Mga Milagro—Tinuod o Tinumotumo?
Mga Milagro—Tinuod o Tinumotumo?
NAMATIKDAN dayon sa usa ka lalaki ang estiker nga gipaskin sa likod sa usa ka nagdagan nga kotse, “Nagakahitabo ang mga Milagro—Pangutan-a ang mga Manulonda.” Bisan tuod usa siya ka relihiyosong tawo, dili siya segurado sa kahulogan niini. Gipaila ba sa maong estiker nga ang drayber nagtuo ug mga milagro? O makantalitahon bang gipakita niini nga ang mga milagro ug mga manulonda parehong dili tinuod?
Basin interesado ka sa giingon sa Aleman nga magsusulat nga si Manfred Barthel: “Kon milagro nay hisgotan, ang mga magbabasa mabahin dayon sa duha ka magkalahing opinyon.” Kadtong mga nagtuog milagro kombinsido nga kini nagakahitabo ug lagmit nga kanunay pa ganing nagakahitabo. a Pananglitan, sa di pa dugayng katuigan sa Gresya, gikataho nga kadtong mga nagtuo niini miingon nga ang mga milagro mahitabo labing menos kas-a sa usa ka bulan. Mao kiniy hinungdan nga usa ka obispo sa Grego Ortodoksong Simbahan nagpasidaan: “Kadtong mga nagtuo niini nakiling sa paglantaw sa Diyos, kang Maria, ug sa mga santos ingong tawhanon. Ang mga magtutuo niini dili angayng maghinobra.”
Sa pipila ka nasod, diyutay ra ang mga tawo nga motuo ug mga milagro. Sumala sa usa ka surbi sa Allensbach nga gipatik sa Alemanya sa 2002, 71 porsiyento sa mga lungsoranon niini naghunahuna nga ang mga milagro hinanduraw lang, dili tinuod. Apan, lakip niadtong wala pay ikatulo ka bahin nga motuo ug mga milagro mao ang tulo ka babaye nga nag-angkong nakadawat ug mensahe gikan kang Birhen Maria. Mga pipila ka bulan human si Maria gikaingong nagpakita kanila—dinuyogan sa mga manulonda ug usa ka salampati—ang Aleman nga mantalaan nga Westfalenpost mitaho: “Hangtod karon mga 50,000 ka peregrino, mga tawo nga gustong matambalan sa ilang sakit, maingon man mga maukit-ukiton ang nagpakitag dakong interes sa mga panan-awon nga nakita sa mga babaye.” Lain pang 10,000 ang gidahom nga mohugop niini nga balangay aron makasaksi sa pagpakita pag-usab ni Maria. Ang sama niana nga mga pagpakita ni Birhen Maria gikaingong nahitabo sa Lourdes, Pransiya, sa 1858, ug sa Fátima, Portugal, sa 1917.
Komosta ang Dili-Kristohanong mga Relihiyon?
Halos tanang relihiyon nagtuo ug mga milagro. Gisaysay sa The Encyclopedia of Religion nga ang mga nagpundar sa Budhismo, Kristiyanidad, ug Islam adunay lainlaing pagtuo bahin sa mga milagro, apan kini miingon: “Klarong gipakita sa kasaysayan niining maong mga relihiyon nga ang mga milagro ug ang milagrosong mga asoy maoy kinaiyanhong bahin sa relihiyosong mga tinuohan sa tawo.” Kining maong reperensiyang basahon nag-ingon nga “si Budha mismo naghimo usahay ug mga milagro.” Sa ulahi, sa dihang “ang Budhismo gidala sa Tsina, ang mga misyonaryo niini kasagarang magpasundayag sa ilang milagrosong mga gahom.”
Human mahisgoti ang ubay-ubay nianang gikaingong mga milagro, ang maong ensiklopedia mihinapos: “Ang usa basin maglisod sa pagtuo niining tanang milagrosong mga asoy nga gisugilon sa relihiyosong mga biograpo, apan kini walay duhaduhang gimugna aron sa paghimaya kang Budha, kinsa makatugag milagrosong mga gahom ngadto sa iyang madasigong mga sumusunod.” Ang mao gihapong basahon miingon bahin sa Islam: “Kadaghanan sa Islamikong katilingban nagdahom gihapon ug mga milagro. Gipadayag sa mga sugilanon (hadīths) nga si Muhammad naghimog mga milagro atubangan sa mga tawo sa daghang okasyon. . . . Bisag patay na, ang mga santos gituohang mohimo gihapon ug mga milagro diha sa ilang mga lubnganan alang sa kaayohan sa mga matinumanon, ug ang mga tawo sinserong mangaliyupo sa ilang tabang.”
