Paghimo Kang Jehova nga Imong Diyos

SA PANAHON sa Bibliya, dunay pipila ka tawo nga suod kang Jehova nga tungod niana siya gitawag nga ilang Diyos. Pananglitan, diha sa Kasulatan, si Jehova gihubit ingong “ang Diyos ni Abraham,” “Diyos ni David,” ug “Diyos ni Elias.”—Genesis 31:42; 2 Hari 2:14; 20:5.

Sa unsang paagi nabatonan niining mga tawhana ang suod nga relasyon uban sa Diyos? Unsay atong makat-onan gikan kanila aron kita usab makabaton ug makahupot ug lig-on nga relasyon uban sa Maglalalang?

Si Abraham Nagbutang ug “Pagtuo Kang Jehova”

Si Abraham mao ang unang tawo nga gihubit sa Bibliya nga nagbutang ug pagtuo kang Jehova. Ang pagtuo maoy pangunang hiyas ni Abraham nga tungod niana nabatonan niya ang pag-uyon sa Diyos. Sa pagkatinuod, giuyonan gayod ni Jehova si Abraham nga ang Maglalalang sa ulahi nagpaila sa iyang kaugalingon ngadto kang Moises ingong “ang Diyos ni Abraham” ug maingon man ngadto sa iyang anak ug apo, si Isaac ug Jacob.—Genesis 15:6; Exodo 3:6.

Sa unsang paagi naugmad ni Abraham ang ingon niana nga matang sa pagtuo sa Diyos? Una sa tanan, gitukod ni Abraham ang iyang pagtuo diha sa lig-on nga pundasyon. Tingalig natudloan siya sa mga dalan ni Jehova pinaagi sa anak nga lalaki ni Noe nga si Sem, kinsa nakakita mismo sa mga buhat sa Diyos sa pagluwas. Nakita mismo ni Sem nga si Jehova “nagluwas kang Noe, nga usa ka magwawali sa pagkamatarong, uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan.” (2 Pedro 2:5) Basin nakat-onan ni Abraham gikan kang Sem nga kon si Jehova magsaad ug usa ka butang, kana matuman gayod. Bisag unsa pay kahimtang, sa dihang si Abraham mismo nakadawat ug saad gikan sa Diyos, siya nalipay ug nagkinabuhi sumala sa tinong kaamgohan nga ang maong saad matuman.

Sanglit aduna nay lig-ong pundasyon sa iyang pagtuo, gipalig-on ni Abraham ang iyang pagtuo pinaagi sa iyang mga binuhatan. Si apostol Pablo misulat: “Tungod sa pagtuo si Abraham, sa gitawag siya, misugot sa pag-adto sa usa ka dapit nga gitino nga iyang pagadawaton ingon nga panulondon; ug siya milakaw, bisan pag wala mahibalo kon asa siya paingon.” (Hebreohanon 11:8) Kanang maong buhat sa pagkamasinugtanon nagpalig-on sa pagtuo ni Abraham, nga bahin niana ang tinun-ang si Santiago misulat: “Nakita mo nga ang iyang pagtuo naglihok diay duyog sa iyang mga binuhatan ug pinaagi sa iyang mga binuhatan ang iyang pagtuo nahingpit.”—Santiago 2:22.

Dugang pa, gitugotan ni Jehova nga masulayan ang pagtuo ni Abraham, nga nagpalig-on pa gayod niana. Si Pablo mipadayon sa pag-ingon:  “Tungod sa pagtuo si Abraham, sa dihang siya gisulayan, sama ug naghalad na kang Isaac.” Ang mga pagsulay maglunsay ug magpalig-on sa pagtuo, nga maghimo niana nga “labi pang bililhon kay sa bulawan.”—Hebreohanon 11:17; 1 Pedro 1:7.

Bisan tuod wala makakita si Abraham sa katumanan sa tanan nga gisaad sa Diyos, natagamtam niya ang kalipay sa pagkakita nga gisundog sa uban ang iyang panig-ingnan. Ang iyang asawa nga si Sara ug tulo ka ubang membro sa iyang pamilya—si Isaac, Jacob, ug Jose—gidayeg usab sa Bibliya tungod sa ilang talagsaong pagtuo.—Hebreohanon 11:11, 20-22.

Pagtuo nga Sama Kang Abraham Karon

Ang tanan nga nagtinguha sa paghimo kang Jehova nga iyang Diyos nagkinahanglan ug pagtuo. “Kon walay pagtuo imposible ang pagpahimuot [sa Diyos],” misulat si Pablo. (Hebreohanon 11:6) Sa unsang paagi ang usa ka alagad sa Diyos karon makaugmad ug lig-ong pagtuo nga sama kang Abraham?

