Ang Imo Bang mga Pag-ampo Makapausab sa Sangpotanan sa Usa ka Problema?

KINSA kanato ang wala makaatubang ug grabeng problema nga dili nato makontrolar? Gipakita sa Bibliya nga si apostol Pablo nahibalo nga ang pag-ampo makaapektar sa sangpotanan sa maong problema.

Sa dihang si Pablo dili-makataronganong gibilanggo sa Roma, iyang gihangyo ang iyang mga isigkamagtutuo sa pag-ampo alang kaniya, nga midugang: “Ako nagaawhag kaninyo sa pagbuhat niini, aron ako mahibalik kaninyo sa labing madali.” (Hebreohanon 13:18, 19) Sa laing higayon, si Pablo nagpahayag ug pagsalig nga tubagon sa Diyos ang mga pag-ampo alang sa iyang sayong kagawasan. (Filemon 22) Sa wala madugay si Pablo gibuhian ug mipadayon sa iyang misyonaryong buluhaton.

Apan makapausab ba gayod ang pag-ampo sa sangpotanan sa imong mga problema? Tingali. Apan, hinumdomi nga ang pag-ampo dili lamang usa ka pormal nga relihiyosong tulumanon. Kini maoy aktuwal nga pagpakigsulti sa atong mahigugmaon ug gamhanan nga Amahan sa mga langit. Dili kita angayng magpanuko nga magmaespesipiko sa atong mga pag-ampo kondili mapailobong maghulat kon sa unsang paagi tubagon kini ni Jehova.

Dili tingali tubagon sa Diyos dihadiha ang matag pag-ampo, o dili tingali siya motubag sa paagi o sa panahon nga atong gidahom. Si Pablo, pananglitan, subsob nga nag-ampo mahitungod sa iyang “tunok sa unod.” Kon unsa man kadto, wala kuhaa sa Diyos ang problema ni Pablo, apan iyang gihupay si Pablo pinaagi sa makapadasig nga mga pulong: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.”—2 Corinto 12:7-9.

Kita usab makasalig nga bisan pag dili kuhaon sa Diyos ang usa ka problema, siya “magtaganag kalingkawasan aron [kita] makahimo sa pag-antos niini.” (1 Corinto 10:13) Sa dili madugay, wagtangon sa Diyos ang tanang pag-antos sa katawhan. Kasamtangan, ang pagdangop sa “Tigpatalinghog sa pag-ampo” mahimong makapausab sa sangpotanan sa usa ka problema.—Salmo 65:2.