Adlaw sa Graduwasyon—Usa ka Maanindot nga Adlaw

“GIPANALANGINAN kita ug usa ka maanindot nga adlaw. Hayag ang adlaw. Asul ang kalangitan. Lunhaw ang mga sagbot. Nanag-awit ang kalanggaman. Maanindot kaayo kini nga adlaw alang kanato, ug dili gayod kita mahigawad. Si Jehova dili Diyos sa kahigawad. Siya maoy Diyos sa mga panalangin.”

Pinaagi nianang mga pulonga, gisugdan ni Brader Samuel Herd, usa ka membro sa Nagamandong Lawas sa mga Saksi ni Jehova, ang programa sa graduwasyon sa ika-117 nga klase sa Watchtower Bible School of Gilead. Gipahigayon kana niadtong Septiyembre 11, 2004. Ang maanindot nga programa naglakip sa makapalig-ong tambag nga gipasukad sa Bibliya maingon man sa mga eksperyensiya sa mga estudyante ug sa mga misyonaryo. Oo, usa kadto ka maanindot nga adlaw alang sa 6,974 nga nanambong didto sa Watchtower Educational Center sa Patterson, New York, ug sa mga tinukod sa Brooklyn ug Wallkill, nga gikonektar pinaagig audio ug video.

Makapadasig nga mga Pulong Alang sa mga Estudyante

Si John Kikot, membro sa Komite sa Sanga sa Tinipong Bansa, mihatag sa makapadasig nga mga pulong diha sa tema nga “Hupti ang Kalipay Ingong Misyonaryo.” Iyang gipasiugda nga ang mga estudyante sa Gilead nailhan tungod sa ilang kalipay, ingon sa gipakita niini nga graduwasyon. Ang instruksiyon gikan sa Kasulatan panahon sa pag-eskuyla nakahatag ug kalipay sa mga estudyante, ug sila karon nabansay na sa pagtabang sa uban nga makasinati sa maong kalipay. Sa unsang paagi? Pinaagi sa paghatag sa ilang panahon ug kusog diha sa ilang ministeryo ingong mga misyonaryo. Si Jesus nag-ingon: “Adunay labaw nga kalipay sa paghatag kay sa pagdawat.” (Buhat 20:35) Samtang ilang sundogon si Jehova nga Diyos, ang mahinatagon nga “malipayong Diyos,” kinsa nagtagana sa kamatuoran ngadto sa uban, mahuptan sa bag-ong mga misyonaryo ang ilang kalipay.—1 Timoteo 1:11.

Ang sunod nga adunay bahin sa programa mao ang laing membro sa Nagamandong Lawas, si David Splane, nga nagbatbat sa tema nga “Sa Unsang Paagi Ikaw Makabaton ug Maayong Relasyon sa Uban?” Walay duhaduha nga maayo ug makapalipay ang pagpuyo nga nagkahiusa, bisan tuod nagkinahanglan kini nga mahimong “tanang butang ngadto sa tanang matang sa katawhan.” (1 Corinto 9:22; Salmo 133:1) Gihisgotan ni Brader Splane nga ang migraduwar nga mga estudyante makiglabot ug daghang tawo diha sa ilang misyonaryong buluhaton—mga tawo diha sa teritoryo, isigkamisyonaryo, mga igsoon diha sa bag-o nilang kongregasyon, ug kadtong anaa sa sangang buhatan nga nagdumala sa buluhatong pagwali ug pagpanudlo. Naghatag siya ug praktikal nga mga sugyot kon unsaon sa pagbaton ug makapahimuot nga relasyon sa uban kutob sa mahimo: Paningkamoti nga makat-onan ang lokal nga pinulongan, magmaalisto ug magmaandam sa pagsagop sa lokal nga mga kostumbre, tahora ang pribasiya sa mga isigkamisyonaryo, ug magmapinasakopon niadtong mga nagapanguna.—Hebreohanon 13:17.

