Mga Tigulang—Bililhong mga Membro sa Atong Kristohanong Panag-igsoonay

“Sila nga natanom diha sa balay ni Jehova . . . molambo. Sila magpadayon pa gihapon sa paglipang panahon sa ilang pagkaubanon.”—SALMO 92:13, 14.

1. Sa unsang paagi gilantaw sa daghang tawo ang mga tigulang?

 SI Jehova nahigugma sa tanan niyang matinumanong mga alagad, lakip na sa mga tigulang. Apan, sumala sa usa ka nasodnong kalkulasyon, kada tuig duolan sa tunga sa milyong tigulang sa Tinipong Bansa ang giabusohan o gipasagdan. Ang susamang mga taho gikan sa tibuok kalibotan nagpaila nga ang pag-abuso sa mga tigulang maoy tibuok-globong problema. Ang hinungdan niini mao ang gitawag sa usa ka organisasyon nga “kaylap nga tinamdan taliwala sa daghang tawo . . . nga ang mga tigulang wala nay kapuslanan, dili-mabungahon ug sobrang magsalig sa uban.”

2. (a) Sa unsang paagi gilantaw ni Jehova ang iyang matinumanong tigulang nga mga alagad? (b) Unsang makapadasig nga kahubitan ang atong makita diha sa Salmo 92:12-15?

² Gipabilhan ni Jehova nga Diyos ang iyang maunongong tigulang nga mga alagad. Siya naghatag ug dakong pagtagad sa ‘atong pagkatawo sa sulod’—atong espirituwal nga kahimtang—inay kay sa atong pisikal nga mga limitasyon. (2 Corinto 4:16) Sa iyang Pulong, ang Bibliya, atong makita ang mosunod nga makapadasig nga pasalig: “Ang matarong molambo sama sa kahoyng palma; siya modako, sama sa sedro sa Lebanon. Sila nga natanom diha sa balay ni Jehova, diha sa mga sawang sa atong Diyos, sila molambo. Sila magpadayon pa gihapon sa paglipang panahon sa ilang pagkaubanon, sila magpabiling tambok ug lunhaw, aron sa pagsaysay nga si Jehova maoy matul-id.” (Salmo 92:12-15) Ang paghisgot niining mga bersikuloha magpadayag sa mga bahin sa bililhong kahinguhaan nga ikatampo ninyong mga tigulang ngadto sa Kristohanong kapunongan sa mga igsoon.

‘Paglipang Panahon sa Pagkaubanon’

3. (a) Nganong ang mga matarong gipakasama sa mga kahoyng palma? (b) Sa unsang paagi ang mga tigulang ‘molipang panahon sa pagkaubanon’?

³ Gipakasama sa salmista ang mga matarong ngadto sa mga kahoyng palma nga ‘natanom diha sa mga sawang sa atong Diyos.’ Sila ‘magpadayon sa paglipang panahon sa ilang pagkaubanon.’ Ang laing hubad mabasa: “Sa pagkatigulang sila mamunga gihapon.” (Tanakh) Dili ka ba mouyon nga makapadasig kini nga hunahuna? Ang maanindot, tanos nga mga kahoyng palma kasagarang makita diha sa mga sawang sa Silangan sa kapanahonan sa Bibliya. Gawas pa nga kini gigamit ingong dayandayan, ang mga palma gipabilhan tungod sa ilang dagayang bunga, nga ang ubang mga kahoy padayong mamunga sulod sa kapin sa usa ka gatos ka tuig. a Pinaagi sa pagpabiling lig-on nga nagbarog diha sa matuod nga  pagsimba, ikaw usab ‘padayong mamunga sa tanang maayong buhat.’—Colosas 1:10.

4, 5. (a) Unsang hinungdanong bunga ang kinahanglang ipatungha sa mga Kristohanon? (b) Paghatag ug Kasulatanhong mga panig-ingnan sa mga tigulang nga nagpatunghag “bunga sa mga ngabil.”

⁴ Gidahom ni Jehova ang mga Kristohanon nga magpatunghag “bunga sa mga ngabil”—mga pulong nga gisulti sa pagdayeg kaniya ug sa iyang katuyoan. (Hebreohanon 13:15) Mapadapat ba kini kanimo ingong tigulang? Mapadapat gayod.

