Mga Magmamantala sa Gingharian Nagtaho

Usa ka Sulat Gikan Kang Alejandra

ANG pagsulat dugay nang napamatud-an nga epektibong paagi sa pagpamatuod. Bisan tuod usahay ang resulta dili mahibaw-an, kadtong padayong naggamit niining paagiha tugob nga gipanalanginan. Ilang gihinumdoman ang maalamong tambag sa Bibliya: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon, dinhi man o didto, o kon silang duha sama nga mahimong maayo.”—Ecclesiastes 11:6.

Si Alejandra, usa ka batan-ong Saksi nga nag-alagad sa sangang buhatan sa mga Saksi ni Jehova sa Mexico sulod sa duolag napulo ka tuig, gitambalan pinaagig chemotherapy para sa kanser. Migrabe ang iyang kahimtang, ug siya luya na kaayo nga dili na niya mahimo ang iyang naandang buluhaton sa adlaw-adlaw. Apan, tungod kay dili niya buot nga mapasagdan ang iyang ministeryo, nakahukom si Alejandra sa pagsulat. Siya nagsulat mahitungod sa kahikayan sa libreng pagtuon sa Bibliya sa balay ug iyang gisulat ang numero sa telepono sa iyang inahan. Dayon iyang gihatag ang mga sulat ngadto sa iyang inahan aron ikabilin sa mga balay sa mga tawo nga wala sa ilang gipuy-an sa dihang mamalaybalay ang iyang inahan.

Kasamtangan, si Diojany, usa ka batan-ong babaye nga taga-Guatemala, miadto sa Cancún, Mexico aron motrabaho ingong katabang sa balay. Samtang didto siya, nakontak siya sa mga Saksi ni Jehova ug nalingaw sa pagtuon sa Bibliya uban kanila. Sa ulahi, ang iyang mga amo nakahukom sa pagbalhin ngadto sa Mexico City ug gustong iuban siya. Nagpanuko si Diojany sa pag-uban tungod kay basig dili na niya makontak ang mga Saksi.

“Ayawg kabalaka,” gipasaligan siya sa iyang mga amo, “dunay mga Saksi bisan asa. Pangitaon dayon nato sila inig-abot nato didto.” Uban sa maong malipayong kahigayonan, miuyon si Diojany nga mouban kanila. Pag-abot nila sa Mexico City, gipangita dayon sa mga amo ni Diojany ang mga Saksi. Tungod sa pipila ka hinungdan, wala nila makita sila, bisan tuod ug dunay kapin sa 41,000 ka Saksi ug 730 ka kongregasyon sa maong siyudad.

Sa wala madugay, nabugnaw si Diojany tungod kay wala man niya makaplagi ang mga Saksi aron mapadayon ang iyang pagtuon sa Bibliya. Usa ka adlaw niana, ang iyang amo nga babaye miduol kaniya ug miingon: “Aniay sorpresa! Gidungog sa Diyos ang imong mga pag-ampo.” Sa pagtunol kaniya sa usa ka sulat, siya miingon: “Ang mga Saksi maoy nagbilin niining sulata alang nimo.” Sulat kadto nga gikan kang Alejandra.

Gikontak ni Diojany ang inahan ug manghod nga babaye ni Alejandra nga si Blanca, ug midawat ug pagtuon sa Bibliya. Paglabay sa pipila ka semana, iyang nahimamat si Alejandra ug nalipay kaayo sila sa ilang panagkita. Gidasig siya ni Alejandra nga padayong magkugi sa pagtuon sa Bibliya aron mouswag siya sa espirituwal.

Paglabay sa pipila ka bulan, sa Hulyo 2003, namatay si Alejandra, nga naghatag ug usa ka maayong panig-ingnan sa pagtuo ug kaisog ngadto sa iyang isigkamagtutuo. Panahon sa paglubong, daghan ang natandog gayod sa dihang ilang nahimamat si Diojany ug nakadungog kaniya nga miingon: “Si Alejandra ug ang iyang pamilya usa gayod ka talagsaong panig-ingnan kanako. Determinado akong moalagad kang Jehova ug magpabawtismo sa dili madugay. Nangandoy ako nga makita pag-usab si Alejandra sa umaabot nga Paraiso!”

Oo, gamayng butang ra tingali ang usa ka sulat. Apan bisan ang gamayng sulat makahatag ug maayo ug dumalayong mga epekto!