“Himoa ang Buluhaton sa Usa ka Tig-ebanghelyo”

“Maghupot ug maayong panghunahuna sa tanang butang, . . . himoa ang buluhaton sa usa ka tig-ebanghelyo.”—2 TIMOTEO 4:5.

1. Unsang sugo ang gihatag ni Jesus sa iyang mga sumusunod?

 ANG ngalan ug mga katuyoan ni Jehova ginapahayag sa tibuok yuta. Tungod kini kay ang dedikadong katawhan sa Diyos seryosong nagtuman sa sugo nga gihatag ni Jesu-Kristo sa iyang mga sumusunod sa dihang miingon siya: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

2. Unsang instruksiyon ang nadawat sa magtatan-aw nga si Timoteo, ug unsa ang usa ka paagi nga matuman sa Kristohanong mga magtatan-aw ang ilang ministeryo?

² Ang unang-siglo nga mga tinun-an seryosong nagtuman sa maong sugo. Pananglitan, giawhag ni apostol Pablo ang iyang isigka-Kristohanong magtatan-aw nga si Timoteo: “Himoa ang buluhaton sa usa ka tig-ebanghelyo, tumana sa bug-os ang imong ministeryo.” (2 Timoteo 4:5) Karong adlawa, ang usa ka paagi nga matuman sa usa ka magtatan-aw ang iyang ministeryo maoy pinaagi sa pagkahimong masiboton nga magmamantala sa Gingharian, usa nga regular nga nakigbahin sa pag-alagad sa kanataran. Pananglitan, ang magtatan-aw sa Pagtuon sa Libro sa Kongregasyon adunay makapatagbawng pribilehiyo sa pagpanguna diha sa buluhatong pagsangyaw ug sa pagbansay sa uban. Gituman ni Pablo ang iyang personal nga responsibilidad sa pagpahayag sa maayong balita, ug mitabang siya sa pagbansay sa uban alang sa ministeryo.—Buhat 20:20; 1 Corinto 9:16, 17.

 Masibotong mga Tig-ebanghelyo Kaniadto

3, 4. Unsay mga eksperyensiya ni Felipe ingong tig-ebanghelyo?

³ Ang unang mga Kristohanon nailhan ingong masibotong mga tig-ebanghelyo. Tagda ang tig-ebanghelyo nga si Felipe. Usa siya sa “pito ka lalaki . . . nga napanghimatud-ang maayo, [nga] puno sa espiritu ug kaalam,” nga napili sa paghimo sa walay-pagpihig nga adlaw-adlawng pag-apod-apod ug pagkaon taliwala sa nagsultig-Grego ug sa nagsultig-Hebreohanon nga Kristohanong mga balo sa Jerusalem. (Buhat 6:1-6) Sa nahuman ang maong linain nga pag-alagad ug nagkatibulaag ang mga Kristohanon gawas sa mga apostoles tungod sa paglutos, si Felipe miadto sa Samaria. Didto iyang gipahayag ang maayong balita ug gihatagan siyag gahom sa balaang espiritu sa pagpalayas sa mga demonyo ug pag-ayo sa mga bakol ug mga paralisado. Daghang Samarianhon ang midawat sa mensahe sa Gingharian ug nabawtismohan. Kay nakadungog bahin niini, ang mga apostoles sa Jerusalem nagpadala kang apostol Pedro ug Juan ngadto sa Samaria aron ang bag-ong nabawtismohan nga mga magtutuo makadawat sa balaang espiritu.—Buhat 8:4-17.

