“Batoni ang Malumong Pagmahal Alang sa Usag Usa”
“Batoni ang Malumong Pagmahal Alang sa Usag Usa”
“Sa inigsoong gugma batoni ang malumong pagmahal alang sa usag usa.”—ROMA 12:10.
1, 2. Unsang matanga sa relasyon ang nabatonan sa usa ka modernong-adlaw nga misyonaryo ug ni apostol Pablo uban sa mga igsoon?
SULOD sa iyang 43 ka tuig nga misyonaryong pag-alagad sa Halayong Silangan, si Don nailhan tungod sa pagkamabination niya niadtong iyang gialagaran. Samtang nakigbisog siya sa iyang sakit nga sa kataposan mihunos sa iyang kinabuhi, pipila sa iyang gitun-an sa Bibliya kaniadto mibiyahe ug libolibo ka kilometro aron moduaw kaniya ug moingon, “Kamsahamnida, kamsahamnida!”—“Salamat, salamat!” sa Koreanhong pinulongan. Ang malumong pagmahal ni Don nakatandog sa ilang kasingkasing.
2 Kining panig-ingnan ni Don dili talagsaon. Sa unang siglo, si apostol Pablo nagpakita ug halalom nga pagmahal alang niadtong iyang gialagaran. Gisakripisyo ni Pablo ang iyang kaugalingon. Bisan tuod lig-on siyag baroganan, siya usab malumo ug mahangawaon, “sama sa usa ka nagpasusong inahan nga nagpangga sa iyang kaugalingong mga anak.” Siya misulat ngadto sa kongregasyon sa Tesalonica: “Kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.” (1 Tesalonica 2:7, 8) Sa ulahi, sa dihang giingnan ni Pablo ang mga igsoon sa Efeso nga sila dili na makakita kaniya pag-usab, “silang tanan nanghilak pag-ayo, ug ilang gigakos si Pablo sa liog ug gihalokan siya nga mabination.” (Buhat 20:25, 37) Klaro nga ang relasyon ni Pablo sa mga igsoon dili lamang tungod sa pagkamanagsama nila ug pagtuo. Sila adunay malumong pagmahal alang sa usag usa.
Malumong Pagmahal ug Gugma
3. Sa unsang paagi nalambigit ang mga termino sa Bibliya alang sa pagmahal ug gugma?
3 Diha sa Kasulatan, ang malumong pagmahal, inigsoong pagbati, ug pagkamabination dakog kalabotan sa labing hamili sa Kristohanong mga hiyas—ang gugma. (1 Tesalonica 2:8; 2 Pedro 1:7) Sama sa lainlaing bahin sa usa ka maanindot nga brilyante, kining tanang diyosnong mga hiyas magtinabangay aron sa pagpatungha ug maanindot nga mga resulta. Kini makapasuod sa mga Kristohanon dili lamang sa usag usa kondili usab sa ilang langitnong Amahan. Busa, si apostol Pablo nag-awhag sa iyang mga isigkamagtutuo: “Himoa nga walay pagkasalingkapaw ang inyong gugma. . . . Sa inigsoong gugma batoni ang malumong pagmahal alang sa usag usa.”—Roma 12:9, 10.
4. Unsay kahulogan sa ekspresyon nga “malumong pagmahal”?
4 Ang Gregong pulong nga gigamit ni Pablo alang sa “malumong pagmahal” adunay duha ka bahin, ang usa nagkahulogan ug panaghigalaay ug ang lain, kinaiyanhong pagmahal. Ingon sa gipatin-aw sa usa ka eskolar sa Bibliya, kini nagkahulogan nga ang mga Kristohanon “mailhan pinaagi sa debosyon nga maoy hiyas sa usa ka mahigugmaon, suod, ug nagtinabangay nga pamilya.” Mao ba kanay imong gibati sa imong Kristohanong mga igsoong lalaki ug babaye? Ang Kristohanong kongregasyon kinahanglang matugob sa usa ka mainitong atmospera—usa ka pagbati sa pagkapartidos. (Galacia 6:10) Busa, ang The New Testament in Modern English, ni J. B. Phillips, naghubad sa Roma 12:10 ingong: “Batonan nato ang mainit kaayong pagmahal alang sa usag usa sama nianang sa managsoon.” Ug sa The Jerusalem Bible mabasa: “Paghigugmaay kamo ingon sa mga managsoon.” Oo, ang mga Kristohanon nahigugma sa usag usa dili lang tungod kay kini makataronganon ug usa ka obligasyon. “Uban sa dili-salingkapaw nga inigsoong pagbati,” kita angayng “maghigugmaay sa usag usa gikan sa kasingkasing.”—1 Pedro 1:22.
