Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon matubag nimo ang mosunod nga mga pangutana:

• Unsay mahimo sa usa ka Kristohanon kon siya maluya sa emosyonal ug espirituwal nga paagi?

Angay natong ilhon ang hinungdan sa kaluya. Makatabang ang paglista sa atong mga batasan ug mga kabtangan, ug isalikway ang dili-angayng mga kabug-at. Mahimo nato ang makataronganong mga tumong sumala sa atong mga kahimtang. Hinungdanon ang pag-atiman sa atong espirituwal nga kahimsog ug kinahanglang maglakip kini sa regular nga pag-ampo ug pagpamalandong.—8/15, mga panid 23-6.

• Nganong literal man ang pagsabot sa mga Saksi ni Jehova sa numero nga 144,000?

Human suginli si apostol Juan bahin sa 144,000, iyang nakita ang “usa ka dakong panon, nga walay tawong makaihap.” (Pinadayag 7: 4, 9) Kon ang numero nga 144,000 simboliko pa, ang gibug-aton sa pagtandi dili masabtan. Si Jesus naghisgot bahin niadtong magmando uban kaniya ingong “gamayng panon.” (Lucas 12:32)—9/1, panid 30.

• Nganong ang usa ka Israelinhon makabaligya man ug patayng mananap nga wala mapaagasi ug dugo ngadto sa usa ka langyaw?

Ang usa ka langyaw o dumuloong nga dili proselita wala mailalom sa Balaod. Busa ang usa ka Israelinhon gitugotan sa paghatag o pagbaligya sa maong mga mananap ngadto kaniya. (Deuteronomio 14:21) Apan ang usa ka proselita nailalom sa Balaod ug dili mokaon ug karne sa mananap nga wala mapaagasi ug dugo. (Levitico 17:10)—9/15, panid 26.

• Unsa ang biomimetics, ug nganong makaikag kini sa mga Kristohanon?

Kini ang natad sa siyensiya nga maninguha pagsundog sa mga disenyo nga makaplagan diha sa kinaiyahan. Pananglitan, ang magsoong Wright nakadisenyo ug ayroplano human nila tun-i ang dagkong mga langgam nga naglupad. Busa, ang biomimetics makadasig sa usa ka Kristohanon sa paghimaya sa Maglalalang—10/1, panid 9.

• Kinsay gihisgotan sa 2 Corinto 12:2-4 ingon nga gisakgaw ngadto sa paraiso?

Kanang tekstoha misunod dayon sa mga teksto diin gilabanan ni Pablo ang iyang pagkaapostoles. Sanglit ang Bibliya wala maghisgot ug laing tawo nga nakasinati sa ingon, ug kay si Pablo man ang nagsugilon nato niana, lagmit siya ang nakabatog panan-awon.—10/15, panid 8.

• Unsa ang pipila ka hiyas ni Jesus nga nagkuwalipikar kaniya sa pag-alagad ingong Pangulo nga gipili sa Diyos?

Gihuptan ni Jesus ang hingpit nga integridad, nga matinud-anon ug matul-id sa iyang panggawi. Siya bug-os nga dedikado sa Diyos. Si Jesus nahangawa pag-ayo sa mga tawo ug kinabubut-on nga milihok.—11/1, mga panid 6-7.

• Asa man unya ang mga demonyo panahon sa Milenyo?

Kita may katarongan sa paghinapos nga panahon sa Milenyal nga Pagmando ni Kristo, sila itambog sa bung-aw uban kang Satanas. (Pinadayag 20:1-3) Ang Genesis 3:15 nagtagna sa pagsamad sa ulo sa halas, nga naglakip sa pagtambog kaniya panahon sa Milenyo. Ang iyang binhi naglakip sa daotang mga manulonda, o mga demonyo. Ang kamatuoran nga sila nahadlok sa bung-aw nagpakita nga sila nahibalo niining umaabot nga pagpugong kanila. (Lucas 8:31)—11/15, mga panid 30-1.

• Nganong ang usa ka tawo angayng magbantay bahin sa pag-inom ug alkoholikong mga ilimnon, bisan pag siya maglikay nga mahubog?

Ang pipila ka tawo dili ra kaayo mailhang hubog bisag nakainom ug daghan. Apan ang usa tingali inanay nga magiyan sa alkoholikong ilimnon ug ‘maulipon sa daghang bino.’ (Tito 2:3) Si Jesus nagpasidaan bahin sa pagkahimong “mabug-atan sa pagpalabig kaon ug sa pagpalabig inom.” (Lucas 21:34, 35) Sa sobrang inom, bisag dili pa mahubog ang usa ka tawo, siya mobati na sa pagduka o pagkatapolan—sa pisikal man o sa espirituwal.—12/1, mga panid 19-21.