⁴ Dayon ang espiritu sa Diyos nagtultol kang Felipe sa pagtagbo sa Etiopianhong eunuko diha sa dalan paingon sa Gaza. Human sa klarong pagpatin-aw ni Felipe sa tagna ni Isaias, kining maong ‘tawo nga anaa sa gahom ilalom ni Candace nga rayna sa mga Etiopianhon’ mituo kang Jesu-Kristo ug nabawtismohan. (Buhat 8:26-38) Human niana si Felipe miadto sa Asdod ug dayon sa Cesarea, nga ‘nagpahayag sa maayong balita sa tanang siyudad’ nga iyang naagian. (Buhat 8:39, 40) Tinong naghatag siya ug maayong panig-ingnan sa paghimo sa buluhaton sa usa ka tig-ebanghelyo!

5. Sa unsa ilabinang nailado ang upat ka anak nga babaye ni Felipe?

⁵ Si Felipe aktibo gihapon diha sa ministeryo sa Cesarea mga 20 ka tuig sa ulahi. Sa dihang si Pablo ug Lucas miestar sa iyang balay, siya “may upat ka anak nga babaye, mga ulay, nga nanagna.” (Buhat 21:8-10) Dayag nga sila maayong pagkabansay sa espirituwal, may kasibot alang sa ministeryo, ug nakapribilehiyo gani sa pagpanagna. Ang kasibot sa mga ginikanan alang sa ministeryo mahimong adunay maayong epekto diha sa mga anak nga lalaki ug babaye karon, nga magtukmod kanila sa paghimo sa masibotong pag-ebanghelyo ingong ilang tibuok-kinabuhing buluhaton.

Masibotong mga Tig-ebanghelyo Karon

6. Unsang kalamposan ang nabatonan sa unang-siglo nga mga tig-ebanghelyo?

⁶ Sa iyang dakong tagna nga nagpunting sa atong adlaw ug sa panahon sa kataposan, si Jesu-Kristo nag-ingon: “Sa tanang kanasoran ang maayong balita kinahanglang igawali una.” (Marcos 13:10) Ang kataposan moabot human ang maayong balita ikawali “sa tibuok gipuy-ang yuta.” (Mateo 24:14) Samtang si Pablo ug ang ubang unang-siglo nga mga tig-ebanghelyo nagmantala sa maayong balita, daghan ang nahimong mga magtutuo, ug ang mga kongregasyon natukod sa daghang dapit sa tibuok Romanhong Imperyo. Ang mga ansiyano nga natudlo aron sa pag-alagad niining mga kongregasyona nakigbahin uban sa ilang mga igsoong lalaki ug babaye diha sa buluhatong pag-ebanghelyo ug nagpakaylap sa buluhatong pagsangyaw bisan asa. Ang pulong ni Jehova padayong mikaylap ug nagmadaogon niadtong mga adlawa, sama usab karon tungod kay milyonmilyong Saksi ni Jehova ang naghimo sa buluhaton sa mga tig-ebanghelyo. (Buhat 19:20) Usa ka ba nianang malipayong mga magdadayeg ni Jehova?

7. Unsay ginahimo karon sa mga magmamantala sa Gingharian?

⁷ Daghang presenteng-adlaw nga mga magmamantala sa Gingharian ang nagpahimulos sa mga kahigayonan sa pagpauswag sa ilang pagpakigbahin sa buluhatong pag-ebanghelyo. Libolibo ang nahimong mga misyonaryo, ug gatosan ka libo ang nakigbahin sa bug-os-panahong pag-ebanghelyo nga buluhaton ingong mga regular ug oksilyare payunir. Ug pagkadalayegong buluhaton ang ginahimo sa mga lalaki, babaye, ug mga bata nga nag-alagad ingong masibotong mga magmamantala sa Gingharian! Sa pagkatinuod, ang tanang katawhan ni Jehova nagpahimulos sa iyang dagayang panalangin samtang sila nag-alagad kaniya abaga sa abaga ingong Kristohanong mga tig-ebanghelyo.—Sofonias 3:9.