Sama kang Abraham, ang atong pagtuo kinahanglang adunay lig-ong pundasyon. Ang labing maayong paagi sa paghimo niini mao ang regular nga pagtuon sa Bibliya ug sa binase-sa-Bibliya nga mga publikasyon. Ang pagbasa sa Bibliya ug ang pagpalandong sa atong nabasa magpasalig kanato nga ang mga saad sa Diyos matuman. Dayon magpalihok kini kanato sa pagkinabuhi sumala nianang segurado nga palaaboton. Ang atong pagtuo dugang mapalig-on pinaagig mga buhat sa pagkamasinugtanon, nga naglakip sa pagpakigbahin sa publikong ministeryo ug pagtambong sa Kristohanong mga tigom.—Mateo 24:14; 28:19, 20; Hebreohanon 10:24, 25.

Ang atong pagtuo seguradong masulayan, tingali pinaagi sa pagsupak, grabe nga sakit, kamatayon sa usa ka minahal, o uban pang butang. Kon kita magpabiling maunongon kang Jehova ubos sa pagsulay, ang atong pagtuo mas molig-on ug mahimong mas bililhon pa kay sa bulawan. Kon kita buhi man ugaling sa pagkakita sa katumanan sa tanang saad sa Diyos o dili, ang atong pagtuo magpasuod kanato kang Jehova. Dugang pa, ang atong maayong panig-ingnan magpalihok sa uban sa pagsundog sa atong pagtuo. (Hebreohanon 13:7) Tinuod kini sa kahimtang ni Ralph, kinsa nakamatikod ug nagsundog sa pagtuo sa iyang mga ginikanan. Siya misaysay:

“Sa dihang miipon pa ako pagpuyo sa balay, kaming tanan sa pamilya gidasig sa akong mga ginikanan sa pagbangon ug sayo sa buntag aron mag-usa kami sa pagbasa sa Bibliya. Among nabasa ang tibuok Bibliya nianang paagiha.” Si Ralph nagbasa gihapon ug Bibliya kada buntag, ug kini maoy maayong paagi sa pagsugod sa iyang adlaw. Si Ralph mokuyog kaniadto sa iyang amahan sa publikong ministeryo kada semana. “Niadtong panahona ako nakakat-on sa pagbalikduaw ug pagdumalag mga pagtuon sa Bibliya sa balay.” Si Ralph karon nag-alagad ingong boluntaryo sa usa sa mga sangang buhatan sa mga Saksi ni Jehova sa Uropa. Pagkadakong ganti alang sa pagtuo nga gipasundayag sa iyang mga ginikanan!

Usa ka Tawo nga Gikahimut-an sa Kasingkasing ni Jehova

Si David, nga natawo mga 900 ka tuig ulahi kang Abraham, maoy usa ka sulondang tawo taliwala sa mga alagad ni Jehova nga gihisgotan sa Kasulatan. Mahitungod sa pagpili ni Jehova kang David ingong umaabot nga hari, si manalagnang Samuel miingon: “Si Jehova mangita gayod ug usa ka tawo nga gikahimut-an sa iyang kasingkasing.” Si Jehova ug David adunay suod kaayo nga relasyon nga tungod niana si manalagnang Isaias sa ulahi nakigsulti kang Haring Ezequias bahin kang “Jehova nga Diyos ni David nga imong katigulangan.”—1 Samuel 13:14; 2 Hari 20:5; Isaias 38:5.

Bisan tuod si David kahimut-anan sa kasingkasing ni Jehova, dihay mga higayon nga nadaog siya sa iyang daotang mga pangibog. Tulo ka higayon siyang nakahimog grabeng kasaypanan: Siya  mitugot sa pagdala sa arka sa pakigtugon paingon sa Jerusalem sa dili hustong paagi; nakapanapaw siya uban kang Bat-seba ug naglaraw sa pagpatay sa iyang bana, si Urias; ug giihap niya ang katawhan sa Israel ug Juda nga wala isugo ni Jehova. Sa matag usa niana ka higayon, gilapas ni David ang Balaod sa Diyos.—2 Samuel 6:2-10; 11:2-27; 24:1-9.

Apan, sa dihang si David gisukmatan bahin sa iyang mga sala, giangkon niya kana ug wala kana ipasangil sa uban. Siya miangkon nga wala niya mahikay sa hustong paagi ang pagbalhin sa Arka, ug miingon usab nga ‘wala kami mangita kang Jehova sumala sa nabatasan.’ Sa dihang giyagyag ni manalagnang Natan ang pagpanapaw ni David, si David mitubag pinaagi sa pag-ingon: “Ako nakasala batok kang Jehova.” Ug sa dihang naamgohan ni David ang iyang kasaypanan sa pag-ihap sa mga tawo, siya miadmitir: “Ako nakasala ug dako kaayo sa akong gibuhat.” Si David naghinulsol sa iyang mga sala ug nagpatunhay sa iyang maayong relasyon kang Jehova.—1 Cronicas 15:13; 2 Samuel 12:13; 24:10.

