Mga Magmamantala sa Gingharian Nagtaho

‘Dali Ngari ug Tabangi Kami’

NIADTONG Hulyo 2000, ang Alemanya, Austria, ug Switzerland nangimbitar sa nagsultig-Aleman nga mga Saksi sa pagbalhin ngadto sa Bolivia. Ngano? Tungod kay didto sa nahilit nga mga pundok sa mga mag-uuma sulod sa 300-kilometros nga gilay-on palibot sa Santa Cruz, Bolivia, ang nagsultig-Aleman nga mga Mennonianhon nagpakitag dakong interes sa Bibliya.

Mga 140 ka Saksi ang midawat sa imbitasyon. Ang uban miestar sulod sa pipila ka semana, ug ang uban sulod sa usa ka tuig o kapin pa. Sa pagbuhat niini, ilang gipasundayag ang samang espiritu sa unang-siglo nga mga misyonaryo kinsa midawat sa imbitasyon nga: “Dali ngari sa Macedonia ug tabangi kami.”—Buhat 16:9, 10.

Sama sa unsa ang pagsangyaw sa maong teritoryo? Usa ka ansiyano sa lokal nga kongregasyon misaysay: “Ang pag-adto sa usa sa 43 ka pundok sa mga Mennonianhon mokabat ug mga walo ka oras nga biyahe sa dili-sementadong mga karsada sakay sa four-wheel-drive nga sakyanan. Ang pagduaw ngadto sa mas lagyong mga dapit dangtan ug upat ka adlaw nga biyahe ug kinahanglan kang matulog sa tolda sa pipila ka gabii. Apan takos gayod kini sa paghago, tungod kay halos tanan niining mga tawhana wala pa gayod makadungog sa maayong balita sukad.”

Sa primero, daghang Mennonianhon ang wala modawat sa mga pagduaw. Apan ang balikbalik nga pagduaw nakatabang kanila sa pag-apresyar kon unsay ikatanyag sa mga Saksi. Pananglitan, usa ka mag-uuma miingon nga siya tigbasa ug magasing Pagmata! sulod na sa usa ka tuig. Dayon siya midugang: “Nasayod ko nga daghang tawo dinhi ang dili motuo sa inyong ginasulti, apan nagtuo ko nga kini mao ang kamatuoran.” Sa laing pundok, usa ka tawo miingon: “Ang uban nakong mga silingan miingon nga kamo maoy bakak nga mga manalagna, apan ang uban miingon nga kamo ang nakabaton sa kamatuoran. Buot ko nga ako mismo ang mosusi niana.”

Karon aduna nay usa ka Aleman-ug-pinulongan nga kongregasyon sa Bolivia, nga may 35 ka magmamantala, lakip sa 14 ka bug-os-panahong mga magwawali. Sa pagkakaron, 14 ka kanhi Mennonianhon ang nahimo nang mga magmamantala sa Gingharian, ug 9 pang uban ang regular nang tigtambongan sa mga tigom. Usa ka edarang tawo nga bag-o pang nabawtismohan miingon: “Nakita gayod namo ang pagtultol ni Jehova. Nagpadala siyag may-kasinatian, nagsultig-Aleman nga mga igsoong lalaki ug babaye sa pagtabang kanamo. Mapasalamaton kaayo kami.” Ang iyang 17-anyos nga anak nga babaye, nga bawtismado na usab, midugang: “Makatakod ang kadasig sa mga batan-ong igsoong lalaki ug babaye nga mianhi dinhi. Ang kadaghanan kanila maoy mga payunir, nga naggamit sa ilang panahon ug salapi sa pagtabang sa uban. Nadasig ko sa pagsundog kanila.”

Sa pagkatinuod, dakong kalipay ug katagbawan ang giani niadtong mga nanlimbasog sa pag-adto niadtong dapita aron sa pagtabang.