8. Unsang pagmarka nga buluhaton ang ginahimo karon, ug kinsay naghimo niini?

⁸ Gihatagan sa Diyos ang dinihogang mga sumusunod ni Jesus sa responsibilidad sa pagmantala sa maayong balita sa tibuok yuta. Nagtabang kanila niining buluhatong pag-ebanghelyo mao ang nagkadaghang “ubang mga karnero” ni Kristo. (Juan 10:16) Sa matagnaong paagi, kining nagaluwas-kinabuhi nga buluhaton gipakasama sa pagbutang ug marka diha sa mga agtang niadtong  nagapanghupaw ug nagaagulo tungod sa tanang dulumtanang mga butang nga nagakahitabo karon. Sa dili madugay, ang mga daotan pagalaglagon. Sa kasamtangan, pagkadakong pribilehiyo ang pagdala ug nagaluwas-kinabuhi nga mga kamatuoran ngadto sa mga molupyo sa yuta!—Ezequiel 9:4-6, 11.

9. Sa unsang paagi matabangan ang mga bag-ohan diha sa ministeryo?

⁹ Kon kita dugaydugay nang nakigbahin sa buluhatong pag-ebanghelyo, lagmit kaayo nga duna kitay mahimo aron sa pagtabang sa mga bag-ohan diha sa kongregasyon. Usahay, mahimong paubanon nato sila diha sa ministeryo. Kadtong nag-alagad ingong mga ansiyano gidasig sa paghimo sa tanan nilang maarangan sa pagpalig-on sa mga isigkamagtutuo sa espirituwal nga paagi. Ang maayong mga paningkamot sa mapaubsanong mga magtatan-aw dakog mahimo sa pagtabang sa uban nga mahimong masiboton ug mabungahon nga mga tig-ebanghelyo.—2 Pedro 1:5-8.

Pagpamatuod sa Balay ug Balay

10. Unsang ehemplo ang gihatag ni Kristo ug sa iyang unang mga sumusunod diha sa ministeryo?

¹⁰ Si Jesu-Kristo naghatag sa iyang mga sumusunod ug maayo kaayong ehemplo ingong tig-ebanghelyo. Mahitungod sa ministeryo ni Kristo ug sa iyang mga apostoles, ang Pulong sa Diyos nag-ingon: “Siya mipanaw gikan sa siyudad ug siyudad ug gikan sa balangay ug balangay, nga nagwali ug nagpahayag sa maayong balita sa gingharian sa Diyos. Ug miuban kaniya ang napulog-duha.” (Lucas 8:1) Komosta ang mga apostoles mismo? Human mabuboi sa balaang espiritu panahon sa Pentekostes sa 33 K.P., “matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.”—Buhat 5:42.

11. Sumala sa Buhat 20:20, 21, unsay gihimo ni apostol Pablo diha sa iyang ministeryo?

¹¹ Tungod sa iyang masibotong buluhaton nga pag-ebanghelyo, makasulti si apostol Pablo ngadto sa Kristohanong mga ansiyano nga taga-Efeso: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay.” Sa dihang si Pablo ‘nagtudlo sa balay ug balay,’ giduaw ba niya ang kabalayan sa mga isigkamagsisimba ni Jehova nga nagaduaw sa mga magtutuo isip magbalantay? Wala, kay siya nagpadayon sa pagsaysay: “Ako bug-os nga nagpamatuod ngadto sa mga Hudiyo ug sa mga Grego mahitungod sa paghinulsol ngadto sa Diyos ug sa pagtuo diha sa atong Ginoong Jesus.” (Buhat 20:20, 21) Sa katibuk-an, kadtong dedikado na kang Jehova dili magkinahanglan ug instruksiyon mahitungod sa “paghinulsol ngadto sa Diyos ug sa pagtuo diha sa atong Ginoong Jesus.” Gibansay ni Pablo ang Kristohanong mga ansiyano sa Efeso diha sa balay-balay nga ministeryo samtang iyang gitudloan ang mga dili-magtutuo bahin sa paghinulsol ug pagtuo. Sa pagbuhat niini, gisundog ni Pablo ang pamaagi nga gisugdan ni Jesus.

