Unsang Matanga sa Mahulatong Tinamdan ang Imong Nabatonan?

KADAGHANAN sa mga tawo karon dili gayod makapailob kon sila kinahanglang maghulat sa usa ka tawo o sa usa ka butang. Apan, ang Kasulatan nagdasig sa katawhan sa Diyos sa pag-ugmad ug “mahulatong tinamdan.” Lahi sa mga tawo sa iyang palibot, ang manalagnang si Miqueas nagpahayag: “Magpakita ako ug mahulatong tinamdan sa Diyos sa akong kaluwasan.”—Miqueas 7:7; Lamentaciones 3:26.

Apan, unsay kahulogan sa paghulat kang Jehova? Sa unsang paagi angayng hulaton sa usa ka Kristohanon ang Diyos? Aduna bay husto ug sayop nga mga paagi sa paghulat? Aduna kitay makat-onan gikan sa kasinatian sa manalagnang si Jonas sa ikasiyam nga siglo W.K.P.

Sayop nga Katarongan sa Paghulat

Gisugo ni Jehova nga Diyos si Jonas sa pag-adto ug pagwali ngadto sa mga tawo sa Nineve, ang kaulohan sa Imperyo sa Asirya. Ang Nineve nailhan ingong “siyudad nga nagaula ug dugo” tungod sa hilabihang kapintas ug kabangis niini, usa ka kamatuoran nga gipamatud-an pag-ayo sa mga historyano ug mga arkeologo. (Nahum 3:1) Sa sinugdan si Jonas misulay sa paglikay sa maong asaynment, apan gipaneguro ni Jehova nga ang manalagna makaadto ra gayod sa Nineve.—Jonas 1:3–3:2.

“Si Jonas misulod sa siyudad nga may gilay-ong usa ka adlaw nga pagbaktas, ug siya nagmantala ug nag-ingon: ‘Kap-atan ka adlaw na lamang, ug ang Nineve pagalaglagon.’” (Jonas 3:4) Dihay talagsaong reaksiyon sa mga paningkamot ni Jonas: “Ang mga tawo sa Nineve nagbutang ug pagtuo sa Diyos, ug sila nagmantala ug usa ka pagpuasa ug nagsul-ob ug sakong panapton, gikan sa labing dako kanila hangtod sa labing gamay.” (Jonas 3:5) Tungod niana, si Jehova, kinsa usa ka Diyos nga “wala magtinguha nga adunay malaglag apan nagtinguha nga ang tanan makakab-ot sa paghinulsol,” wala maglaglag sa siyudad.—2 Pedro 3:9.

Unsay reaksiyon ni Jonas? Ang asoy nag-ingon: “Apan, alang kang Jonas kadto dili gayod makapahimuot, ug siya nanginit sa kasuko.” (Jonas 4:1) Ngano man? Lagmit nagtuo si Jonas nga mawad-an siyag kredibilidad ingong manalagna tungod kay wala matuman ang iyang gipahayag nga kalaglagan sa gitakdang petsa. Dayag nga siya mas nabalaka sa kaugalingon niyang dungog imbes kaluy-an ug luwason ang uban.

Siyempre, wala moretiro si Jonas sa pagkamanalagna. Bisan pa niana, siya naghulat aron “iyang makita kon unsay mahitabo sa siyudad.” Sa pagkatinuod, iyang naugmad ang masuk-anong tinamdan nga tungod niana wala na siya mosangyaw ug nagpaabot na lang kon unsay mahitabo. Sa dihang iyang naamgohan nga ang mga butang wala mahitabo sumala sa iyang gidahom, siya nagtukod ug silonganan, milingkod ilalom sa landong niini, ug masulub-ong nagpaabot kon unsay mahitabo. Apan, wala makauyon si Jehova  sa tinamdan ni Jonas, busa mahigugmaon niyang gitul-id ang sayop nga panghunahuna sa iyang manalagna.—Jonas 4:5, 9-11.

Kon Nganong Mapailobon si Jehova

Bisan tuod naghinulsol ang Nineve ug wala laglaga, kini sa ulahi mibalik sa daotang mga binuhatan. Pinaagi sa mga manalagna nga sila si Nahum ug Sofonias, gitagna ni Jehova ang kalaglagan niini. Maylabot sa “siyudad nga nagaula ug dugo,” si Jehova nagpahayag nga iyang laglagon ang Asirya ug himoon ang Nineve nga awaaw. (Nahum 3:1; Sofonias 2:13) Sa 632 W.K.P., ang Nineve nalaglag, ug wala na gayod matukod pa pag-usab.