Sa Dihang Kita Makasala

Ang panig-ingnan ni David makadasig kanato samtang naningkamot kita sa paghimo kang Jehova nga atong Diyos. Kon ang usa ka tawo nga kahimut-anan sa kasingkasing ni Jehova nakahimo man gani ug grabeng mga sala, dili kita angayng maluya kon, bisan pag naningkamot kita pag-ayo, kita masayop usahay o basin makahimo pa ganig seryosong mga sala. (Ecclesiastes 7:20) Makapahupay ang pagkasayod nga sa dihang si David naghinulsol, ang iyang mga sala gipasaylo. Mao kanay nahitabo kang Uwe a mga pipila ka tuig nang milabay.

Ansiyano si Uwe sa usa ka kongregasyon sa mga Saksi ni Jehova. Usa ka higayon niana, nadaog siya sa iyang daotang mga pangibog ug nakahimog imoralidad. Sa primero, si Uwe, sama ni Haring David, misulay pagtago sa iyang sala, nga naglaom nga dili balebalehon ni Jehova ang iyang sala. Sa kadugayan, nahasol pag-ayo ang konsensiya ni Uwe mao nga gitug-an niya ang iyang sala ngadto sa iyang isigkaansiyano ug dayon gihimo ang gikinahanglang aksiyon aron matabangan si Uwe nga maulian sa iyang nadaot nga espirituwalidad.

Si Uwe naghinulsol sa iyang mga sala ug nagpatunhay sa iyang maayong relasyon kang Jehova ug sa kongregasyon. Siya mapasalamaton kaayo sa tabang nga iyang nadawat nga paglabay sa pipila ka semana siya misulat sa mga ansiyano nga nagpahayag sa iyang sinsero ug kinasingkasing nga pagpasalamat sa ilang tabang. “Gitabangan ninyo ako sa pagwagtang sa pasipala nga akong nahatag sa ngalan ni Jehova,” siya misulat. Napatunhay ni Uwe ang iyang maayong relasyon kang Jehova ug sa ngadtongadto natudlo na usab nga alagad sa maong kongregasyon.

“Usa ka Tawo nga May Pagbati nga Sama Kanato”

Si Elias, nga nabuhi sa siglo human kang David, maoy usa sa pangunang mga manalagna sa Israel. Gituboy ni Elias ang matuod nga pagsimba sa panahon diin ang korapsiyon ug imoralidad kaylap kaayo, ug siya wala gayod magpalingpaling sa iyang debosyon kang Jehova. Dili ikatingala nga ang iyang manununod, si Eliseo, kas-a mitawag kang Jehova ingong “Diyos ni Elias”!—2 Hari 2:14.

Bisan pa niana, si Elias dili labaw sa ordinaryong mga tawo. Si Santiago misulat: “Si Elias maoy usa ka tawo nga may pagbati nga sama kanato.” (Santiago 5:17) Pananglitan, human niya maparot ang mga magsisimba ni Baal sa Israel, gibaharan siya ni Rayna Jezebel nga patyon. Unsay iyang sanong? Siya nahadlok ug mikalagiw ngadto sa kamingawan. Didto, samtang naglingkod ilalom sa kahoyng retama, si Elias nagmulo: “Igo na! Karon, Oh Jehova, kuhaa ang akong kalag, kay ako dili mas maayo kay sa akong mga katigulangan.” Dili na gusto ni Elias nga mahimong manalagna ug mas gusto pa niya nga mamatay.—1 Hari 19:4.

Bisan pa niana, nakasabot si Jehova sa pagbati ni Elias. Gipalig-on siya sa Diyos, nga nagpasalig kang Elias nga wala siya mag-inusara, sanglit aduna pay uban nga maunongon sa matuod nga pagsimba. Dugang pa, misalig gihapon si Jehova kang Elias ug gihatagan siya ug buluhaton nga pagahimoon.—1 Hari 19:5-18.

Ang kalisang nga gibati ni Elias dili timailhan nga nawad-an na siya sa pag-uyon sa Diyos. Mga 1,000 ka tuig sa ulahi, sa dihang nausab ang dagway ni Kristo Jesus atubangan nila ni Pedro, Santiago, ug Juan, kinsay gipili ni Jehova nga makita  tupad ni Jesus diha sa panan-awon? Si Moises ug Elias. (Mateo 17:1-9) Tin-aw nga giisip ni Jehova si Elias ingong sulondan nga manalagna. Bisan tuod si Elias maoy usa lang ka “tawo nga may pagbati nga sama kanato,” gipabilhan sa Diyos ang iyang paningkamot sa pagpasig-uli sa putling pagsimba ug sa pagbalaan sa Iyang ngalan.

