultol sa kinabuhing walay kataposan. Ayaw gayod pababag. Tambong niining makapadasig nga kasaulogan nga maghimaya ug magpahimuot sa atong langitnong Amahan, si Jehova nga Diyos.

[Hulagway sa panid 5]

Ang kamatayon ni Jesus nalangkit sa duha ka kinadak-ang mga pasundayag sa gugma

[Hulagway sa panid 6]

Ang tinapay nga walay lebadura ug ang bino maoy tukmang mga simbolo sa walay sala nga lawas ni Jesus ug sa iyang giula nga dugo