Salig sa Pulong ni Jehova
Salig sa Pulong ni Jehova
“Ako nagsalig sa imong pulong.”—SALMO 119:42.
1. Kinsay nagsulat sa Salmo 119 ug unsay iyang tinamdan?
ANG pulong ni Jehova giapresyar gayod sa tagsulat sa Salmo 119. Lagmit siya mao si Prinsipe Ezequias sa Juda. Ang pagbati nga gipahayag diha niining inspiradong awit mohaom sa tinamdan ni Ezequias, kinsa “nagpadayon sa pag-unong kang Jehova” samtang nag-alagad ingong hari sa Juda. (2 Hari 18:3-7) Usa ka butang ang tino: Ang tagsulat mahunahunaon sa iyang espirituwal nga panginahanglan.—Mateo 5:3.
2. Unsa ang tema sa Salmo 119, ug sa unsang paagi gihan-ay kining awita?
2 Ang usa ka hinungdanong punto sa Salmo 119 mao ang pagkabililhon sa pulong o mensahe sa Diyos. a Lagmit ingong tabang sa pagmemorya, ang tagsulat naghimo niini nga usa ka alpabetikong awit. Ang 176 ka bersikulo niini gibase sa sunodsunod nga mga letra sa Hebreohanong alpabeto. Sa orihinal nga Hebreohanon, ang matag usa sa 22 ka estansa sa maong salmo adunay 8 ka linya nga nagsugod sa mao gihapong letra. Kining salmoha naghisgot sa pulong, balaod, mga pahinumdom, dalan, regulasyon, sugo, hudisyal nga mga hukom, ug mga lagda sa Diyos. Niining artikuloha ug sa mosunod, ang Salmo 119 pagahisgotan sumala sa tukmang hubad sa Hebreohanong teksto sa Bibliya. Ang pagpamalandong sa mga kasinatian sa mga alagad ni Jehova kaniadto ug karon angayng magpauswag sa atong pagsabot niining inspirado-sa-Diyos nga awit ug maghimo kanatong mas mapasalamaton sa sinulat nga Pulong sa Diyos, ang Bibliya.
Tumana ang Pulong sa Diyos ug Magmalipayon
3. Ipatin-aw ug iilustrar kon unsay kahulogan sa pagkahimong walay-ikasaway.
3 Ang tinuod nga kalipay nagdepende sa atong pagsubay sa balaod sa Diyos. (Salmo 119:1-8) Kon buhaton nato kini, isipon kita ni Jehova nga ‘walay-ikasaway diha sa atong dalan.’ (Salmo 119:1) Ang pagkawalay-ikasaway wala magpasabot nga kita hingpit, apan nagpaila kini nga kita naningkamot pag-ayo sa pagbuhat sa kabubut-on ni Jehova nga Diyos. Si Noe “walay-ikasaway taliwala sa iyang mga katalirongan” ingong tawo nga “naglakaw uban sa matuod nga Diyos.” Ang maong matinumanong patriarka ug ang iyang pamilya nakalabang-buhi sa Lunop tungod kay iyang gisubay ang dalan sa kinabuhi nga gilatid ni Jehova. (Genesis 6:9; 1 Pedro 3:20) Sa susama, ang atong pagkalabang-buhi niining kataposan sa kalibotan nagdepende sa atong ‘mainampingong pagtuman sa mga sugo sa Diyos,’ sa ingon nagbuhat sa iyang kabubut-on.—Salmo 119:4.
4. Nagdepende sa unsa ang atong kalipay ug kalamposan?
4 Dili gayod kita talikdan ni Jehova kon ‘dayegon nato siya uban ang katul-id sa kasingkasing ug sundon kanunay ang iyang mga regulasyon.’ (Salmo 119:7, 8) Wala talikdi sa Diyos ang Israelinhong lider nga si Josue, kinsa nagpadapat sa tambag nga ‘basahon ang balaod adlaw ug gabii aron siya mag-amping sa pagbuhat sumala sa tanang nahisulat niini.’ Tungod niana siya nagmalamposon ug milihok nga maalamon. (Josue 1:8) Sa hapit na siyang mamatay, si Josue nagdayeg gihapon sa Diyos ug nagpahinumdom sa mga Israelinhon: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas.” (Josue 23:14) Sama kang Josue ug sa magsusulat sa Salmo 119, atong makaplagan ang kalipay ug kalamposan pinaagi sa pagdayeg kang Jehova ug pagsalig sa iyang pulong.
