Gipaambit Niya ang Iyang Pagtuo Ngadto sa Iyang mga Klasmet

BUOT ba nimong tabangan ang imong mga klasmet nga masayod ug dugang bahin sa imong binase-sa-Bibliya nga pagtuo? Si Magdalena, usa ka 18-anyos nga estudyante sa hayskul sa Polandia, kanunayng makigsulti sa iyang mga klasmet bahin sa iyang mga tinuohan ingong usa sa mga Saksi ni Jehova. Tungod niini, kanunay siyang suknaon sa mga pangutanang sama sa, ‘Sama sa unsa ang pagkahimong usa ka Saksi ni Jehova?’ ug ‘Dili ba mo motuo kang Jesu-Kristo?’ Unsaon niya pagtabang ang iyang mga klasmet? Si Magdalena miampo kang Jehova alang sa pagtultol ug milihok sumala sa iyang mga pag-ampo.—Santiago 1:5.

Usa ka adlaw niana, si Magdalena nangutana sa usa ka magtutudlo kinsa nagtahod sa iyang mga tinuohan kon mahimo ba niyang ipasalida sa klase ang video nga Jehovah’s Witnesses—The Organization Behind the Name. a Ang magtutudlo misugot. Busa giingnan ni Magdalena ang iyang mga klasmet: “Gihangyo nako ang usa ka higala nga ipresentar sa klase ang usa ka 90-minuto nga programa. Maglakip kini ug usa ka salida sa video ug panaghisgot bahin sa mga Saksi ni Jehova. Buot ba ninyong motambong?” Ang tanan miingon ug oo. Si Magdalena ug Wojciech, usa ka eksperyensiyadong bug-os-panahong magwawali, misugod sa pagpangandam alang sa maong proyekto.

Ilang gilaraw nga sugdan ang presentasyon uban sa 20-minutos nga pakigpulong base sa brosyur nga Mga Saksi ni Jehova—Kinsa Sila? Unsay Ilang Gituohan? b ug sundan kana sa pangutanag-tubag nga panaghisgot. Human niana, ang video ipasalida didto sa librarya sa tunghaan. Ang matag estudyante sa klase hatagan ug gasa—usa ka dakong sobre nga adunay pipila ka brosyur, libro nga Mga Pangutanang Gisukna sa mga Batan-on—Mga Tubag nga Mosaler, c ug pipila ka tract ug mga magasin.

Sa adlaw sa presentasyon, mitambong ang 14 niya ka klasmet, ang magtutudlo, ug 4 ka lain pang estudyante nga naatol nga atua sa librarya. Gisaysay una ni Wojciech nga daghang Polako nga mga magbabalak ug magsusulat ang migamit sa balaang ngalan, ang Jehova, diha sa ilang mga sinulat. Gihisgotan usab niya nga ang pipila ka karaang Katoliko nga katekismo naglakip sa balaang ngalan. Aron ipatin-aw ang modernong-adlaw nga kalihokan sa mga Saksi ni Jehova, gipakita niya ang mga brosyur sa nagkalainlaing sangang buhatan ug ang mga hulagway sa ubay-ubayng mga Assembly Hall.

Gisundan kadto ug makaiikag nga panaghisgot. Gigamit ni Magdalena ug Wojciech ang Bibliya sa pagtubag sa mga pangutana. Nakadayeg niana ang mga mamiminaw ug nakombinsir sila nga ang mga Saksi ni Jehova wala magtudlo sa ilang kaugalingong mga ideya. Unsa ang pipila sa mga pangutana, ug giunsa nila kadto pagtubag?

Pangutana: Ang Bibliya daghag dili-klaro ug masambingayon nga mga pulong, nga mahimong sabton sa lainlaing paagi. Sa unsang paagi kita posibleng magkinabuhi uyon sa Bibliya?