12, 13. Kaharmonya sa Filipos 1:7, unsay nahimo sa katawhan ni Jehova labot sa ilang katungod sa pagsangyaw?

¹² Ang balay-balay nga ministeryo mahimong malisod. Pananglitan, ang uban mapikal sa dihang moduaw kita kanila dala ang mensahe sa Bibliya. Dili nato gustong mapikal ang mga tawo. Bisan pa niana, ang balay-balay nga ministeryo maoy Kasulatanhon, ug ang gugma sa Diyos ug sa silingan magpalihok kanato sa pagpamatuod niining paagiha. (Marcos 12:28-31) Aron ‘madepensahan ug legal nga maestablisar’ ang atong katungod sa pagsangyaw sa balay ug balay, atong gipasaka ang mga kaso ngadto sa mga hukmanan, lakip na sa Korte Suprema sa Tinipong Bansa. (Filipos 1:7) Ang maong hukmanan halos kanunayng mihukom pabor kanato. Kasagaran ang mosunod nga desisyon:

¹³ “Ang personal nga pagpanagtag ug relihiyosong mga tract maoy dugay nang matang sa misyonaryong ebanghelismo—sama ka karaan sa pag-imbento sa mga imprentahanan. Kini maoy epektibong puwersa diha sa lainlaing relihiyosong mga kalihokan latas sa katuigan. Kining matanga sa pag-ebanghelyo gigamit karon, sa dakong bahin sa lainlaing relihiyosong mga sekta kansang mga colporteur nagdala sa Ebanghelyo ngadto sa libolibong kabalayan ug nagtinguha sa pagdani ug mga membro sa ilang pagtuo pinaagi sa personal nga pagduaw. . . . Kining matanga sa relihiyosong kalihokan sama ka hinungdanon sa pagsimba diha sa mga simbahan ug pagwali gikan sa mga pulpito ilalom sa Unang Pag-amenda [sa Konstitusyon sa Tinipong Bansa].”—Murdock v. Pennsylvania, 1943.

Nganong Magpadayon sa Pagsangyaw?

14. Unsay lain pang epekto sa atong ministeryo?

¹⁴ Adunay daghang rason nga mosangyaw sa balay ug balay. Matag higayon nga moduaw kita sa  usa ka tagbalay, maningkamot kita sa pagtisok ug binhi sa kamatuoran sa Kasulatan. Pinaagi sa pagbalikduaw, ato kanang gibisbisan. Ug adunay lain pang maayong epekto, kay si Pablo misulat: “Ako ang nagtanom, si Apolos ang nagbisibis, apan ang Diyos ang nagpadayon sa pagpatubo niini.” (1 Corinto 3:6) Busa magpadayon kita sa ‘pagtanom ug pagbisibis,’ nga masaligon nga si Jehova ‘magapatubo niana.’

15, 16. Nganong kita magbalikbalik sa pagduaw sa mga tawo diha sa ilang kabalayan?

¹⁵ Atong gibuhat ang buluhaton sa mga tig-ebanghelyo tungod kay nameligro ang mga kinabuhi. Pinaagi sa pagsangyaw atong maluwas ang atong kaugalingon ug kadtong mamati kanato. (1 Timoteo 4:16) Kon kita nahibalo nga nameligro ang kinabuhi sa usa ka tawo, mantinilan ra ba nato ang pagtabang kaniya? Dili gayod! Sanglit nalangkit ang kaluwasan, kita magbalikbalik pagduaw sa mga tawo diha sa ilang kabalayan. Ang mga sirkumstansiya mag-usab-usab. Ang usa nga puliki kaayo nga dili na maminaw sa usa ka higayon basin andam nang mamati sa mensahe sa Bibliya sa laing panahon. Ang laing membro sa pamilya mahimong maoy moatubang, ug mahimong motultol kana sa usa ka Kasulatanhong panaghisgot.

