Ang Pagpangitag Kalipay

SA DILI pa dugayng katuigan, ang mga tawo sa Alemanya, Gran Britanya, Pransiya, ug Tinipong Bansa gipangutana, “Unsay makahatag ug kalipay?” Taliwala niadtong giinterbiyo, 89 porsiyento miingon nga makahatag ug kalipay ang maayong panglawas; 79 porsiyento naghisgot ug malipayong kaminyoon o panag-ubanay; 62 porsiyento nagpunting nga makahatag ug kalipay ang pagkahimong ginikanan; ug 51 porsiyento nagtuo nga makahatag ug kalipay ang malamposong karera. Ug bisan pag ang kadaghanan sa mga tawo gitudloan nga ang salapi dili makahatag ug kalipay, 47 porsiyento niadtong gipangutana kombinsido nga kini makahatag ug kalipay. Unsay gipakita sa mga kahimtang?

Una, tan-awa ang ginaingon nga kalangkitan sa salapi ug kalipay. Usa ka surbi sa usa ka gatos sa labing adunahang mga tawo sa Tinipong Bansa nagpakita nga sila dili mas malipayon kay sa ordinaryong mga tawo. Dugang pa, bisan pag midoble ang materyal nga mga kabtangan sa kadaghanan sa Tinipong Bansa sa miaging tulo ka dekada, sila dili mas malipayon kon itandi kaniadto, sumala sa mga espesyalista sa mental nga kahimsog. Sa pagkatinuod, usa ka taho nagkomento: “Sa mao gihapong yugto, ang mga tawo nga dunay depresyon midaghan. Ang paghikog sa mga tin-edyer mitriple. Ang gidaghanon sa nagdiborsiyo midoble.” Diha sa mga 50 ka lainlaing mga nasod, ang mga tigdukiduki nga nagtuon sa kalangkitan sa salapi ug kalipay nakahinapos nga ang salapi dili makapalit ug kalipay.

Sunod, unsa ba ka hinungdanon ang maayong panglawas, malipayong kaminyoon, ug malamposong karera? Buweno, kon kining mga butanga gikinahanglan gayod aron mahimong malipayon, komosta kadtong milyonmilyong tawo nga dili maayog panglawas ug kadtong tanan nga dili malipayon ug kaminyoon? Komosta ang mga magtiayon nga walay anak ug ang tanang lalaki ug babaye nga walay malamposong karera? Ang kinabuhi niining mga tawhana magpadayon na lang ba nga dili magmalipayon? Ug ang ginaingong kalipay niadtong mga tawo nga may maayong panglawas ug malipayong kaminyoon mahanaw ba kon mausab ang ilang kahimtang?

Kita ba Nagpangita ug Kalipay Diha sa Hustong Tinubdan?

Ang tanan gustong malipay. Dili kini ikahibulong tungod kay ang Maglalalang sa tawo gihubit ingong “malipayong Diyos,” ug ang tawo gihimo sa dagway sa Diyos. (1 Timoteo 1:11; Genesis 1:26, 27) Busa, normal lang sa mga tawo nga mangita ug kalipay. Apan, daghan ang nakakaplag nga ang paghawid sa kalipay sama rag paghawid sa mga lugas sa balas nga dali rang mawagtang.

Apan, dili ba kaha sobra ra kaayo ang  pagpaningkamot sa uban sa pagpangitag kalipay? Mao kanay pagtuo ni Eric Hoffer, nga usa ka pilosopo maylabot sa katilingban. Siya miingon: “Ang pagpangitag kalipay maoy usa sa pangunang mga hinungdan sa pagkawalay kalipay.” Tinuod gayod kana kon kita mangita ug kalipay sa dili-hustong tinubdan. Kon mao, kita seguradong mahigawad ug maluya. Ang pagpaningkamot nga mahimong dato; ang pagpaninguha nga mahimong dungganon o inila; ang pagpangagpas ug politikanhon, katilingbanon, o ekonomikanhong mga tingusbawan; o ang pagkinabuhi alang lamang sa kaugalingon ug ang pagpatagbaw dayon sa pangibog dili makahatag ug kalipay. Busa masabtan nga ang uban misagop ug nagkasumpaki nga mga hunahuna nga gipahayag sa usa ka awtor kinsa miingon: “Kon mohunong lang unta kita sa pagpangagpas sa kalipay, kita mahimong magmalipayon”!

Labawng hinungdanon, ang surbi nga gihisgotan sa sinugdan niining artikuloha nagpakita usab nga sa 10 ka tawo, 4 ang nagtuo nga makahatag ug kalipay ang paghimog maayo ug pagtabang sa uban. Ug sa matag 4 ka tawo, 1 ang nagpasiugda nga ang pagtuo ug relihiyon dako ug papel sa pagkahimong malipayon. Tin-aw, kinahanglan nga atong susihon ug maayo kon unsa gayoy makahatag ug tinuod nga kalipay. Ang sunod nga artikulo motabang kanato sa paghimo niini.

[Mga hulagway sa panid 3]

Daghan ang nagtuo nga ang salapi, malipayong pamilya, o malamposong karera mao ang yawi sa kalipay. Mouyon ka ba?