“Gitudloan na sa Diyos nga Maghigugmaay sa Usag Usa”
5, 6. (a) Sa unsang paagi gigamit ni Jehova ang internasyonal nga mga kombensiyon aron sa pagtudlo sa iyang katawhan bahin sa Kristohanong pagmahal? (b) Sa unsang paagi ang relasyon tali sa mga igsoon mas molig-on sa paglabay sa panahon?
5 Bisan tuod niining kalibotana “ang gugma sa kadaghanan” mibugnaw, si Jehova nagatudlo sa iyang modernong-adlaw nga mga katawhan sa ‘paghigugma sa usag usa.’ (Mateo 24:12; 1 Tesalonica 4:9) Ang internasyonal nga mga kombensiyon sa mga Saksi ni Jehova maoy talagsaong mga kahigayonan niining maong pagbansay. Niini nga mga kombensiyon, ang lokal nga mga Saksi makahimamat ug mga igsoon gikan sa lagyong kanasoran, ug daghan ang nagpasaka sa langyawng mga delegado nganha sa ilang mga balay. Sa usa ka di pa dugayng kombensiyon, ang uban naggikan sa mga nasod diin ang mga tawo kasagarang dili mopadayag sa ilang mga pagbati. “Sa pag-abot niining maong mga delegado, sila ginerbiyos ug maulawon,” matod pa sa usa ka Kristohanon nga mitabang sa pagpangitag sak-anan sa mga delegado. “Apan unom ka adlaw sa ulahi sa dihang sila nanamilit na, sila ug ang nag-abiabi kanila naghalogay ug nanghilak. Ilang natagamtam ang usa ka matang sa Kristohanong gugma nga dili gayod nila makalimtan.” Ang pag-abiabi sa atong mga igsoon, bisan unsa pay ilang kagikan, makapadayag sa kinamaayohang mga hiyas sa bisita ug sa nag-abiabi.—Roma 12:13.
6 Bisan tuod makapahinam ang maong mga eksperyensiya panahon sa mga kombensiyon, ang mas suod pa gani nga relasyon maugmad sa dihang ang mga Kristohanon magkauban sa pag-alagad kang Jehova sulod sa usa ka yugto sa panahon. Sa dihang masinati nato pag-ayo ang atong mga igsoon, mas maapresyar nato ang ilang dalayegong mga hiyas—ang ilang pagkamatinud-anon, pagkakasaligan, pagkamaunongon, pagkamaluloton, pagkamanggihatagon, pagkamahunahunaon, pagkamabination, ug pagkadili-mahakogon. (Salmo 15:3-5; Proverbio 19:22) Si Mark, kinsa nag-alagad ingong misyonaryo sa Sidlakang Aprika, miingon, “Ang pagtrabaho kauban sa atong mga igsoon magpatunghag usa ka relasyon nga dili mabungkag.”
7. Unsay gikinahanglan aron matagamtam nato ang Kristohanong pagmahal diha sa kongregasyon?
7 Aron makab-ot ug mahuptan ang maong relasyon sulod sa kongregasyon, ang mga membro kinahanglang makigsandurot. Pinaagi sa regular nga pagtambong sa Kristohanong mga tigom, atong gipalig-on ang atong pagbati sa atong mga igsoon. Pinaagi sa pagtambong, pagpakighugoyhugoy sa mga igsoon sa dili pa ug pagkahuman sa mga tigom, ug pagkomento panahon sa mga tigom, atong gidasig ang usag usa “sa paghigugma ug sa maayong mga buhat.” (Hebreohanon 10:24, 25) Miingon ang usa ka ansiyano didto sa Tinipong Bansa: “Malipay ako sa paghandom nga sa bata pa ako, ang akong pamilya kanunayng nalakip sa kinaulahiang mamiya sa Kingdom Hall, nga malingaw sa mahigalaon ug makahuloganon nga mga kabildohay kutob sa mahimo.”