¹⁶ Dili lang ang ilang mga sirkumstansiya kondili usab ang tinamdan sa mga tagbalay mahimong mausab. Pananglitan, ang kaguol nga bation sa dihang mamatyan ug minahal mahimong magtukmod sa usa ka tawo sa pagpamati sa mensahe sa Gingharian. Nagdahom kita nga mahupayan nato ang maong tawo, nga awhagon siya sa paghunahuna sa iyang espirituwal nga panginahanglan, ug ipakita kon sa unsang paagi kini matagbaw.—Mateo 5:3, 4.

17. Unsa ang pangunang rason sa atong buluhatong pagsangyaw?

¹⁷ Ang pangunang rason kon nganong kita mosangyaw sa balay-balay o makigbahin sa ubang mga matang sa Kristohanong ministeryo mao ang tinguha nga makapakig-ambit sa pagpahayag sa ngalan ni Jehova. (Exodo 9:16; Salmo 83:18) Pagkamagantihon kon ang atong buluhatong pag-ebanghelyo makatabang sa mga mahigugmaon sa kamatuoran ug sa pagkamatarong nga mahimong mga magdadayeg kang Jehova! “Kamong mga batan-ong lalaki ug kamong mga ulay usab, kamong mga tigulang nga lalaki uban sa mga batang lalaki,” miawit ang salmista. “Padayega sila sa ngalan ni Jehova, kay ang iyang ngalan lamang maoy hataas uyamot. Ang iyang dignidad maoy labaw pa sa yuta ug sa langit.”—Salmo 148:12, 13.

Ang Pag-ebanghelyo Makabenepisyo Kanato sa Personal

18. Sa unsang paagi makabenepisyo kita sa paghimo sa buluhatong pag-ebanghelyo?

¹⁸ Ang paghimo sa buluhaton sa usa ka tig-ebanghelyo makabenepisyo kanato sa personal sa lainlaing mga paagi. Ang pagduaw sa balay ug balay dala ang maayong balita motabang kanato sa pag-ugmad sa pagkamapaubsanon, ilabina sa dihang wala kita tagda sa malulotong paagi. Aron mahimong epektibo nga mga tig-ebanghelyo, kita kinahanglang mahisama kang Pablo, kinsa ‘nahimong tanang butang ngadto sa tanang matang sa katawhan aron maluwas niya ang pipila.’ (1 Corinto 9:19-23) Ang kasinatian diha sa ministeryo motabang kanato nga mahimong mataktikanhon. Pinaagi sa pagsalig kang Jehova ug pagpili pag-ayo sa atong isulti, ikapadapat nato ang tambag ni Pablo: “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.”—Colosas 4:6.

19. Sa unsang paagi ang mga tig-ebanghelyo matabangan sa balaang espiritu?

¹⁹ Ang buluhatong pag-ebanghelyo magtukmod usab kanato sa pagsalig sa balaang espiritu sa Diyos. (Zacarias 4:6) Sa baylo, ang bunga niini—“gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon”—madayag diha sa atong ministeryo. (Galacia 5:22, 23) Makaapektar kini sa atong mga pakiglabot sa mga tawo, kay ang pagpasignunot sa pagtultol sa espiritu motabang kanato sa pagpasundayag ug gugma, nga magmalipayon ug magmakigdaiton, mahimong hataas ug pailob ug maluloton, magpasundayag ug pagkamaayo ug pagtuo, ug magpasundayag ug kalumo ug pagpugong-sa-kaugalingon samtang nagapahayag sa maayong balita.

20, 21. Unsa ang pipila ka panalangin ug mga benepisyo sa pagkapuliki ingong mga tig-ebanghelyo?

