Pagbuhat ug Maayo sa mga Panahon sa Panginahanglan

“BUHATON NATO ANG MAAYO ngadto sa tanan,” miawhag si apostol Pablo, “apan ilabina kanila nga atong kabanay sa pagtuo.” (Galacia 6:10) Ang mga Saksi ni Jehova sa tibuok kalibotan makugihong naningkamot sa pagpadapat sa maong prinsipyo diha sa ilang kinabuhi, nga nagabuhat ug maayo ngadto sa tanan, ilabina sa ilang mga isigkamagtutuo. Makita kini kanunay sa mga panahon sa panginahanglan. Atong tagdon ang di pa dugayng mga pananglitan gikan sa tulo ka nasod.

Sa Disyembre 2002, usa ka kusog nga bagyo ang mihapak sa Guam, nga may gikusgon sa hangin nga sobra sa 300 kilometros kada oras. Daghang balay ang nangaguba, nga ang uban niana bug-os nga nangahapay. Ang mga kongregasyon sa maong dapit nag-organisar dayon ug mga grupo sa mga tighinlo aron sa pagtabang sa mga pamilyang Saksi nga naapektohan pag-ayo. Ang sanga sa Guam nagpadalag mga materyales ug mga tawo sa pag-ayo sa nangadaot nga mga balay, ug ang sanga sa Hawaii mitabang. Sulod sa pipila ka mga semana, usa ka grupo sa mga panday ang nangabot gikan sa Hawaii aron sa pagtabang sa pagpanukod pag-usab, ug aron maabagan ang maong mga igsoon, ang pipila ka lokal nga mga igsoon namakasyon sa ilang mga trabaho. Ang espiritu sa malipayong pagtambayayongay maoy pamatuod sa tanan diha sa komunidad.

Sa usa ka sikbit nga balangay sa siyudad sa Mandalay, Myanmar, dihay sunog nga dili layo sa usa ka Kingdom Hall. Diha sa duol ang balay sa di-aktibong sister ug iyang pamilya. Ang hangin mihuros paingon sa iyang balay, busa midagan siya ngadto sa tigomanan aron magpakitabang. Niadtong higayona, ang tigomanan giayo, busa didtoy daghang igsoon. Natingala sila sa pagkakita sa maong sister tungod kay wala sila mahibalo nga didtong dapita ra diay siya nagpuyo. Dihadiha, ang mga igsoon mitabang sa pagbalhin sa mga butang sa pamilya ngadto sa luwas nga dapit. Sa dihang ang bana, nga dili Saksi, nakahibalo bahin sa maong sunog, midali siya pagpauli sa ilaha ug nakita ang mga igsoon nga nag-atiman sa iyang pamilya. Gawas nga siya nakadayeg ug mapasalamaton, siya nahupayan usab tungod kay kasagarang pahimuslan sa mga kawatan ang maong mga situwasyon. Kining maong pagpahayag sa mga igsoon ug kalulot nagtukmod sa maong sister ug sa iyang anak nga lalaki sa pagpakig-uban pag-usab sa Kristohanong kongregasyon, ug sila karon nagtambongan na sa tanang panagkatigom.

Sa miaging tuig sa pag-alagad, daghan didto sa Mozambique ang nasugamak sa kagutom tungod sa hulaw ug kawalay-abot. Ang lokal nga sangang buhatan sa mga Saksi ni Jehova misanong dayon pinaagi sa pagtaganag pagkaon alang sa mga nanginahanglan. Ang pagpang-apod-apod gihimo diha sa mga Kingdom Hall, usahay human sa mga tigom sa kongregasyon.  Usa ka sister kinsa usa ka nag-inusarang ginikanan miingon: “Mitambong ko sa tigom nga magul-anon, kay wala masayod kon unsay akong ipakaon sa akong mga anak inig-uli namo sa amoa.” Ang mahigugmaong tabang nga gihatag sa mga igsoon nakapadasig dayon kaniya. “Kadto nahisamag pagkabanhaw alang nako!” matod pa niya.

Ang mga Saksi ‘nagbuhat usab ug maayo’ sa espirituwal nga paagi pinaagi sa pagpaambit sa mensahe sa Bibliya sa kahupayan ug paglaom. Sila nagtuo sama sa gituohan sa usa ka maalamong tawo dugay na kanhi: “Kon bahin sa nagapatalinghog [sa diyosnong kaalam], siya magapuyo sa kasegurohan ug dili matugaw sa kalisang sa katalagman.”—Proverbio 1:33.

[Mga hulagway sa panid 31]

1, 2. Pagpang-apod-apod ug pagkaon ngadto sa mga nanginahanglan sa Mozambique

3, 4. Ang bagyo sa Guam nakaguba ug daghang balay

[Credit Lines]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe