Unsang Relihiyona ang Angay Nimong Pilion?

‘ANG lainlaing relihiyon maoy lainlaing dalan lamang nga usa ray padulngan. Total, usa ray Diyos, dili ba?’ Ang maong pangisip gisagop sa daghang tawo kinsa nagtuo nga bisan tuod hinungdanon ang pagpasakop sa usa ka relihiyon, dili gayod hinungdanon kon unsang relihiyona ang pilion sa usa.

Sa una nimong pagpaminaw, kining argumentoha morag makataronganon, kay tinuod man nga usa lamang ang Diyos, ang Labing Gamhanan. (Isaias 44:6; Juan 17:3; 1 Corinto 8:5, 6) Bisan pa niana, dili nato mahimong ibalewala ang klarong mga kalainan—mga kontradiksiyon pa gani—taliwala sa daghang relihiyosong mga grupo nga nag-angkong nag-alagad sa matuod nga Diyos. Magkalahi kaayo ang ilang mga tulumanon, tinuohan, pagtulon-an, ug ilang mga kinahanglanon. Dako kaayo ang mga kalainan mao nga ang mga tawong sakop sa usa ka relihiyon o grupo malisdan sa pagsabot o pagdawat sa gitudlo o gituohan sa ubang relihiyon.

Sa laing bahin, si Jesus miingon: “Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.” (Juan 4:24) Ang pagsimba sa Diyos uban sa kamatuoran magtugot kaha sa pagdawat sa daghang nagkasumpaking mga ideya bahin sa kon kinsa ang Diyos, kon unsay iyang mga katuyoan, ug kon sa unsang paagi siya pagasimbahon? Makataronganon ba ang pagtuo nga dili mahinungdanon sa Labing Gamhanang Diyos kon unsaon nato siya pagsimba?

Tinuod nga mga Kristohanon Kaniadto ug Karon

Ang mga Kristohanon sa unang siglo usahay may lainlaing mga opinyon. Pananglitan, sa nagsulti sa mga taga-Corinto, si apostol Pablo miingon: “Gisuginlan ako bahin kaninyo, mga igsoon ko, nilang sakop sa balay ni Cloe, nga adunay mga pagsumpakiay diha kaninyo. Ang buot kong ipasabot mao kini, nga ang matag usa kaninyo nag-ingon: ‘Ako iya ni Pablo,’ ‘Apan ako kang Apolos,’ ‘Apan ako kang Cefas,’ ‘ Apan ako kang Kristo.’”—1 Corinto 1:11, 12.

Giisip ba ni Pablo ang maong mga kalainan nga dili mahinungdanon? Ang tagsatagsa nagsunod ba lamang sa kaugalingon niyang paagi sa kaluwasan? Wala gayod! Si Pablo nagtambag: “Ako magaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna.”—1 Corinto 1:10.

Siyempre, ang panaghiusa sa tinuohan dili makab-ot pinaagig pagpugos. Makab-ot lamang kini sa dihang ang mga indibiduwal maampingong magsusi sa mga tinuohan ug unya motuo ug modawat sa samang mga konklusyon. Sa ingon, ang personal nga pagtuon sa Pulong sa Diyos ug ang matinud-anong tinguha sa pagpadapat kon unsay makat-onan maoy hinungdanong mga tikang aron matagamtam ang matang sa panaghiusa nga gihisgotan ni Pablo. Makaplagan ba ang maong  panaghiusa? Sa ato nang nahisgotan, ang Diyos dugay nang nakiglabot sa iyang katawhan ingong usa ka grupo. Posible ba nga mailhan ang maong grupo karon?

Mga Kaayohan sa Pagpasakop sa Grupo nga Giuyonan sa Diyos

Ang salmistang si David nangutana kaniadto: “Oh Jehova, kinsa man ang mahimong dinapit sa imong tolda? Kinsa man ang mopuyo sa imong bukid nga balaan?” Makapahinuklog gayod ang maong pangutana. Si David nagtubag: “Siya nga nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa iyang kasingkasing.” (Salmo 15:1, 2) Ang tukmang pagsabot sa Bibliya makatabang sa pag-ila sa relihiyon nga nakakab-ot niana nga mga kinahanglanon sa Diyos. Dayon, pinaagi sa pagpasakop sa maong grupo, ang usa makapakig-uban sa mga tawong nagasimba sa Diyos diha sa panaghiusa ug “uban sa espiritu ug sa kamatuoran.”

Gipakita sa mga Saksi ni Jehova nga posible ang pagtuo ug paglihok sa nahiusang paagi bisan niining nagkabahinbahin nga kalibotan. Anaa sa ilang taliwala ang mga membro kanhi sa nagkalainlaing relihiyon ug etnikong mga grupo. Ang ubang mga Saksi maoy mga agnostiko o mga ateyista kanhi. Ug ang uban kaniadto walay seryosong pagtagad sa relihiyon. Gikan sa maong nagkadaiyang mga relihiyon, kultura, ug mga pilosopiya nanggula ang mga tawo nga karon nagtagamtam sa usa ka relihiyosong panaghiusa nga dili gayod makita sa kalibotan karon.