Ang Pulong ni Jehova Makahimo Kanatong Hinlo
5. (a) Ipatin-aw kon sa unsang paagi posible nga mahuptan ang espirituwal nga kahinlo. (b) Unsay tabang nga mabatonan sa usa ka batan-on nga nakahimog grabeng sala?
5 Mahimo kitang hinlo sa espirituwal kon kita magpadayon sa pagbantay subay sa pulong sa Diyos. (Salmo 119:9-16) Ingon niini ang kahimtang bisan pag ang atong mga ginikanan wala magpakita ug maayong panig-ingnan. Bisan tuod ang amahan ni Ezequias usa ka magsisimba sa idolo, ‘gihinloan ni Ezequias ang iyang alagianan,’ posible sa paganong mga impluwensiya. Ibutang ta nga ang usa ka batan-on nga nag-alagad sa Diyos karon nakahimog grabeng sala. Ang paghinulsol, pag-ampo, tabang gikan sa mga ginikanan, ug gikan sa mahigugmaong Kristohanon nga mga ansiyano makatabang kaniya nga mahisama kang Ezequias ug ‘mahinloan ang iyang alagianan ug magpadayon sa pagbantay.’—Santiago 5:13-15.
6. Kinsa nga mga babaye ang ‘naghinlo sa ilang alagianan ug padayong nagbantay subay sa pulong sa Diyos’?
6 Bisan tuod sila si Rahab ug Ruth dugay nang nabuhi una pa gisulat ang Salmo 119, sila ‘naghinlo sa ilang alagianan.’ Si Rahab usa ka Canaanhong pampam, apan siya nailhan tungod sa iyang pagtuo ingong magsisimba ni Jehova. (Hebreohanon 11:30, 31) Ang Moabitang si Ruth mibiya sa iyang mga diyos, nag-alagad kang Jehova, ug nagtuman sa iyang Balaod ngadto sa Israel. (Ruth 1:14-17; 4:9-13) Kining duha ka dili-Israelinhong mga babaye ‘padayong nagbantay subay sa pulong sa Diyos’ ug nakabaton ug talagsaong pribilehiyo nga mahimong mga katigulangan ni Jesu-Kristo.—Mateo 1:1, 4-6.
7. Sa unsang paagi si Daniel ug ang tulo pa ka Hebreohanong mga batan-on naghatag ug maayong panig-ingnan sa paghupot ug espirituwal nga kahinlo?
7 “Ang kiling sa kasingkasing sa tawo daotan sukad pa sa iyang pagkabatan-on,” apan ang mga batan-on makasubay sa hinlo nga alagianan, bisan niining dunot nga kalibotan nga gikontrolar ni Satanas. (Genesis 8:21; 1 Juan 5:19) Ingong mga binihag sa Babilonya, si Daniel ug ang tulo pa ka Hebreohanong mga batan-on ‘padayong nagbantay subay sa pulong sa Diyos.’ Pananglitan, wala nila hugawi ang ilang kaugalingon “sa lamiang mga pagkaon sa hari.” (Daniel 1:6-10) Ang mga Babilonyanhon mokaon ug dili-hinlo nga mga mananap, nga gidili sa Moisesnong Balaod. (Levitico 11:1-31; 20:24-26) Dili nila kanunayng paagasan ug dugo ang giihaw nga mga mananap, ug ang ilang pagkaon sa wala mapaagasi ug dugo nga karne supak sa balaod sa Diyos bahin sa dugo. (Genesis 9:3, 4) Mao diay nga ang upat ka Hebreohanon wala mokaon sa lamiang mga pagkaon sa hari! Kadtong diyosnong mga batan-on naghupot sa ilang espirituwal nga kahinlo ug busa naghatag ug maayong panig-ingnan.
Ang Pulong sa Diyos Tabang sa Pagkamatinumanon
8. Unsang tinamdan ug kahibalo ang atong gikinahanglan aron atong masabtan ug mapadapat ang balaod sa Diyos?
8 Ang pagkalipay diha sa pulong sa Diyos maoy hinungdanong tabang sa pagpabiling matinumanon kang Jehova. (Salmo 119:17-24) Kon kita susama sa inspiradong salmista, tinguhaon gayod nato nga masabtan ang “katingalahang mga butang” sa balaod sa Diyos. Kita kanunayng ‘mangandoy sa hudisyal nga mga hukom ni Jehova’ ug magpakita ug ‘kalipay sa iyang mga pahinumdom.’ (Salmo 119:18, 20, 24) Kon kita bag-o pa lang nagpahinungod kang Jehova, ‘naugmad ba nato ang pangandoy alang sa walay-sambog nga gatas nga iya sa pulong’? (1 Pedro 2:1, 2) Kinahanglang masabtan nato ang paninugdang mga pagtulon-an sa Bibliya aron mas masabtan ug mapadapat nato ang balaod sa Diyos.