⁵ Ang Bibliya adunay mga panig-ingnan sa mga tigulang nga way-kokahadlok nga nagpamatuod sa ngalan ug katuyoan ni Jehova. Si Moises milapas na sa “kapitoan ka tuig” sa dihang gisugo siya ni Jehova ingong iyang manalagna ug hawas. (Salmo 90:10; Exodo 4:10-17) Ang pagkatigulang wala magpugong kang manalagnang Daniel sa paghatag ug maisogong pagpamatuod bahin sa pagkasoberano ni Jehova. Si Daniel lagmit nga nag-edad ug kapin sa 90 anyos sa dihang gipatawag siya ni Belsazar aron sa paghubad sa misteryosong sinulat sa kamot diha sa bungbong. (Daniel, kapitulo 5) Ug komosta ang tigulang nga si apostol Juan? Sa naghinapos na ang iyang matinumanong pag-alagad, nabilanggo siya sa isla sa Patmos “tungod sa pagsulti bahin sa Diyos ug sa pagpamatuod bahin kang Jesus.” (Pinadayag 1:9) Lagmit gayong mahinumdoman nimo ang daghan pang mga karakter sa Bibliya nga nagpatungha ug “bunga sa mga ngabil” sa tigulang na sila.—1 Samuel 8:1, 10; 12:2; 1 Hari 14:4, 5; Lucas 1:7, 67-79; 2:22-32.

6. Sa unsang paagi gigamit ni Jehova ang “mga tigulang nga lalaki” sa pagpanagna niining kataposang mga adlaw?

⁶ Nagkutlo sa Hebreohanong manalagna nga si Joel, si apostol Pedro miingon: “‘Sa kataposang mga adlaw,’ nagaingon ang Diyos, ‘ibubo ko ang bahin sa akong espiritu sa tanang matang sa unod [lakip na sa “mga tigulang nga lalaki”], . . . ug sila managna.’” (Buhat 2:17, 18; Joel 2:28) Sa samang paagi, niining kataposang mga adlaw, gigamit ni Jehova ang tigulang nga mga membro sa dinihogang matang ug sa “ubang mga karnero” sa pagpahayag sa iyang mga katuyoan. (Juan 10:16) Ang uban niini matinumanong nagpatungha ug mga bunga sa Gingharian sulod na sa daghang dekada.

7. Iilustrar kon sa unsang paagi ang mga tigulang makapadayon sa pagpatunghag mga bunga sa Gingharian bisan pa sa mga limitasyon sa lawas.

⁷ Tagda si Sonia, kinsa nahimong bug-os-panahong magmamantala sa Gingharian niadtong 1941. Bisan pa sa dugayng pagpakigbisog sa grabeng balatian, siya regular nga nagadumala ug mga panagtuon sa Bibliya diha sa iyang balay. “Ang pagsangyaw sa maayong balita maoy bahin sa akong kinabuhi,” matod pa ni Sonia. “Sa pagkatinuod, kini maoy akong kinabuhi. Dili ko gustong mohunong sa pagsangyaw.” Di pa dugay, si Sonia ug ang iyang igsoon nga si Olive, nagpaambit sa mensahe sa paglaom diha sa Bibliya ngadto kang Janet, usa ka pasyente nga dunay sakit nga ikamatay nga ilang nahimamat diha sa lawak-hulatanan sa ospital. Ang inahan ni Janet, nga usa ka debotadong Katoliko, nakadayeg kaayo niining mahigugmaong kaikag nga gipakita ngadto sa iyang anak nga siya midawat sa tanyag nga pagtuon sa Bibliya sa balay ug sa pagkakaron kusog nga nagauswag. Magamit ba nimo ang susamang mga kahigayonan sa pagpatunghag mga bunga sa Gingharian?

8. Sa unsang paagi ang tigulang nga si Caleb nagpasundayag sa iyang pagsalig kang Jehova, ug sa unsang paagi ang tigulang nga mga Kristohanon makasundog sa iyang panig-ingnan?