Kinahanglan Ka Bang “Magpasangkad”?
8. (a) Unsay gipasabot ni Pablo sa dihang iyang giawhag ang mga taga-Corinto nga “magpasangkad”? (b) Unsay atong mahimo sa pagpalambo sa pagmahal diha sa kongregasyon?
8 Aron bug-os nga mapakita ang maong pagmahal, basin kinahanglang “magpasangkad” kita sa atong kasingkasing. Ngadto sa kongregasyon sa Corinto, si apostol Pablo misulat: “Ang among mga kasingkasing gipasangkad. Kamo dili hagip-ot ug luna sulod kanamo.” Giawhag sila ni Pablo nga “magpasangkad” usab. (2 Corinto 6:11-13) ‘Mapasangkad’ ba usab nimo ang imong pagmahal? Dili kinahanglang maghulat ka nga ang uban maoy mouna pagpakigsuod kanimo. Sa iyang sulat ngadto sa mga taga-Roma, gilambigit ni Pablo ang panginahanglan nga magbaton ug malumong pagmahal uban niining tambaga: “Manguna sa pagpakitag pasidungog sa usag usa.” (Roma 12:10) Sa pagpakitag pasidungog sa uban, mahimong mouna ka sa pagtimbaya kanila diha sa mga tigom. Mahimo usab nga dapiton nimo sila nga mouban nimo sa pagsangyaw sa kanataran o sa pagpangandam sa tigom. Ang paghimo niana magpalambo sa malumong pagmahal.
9. Unsang mga lakang ang gihimo sa pipila aron mahimong mas suod nga mga higala sa mga isigka-Kristohanon? (Ilakip ang bisan unsang mga pananglitan diha sa inyong kongregasyon.)
9 Ang mga pamilya ug mga indibiduwal diha sa kongregasyon ‘makapasangkad’ pinaagi sa pagduaw sa usag usa, tingali mag-uban sa usa ka simpleng pagpangaon, ug pinaagi sa pagpakigbahin sa maayong mga kalihokan nga magkauban. (Lucas 10:42; 14:12-14) Matag karon ug unya si Hakop maghikay ug mga piknik alang sa gagmayng mga grupo. “Ang bata ug tigulang presente, maingon man ang mga ginikanang nag-inusara,” matod niya. “Ang tanan mamauli uban ang malipayong mga handomanan, ug sila mas nasuod sa usag usa.” Ingong mga Kristohanon, kita kinahanglang maningkamot nga dili lamang mahimong mga isigkamagtutuo kondili tinuod nga mga higala usab.—3 Juan 14.
10. Unsay atong mahimo sa dihang madaot ang mga relasyon?
10 Apan, usahay ang mga pagkadili-hingpit mahimong babag sa pag-ugmad ug panaghigalaay ug pagmahal. Unsay atong mahimo? Una, makaampo kita nga mabatonan ang maayong relasyon uban sa atong mga igsoon. Kabubut-on sa Diyos nga ang iyang mga alagad magkasinabtanay, ug iyang tubagon ang ingon nianang sinserong mga pag-ampo. (1 Juan 4:20, 21; 5:14, 15) Kinahanglan molihok usab kita nga kaharmonya sa atong mga pag-ampo. Si Ric, usa ka nagapanawng ministro sa Sidlakang Aprika, nahinumdom sa usa ka igsoon kansang makapapikal nga kinaiya nakapahimo niyang lisod ikasinabot. “Imbes likayan ang maong igsoon, nakahukom ko nga sination siya pag-ayo,” misaysay si Ric. “Ang amahan diay sa maong igsoon maoy estriktong tigdisiplina. Sa dihang nasabtan nako kon unsa ka lisod ang pagpanglimbasog sa igsoon aron mabuntog kining maong kaagi ug kon unsa ka dakong pag-uswag ang iyang nahimo, nakadayeg ko niya. Nahimo ming suod nga managhigala.”—1 Pedro 4:8.