9. Unsay angay natong buhaton kon magkasumpaki ang balaod sa Diyos ug sa tawo?
9 Gikalipay tingali nato ang mga pahinumdom sa Diyos, apan komosta kon ang “mga prinsipe” mosulti batok kanato tungod sa usa ka hinungdan? (Salmo 119:23, 24) Karon, ang mga tawo nga naghupot ug awtoridad subsob nga magpugos kanato sa pag-una sa mga balaod sa tawo inay sa balaod sa Diyos. Kon adunay panagsumpaki tali sa mga balaod sa tawo ug sa kabubut-on sa Diyos, unsay atong buhaton? Ang atong pagkalipay diha sa pulong sa Diyos motabang kanato sa pagpabiling matinumanon kang Jehova. Sama sa gilutos nga mga apostoles ni Jesu-Kristo, kita moingon: “Kinahanglang sugton namo ang Diyos ingong magmamando inay ang mga tawo.”—Buhat 5:29.
10, 11. Iilustrar kon sa unsang paagi mahuptan nato ang integridad ngadto kang Jehova bisan pa sa malisod nga mga kahimtang.
10 Makapabilin kitang matinumanon kang Jehova bisan ilalom sa malisod nga mga kahimtang. (Salmo 119:25-32) Aron molampos kita sa paghupot sa atong integridad sa Diyos, kinahanglan kitang magpatudlo ug kinasingkasing nga mag-ampo alang sa iyang instruksiyon. Kinahanglang pilion usab nato “ang dalan sa pagkamatinumanon.”—Salmo 119:26, 30.
11 Si Ezequias, nga lagmit maoy nagsulat sa Salmo 119, mipili sa “dalan sa pagkamatinumanon.” Gibuhat niya kana bisan pag gilibotan siya sa mini nga mga magsisimba ug gibugalbugalan tingali sa mga sakop sa harianong panimalay. Lagmit, ‘ang iyang kalag walay tulog tungod sa kaguol’ gumikan nianang maong mga kahimtang. (Salmo 119:28) Apan si Ezequias misalig sa Diyos, maoy maayo nga hari, ug mibuhat “kon unsay matarong sa mga mata ni Jehova.” (2 Hari 18:1-5) Pinaagi sa pagsalig sa Diyos, kita usab makalahutay sa mga pagsulay ingong mga maghuhupot sa integridad.—Santiago 1:5-8.
Ang Pulong ni Jehova Naghatag ug Kaisog
12. Sa unsang paagi mapadapat nato mismo ang Salmo 119:36, 37?
12 Ang pagsunod sa giya sa pulong sa Diyos mohatag kanatog kaisog nga gikinahanglan sa pagsagubang sa mga pagsulay sa kinabuhi. (Salmo 119:33-40) Kita mapaubsanong magpatudlo kang Jehova aron kita makatuman sa iyang balaod “sa bug-os nga kasingkasing.” (Salmo 119:33, 34) Sama sa salmista, kita makahangyo sa Diyos: “Ikiling ang akong kasingkasing sa imong mga pahinumdom, ug dili sa mga ganansiya,” sa ato pa, sa dili-minatarong nga ganansiya. (Salmo 119:36) Sama kang apostol Pablo, kita “magmaminatud-on sa tanang butang.” (Hebreohanon 13:18) Kon buot sa atong amo nga kita mohimog usa ka butang nga dili maminatud-on, kita magmaisogon sa pagsunod sa mga direktiba sa Diyos—ug panalanginan gayod ni Jehova ang maong dalan. Motabang gani siya kanato sa pagkontrolar sa tanang daotang mga kiling. Busa mag-ampo kita: “Ilikay ang akong mga mata gikan sa pagtan-aw sa butang nga walay-pulos.” (Salmo 119:37) Dili gayod nato tinguhaon ang bisan unsang walay-pulos nga butang nga gidumtan sa Diyos. (Salmo 97:10) Lakip sa ubang mga butang, kini magpalihok kanato sa paglikay sa pornograpiya ug sa espiritistikong mga buhat.—1 Corinto 6:9, 10; Pinadayag 21:8.