²⁰ Ang laing panalangin nga atong masinati ingong mga tig-ebanghelyo mao nga kita mahimong mas mabination. Sa dihang ang mga tawo maghisgot sa ilang mga problema—sakit, kawalay-trabaho, mga kalisdanan diha sa pamilya—dili kita molihok ingong mga magtatambag,  kondili magpaambit kita ug makapadasig ug makapahupay nga mga kasulatan uban kanila. Kita may kahingawa sa mga tawo nga nabutaan sa espirituwal apan daw adunay gugma sa pagkamatarong. (2 Corinto 4:4) Ug pagkadakong panalangin ang paghatag ug espirituwal nga tabang niadtong “hustong nakiling alang sa kinabuhing walay kataposan”!—Buhat 13:48.

²¹ Ang regular nga pagpakigbahin sa buluhatong pag-ebanghelyo motabang kanato sa pagsentro sa atong hunahuna diha sa espirituwal nga mga butang. (Lucas 11:34) Mapuslanon gayod kana, tungod kay kondili basin mahaylo kita sa materyalistikong mga tentasyon nga komon kaayo niining kalibotana. Si apostol Juan nag-awhag sa mga Kristohanon: “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya; tungod kay ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan, apan nagagikan sa kalibotan. Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:15-17) Ang pagkapuliki ingong mga tig-ebanghelyo nga nagapakigbahin kanunay diha sa buluhaton sa Ginoo motabang kanato nga dili mahigugma sa kalibotan.—1 Corinto 15:58.

Pagtigom ug mga Bahandi sa Langit

22, 23. (a) Unsang mga bahandi ang ginatigom sa Kristohanong mga tig-ebanghelyo? (b) Sa unsang paagi motabang kanato ang sunod nga artikulo?

²² Ang masibotong buluhaton nga pagwali sa Gingharian makahatag ug dumalayong mga benepisyo. Gipakita kini ni Jesus sa dihang siya miingon: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat. Kay kon hain gani ang imong bahandi, atua usab didto ang imong kasingkasing.”—Mateo 6:19-21.

²³ Hinaot nga magpadayon kita sa pagtigom ug mga bahandi sa langit, nga nahibalo nga wala nay mas labaw pang pribilehiyo kay nianang paghawas sa Soberanong Ginoong Jehova ingong iyang mga Saksi. (Isaias 43:10-12) Samtang ginatuman nato ang gisugo kanato ingong mga ministro sa Diyos, lagmit bation nato ang gibati sa usa ka Kristohanong babaye nga nag-edad ug kapin sa 90 anyos kinsa miingon niini bahin sa iyang dugay nang pag-alagad sa Diyos: “Latas niining tanang katuigan akong gipasalamatan si Jehova tungod sa pagdawat kanako bisan pa sa akong mga kasaypanan, ug kinasingkasing akong nag-ampo nga siya mahimong akong mahigugmaong Amahan sa walay kataposan.” Kon pabilhan usab nato ang atong relasyon uban sa Diyos, segurado nga buot natong mobuhat sa buluhaton sa usa ka tig-ebanghelyo sa bug-os nga paagi. Ang sunod nga artikulo motabang kanato sa pagsusi kon sa unsang paagi matuman nato sa bug-os ang atong ministeryo.

Unsaon Nimo Pagtubag?

• Nganong angay natong buhaton ang buluhaton sa usa ka tig-ebanghelyo?

• Unsay imong ikasulti bahin sa buluhaton sa mga tig-ebanghelyo kaniadto ug karon?

• Nganong kita magpamatuod sa balay ug balay?

• Sa unsang paagi makabenepisyo ka sa pagbuhat sa buluhaton sa usa ka tig-ebanghelyo?

[Mga Pangutana sa Pagtuon]

[Mga hulagway sa panid 10]

Ang mga tig-ebanghelyo sama kang Felipe ug sa iyang mga anak nga babaye adunay malipayong modernong-adlaw nga mga katumbas

[Hulagway sa panid 14]

Sa unsang paagi makabenepisyo ka samtang ikaw nagapaambit sa maayong balita ngadto sa uban?