Mga Pangutana Gikan sa mga Magbabasa

Unsay gilandongan sa kahikayan sa tuig sa Tinghugyaw nga gihisgotan sa ika-25 nga kapitulo sa Levitico?

Ang Moisesnong Balaod nagtakda nga “sa ikapito ka tuig kinahanglan nga adunay igpapahulay sa bug-os nga pagpahulay alang sa yuta.” Bahin nianang tuiga, ang mga Israelinhon gisugo: “Ang imong uma dili nimo pagapugsan ug binhi, ug ang imong parasan dili nimo pul-ongan. Ang mga moturok gikan sa nahulog nga mga lugas sa imong alanihon dili nimo anihon, ug ang mga ubas sa imong wala-mapul-ongi nga paras dili nimo pupoon. Kinahanglan nga adunay usa ka tuig nga bug-os nga pahulay alang sa yuta.” (Levitico 25:4, 5) Busa, ang matag ikapitong tuig maoy tuig sa Igpapahulay alang sa yuta. Ug matag ika-50 ka tuig, human sa ikapitong Igpapahulay nga tuig, mao ang Tinghugyaw. Unsay mahitabo sa maong tuig?

Si Jehova nagsugo sa Israel pinaagi kang Moises: “Balaanon ninyo ang ikakalim-an nga tuig ug imantala ang kagawasan diha sa yuta ngadto sa tanang molupyo niini. Kini mahimong usa ka Tinghugyaw alang kaninyo, ug ang matag usa kaninyo mamalik ngadto sa iyang gipanag-iya ug ang matag usa kaninyo mamauli ngadto sa iyang banay. Ang ikakalim-an nga tuig mahimong usa ka Tinghugyaw alang kaninyo. Dili kamo magapugas ug binhi ni mag-ani sa mga manurok sa yuta gikan sa nahulog nga mga lugas ni inyong pupoon ang mga ubas sa wala-mapul-ongi nga mga paras niini.” (Levitico 25:10, 11) Ang Tinghugyaw nagpasabot sa ikaduhang sunod nga tuig nga Igpapahulay alang sa yuta. Apan sa mga molupyo niini, kadto nagdalag kagawasan. Bisan kinsa sa mga Hudiyo nga gibaligya sa pagkaulipon ipahigawas. Ang panulondon nga yuta nga basin napugos lamang intawon ang usa ka tawo sa pagbaligya ibalik ngadto sa iyang pamilya. Ang Tinghugyaw mahimong tuig sa kapasig-ulian ug kagawasan alang sa karaang Israel. Unsay gilandongan niini alang sa mga Kristohanon?

Ang pagrebelde sa unang tawo, si Adan, nagdala sa katawhan ngadto sa pagkaulipon sa sala. Ang tagana  sa Diyos sa pagpagawas sa katawhan gikan sa pagkaulipon sa sala mao ang halad lukat ni Jesu-Kristo. * (Mateo 20:28; Juan 3:16; 1 Juan 2:1, 2) Kanus-a mapagawas ang mga Kristohanon gikan sa balaod sa sala? Nga nagsulat sa dinihogang mga Kristohanon, si apostol Pablo miingon: “Ang balaod nianang espiritu nga naghatag ug kinabuhi nga nahiusa kang Kristo Jesus nagpagawas na kaninyo gikan sa balaod sa sala ug sa kamatayon.” (Roma 8:2) Kadtong adunay paglaom sa kinabuhi sa langit makadawat ning maong kagawasan sa dihang sila dihogan sa balaang espiritu. Bisan tuod ang ilang lawas unodnon ug dili-hingpit, ang Diyos magpahayag kanila nga matarong ug magsagop kanila ingong iyang espirituwal nga mga anak. (Roma 3:24; 8:16, 17) Alang sa mga dinihogan ingong usa ka grupo, ang Kristohanong Tinghugyaw nagsugod sa Pentekostes 33 K.P.

Komosta ang “ubang mga karnero,” nga may paglaom sa walay-kataposang kinabuhi sa yuta? (Juan 10:16) Alang sa ubang mga karnero, ang Usa ka Libo ka Tuig nga Pagmando ni Kristo mahimong panahon sa kapasig-ulian ug kagawasan. Panahon nianang Milenyo nga Tinghugyaw, ipadapat ni Jesus ang mga kaayohan sa iyang halad lukat sa matinuohong katawhan ug magbali sa mga epekto sa sala. (Pinadayag 21:3, 4) Sa kataposan sa Milenyo nga Pagmando ni Kristo, ang katawhan makadangat sa tawhanong kahingpitan ug bug-os nga mahigawas gikan sa napanunod nga sala ug kamatayon. (Roma 8:21) Sa dihang molampos na kana, ang Kristohanong Tinghugyaw matapos na.

[Footnote]

[Hulagway sa panid 26]

Ang Milenyo nga Tinghugyaw —usa ka panahon sa kapasig-ulian ug kagawasan alang sa “ubang mga karnero”