Mga Pangutana Gikan sa mga Magbabasa

Angay ba alang sa usa ka Kristohanon nga mohatag ug kuwarta o gasa sa usa ka empleyado sa gobyerno alang sa iyang mga serbisyo, o kana ba isipon ingong hiphip?

Bisag asa sila nagpuyo, ang mga Kristohanon nagtinguha sa pagpakitag praktikal nga kaalam sa pagdumala sa mga kahimtang sa ilang dapit, nga nahinumdom nga ang mga butang nga dalawaton ug legal sa usa ka dapit basin bug-os nga dili-dalawaton ug ilegal sa lain. (Proverbio 2:6-9) Siyempre, angayng hinumdoman kanunay sa usa ka Kristohanon nga si bisan kinsa nga gustong mahimong ‘dinapit sa tolda ni Jehova’ angayng molikay sa paghiphip.—Salmo 15:1, 5; Proverbio 17:23.

Unsay hiphip? Sumala sa The World Book Encyclopedia, “ang hiphip nagkahulogan ug paghatag o pagsuhol ug usa ka bililhong butang ngadto sa . . . usa ka tawo nga adunay taas nga posisyon sa gobyerno, kinsa sa baylo mohatag ug pabor sa tighatag pinaagi sa paglapas sa iyang katungdanan o sa pagsupak sa balaod.” Busa, bisag asa nagpuyo ang usa, siya nanghiphip kon suholan niyag kuwarta o hatagag gasa ang usa ka huwes o polis aron tuison ang hustisya o ang usa ka inspektor aron dili itaho ang usa ka depekto o kalapasan. Ang usa nanghiphip usab kon manghatag siyag gasa aron makadawat ug espesyal nga pabor, sama sa pag-una sa iyang ngalan diha sa listahan sa mga naghulat o paglaktaw sa uban nga naglinya. Ang maong binuhatan nagpakita usab ug kawalay-gugma.—Mateo 7:12; 22:39.

Apan ang usa ba nanghiphip kon mohatag siya ug gasa o kuwarta ngadto sa, ingnon ta, usa ka empleyado sa gobyerno aron makabaton ug legal nga serbisyo o aron malikayan ang dili-makataronganong pagtratar? Pananglitan, sa ubang mga nasod ang mga opisyales tingali dili mosugot sa paglista sa mga bata sa tunghaan, dili mopaadmit ug tawo sa ospital, o dili moisyu ug mga dokumento sa imigrasyon hangtod dili sila makadawat ug gasa nga kuwarta. O basin maglanganlangan sila sa pagproseso sa mga aplikasyon sa pagparehistro pag-usab sa mga lisensiya.

Ang paghatag ug gasa o kuwarta ug ang panglantaw sa mga tawo niana magkalahi sa matag dapit. Kon ang maong paghatag naandan na o gipaabot pa gani, ang ubang mga Kristohanon basin mobati nga basta dili lang kini makalapas sa balaod, wala silay nasupak nga mga prinsipyo sa Bibliya sa dihang hatagan nila ug gasa ang usa ka opisyal sa pagbuhat sa iyang katungdanan. Sa ubang mga dapit, lantawon pa gani tingali sa mga tawo ang maong pagpanghatag ingong gasa aron madugangan ang gamayng suweldo sa empleyado sa gobyerno. Hinumdomi nga adunay kalainan tali sa paghatag ug gasa alang sa legal nga mga serbisyo ug sa pagtunol ug hiphip alang sa ilegal nga mga pabor.

Sa laing bahin, kon mangayog pabor nga dili supak sa balaod, ang ubang mga Saksi ni Jehova dili mohatag ug kuwarta o gasa sa mga inspektor, mga opisyal sa aduwana, o uban pa bisag naandan na ang maong pagpanghatag. Sanglit ang mga Saksi ilado sa ilang mga dapit tungod sa ilang pagkamatarong ug pagkamatinud-anon, sila makadawat usahay ug pabor nga kasagarang ihatag lang ngadto sa mga tawong naghatag ug gasa.—Proverbio 10:9; Mateo 5:16.

Ingong sumaryo, ang matag alagad ni Jehova kinahanglang mohukom sa iyang kaugalingon kon kaha mohatag ba siya ug gasa aron makadawat ug legal nga serbisyo o aron malikayan ang dili-makataronganong pagtratar. Labaw sa tanan, siya kinahanglang magkinabuhi nga dunay hinlo nga konsensiya, nga dili makapasipala sa ngalan ni Jehova, ug nga dili makapandol sa uban.—Mateo 6:9; 1 Corinto 10:31-33; 2 Corinto 6:3; 1 Timoteo 1:5.