⁸ Pinaagi sa maisogong pagpadayon diha sa buluhatong pagsangyaw sa Gingharian bisan pa sa mga limitasyon sa pagkatigulang, ang mga tigulang nga Kristohanon nagsunod sa mga tunob sa matinumanong Israelinhon nga si Caleb, kinsa mikuyog kang Moises sa kamingawan sulod sa kap-atan ka tuig. Si Caleb maoy 79 anyos sa dihang siya mitabok sa Suba sa Jordan paingon sa Yutang Saad. Human makiggubat ingong sundalo sa madaogong kasundalohan sa Israel sulod  sa unom ka tuig, mahimong magmatagbaw na lang unta siya sa iyang mga kalamposan kanhi ug wala nay himoon pa. Apan dili, siya maisogong mihangyo sa malisod nga asaynment sa pag-ilog sa “dagkong kinutaang mga siyudad” sa bukirong rehiyon sa Juda, usa ka dapit nga gipuy-an sa mga Anakim, mga tawo nga talagsaon ug gidak-on. Uban sa tabang ni Jehova, ‘gipapahawa gayod sila ni Caleb, ingon sa gisaad ni Jehova.’ (Josue 14:9-14; 15:13, 14) Magmasaligon nga si Jehova magauban kanimo, sama nga nag-uban siya kang Caleb, samtang ikaw magpadayon sa pagpatunghag mga bunga sa Gingharian sa panahon sa pagkatigulang. Ug kon magpabilin kang matinumanon, hatagan ka niya ug usa ka dapit sa iyang gisaad nga bag-ong kalibotan.—Isaias 40:29-31; 2 Pedro 3:13.

“Sila Magpabiling Tambok ug Lunhaw”

9, 10. Sa unsang paagi ang tigulang nga mga Kristohanon magpabiling himsog sa pagtuo ug makahupot sa ilang espirituwal nga kalagsik? (Tan-awa ang kahon sa panid 13.)

⁹ Nagtumong sa pagtagad sa pagkamabungahon sa tigulang nga mga alagad ni Jehova, ang salmista miawit: “Ang matarong molambo sama sa kahoyng palma; siya modako, sama sa sedro sa Lebanon. Sila magpadayon pa gihapon sa paglipang panahon sa ilang pagkaubanon, sila magpabiling tambok ug lunhaw.”—Salmo 92:12, 14.

¹⁰ Sa unsang paagi mahuptan nimo ang imong espirituwal nga kalagsik bisan pa sa katigulangon? Ang sekreto sa dumalayong katahom sa kahoyng palma anaa sa walay hunong nga suplay sa tubig. Sa susama, mapalig-on ka sa mga tubig sa kamatuoran sa Bibliya pinaagi sa imong pagtuon sa Pulong sa Diyos ug pinaagi sa pagpakig-uban sa iyang organisasyon. (Salmo 1:1-3; Jeremias 17:7, 8) Ang imong espirituwal nga kalagsik makapahimo kanimong bililhon sa mga isigkamagtutuo. Tagda kon sa unsang paagi kini napamatud-an sa kaso sa tigulang nga Hataas nga Saserdoteng si Jehoiada.

11, 12. (a) Unsang hinungdanong papel ang gidula ni Jehoiada sa kasaysayan sa gingharian sa Juda? (b) Sa unsang paagi gigamit ni Jehoiada ang iyang impluwensiya sa pagpalambo sa matuod nga pagsimba?

¹¹ Si Jehoiada lagmit maoy kapin na sa usa ka gatos ka tuig sa dihang ang ambisyosong si Rayna Atalia miilog sa pagmando sa Juda pinaagi sa pagpamatay sa iyang kaugalingong mga apo. Unsay mahimo sa tigulang nga si Jehoiada? Sulod sa unom ka tuig gitagoan niya ug sa iyang asawa ang bugtong buhi nga harianong manununod, si Jehoas, diha sa templo. Dayon, sa usa ka makapakurat nga lakang, giproklamar ni Jehoiada ang siyete-anyos nga si Jehoas ingong hari ug gipapatay si Atalia.—2 Cronicas 22:10-12; 23:1-3, 15, 21.

¹² Ingong magbalantay sa hari, gigamit ni Jehoiada ang iyang impluwensiya sa pagbayaw sa matuod nga pagsimba. Siya “naghimo ug usa ka pakigsaad tali sa iyang kaugalingon ug sa tibuok katawhan ug sa hari nga sila magpadayon ingon nga katawhan ni Jehova.” Sa mando ni Jehoiada, gilumpag sa mga tawo ang balay sa bakak nga diyos nga si Baal ug gipapha ang mga halaran, larawan, ug saserdote niini. Ilalom usab sa paggiya ni Jehoiada nga gipasig-uli ni Jehoas ang mga serbisyo diha sa templo ug gihimo ang gikinahanglan kaayo nga pag-ayo sa templo. “Si Jehoas nagpadayon sa pagbuhat kon unsay matarong sa mga mata ni Jehova sa tanan niyang adlaw nga si Jehoiada nga saserdote nagtudlo kaniya.” (2 Cronicas 23:11, 16-19; 24:11-14; 2 Hari 12:2) Sa dihang namatay siya sa edad nga 130 anyos, si Jehoiada gihatagan sa talagsaong pasidungog nga ilubong uban sa mga hari tungod kay siya “nagbuhat ug maayo sa Israel ug sa matuod nga Diyos ug sa Iyang balay.”—2 Cronicas 24:15, 16.