Ipahayag ang Imong Gibati!
11. (a) Unsay gikinahanglan aron molambo ang pagmahal diha sa kongregasyon? (b) Nganong ang dili pagpahayag sa atong gibati ngadto sa uban makadaot sa atong espirituwalidad?
11 Karon, daghang tawo ang nagpadayon sa pagkinabuhi nga wala gayod makabaton ug suod nga higala. Pagkamakapasubo! Kini dili kinahanglan—ug dili angay—nga mahitabo diha sa Kristohanong kongregasyon. Ang tinuod nga inigsoong gugma dili lamang matinahorong kabildohay ug panggawi; ni kini maoy sobrang pagpahayag ug pagbati. Hinunoa, kita kinahanglang andam nga mopahayag sa atong gibati, sama sa gibuhat ni Pablo sa mga taga-Corinto, ug ipakita sa atong mga isigkamagtutuo nga kita tinuod nga nahingawa sa ilang kaayohan. Bisan tuod dili tanan ang kinaiyanhon nga mahigalaon o estoryador, ang sobrang pagkahilomon makadaot. “Ang nagalain sa iyang kaugalingon mangita sa iyang hakog nga tinguha,” nagpasidaan ang Bibliya. “Siya mobatok sa tanang praktikal nga kaalam.”—Proverbio 18:1.
12. Nganong ang maayong komunikasyon hinungdanon sa suod nga relasyon diha sa kongregasyon?
12 Ang matinud-anong pagpakigsulti hinungdanon sa tinuod nga panaghigalaay. (Juan 15:15) Kitang tanan nagkinahanglan ug mga higala nga atong kasugiran sa atong kinailadmang mga hunahuna ug pagbati. Dugang pa, kon mas masinati nato ang usag usa, mas dali natong maatiman ang mga panginahanglan sa usag usa. Sa dihang kita magpakitag kabalaka sa kaayohan sa uban niining paagiha, atong gipalambo ang malumong pagmahal, ug atong maeksperyensiyahan nga tinuod ang giingon ni Jesus: “Adunay labaw nga kalipay sa paghatag kay sa pagdawat.”—Buhat 20:35; Filipos 2:1-4.
13. Unsay atong mahimo sa pagpakita nga kita adunay tinuod nga pagmahal sa atong mga igsoon?
13 Aron magmapuslanon kaayo ang atong pagmahal, kinahanglang ipahayag nato kana. (Proverbio 27:5) Sa dihang tinuoray ang atong pagmahal, lagmit makita kana sa atong nawong, ug kini magtukmod sa kasingkasing sa uban nga mosanong. “Ang kasanag sa mga mata makapalipay sa kasingkasing,” misulat ang maalamong tawo. (Proverbio 15:30) Ang mahunahunaong mga buhat makapalambo usab ug malumong pagmahal. Bisan tuod dili mapalit ang tinuod nga pagmahal, ang usa ka gasa nga kinasingkasing nga gihatag makahuloganon kaayo. Ang usa ka kard, sulat, ug “usa ka pulong nga gisulti sa hustong panahon”—kining tanan makapahayag ug lalom nga pagmahal. (Proverbio 25:11; 27:9) Sa dihang nakabaton na kitag higala, kinahanglang huptan nato kini pinaagi sa padayong pagpakita ug dili-mahakogong pagmahal. Ilabina sa panahon sa panginahanglan, buot natong tabangan ang atong mga higala. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—Proverbio 17:17.
14. Unsay atong mahimo kon adunay usa ka igsoon nga morag dili mosanong sa atong gipakitang pagmahal?
14 Sa tinuoray lang, dili nato madahom nga masuod kita sa tanan diha sa kongregasyon. Natural lang nga mas masuod kita sa pipila kay sa uban. Busa kon adunay igsoon nga dili tingali kaayo mahigalaon kanimo, ayaw dayon paghinapos nga ikaw o kanang tawhana adunay apan. Ug ayaw ipugos ang pagpakigsuod kaniya. Kon magmahigalaon ka kaniya segun sa iyang itugot, basin magkasuod ra mo sa umaabot.