 Sunod, nangutana ang instruktor sa Gilead nga si Lawrence Bowen, “Unsay Imong Hunahuna?” Gipahinumdoman niya ang mga estudyante nga kadtong ‘magahukom pinasukad sa panggawas nga panagway’ wala modawat kang Jesus ingong Mesiyas. (Juan 7:24) Ingong dili-hingpit nga mga tawo, kitang tanan kinahanglang magbantay batok sa ‘paghunahuna sa hunahuna sa mga tawo’ imbes sa “mga hunahuna sa Diyos.” (Mateo 16:22, 23) Bisan ang espirituwal nga mga tawo kinahanglang magpadayon sa pagpasibo sa ilang panghunahuna. Sama sa usa ka barko diha sa lawod, ang mga pagpasibo nga pagahimoon karon mahimong moresulta sa pagkab-ot sa tumong o pag-antos sa espirituwal nga pagkalunod. Ang mapinadayonong pagtuon sa Bibliya sumala sa konteksto niini motabang kanato sa paghunahuna sa “mga hunahuna sa Diyos.”

Si Wallace Liverance, laing instruktor sa Tunghaang Gilead, maoy nagtapos niining bahina sa programa. Pinasukad sa Isaias 55:1, ang iyang tema maoy “Unsay Imong Paliton?” Gidasig niya ang mga estudyante sa ‘pagpalit’ sa kalagsik, kalipay, ug kalig-on gikan sa matagnaong mensahe sa Diyos para sa atong adlaw. Ang tagna ni Isaias nagpakasama sa pulong sa Diyos ngadto sa tubig, bino, ug gatas. Sa unsang paagi kini mapalit “bisag walay salapi ug walay bayad”? Gipatin-aw ni Brader Liverance nga mahimo kana pinaagi sa pagpatalinghog sa tagna  sa Bibliya ug ang dili-espirituwal nga mga hunahuna ug mga dalan ilisan sa mga hunahuna ug mga dalan nga iya sa Diyos. (Isaias 55:2, 3, 6, 7) Pinaagi sa paghimo niini, ang bag-ong mga misyonaryo mapalig-on diha sa ilang langyaw nga mga asaynment. Ang dili-hingpit nga mga tawo sagad maghunahuna nga ang kalipay nagdepende sa pagpangagpas sa materyal nga kahamugaway. “Ayaw pagtuo niana,” miawhag ang mamumulong. “Ayawg tuohi ang maong panghunahuna. Paneguroa nga makagahin ug panahon alang sa makahuloganong pagtuon sa matagnaong Pulong sa Diyos. Kini makapalagsik, makapalig-on, ug makapalipay kaninyo diha sa inyong misyonaryong asaynment.”

Makapahimuot nga mga Eksperyensiya ug mga Interbiyo Uban sa mga Estudyante

Ang mga estudyante regular nga nakigbahin diha sa kalihokan sa pagwali. Ubos sa pagdumala ni Mark Noumair, lain pang instruktor sa Gilead, daghang estudyante diha sa klase ang nagpasundayag sa mga eksperyensiya nga nagpasiugda sa temang “Wala Ikaulaw ang Maayong Balita.” (Roma 1:16) Nalingaw gayod ang mamiminaw sa pagpatalinghog kon sa unsang paagi kining eksperyensiyadong mga ministro nagpamatuod diha sa kabalayan, kadalanan, ug mga tindahan. Ang mga estudyante nga makasulti ug ubang mga pinulongan mihimo sa unang tikang sa pagduaw sa mga tawo nga nagsulti sa maong mga pinulongan diha sa teritoryo sa ilang kongregasyon. Gigamit pag-ayo sa uban ang pinasukad-sa-Bibliya nga mga publikasyon nga gitagana sa mga Saksi ni Jehova, nga naggamit niini diha sa mga balikduaw ug sa dihang magsugod ug mga pagtuon sa Bibliya sa balay. Sila ‘wala maulaw’ sa pagwali sa maayong balita.