13. Sa unsang paagi ang tigulang nga mga Kristohanon ‘makabuhat ug maayo sa matuod nga Diyos ug sa iyang balay’?

¹³ Tingali ang dili maayong panglawas o ubang mga sirkumstansiya naglimite sa imong mahimo sa pagpalambo sa matuod nga pagsimba. Bisan pag ingon niana ang kahimtang, makahimo ka gihapon sa ‘pagbuhat ug maayo sa matuod nga Diyos ug sa iyang balay.’ Ikapasundayag nimo ang kasibot alang sa espirituwal nga balay ni Jehova pinaagi sa pagtambong ug pagpakigbahin sa mga tigom sa kongregasyon ug pinaagi sa pagpakig-ambit sa pag-alagad sa kanataran kon posible. Ang imong pagkaandam nga modawat sa tambag sa Bibliya ug ang imong maunongong pagpaluyo sa “matinumanon ug maalamong ulipon” ug sa kongregasyon adunay makapalig-ong epekto diha sa Kristohanong panag-igsoonay. (Mateo 24:45-47) Makadasig ka usab sa mga isigkamagsisimba “sa paghigugma  ug sa maayong mga buhat.” (Hebreohanon 10:24, 25; Filemon 8, 9) Ug ikaw mahimong panalangin sa uban kon ikaw molihok nga kaharmonya sa tambag ni apostol Pablo: “Ang tigulang nga mga lalaki magmakasaranganon sa batasan, maugdang, maayog panghunahuna, mahimsog [“lagsik,” An American Translation] sa pagtuo, sa gugma, sa pagkamainantoson. Ingon man usab ang tigulang nga mga babaye magmatinahoron sa panggawi, dili mabutangbutangon, ni naulipon sa daghang bino, mga magtutudlo sa maayo.”—Tito 2:2-4.

14. Unsay mahimo sa dugay nang Kristohanong mga ansiyano sa pagpalambo sa matuod nga pagsimba?

¹⁴ Nag-alagad ka ba ingong ansiyano sa kongregasyon sulod sa daghang tuig? “Gamita ang kaalam nga natigom latas sa katuigan sa dili-mahakogong paagi,” maoy tambag sa usa ka dugay nang ansiyano sa kongregasyon. “Idelegar ang responsibilidad, ug ipaambit ang imong kasinatian sa uban kinsa gustong mokat-on . . . Ilha ang mga katakos sa uban. Ugmara ug atimana kana. Pangandam alang sa kaugmaon.” (Deuteronomio 3:27, 28) Ang imong tiunay nga interes sa nagauswag nga buluhaton sa Gingharian mosangpot sa daghang panalangin alang sa uban diha sa atong Kristohanong panag-igsoonay.

‘Isaysay nga si Jehova Maoy Matul-id’

15. Sa unsang paagi ang tigulang nga mga Kristohanon ‘mosaysay nga si Jehova maoy matul-id’?

¹⁵ Ang tigulang nga mga alagad sa Diyos malipayong nagtuman sa ilang responsibilidad “sa pagsaysay nga si Jehova maoy matul-id.” Kon ikaw tigulang nga Kristohanon, ang imong mga pulong ug mga buhat makapakita sa uban nga ‘si Jehova mao ang imong Bato, nga kaniya walay pagkadili-matarong.’ (Salmo 92:15) Ang kahoyng palma maoy hilom nga pamatuod sa kinalabwang mga hiyas sa Maglalalang. Apan gihatagan ka ni Jehova ug pribilehiyo sa pagpamatuod bahin kaniya ngadto niadtong midawat karon sa matuod nga pagsimba. (Deuteronomio 32:7; Salmo 71:17, 18; Joel 1:2, 3) Nganong hinungdanon kini?

