Pagtagana sa Usa ka Panginahanglan sa Macedonia

“DALI ngari sa Macedonia ug tabangi kami.” (Buhat 16:9) Kining mga pulonga nga gilitok sa usa ka tawo nga nakita ni apostol Pablo diha sa panan-awon nagpadayag sa panginahanglan nga imantala ang maayong balita sa Gingharian sa Diyos diha sa usa ka bag-ong teritoryo, sa mga siyudad nga karon anaa sa Gresya.

Sa nasod karon sa Macedonia, aduna lamay 1 ka Saksi ni Jehova sa matag 1,840 ka molupyo. Daghang tawo ang wala pa gayod makadungog bahin kang Jehova nga Diyos. Oo, adunay dinaliang panginahanglan nga madunggan sa mga tawo nining nasora ang mensahe sa pakigdait.—Mateo 24:14.

Ang Diyos nagbukas sa dalan aron ikatagana ang maong panginahanglan. Usa ka adlaw sa Nobyembre 2003, ang buhatan sa mga Saksi ni Jehova sa Skopje, Macedonia, nakadawat ug wala-damha nga tawag sa telepono. Gikan kadto sa Macedonian Center for International Cooperation, nga nagdapit sa mga Saksi sa pagbutang ug usa ka displeyhanan aron masaysay nila ang ilang mga tinuohan panahon sa tulo-ka-adlaw nga eksibit nga magsugod sa Nobyembre 20. Pagkadakong kahigayonan kadto aron maabot ang libolibong tawo nga wala pa gayod makadungog sa maayong balita sa Gingharian!

Ang mga boluntaryo makugihong nangandam ug naghikay sa pagdispley ug lainlaing mga publikasyon sa mga Saksi ni Jehova diha sa pinulongang Macedonian. Ang mga kopya niini gidispley aron ang mga bisita makakuhag mga kopya kon gusto nila. Ang displey nakahatag sa daghang tawo ug kahigayonan sa pagkuhag makapahupayng espirituwal nga tubig nga walay bayad.—Pinadayag 22:17.

Ilabinang nagustohan sa mga bisita ang mga publikasyon nga nakaapektar sa ilang kinabuhi, sama sa Mga Pangutanang Gisukna sa mga Batan-on—Mga Tubag nga Mosaler ug Ang Sekreto sa Kalipay sa Pamilya. a Nubentay-otso ang nagbilin sa ilang mga adres, nga naghangyo nga duawon sila sa mga Saksi ni Jehova. Daghan ang nakadayeg sa maayong buluhaton sa mga Saksi ni Jehova ug sa kalidad sa literatura.

Usa ka tawo ang miadto sa displeyhanan nga nagkapot sa kamot sa iyang batang lalaki. Ang amahan nangutana kon aduna bay basahon alang sa mga bata. Gipakita kaniya sa mga Saksi ang publikasyong Akong Basahon sa mga Estorya sa Bibliya. b Iyang gipakli  ang mga panid niini ug madasigong nangutana kon tagpila kini. Sa dihang nasayran niya nga ang buluhatong pagpanudlo sa mga Saksi ni Jehova bug-os nga gisuportahan sa boluntaryong mga donasyon, siya labaw pang nadasig. (Mateo 10:8) Gipakita niya ang libro ngadto sa iyang anak nga lalaki ug miingon: “Nindot kaayo kini nga libro! Basahan ka ni Papa ug usa ka estorya kada adlaw!”

Usa ka propesor sa pilosopiya ang miduol sa displeyhanan. Interesado kaayo siya sa relihiyon sa katibuk-an apan ilabina sa mga pagtulon-an sa mga Saksi ni Jehova. Samtang nagpaklipakli sa librong Pagpangita sa Katawhan sa Diyos, c ang propesor miingon: “Lohikal kaayo ang pagkasulat sa mga impormasyon! Kini mao gayod ang paagi nga gihunahuna ko nga ang mga impormasyon angayng isulat.” Sa ulahi, ang pipila ka estudyante sa iyang tunghaan miadto sa displeyhanan ug mihangyo ug kaugalingong kopya sa libro nga nabatonan sa propesor. Gusto nilang tun-an ang samang libro. Nagtuo sila nga iyang gamiton ang maong libro dihang magtudlo sa iyang mga leksiyon.

Alang sa pipila ka tawo, ang maong eksibit mao ang una nilang higayon sa pagkabasa ug pagkadungog sa mga kamatuoran sa Kasulatan. Usa ka grupo sa bungol nga mga tin-edyer ang miadto aron motan-awtan-aw. Usa sa mga Saksi nakig-estorya kanila sa mubo, sa tabang sa usa ka batan-ong babaye nga naghubad niana sa senyas nga pinulongan. Ginamit ang mga larawan sa librong Ang Labing Bantogang Tawo nga Nabuhi Sukad, d iyang gipatin-aw nga si Jesus nag-ayo sa mga masakiton, lakip sa mga bungol. Nalipay sila sa “pagkadungog” sa saad sa Bibliya nga sa dili madugay buhaton ni Jesus ang samang butang alang sa mga tawo nga nagpuyo sa yuta karong adlawa. Ubay-ubay kanila ang malipayong midawat ug binase-sa-Bibliya nga literatura, ug gihikay nga duawon sila sa mga Saksi nga kahibalong mosenyas.

Gawas pa sa pinulongang Mecedonian, ang mga literatura mabatonan usab sa Albanian, Ingles, ug Turko. Usa ka lalaki nga dili makasultig Macedonian mihangyog literatura nga Iningles. Human madawat ang mga gula sa Bantayanang Torre ug Pagmata! nga mga magasin, siya miingon nga Turko ang iyang sinultihan. Sa dihang gipakitaan siya ug literatura sa iyang kaugalingong pinulongan, siya nahingangha pag-ayo! Nakita niya nga ang mga Saksi ni Jehova gustong motabang sa tanan.

Pagkadakong pamatuod ang nahatag niadtong maong okasyon, ug pagkamakapadasig nga makita ang daghan kaayong tawo nga nagpakitag interes sa kamatuoran sa Bibliya! Sa pagkatinuod, gibuksan ni Jehova ang dalan aron daghan pang tawo sa Macedonia ang makadungog sa maayong balita sa Gingharian.

[Mga footnote]

[Kahon/Mga hulagway sa panid 9]

USA KA HINUNGDANONG KAUGMARAN!

Niadtong Mayo 17, 2003, may panghitabo nga timaan sa usa ka dakong pag-uswag sa mga paningkamot sa pagpakaylap sa maayong balita sa Gingharian sa Macedonia. Usa ka buhatan sa mga Saksi ni Jehova ang gipahinungod sa Skopje. Ang pagtukod mikabat ug duha ka tuig, nga nagpadako sa kanhing mga pasilidad sa upat ka pilo.

Adunay tulo ka bulag nga mga tinukod nga nahimutangan sa mga buhatan sa administrasyon ug sa paghubad maingon man mga puy-anan, kosina, ug labhanan. Si Guy Pierce, membro sa Nagamandong Lawas sa mga Saksi ni Jehova, mao ang naghatag sa pakigpulong sa pahinungod. Ang mga bisita gikan sa napulo ka lainlaing nasod mitambong sa programa sa pahinungod. Ang tanan nalipay sa pagkakita sa nindot nga bag-ong mga tinukod.

[Mapa sa panid 8, 9]

(Alang sa aktuwal nga pagkahan-ay, tan-awa ang publikasyon)

BULGARIA

MACEDONIA

Skopje

ALBANIA

GRESYA

[Hulagway sa panid 8]

Skopje, Macedonia