“Giuyonan Ko Ikaw”
15. Unsay epekto sa pagdayeg, o ang kakulang niana, nganha sa uban?
15 Pagkadako kaha sa kalipay ni Jesus sa dihang sa pagbawtismo kaniya, iyang nadungog ang tingog gikan sa langit: “Giuyonan ko ikaw”! (Marcos 1:11) Kining maong pagpahayag ug pagdawat lagmit nakapalalom sa pagtuo ni Jesus nga gimahal siya sa iyang Amahan. (Juan 5:20) Ikasubo, ang uban wala pa gayod makadungog sa maong pagdayeg gikan niadtong ilang gitahod ug gihigugma. “Daghang batan-on sama kanako ang walay membro sa pamilya nga sama nilag Kristohanong mga pagtuo,” miingon si Ann. “Sa balay, ang madungog lamang namo mao ang pagpanaway. Makapaguol kaayo kini kanamo.” Apan, sa dihang mahimo silang bahin sa kongregasyon, ilang bation ang kainit sa usa ka matinabangon, mahangawaon nga espirituwal nga pamilya—mga amahan ug mga inahan ug mga igsoong lalaki ug babaye sa pagtuo.—Marcos 10:29, 30; Galacia 6:10.
16. Nganong ang pagpanaway sa uban dili mapuslanon?
16 Sa pipila ka kultura, ang mga ginikanan, mga tigulang, ug mga magtutudlo panagsa rang magpahayag ug kinasingkasing nga pag-uyon sa mga batan-on, nga naghunahuna nga ang maong pagdayeg makapahimo kanilang tagbaw-na-sa-kaugalingon o garboso. Ang maong panghunahuna makaapektar gani sa Kristohanong mga pamilya ug sa kongregasyon. Sa pagkomento bahin sa usa ka pakigpulong o ubang paningkamot, ang mga tigulang moingon tingali: “Maarang-arang na to, apan makahimo ka pag labaw niana!” O sa ubang paagi, mahimong ipasumbingay pa gani nila nga napikal sila sa mga batan-on. Sa pagbuhat niana, daghan ang nagtuo nga sila nagpalihok sa mga batan-on sa pagkab-ot sa ilang bug-os nga potensiyal. Apan kining paagiha subsob nga adunay kaatbang nga epekto, tungod kay ang mga batan-on basin mopalayo o mobati nga dili makaabot sa sukdanan.
17. Nganong gikinahanglan nga mangita kitag mga kahigayonan nga komendahan ang uban?
17 Apan, ang pagdayeg dili angayng ihatag ingong pasiuna lamang sa paghatag ug tambag. Ang sinserong pagdayeg magpalambo ug malumong pagmahal sulod sa pamilya ug sa kongregasyon, sa ingon nagdasig sa mga batan-on sa pagpangayog tambag gikan sa eksperyensiyadong mga igsoong lalaki ug babaye. Busa inay tugotan ang kultura nga modiktar kon unsaon nato pagtratar ang uban, ‘isul-ob nato ang bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’ Paghatag ug komendasyon sama sa gibuhat ni Jehova.—Efeso 4:24.
18. (a) Mga batan-on, unsaon ninyo paglantaw ang tambag gikan sa mga tigulang? (b) Nganong ang mga tigulang magmabinantayon labot sa paagi nga sila mohatag ug tambag?
18 Sa laing bahin, mga batan-on, ayaw kamo paghinapos nga kon ang mga tigulang motul-id o motambag kaninyo, sila wala makaangay kaninyo. (Ecclesiastes 7:9) Kasukwahi niana ang tinuod! Lagmit gitukmod sila sa ilang kahingawa ug halalom nga pagmahal kaninyo. Kay kon dili, nganong maningkamot pa man sila sa pagpakigsulti kaninyo bahin sa maong butang? Tungod kay nahibalo sila sa mahimong epekto sa ilang isulti, ang mga tigulang—ilabina ang mga ansiyano sa kongregasyon—subsob mogugol ug dakong panahon sa paghunahuna ug pag-ampo sa dili pa mohatag ug tambag, tungod kay ang gusto nila mao lamang ang pagbuhat ug maayo.—1 Pedro 5:5.