16. Unsang panig-ingnan sa Bibliya ang nag-ilustrar sa kahinungdanon sa ‘pagsaysay nga si Jehova maoy matul-id’?

¹⁶ Sa dihang ang Israelinhong lider nga si Josue “tigulang na ug taas nag panuigon,” iyang ‘gitawag ang tibuok Israel, ang mga ansiyano niini ug ang mga pangulo niini ug ang mga maghuhukom niini ug ang mga opisyal niini,’ sa pagpahinumdom kanila sa matul-id nga mga pakiglabot sa Diyos. Siya miingon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman  alang kaninyo.” (Josue 23:1, 2, 14) Sulod sa usa ka yugto, kining mga pulonga nagpalig-on sa determinasyon sa mga tawo sa pagpabiling matinumanon. Apan, human sa kamatayon ni Josue, “may laing kaliwatan nga mitungha . . . nga wala makaila kang Jehova o sa buhat nga gibuhat niya alang sa Israel. Ug ang mga anak sa Israel nagbuhat kon unsay daotan sa mga mata ni Jehova ug nag-alagad sa mga Baal.”—Maghuhukom 2:8-11.

17. Sa unsang paagi si Jehova nakiglabot sa iyang katawhan sa modernong kapanahonan?

¹⁷ Ang integridad sa presenteng-adlaw nga Kristohanong kongregasyon wala magdepende sa binaba nga pamatuod sa tigulang nga mga alagad sa Diyos. Bisan pa niana, ang atong pagtuo kang Jehova ug sa iyang mga saad mapalig-on sa dihang atong madungog mismo ang mga asoy sa “dagkong buhat” nga iyang nahimo alang sa iyang katawhan niining kataposang mga adlaw. (Maghuhukom 2:7; 2 Pedro 1:16-19) Kon ikaw nakig-uban sa organisasyon ni Jehova sulod na sa daghang katuigan, mahinumdoman tingali nimo ang panahon sa dihang diyutay lang ang mga magmamantala sa Gingharian diha sa imong dapit o nasod o sa dihang ang buluhatong pagsangyaw nag-atubang pa ug grabeng pagsupak. Sa paglabay sa panahon, imong nakita nga gikuha ni Jehova ang pipila ka mga babag ug ‘gipadali’ ang pag-uswag sa Gingharian. (Isaias 54:17; 60:22) Imong namatikdan ang pagpatin-aw sa mga kamatuoran sa Bibliya ug nasaksihan ang progresibong pagpasibo sa makitang bahin sa organisasyon sa Diyos. (Proverbio 4:18; Isaias 60:17) Naningkamot ka ba sa pagpalig-on sa uban pinaagi sa pagpaambit kanila sa imong eksperyensiya maylabot sa matul-id nga mga pakiglabot ni Jehova? Pagkamakapadasig ug pagkamakapalig-on ang epekto niini diha sa Kristohanong panag-igsoonay!

18. (a) Iilustrar ang layog-abot nga epekto sa ‘pagsaysay sa uban nga si Jehova maoy matul-id.’ (b) Sa unsang paagi personal nimong naeksperyensiyahan ang katul-id ni Jehova?

¹⁸ Komosta ang mga higayon diin imong naeksperyensiyahan ang mahigugmaong pag-atiman ug paggiya ni Jehova sa imong personal nga kinabuhi? (Salmo 37:25; Mateo 6:33; 1 Pedro 5:7) Usa ka tigulang nga sister nga ginganlag Martha modasig kanhi sa uban pinaagi sa pag-ingon: “Bisag unsay mahitabo, ayaw gayod talikdi si Jehova. Siya magpalig-on kanimo.” Kining tambaga adunay dakong epekto kang Tolmina, usa sa mga estudyante sa Bibliya ni Martha kinsa nabawtismohan sa sayong bahin sa katuigan sa 1960. “Sa dihang namatay ang akong bana,” nahinumdom si Tolmina, “nahigawad ko pag-ayo, apan ang maong mga pulong naghimo kanakong determinado nga dili mopalta sa tigom. Ug gipalig-on gayod ako ni Jehova sa pagpadayon.” Gihatag ni Tolmina ang mao gihapong tambag ngadto sa daghan sa iyang kaugalingong mga estudyante sa Bibliya sulod sa katuigan. Sa pagkatinuod, pinaagi sa paghatag ug pagdasig ug paghinumdom sa matul-id nga mga pakiglabot ni Jehova, dako kag mahimo sa pagpalig-on sa pagtuo sa mga isigkamagtutuo.