Sa samang paagi, ang kalibotan karon sad-an sa hilabihang pag-ula ug dugo nga mas grabe pa kay nianang sa karaang Nineve. Tungod niini ug sa uban pang mga hinungdan, gibaod ni Jehova nga ang daotang sistema sa mga butang karon modangat sa kataposan niini panahon sa “dakong kasakitan” nga wala pa sukad mahitabo.—Mateo 24:21, 22.

Bisan pa niana, gipugngan ni Jehova ang gisaad nga kalaglagan aron ang sinserong mga tawo karon, sama sa mahinulsolong mga tawo sa Nineve, makahinulsol ug maluwas. Si apostol Pedro naghisgot sa pailob sa Diyos pinaagi niining mga pulonga: “Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.”—2 Pedro 3:9, 10, 13.

Hustong Paagi sa Paghulat

Si Pedro nagpadayon: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Pedro 3:11, 12) Matikdi nga samtang nagapaabot sa adlaw ni Jehova, kita angayng magpakitag “balaang mga buhat sa panggawi ug mga buhat sa diyosnong pagkamahinalaron”—kita kinahanglang puliki, dili kay walay ginabuhat.

Sa pagkatinuod, ang hustong tinamdan sa paghulat magpadayag ug bug-os nga pagsalig nga ang adlaw ni Jehova moabot sa eksaktong panahon sumala sa katuyoan ni Jehova. Ang maong pagtuo magpatunghag balaan ug diyosnon nga mga buhat, ug ang panguna niini mao ang pagwali sa maayong balita sa Gingharian sa Diyos. Si Jesus naghatag ug maayong panig-ingnan sa pagwali, ug iyang gitudloan ang iyang dinihogang mga sumusunod: “Baksi ang inyong hawak ug pasigaha ang inyong mga lampara, ug magpakasama kamo sa mga tawong nagapaabot sa ilang agalon sa pagpauli niya gikan sa kasal, aron nga sa iyang pag-abot ug pagpanuktok ila dayon siyang buksan. Malipayon kadtong mga ulipona nga sa pag-abot sa agalon makaplagang nagabantay!”—Lucas 12:35-37.

Ang mga ulipon sa unang siglo ‘magbakos sa ilang mga hawak’ pinaagi sa pagpilo sa ilang tag-as nga mga besti ug pagsuksok sa mga sidsid niana ilalom sa bakos aron mas sayon ang ilang paglihoklihok samtang nagtrabaho. Busa, ang usa ka Kristohanon kinahanglang magmaaktibo ug magmasiboton sa maayong mga buhat. Angay niyang pakigbisogan ang bisan unsang kiling sa “paglangaylangay” diha sa pagkadili-aktibo sa  espirituwal, tingali naggamit sa iyang kusog diha sa mga kalingawan o materyal nga mga pangagpas. Hinunoa, siya angayng “puliki diha sa buluhaton sa Ginoo” samtang nagapaabot sa dako ug makalilisang nga adlaw ni Jehova.—Roma 12:11; 1 Corinto 15:58.

Puliki Samtang Nagahulat

Ang mga Saksi ni Jehova nagpabiling puliki samtang nagahulat sa adlaw ni Jehova. Pananglitan, sa 2003 nga tuig sa pag-alagad, sila migugol ug aberids nga 3,383,000 ka oras matag adlaw nga nagwali sa pulong ni Jehova. Tiaw mo kana, ang usa ka tawo kinahanglang mosangyaw nga walay-hunong sulod sa 386 ka tuig aron mabuhat ang nahimo sa usa lang ka adlaw!

Bisan pa niana, maayong pangutan-on nato ang atong kaugalingon, ‘Unsang matanga sa mahulatong tinamdan ang akong nabatonan?’ Si Jesus naghatag ug sambingay nga naghubit sa pagkakugihan nga gidahom nga ipakita sa matinumanong dinihogan nga mga Kristohanon. Siya naghisgot bahin sa tulo ka ulipon: “Sa usa gihatag [sa agalon] ang lima ka talanton, sa lain duha, sa lain pa usa, sa matag usa sumala sa iyang katakos, ug siya milangyaw. Dihadiha ang usa nga nakadawat ug lima ka talanton milakaw ug nagpatigayon niini ug nakaganansiyag lima pa. Sa samang paagi ang usa nga nakadawat ug duha nakaganansiyag duha pa. Apan ang usa nga nakadawat ug usa lang milakaw, ug nagkalot sa yuta ug nagtago sa salaping plata sa iyang agalon. Human sa hataas nga panahon ang agalon niadtong mga ulipona miabot ug nakighusay kanila.”—Mateo 25:15-19.