Komosta ang mga Milagro Diha sa Kristiyanidad?
Lainlaig opinyon ang mga Kristiyano bahin niini. Ang uban motuo sa mga taho sa Bibliya bahin sa mga milagro nga gihimo ni Jesu-Kristo o sa mga alagad sa Diyos una pa kang Kristo. Bisan pa niana, daghan ang mouyon sa Protestanteng Repormador nga si Martin Luther. Mao kiniy giingon sa The Encyclopedia of Religion bahin kaniya: “Si Luther ug Calvin parehong misulat nga ang panahon sa mga milagro natapos na ug nga dili na angayng dahomon nga mahitabo pa kini pag-usab.” Ang Iglesya Katolika motuo gihapon ug mga milagro apan “dili niini ipatin-aw kon sa unsang paagi kini nahitabo,” matod niining reperensiyang basahon. Apan, “ang intelektuwal nga Protestanteng katilingban nagtuo nga ang katuyoan sa Kristiyanidad mao lang ang pagtudlo ug hustong moralidad ug nga ang Diyos o ang espirituhanong kalibotan wala gayod makigkomunikar o mag-impluwensiya sa mga tawo sa bisan unsang talagsaon nga paagi.”
Ang ubang nag-angkong Kristohanon, lakip na sa pipila ka klerigo, nagduhaduha kon tinuod ba ang mga milagro nga gihisgotan sa Bibliya. Pananglitan, tagda ang asoy bahin sa nagdilaab nga tunokong tanom nga gitaho sa Bibliya sa Exodo 3:1-5. Ang librong What the Bible Really Says nag-ingon nga daghang Aleman nga mga teologo ang wala mag-isip niini ingong usa ka literal nga asoy bahin sa milagro. Hinunoa, gisabot nila kini ingong “usa ka simbolo sa pagpakigbisog ni Moises sa iyang gitulisok ug gihasol-pag-ayo nga tanlag.” Ang basahon nagpadayon: “Ang nagdilaab nga kalayo mahimo usab nga lantawon ingong kalit nga pagpanglimbukad sa mga bulak sa dihang kini nadan-agan sa presensiya sa Diyos.”
Basin dili ka kombinsido sa maong mga pangatarongan. Busa, unsay angay nimong tuohan? Realistiko ba ang pagtuo nga ang mga milagro nahitabo gayod? Ug komosta na man ang bahin sa modernong-adlaw nga mga milagro? Sanglit dili nato puwedeng pangutan-on ang mga manulonda, kinsay atong pangutan-on?
Ang Hunahuna sa Bibliya
Dili ikalimod nga ang Bibliya nagtaho nga sa karaang panahon ang Diyos mangilabot usahay ug mohimog mga butang nga dili gayod mahimo sa tawo. Mao kiniy atong mabasa bahin kaniya: “Gipagawas mo ang imong katawhang Israel gikan sa yuta sa Ehipto, uban sa mga ilhanan ug sa mga milagro ug sa usa ka kusganong kamot ug sa usa ka tinuy-od nga bukton ug sa labihan nga pagkamakalilisang.” (Jeremias 32:21) Tiaw mo kana, napaubos ang labing gamhanang nasod niadtong adlawa tungod sa napulo ka hampak nga gipahamtang sa Diyos, lakip ang kamatayon sa ilang panganay nga mga anak. Dako kaayo kadto nga milagro!—Exodo, mga kapitulo 7 hangtod sa 14.
Mga kasiglohan sa ulahi, gitaho sa upat ka magsusulat sa Ebanghelyo ang mga 35 ka milagro nga gihimo ni Jesus. Sa pagkatinuod, gipaila sa ilang mga sinulat nga mas daghan pa siyag nahimong mga milagro kay sa ilang gitaho. Kini bang maong mga taho tinuod o tinumotumo? b—Mateo 9:35; Lucas 9:11.