“Si Jehova Malumo Kaayo sa Pagmahal”
19. Nganong kadtong nahigawad makasalig sa pagpaluyo ni Jehova?
19 Ang dili-maayong reaksiyon sa gipakitaan ug malumong pagmahal nakapabati sa uban nga ang pagpakita niana motultol lamang sa dugang kahigawad. Gikinahanglan nila ang kaisog ug lig-ong pagtuo aron mapahayag na usab nila ang ilang pagbati ngadto sa uban. Apan kinahanglang dili nila kalimtan nga si Jehova “dili halayo sa matag usa kanato.” Siya nag-awhag kanato sa pagduol kaniya. (Buhat 17:27; Santiago 4:8) Makasabot usab siya sa atong kahadlok nga masakitan, ug siya nagsaad nga kita iyang paluyohan ug tabangan. Gipasaligan kita sa salmistang si David: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
20, 21. (a) Sa unsang paagi nahibaloan nato nga kita mahimong makabaton ug suod nga relasyon kang Jehova? (b) Unsay gikinahanglan aron masuod kang Jehova?
20 Ang suod nga pakighigala kang Jehova mao ang labing hinungdanong relasyon nga atong maugmad. Apan posible ba ang maong relasyon? Oo. Ang Bibliya nagpadayag kon unsa ka suod ang matarong nga mga lalaki ug babaye ngadto sa atong langitnong Amahan. Ang ilang mainitong mga pahayag gipreserbar aron maghatag kanato ug pagsalig nga kita usab makapakigsuod kang Jehova.—Salmo 23, 34, 139; Juan 16:27; Roma 15:4.
21 Ang mga kinahanglanon ni Jehova aron masuod kaniya maabot sa tanan. “Oh Jehova, kinsa man ang mahimong dinapit sa imong tolda?” nangutana si David. “Siya nga nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa iyang kasingkasing.” (Salmo 15:1, 2; 25:14) Sa dihang atong makita nga ang pag-alagad sa Diyos magpatunghag maayong bunga ug tungod niana atong maangkon ang iyang giya ug proteksiyon, atong mahibaloan nga “si Jehova malumo kaayo sa pagmahal.”—Santiago 5:11.
22. Unsang matanga sa relasyon ang gusto ni Jehova nga matagamtam sa iyang katawhan?
22 Bulahan gayod kita nga si Jehova gustong makabaton ug ingon nianang personal nga relasyon uban sa dili-hingpit nga mga tawo! Nan dili ba kita angayng magpakita ug malumong pagmahal alang sa usag usa? Uban sa tabang ni Jehova, ang matag usa kanato makatampo ug makatagamtam sa malumong pagmahal nga maoy timailhan sa atong Kristohanong panag-igsoonay. Ilalom sa Gingharian sa Diyos, ang tanan dinhi sa yuta mobati na nianang maong pagmahal sa walay kataposan.
Ikapatin-aw Mo Ba?
• Unsang matanga sa atmospera ang angayng maglungtad diha sa Kristohanong kongregasyon?
• Sa unsang paagi ang matag usa kanato makatampo sa malumong pagmahal diha sa kongregasyon?
• Sa unsang paagi ang sinserong komendasyon magpalambo ug Kristohanong pagmahal?
• Sa unsang paagi ang malumong pagmahal ni Jehova magpaluyo ug magpalig-on kanato?
[Mga Pangutana sa Pagtuon]
[Hulagway sa panid 15]
Ang gugma taliwala sa mga Kristohanon dili kay obligasyon lamang
[Mga hulagway sa panid 16, 17]
‘Makapasangkad’ ka ba sa imong pagmahal?
[Hulagway sa panid 18]
Ikaw ba hinawayon o makapadasig?