Ang tulo ka ulipon nagpaabot sa pagbalik sa agalon. Ang duha nga nagpabiling puliki samtang naghulat sa ilang agalon giingnan sa dihang siya miabot: “Maayong pagkabuhat, maayo ug kasaligan nga ulipon!” Apan, ang usa nga nagpaabot nga walay gibuhat nakadawat ug lahi nga pagtratar. Ang agalon miingon: “Ilabay ang walay-silbi nga ulipon ngadto sa kangitngitan sa gawas.”—Mateo 25:20-30.

Bisan tuod kini nga sambingay mapadapat ngadto sa dinihogang mga Kristohanon, dunay leksiyon alang kanatong tanan bisag unsa pay atong paglaom. Ang Agalon, si Jesu-Kristo, nagdahom nga ang matag usa kanato makugihong nagabuhat diha sa pag-alagad kaniya samtang kita nagahulat sa iyang pag-abot panahon sa dakong adlaw ni Jehova. Iyang pabilhan ang kahago sa matag usa “sumala sa iyang katakos” ug mga kahimtang. Pagkadakong kalipay unya nga madungog ang Agalon nga moingong “maayong  pagkabuhat” sa dihang matapos na gayod ang paghulat!

Ang Pailob sa Atong Ginoo Nagkahulogan ug Kaluwasan

Komosta na man kon kining sistemaha sa mga butang dugayng natapos kay sa una natong gituohan o gilaoman nga mahitabo? Kana dili kay walay hinungdan. Si apostol Pedro misulat: “Isipa ang pailob sa atong Ginoo ingong kaluwasan.” (2 Pedro 3:15) Ang tukmang kahibalo bahin sa katuyoan sa Diyos ug ang mapainubsanong paglantaw sa atong kaugalingon makapahimo kanatong mapailobon maingon nga si Jehova nagmapailobon niining daang sistema.

Sa pagdasig sa mga Kristohanon nga magmapailobon, ang magsusulat sa Bibliya nga si Santiago naghatag ug usa ka ilustrasyon. Siya misulat: “Tan-awa! Ang mag-uuma nagpadayon sa paghulat sa bililhong abot sa yuta, nga nagpailob niini hangtod nga madawat niya ang sayong ulan ug ang ulahing ulan. Kamo usab kinahanglang magpailob; lig-ona ang inyong mga kasingkasing, tungod kay ang presensiya sa Ginoo haduol na.”—Santiago 5:7, 8.

Dili buot ni Jehova nga Diyos nga kita molunga o mohunong samtang kita nagahulat. Siya adunay buluhaton nga gipabuhat kanato ug siya mahimuot kon atong gamiton ang panahon sa paghulat diha sa makugihong pagpakigbahin sa maong buluhaton. Buot niya nga kita mahilakip niadtong gihubit ni apostol Pablo diha sa iyang sulat ngadto sa mga Hebreohanon: “Kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan, aron dili kamo mahimong tapolan, kondili mahimong mga tigsundog kanila nga pinaagi sa pagtuo ug pailob nagapanunod sa mga saad.”—Hebreohanon 6:11, 12.

Busa dili kita angayng maluya. Hinunoa, hinaot nga ang atong personal nga relasyon uban kang Jehova nga Diyos, ang atong pagtuo sa halad lukat ni Jesus, ug ang atong masanag nga paglaom diha sa bag-ong sistema sa mga butang makapalagsik sa atong kinabuhi. Sama sa “maayo ug kasaligan” nga mga ulipon sa sambingay ni Jesus, hinaot pamatud-an nato nga kita takos dayegon ug gantihan pinaagi sa pagkapuliki kanunay sa pagdayeg sa atong Diyos, sama sa gihimo sa salmista kinsa miingon: “Alang kanako, ako magahulat kanunay, ug dugangan ko ang imong tanang pagdayeg.”—Salmo 71:14.

[Hulagway sa panid 21]

Kay nahigawad, si Jonas nagpaabot na lang kon unsay mahitabo sa Nineve

[Mga hulagway sa panid 22, 23]

Ipakita nato ang diyosnong pagkamahinalaron samtang nagapaabot sa adlaw ni Jehova