Atong Emosyonal nga Pakigbisog

Ang mga alagad ni Jehova karong panahona tingalig maluya o mabalaka usahay. Makapahupay ang pagkasayod nga si Elias nakaagom usab niana nga mga pagbati! Ug makapadasig ang pagkahibalo nga sama nga nasabtan ni Jehova ang mga pagbati ni Elias, masabtan usab Niya ang atong emosyonal nga pakigbisog.—Salmo 103:14.

Sa usa ka bahin, kita nahigugma sa Diyos ug sa atong isigkatawo ug nagtinguha sa pagtuman sa gisugo ni Jehova nga buluhaton sa pagmantala sa maayong balita sa Gingharian. Sa laing bahin, kita basin mahigawad kon ang mga tawo dili mosanong sa atong pagsangyaw o basin mabalaka pa gani bahin sa mga hulga sa mga kaaway sa matuod nga pagsimba. Hinunoa, sama nga gitabangan ni Jehova si Elias sa pagpadayon, Siya motabang usab sa iyang mga alagad karong adlawa. Tagda, pananglitan, ang nahitabo kang Herbert ug Gertrud.

Si Herbert ug Gertrud nabawtismohan ingong mga Saksi ni Jehova sa Leipzig, sa kanhi German Democratic Republic, sa 1952. Lisod ang kinabuhi niadtong panahona alang sa mga alagad sa Diyos, kay gidili ang ilang publikong ministeryo. Unsay gibati ni Herbert bahin sa pagsangyaw sa balay ug balay?

“Dihay mga higayon nga makuyawan kaayo mi. Sa among pagbalaybalay, dili namo mahibal-an kon kanus-a mokalit ug abot ang mga polis ug dakpon mi.” Unsay nakatabang kang Herbert ug sa uban sa pagbuntog sa ilang kahadlok? “Kanunay kaming naghimog personal nga pagtuon sa Bibliya. Ug gipalig-on kami ni Jehova sa pagpadayon sa among buluhatong pagsangyaw.” Diha sa iyang publikong ministeryo, si Herbert daghag eksperyensiya nga nakapalig-on—nakapahimuot pa gani—kaniya.

Si Herbert nakahibalag ug usa ka edarang babaye nga nagpakitag interes sa Bibliya. Sa dihang si Herbert miduaw kaniya pag-usab pipila ka adlaw sa ulahi, usa ka batan-ong lalaki ang atua didto ug naminaw sa ilang panagsultihay. Human sa pipila ka gutlo, may nakita si Herbert nga nakapalisang pag-ayo kaniya. Diha sa silya sa suok sa lawak, dihay kalo sa polis. Iya kini sa batan-ong lalaki, nga usa diay ka polis nga determinado sa pag-aresto kang Herbert.

“Usa ka diay ka Saksi ni Jehova!” miingon ang batan-ong lalaki. “Pakit-a ko sa imong ID.” Gitunol ni Herbert ang iyang identipikasyon nga kard. Dayon nahitabo ang wala damha. Giatubang sa babaye ang polis ug gibaharan siya: “Kon may daotan ganing mahitabo niining ministro sa Diyos, dili ka na gyod makasaka niining balaya.”

Ang batan-ong lalaki namalandong kadiyot, dayon gitunol niya pagbalik ang ID kang Herbert, ug gipalakaw siya. Nasayran ni Herbert sa ulahi nga ang polis nangulitawo sa anak sa maong babaye. Siyempre, gibati niya nga mas makabentaha siya kon makapadayon siya sa pagpangulitawo sa dalaga kay sa pag-aresto kang Herbert.

Himoa si Jehova nga Atong Diyos

Unsay atong makat-onan gikan niini nga mga panghitabo? Sama kang Abraham, kinahanglang duna kitay lig-ong pagtuo sa mga saad ni Jehova. Sama kang David, kinahanglang moduol kita kang Jehova uban ang tiunayng paghinulsol sa dihang kita makasala. Ug sama kang Elias, kinahanglang mangayo kitag kusog gikan kang Jehova kon kita nabalaka. Kon buhaton nato kana, mahimo nato si Jehova nga atong Diyos karon ug sa walay kataposan, sanglit siya maoy “usa ka buhing Diyos, nga Manluluwas sa tanang matang sa mga tawo, ilabina sa mga matinumanon.”—1 Timoteo 4:10.

[Footnote]

[Mga hulagway sa panid 25]

Ang mga buhat sa pagkamasinugtanon nagpalig-on sa pagtuo ni Abraham

[Hulagway sa panid 26]

Sama kang David, angay kitang maghinulsol kon makasala

[Hulagway sa panid 28]

Maingon nga nasabtan ni Jehova ang mga pagbati ni Elias, masabtan usab niya ang atoa