Ang pasikaranan sa maong panaghiusa mao ang Pulong sa Diyos, ang Bibliya. Siyempre, ang mga Saksi ni Jehova nahibalo nga dili nila madiktahan ang uban kon unsay buhaton. Apan, ilang gipabilhan ang pribilehiyo sa pagdasig sa uban sa pagkat-on gikan sa Bibliya aron ilang ipasukad ang ilang pagpili bahin sa pagsimba diha sa maong malig-on nga sukaranan. Niining paagiha, daghan pa ang makatagamtam sa mga kaayohan nga mabatonan tungod sa pagsimba sa Diyos “uban sa espiritu ug sa kamatuoran.”

Karon, dako ang kapeligrohan nga mabiktima sa makadaot nga mga impluwensiya ug mga panghaylo. Mahinungdanon ang pagpili ug maayong mga kauban. Ang Bibliya nag-ingon nga “siya nga nagalakaw uban sa mga tawong maalamon mahimong maalamon” ug “ang daotang pakig-uban makadaot sa mapuslanong pamatasan.” (Proverbio 13:20; 1 Corinto 15:33) Ang pagpakig-uban sa tinuod nga mga magsisimba sa Diyos maoy usa ka panalipod. Busa, ang Bibliya nagpahinumdom kanato: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.” (Hebreohanon 10:24, 25) Pagkadakong panalangin sa dihang ang tinuod nga mga managhigala, mga lalaki ug babaye nga managsoon sa espirituwal, mahigugmaong magtinabangay aron sa pagtuman sa ilang mga kaakohan atubangan sa Diyos!

Napamatud-an ni Ottmar kining hunahunaa. Siya gimatuto sa usa ka Katolikong pamilya sa Alemanya, apan siya mihunong na sa pagsimba. Siya misaysay: “Kada simba nako, ang kahaw-ang nga akong gibati pagsulod nako sa simbahan naa ra gihapon paggawas nako.” Bisan pa niana, nagtuo gihapon siya sa Diyos. Dayon nahimamat niya ang mga Saksi ni Jehova ug nakombinsir nga sila ang tinuod nga mga alagad sa Diyos. Iyang nasabtan ang panginahanglan sa pagpakig-uban kanila. Siya karon miingon: “Kay ako aktibo diha sa usa ka tibuok-kalibotang organisasyon, akong ginatagamtam ang malinawong hunahuna ug kasingkasing. Ako padayong ginatabangan sa pagbaton ug dugang tukmang kahibalo sa Bibliya. Bililhon kaayo kini alang kanako.”

Usa ka Pagdapit Alang Niadtong Nagapangita

Ang managsamag-hunahuna nga mga tawo nga magtinabangay ingong usa ka grupo makapalampos ug usa ka buluhaton nga mas epektibo kay sa mga tawong mag-iyaiya sa ilang buluhaton. Pananglitan, ang panamilit nga mga instruksiyon ni Jesus sa iyang mga sumusunod mao: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Sa unsang paagi ang  maong buluhaton mapalampos sa matagbawong paagi kon walay pagtultol o organisasyon? Unsaon sa usa ka tawo pagsunod niining Kasulatanhong sugo kon siya magkinaugalingon sa pag-alagad sa Diyos?

Sa miaging tuig, ang mga Saksi ni Jehova sa tibuok kalibotan nakapanagtag ug 91,933,280 ka gipasukad-sa-Bibliya nga mga basahon, mga pulyeto, ug mga brosyur, ug dugang pang 697,603,247 ka magasin, sa ingon naabot ang ginatos ka milyong mga tawo diha sa 235 ka kayutaan dala ang mensahe gikan sa Pulong sa Diyos. Pagkadakong pamatuod nga ang nahiusa, maayong-pagkaorganisar nga paningkamot sa usa ka grupo makapalampos ug labaw pa kaayo kay sa mahimo sa usa ka tawo nga walay tabang sa uban!

Dugang pa sa pagpanagtag ug literatura sa Bibliya, ang mga Saksi ni Jehova nagadumalag mga pagtuon sa Bibliya nga walay bayad aron sa pagtabang sa mga tawo sa pagbaton ug lalom nga pagsabot sa mga kinahanglanon sa Diyos. Sa miaging tuig, sa aberids, 5,726,509 ka pagtuon sa Bibliya ang gidumala kada semana uban sa mga indibiduwal o grupo sa mga tawo. Kini nga instruksiyon sa Bibliya nakatabang sa minilyon sa pagbaton ug lig-ong pasukaranan aron sila makapili maylabot sa relihiyon. Ikaw gidapit sa pagkat-on sa mga kinahanglanon sa Diyos sumala sa gipakita diha sa Bibliya. Dayon ikaw makahimo na sa pagpili.—Efeso 4:13; Filipos 1:9; 1 Timoteo 6:20; 2 Pedro 3:18.

Kon buot nimong pahimut-an ang Diyos, ang pagpasakop sa usa ka relihiyon hinungdanon—apan dili kay sa bisan unsa na lang nga relihiyon o denominasyon. Kinahanglang ipasukad nimo ang imong pagpili ug relihiyon sa tukmang kahibalo sa Bibliya, dili sa wala-kapamatud-ing mga doktrina o sa gisulti ra sa uban. (Proverbio 16:25) Kat-oni ang mga kinahanglanon sa tinuod nga relihiyon. Itandi kini sa imong mga tinuohan. Dayon himoa ang pagpili sumala niana.—Deuteronomio 30:19.

[Mga hulagway sa panid 7]

Ang mga Saksi ni Jehova nahiusa diha sa nagkabahinbahin nga kalibotan