Si Brader William Nonkes, nga naasayn sa Service Department, mao ang midumala sa mga interbiyo uban sa eksperyensiyadong mga misyonaryo gikan sa Burkina Faso, Latvia, ug Rusya. Gipaambit nila ang praktikal nga tambag nga nasentro sa tema nga “Si Jehova Mahigugmaong Nagaganti sa mga Matinumanon.” Usa sa mga igsoong lalaki nga giinterbiyo nagdasig sa mga estudyante sa paghinumdom sa 300 ka sundalo ni Gideon. Ang matag sundalo adunay asaynment nga nakaamot sa kalamposan sa pagpakiggubat ni Gideon. (Maghuhukom 7:19-21) Sa samang paagi, ang mga misyonaryo nga magpabilin sa ilang mga asaynment pagagantihan usab.

Ang “Mahimong Tanang Butang Ngadto sa Tanang Matang sa Katawhan” mao ang tema nga gipasiugda diha sa mga interbiyo nga gidumala ni Samuel Roberson, nga usa ka instruktor didto sa Patterson. Iyang giinterbiyo ang upat ka membro sa Komite sa Sanga, gikan sa Senegal, Guam, Liberia, ug Madagascar. Dunay 170 ka misyonaryo nga nag-alagad niining mga nasora. Ang migraduwar nga mga estudyante dunay nakat-onan gikan sa mga komento kon giunsa pagtabang sa mga Komite sa Sanga ang bag-ong mga misyonaryo aron makapasibo diha sa ilang mga asaynment. Kasagaran kana nagkahulogan sa pagkat-on sa mga kostumbre nga morag lahi sa mga sukdanan sa Kasadpan. Pananglitan, diha sa pipila ka nasod komon kaayo ang pagkakita ug mga lalaki, lakip na niadtong anaa sa Kristohanong kongregasyon, nga maggunitay ug kamot ingong mga managhigala samtang maglakaw. Diha sa ubang mga dapit nga sakop sa sanga sa Guam, ginadalit ang talagsaong mga pagkaon. Apan nakapasibo ang uban, ug makapasibo usab ang bag-ong mga misyonaryo.

Gitagik ni Guy Pierce, usa ka membro sa Nagamandong Lawas, ang ulohang “Magpabiling Maunongon sa ‘Gingharian sa Atong Ginoo.’” Gipahinumdoman niya ang mamiminaw: “Si Jehova naglalang nga may katuyoan. Siya adunay katuyoan para sa iyang kalalangan. Ang iyang katuyoan alang niining yutaa wala mausab. Kini nagapadayon nga dili mapugngan hangtod kini mamatuman. Walay makababag niana.” (Genesis 1:28) Gidasig ni Brader Pierce ang tanan nga maunongong magpasakop sa pagkasoberano sa Diyos bisan pa sa mga kalisdanan nga mitungha gumikan sa sala sa unang tawo, si Adan. “Kita nagkinabuhi sa oras sa paghukom. Kita adunay hamubo na lamang nga panahong nahibilin sa pagpangita sa matinud-anog-kasingkasing nga mga tawo aron matabangan sila nga makakat-on sa kamatuoran. Gamita pag-ayo ang panahon sa pagpaambit sa maayong balita sa Gingharian ngadto sa uban,” miawhag si Brader Pierce. Kadtong maunongong nagpaluyo sa Gingharian sa Diyos makalaom sa iyang tabang.—Salmo 18:25.

Sa panapos nga bahin, gibasa sa tsirman ang mga pangomosta ug mga pahalipay gikan sa mga sanga sa tibuok kalibotan. Dayon iyang gihatag ang mga diploma ngadto sa migraduwar nga mga estudyante, diin ang usa kanila mibasa sa sulat gikan sa klase, nga nagpahayag ug kinasingkasing nga pasalamat sa pagbansay nga ilang nadawat. Haom kadto nga panapos sa labing maanindot nga adlaw nga dili makalimtan sa tanang nanambong.

[Kahon sa panid 23]

ESTADISTIKA SA KLASE

Gidaghanon sa nasod nga gihawasan: 11

Gidaghanon sa nasod nga gipadalhan: 22

Gidaghanon sa mga estudyante: 48

Aberids nga edad: 34.8

Aberids nga katuigan sa kamatuoran: 18.3

Aberids nga katuigan sa bug-os-panahong ministeryo: 13.4

[Hulagway sa panid 24]

Ika-117 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.