Tubag: Ang uban miingon nga ang Bibliya mahimong sabton sa lainlaing paagi. Apan hunahunaa kini: Kon buot nimong masayran ang kahulogan sa sinulat sa usa ka magsusulat, dili ba mas maayong mangutana ka kaniya? Dili sama sa tawhanon nga mga magsusulat nga karon patay  na, ang Awtor sa Bibliya, si Jehova nga Diyos, buhi. (Roma 1:20; 1 Corinto 8:5, 6) Ang konteksto sa usa ka kasulatan sa Bibliya mahimong magpaila sa hustong pagsabot. Dugang pa, ang Bibliya subsob nga maghisgot sa samang ulohan diha sa lainlaing mga teksto, busa makatabang ang pagtandi niana. Sa ingon, ang atong pagsabot magiyahan sa Diyos, nga daw siya mismo ang nagpatin-aw sa kasulatan nganhi kanato. Sa pagbuhat niana, mahimo natong masayran ang kabubut-on sa Diyos sumala sa gipadayag diha sa Bibliya ug magkinabuhi uyon niana, dili ba?

Pangutana: Unsay kalainan tali sa mga Kristohanon ug sa mga Saksi ni Jehova?

Tubag: Mga Kristohanon kami! Apan inay kay nag-angkon lang nga mga Kristohanon, ang mga Saksi ni Jehova naningkamot sa pagkinabuhi sumala sa ilang pagtuo ug sa kon unsay gitudlo sa Diyos kanila alang sa ilang kaayohan. (Isaias 48:17, 18) Sanglit ang tanan nilang mga pagtulon-an binase man sa Bibliya, nasayod sila nga nabatonan nila ang kamatuoran.—Mateo 7:13, 14, 21-23.

Pangutana: Nganong moduol man kamo sa mga tawong dili ninyo kaila ug porsigidong makig-estorya kanila? Dili kaha kana pagpamugos sa inyong pagtuo ngadto sa uban?

Tubag: Sayop ba alang kanimo kon may tawo nga matinahorong makigsulti kanimo diha sa dalan ug mangutana sa imong opinyon bahin sa usa ka butang? (Jeremias 5:1; Sofonias 2:2, 3) (Dayon gipasundayag ni Wojciech ug Magdalena kon unsaon nila pagsukna sa mga lumalabay bahin sa kon ang Diyos ba nagtagad sa mga biktima niadtong dili pa dugayng baha sa Polandia.) Human madungog ang opinyon sa tawo, among gamiton ang Bibliya. Kon ang usa dili buot nga makigsulti, manamilit kami ug mangitag lain. (Mateo 10:11-14) Pagpamugos ba kana sa uban nga makig-estorya? O dili na ba angayng makig-estorya ang mga tawo?

Pangutana: Nganong dili kamo mosaulog ug mga pangilin?

Tubag: Gisaulog namo ang bugtong okasyon nga gisugo sa Bibliya nga saulogon—ang Memoryal sa kamatayon ni Jesu-Kristo. (1 Corinto 11:23-26) Mahitungod sa mga pangilin, masayran nimo ang sinugdanan niana pinaagi sa pagsusi sa mga ensiklopedia ug ubang kasaligang mga reperensiya. Kon susihon nimo kana, makita dayon nimo kon nganong dili kami mosaulog sa usa ka partikular nga kasaulogan.—2 Corinto 6:14-18.

Daghan pang mga pangutana ang gisukna ug gitubag. Dugay kaayo nahuman ang panaghisgot nga kinahanglang ioktaba ang pagpasalida sa video.

Unsay sanong sa mga estudyante? Pasaysaya si Magdalena: “Nakurat ko nga ang pipila ka estudyante nga kasagarang siaw ug bugalbugalon nagsuknag seryosong mga pangutana. Bisag nag-angkon sila nga mga ateyista, nagpadayag silag pagtuo sa Diyos panahon sa panaghisgot!” Ang mga nanambong mapasalamatong midawat sa mga gasa—may gidaghanon nga 35 ka libro, 63 ka brosyur, ug 34 ka magasin ang napahimutang kanila.

Pagkadakong kaayohan ang nahimo sa maong proyekto sa tunghaan! Wala lang kadto nagtabang sa mga klasmet ni Magdalena sa pagkasayod ug pagkasabot pa ug dugang bahin sa mga Saksi ni Jehova kondili nagdasig usab kadto sa kadaghanang mga batan-on sa paghunahuna bahin sa katuyoan sa kinabuhi. Nganong dili maningkamot sa pagtabang sa imong mga klasmet nga masayod ug dugang bahin sa imong pagtuo?

[Mga footnote]

[Hulagway sa panid 31]

Si Magdalena ug Wojciech nangandam alang sa panaghisgot