 Gipabilhan ni Jehova ang Matinumanong mga Tigulang

19, 20. (a) Sa unsang paagi gilantaw ni Jehova ang mga kalihokan sa iyang tigulang nga mga alagad? (b) Unsay hisgotan sa sunod nga artikulo?

¹⁹ Ang kalibotan karon, nga naila sa pagkaingrato, wala kaayoy pagtagad sa mga tigulang. (2 Timoteo 3:1, 2) Sa dihang sila mahinumdoman, subsob nga tungod kana sa ilang nahimo sa nangagi—kon unsa sila kaniadto, imbes kon unsa sila karon. Sa kasukwahi, ang Bibliya nag-ingon: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.” (Hebreohanon 6:10) Siyempre, mahinumdoman ni Jehova nga Diyos ang imong miaging rekord sa matinumanong mga buhat. Apan gipabilhan ka usab niya tungod sa imong padayong ginabuhat sa pag-alagad kaniya. Oo, iyang gilantaw ang matinumanong mga tigulang ingong mabungahon, himsog sa espirituwal, ug lagsik nga mga Kristohanon—usa ka buhing pamatuod sa iyang gahom.—Filipos 4:13.

²⁰ Gilantaw ba nimo ang tigulang nga mga membro sa atong Kristohanong panag-igsoonay sama sa paglantaw ni Jehova kanila? Kon gibuhat nimo kana, matukmod ka sa pagpakita sa imong gugma alang kanila. (1 Juan 3:18) Ang sunod nga artikulo maghisgot sa pipila ka praktikal nga mga paagi sa pagpakita sa maong gugma sa pag-atiman sa ilang mga panginahanglan.

[Footnote]

Unsay Imong mga Tubag?

• Sa unsang paagi ang mga tigulang ‘namunga’?

• Nganong ang espirituwal nga kalagsik sa tigulang nga mga Kristohanon usa ka bililhong kahinguhaan?

• Sa unsang paagi ang mga tigulang ‘makasaysay nga si Jehova maoy matul-id’?

• Nganong gipabilhan ni Jehova ang iyang dugay nang mga alagad?

[Mga Pangutana sa Pagtuon]

[Kahon sa panid 13]

Kon sa Unsang Paagi Nagpabiling Lig-on ang Ilang Pagtuo

Unsay nakatabang sa dugay nang mga Kristohanon sa pagpabiling lig-on sa pagtuo ug sa paghupot sa ilang espirituwal nga kalagsik? Mao kiniy giingon sa pipila:

“Hinungdanon kaayo ang pagbasag mga teksto nga naghatag ug pagtagad sa atong relasyon kang Jehova. Halos kada gabii, akong litokon ang Salmo 23 ug 91.”—Olive, nabawtismohan sa 1930.

“Akong giseguro nga kanunay akong makatambong sa tanang pakigpulong sa bawtismo ug mamati pag-ayo, nga daw ako kining kaugalingong bawtismo. Ang paghupot sa akong pahinungod nga tin-aw diha sa hunahuna maoy hinungdanong lakang sa pagpabiling matinumanon.”—Harry, nabawtismohan sa 1946.

“Hinungdanon ang adlaw-adlaw nga pag-ampo—nga kanunayng mangayo sa tabang, panalipod, ug panalangin ni Jehova, ‘nga magtagad kaniya sa tanan natong mga dalan.’” (Proverbio 3:5, 6)—Antônio, nabawtismohan sa 1951.

“Ang pagpamati sa mga kasinatian niadtong matinumanon gihapong nag-alagad kang Jehova sulod sa daghang katuigan nagbag-o sa akong determinasyon sa pagpabiling maunongon ug matinumanon kaniya.”—Joan, nabawtismohan sa 1954.

“Hinungdanon ang dili paghunahuna pag-ayo sa kaugalingon. Ang tanan natong nabatonan maoy tungod sa dili-takos nga kalulot sa Diyos. Ang pagbaton niining maong punto-debista motabang kanato sa pagpadayon sa paglantaw sa hustong direksiyon alang sa espirituwal nga pagkaon nga gikinahanglan sa paglahutay hangtod sa kataposan.”—Arlene, nabawtismohan sa 1954.

[Hulagway sa panid 11]

Ang mga tigulang nagpatungha ug bililhong mga bunga sa Gingharian

[Hulagway sa panid 14]

Ang espirituwal nga kalagsik sa mga tigulang maoy bililhong kahinguhaan