Kon tinuod ang pangangkon sa Bibliya—nga kini maoy Pulong sa Diyos bahin sa kamatuoran—nan aduna kay lig-ong katarongan sa pagtuo sa mga milagro nga gihisgotan niana. Ang Bibliya klarong nagsaysay sa mga milagro nga nahitabo sa karaang mga panahon—milagrosong pagpang-ayo, pagpamanhaw, ug uban pa—apan klaro usab niining gipatin-aw nga ang maong mga milagro gihunong na. (Tan-awa ang kahon nga “Kon Nganong Gihunong na ang Pipila ka Matang sa Milagro,” sa panid 4.) Busa nagpasabot ba kini nga bisan kadtong nagtuo sa Bibliya dili motuo sa modernong-adlaw nga mga milagro? Palihog basaha ang mosunod nga artikulo alang sa tubag.
[Mga footnote]
a Ang pulong “milagro” niining artikuloha adunay samang kahulogan nianang gihubit sa usa ka diksiyonaryo sa Bibliya: “Mga panghitabo sa pisikal nga kalibotan nga dili arang mahimo sa tanang nasayrang tawhanon o kinaiyanhong mga gahom ug busa gikaingong gipahinabo sa labaw-tawhanong puwersa.”
b Mahimo nimong susihon ang ebidensiya nga ang Bibliya katuohan gayod. Ang maong mga ebidensiya makaplagan sa librong Ang Bibliya—Pulong sa Diyos o sa Tawo? nga gipatik sa mga Saksi ni Jehova.
[Kahon sa panid 4]
KON NGANONG GIHUNONG NA ANG PIPILA KA MATANG SA MILAGRO
Ang Bibliya naghisgot ug lainlaing matang sa mga milagro. (Exodo 7:19-21; 1 Hari 17:1-7; 18:22-38; 2 Hari 5:1-14; Mateo 8:24-27; Lucas 17:11-19; Juan 2:1-11; 9:1-7) Kadaghanan niining maong mga milagro gihimo aron sa pagpaila nga si Jesus mao ang Mesiyas, ug sa pagpamatuod nga siya gipaluyohan sa Diyos. Ang unang mga sumusunod ni Jesus naghimo usab ug mga milagro, sama sa pagsultig lainlaing mga pinulongan ug paghubad sa inspiradong mga pulong. (Buhat 2:5-12; 1 Corinto 12:28-31) Kining mga gasa sa paghimog milagro mapuslanon sa dihang nagsugod pa lang ang Kristohanong kongregasyon. Sa unsang paagi?
Aw, diyutay pa lang kaniadto ang mabatonang kopya sa Kasulatan. Ang mga dato lang ang kasagarang makabaton ug bisan unsang matang sa mga basahong linukot o mga libro. Ang mga tawo sa dili-Kristohanong mga dapit wala makaila sa Bibliya o sa Awtor niini, si Jehova. Ang Kristohanong pagtulon-an kinahanglang itudlo nga binaba. Ang mga gasa sa paghimog milagro nakatabang sa pagpakita nga ang Diyos naggamit sa Kristohanong kongregasyon.
Apan gipatin-aw ni Pablo nga kining maong mga gasa mawagtang ra sa dihang kini wala na kinahanglana. “Kon aduna may mga gasa sa pagpanagna, kini sila wagtangon ra; kon aduna may pagsultig lainlaing mga pinulongan, kini sila mohunong; kon aduna may kahibalo, kini wagtangon ra. Kay dili pa bug-os ang atong kahibalo ug dili pa bug-os ang atong pagpanagna; apan sa dihang kanang bug-os moabot na, kanang dili bug-os wagtangon.”—1 Corinto 13:8-10.
Karong adlawa, ang mga tawo aduna nay magamit nga mga Bibliya, maingon man mga konkordansiya ug mga ensiklopedia. Kapig unom ka milyong nabansay nga mga Kristohanon ang nagatabang sa uban nga makakat-on bahin sa Diyos pinasukad sa Bibliya. Busa, dili na kinahanglan ang mga milagro aron ipaila nga si Jesu-Kristo mao ang tinudlong Manluluwas sa Diyos o aron pamatud-an nga si Jehova nagpaluyo sa iyang mga alagad.