13. Sa unsang paagi ang gilutos nga mga tinun-an ni Jesus nakabaton ug kaisog nga gikinahanglan sa pagpamatuod nga walay kokahadlok?
13 Ang tukmang kahibalo sa pulong sa Diyos maghatag kanato ug pagsalig sa pagpamatuod nga maisogon. (Salmo 119:41-48) Ug nagkinahanglan gayod kita ug kaisog sa ‘pagtubag sa nagpakaulaw kanato.’ (Salmo 119:42) Usahay, mahisama tingali kita sa gilutos nga mga tinun-an ni Jesus, kinsa miampo: “Jehova, . . . itugot sa imong mga alagad ang pagpadayon pagsulti sa imong pulong uban ang bug-os nga kaisog.” Unsay resulta? “Silang tanan gayod napuno sa balaang espiritu ug nanagsulti sa pulong sa Diyos uban ang kaisog.” Ang Soberanong Ginoo mohatag usab kanato ug kaisog nga mosulti sa iyang pulong nga walay kokahadlok.—Buhat 4:24-31.
14. Unsay motabang kanato sa pagpamatuod nga maisogon, sama sa gibuhat ni Pablo?
14 Mabatonan nato ang kaisog nga gikinahanglan sa paghatag ug pamatuod nga walay kokaulaw kon atong mahalon “ang pulong sa kamatuoran” ug ‘tumanon kanunay ang balaod sa Diyos.’ (Salmo 119:43, 44) Ang makugihong pagtuon sa sinulat nga Pulong sa Diyos magsangkap kanato sa ‘paghisgot bahin sa iyang mga pahinumdom atubangan sa mga hari.’ (Salmo 119:46) Ang pag-ampo ug ang espiritu ni Jehova motabang usab kanato sa pagsulti sa nahiangay nga mga butang sa hustong paagi. (Mateo 10:16-20; Colosas 4:6) Si Pablo maisogong nagsulti bahin sa mga pahinumdom sa Diyos ngadto sa unang-siglong mga magmamando. Pananglitan, siya nagpamatuod ngadto sa Romanong Gobernador nga si Felix, kinsa “namati kaniya bahin sa pagtuo kang Kristo Jesus.” (Buhat 24:24, 25) Si Pablo naghatag usab ug pamatuod atubangan kang Gobernador Festo ug Haring Agripa. (Buhat 25:22–26:32) Pinaagi sa tabang ni Jehova, kita usab mahimong maisogong mga saksi, nga dili gayod “ikaulaw ang maayong balita.”—Roma 1:16.
Ang Pulong sa Diyos Maghupay Kanato
15. Sa unsang paagi ang Pulong sa Diyos makahatag ug kahupayan sa dihang yubiton kita sa uban?
15 Ang Pulong ni Jehova maghatag kanato ug kasaligang paghupay. (Salmo 119:49-56) Adunay mga panahon sa dihang kita ilabinang nagkinahanglan ug paghupay. Bisan tuod kita maisogong mosulti ingong mga Saksi ni Jehova, “ang mga mapangahason”—kadtong milihok nga mapangahason ngadto sa Diyos—usahay ‘magyubit kanato sa hilabihan.’ (Salmo 119:51) Apan, samtang mag-ampo, mahinumdom tingali kita ug positibong mga butang nga gisulti diha sa Pulong sa Diyos, ug busa ‘makaplagan nato ang kahupayan alang sa atong kaugalingon.’ (Salmo 119:52) Samtang gipahayag nato ang atong mga pangamuyo, mahinumdoman tingali nato ang usa ka balaod o prinsipyo sa Kasulatan nga maghatag kanato ug kahupayan ug kaisog nga gikinahanglan sa usa ka pit-os nga kahimtang.
16. Unsay wala himoa sa mga alagad sa Diyos bisan pa sa paglutos?
16 Ang mga mapangahason nga nagyubit sa salmista maoy mga Israelinhon—mga membro sa nasod nga napahinungod ngadto sa Diyos. Pagkadakong kaulawan! Apan, dili sama kanila, magmadeterminado kita nga dili gayod mobiya sa balaod sa Diyos. (Salmo 119:51) Atubangan sa paglutos sa Nazi ug sa susamang pagtratar latas sa katuigan, libolibong alagad sa Diyos ang wala mobiya sa mga balaod ug mga prinsipyo nga makaplagan diha sa Pulong sa Diyos. (Juan 15:18-21) Ug dili usa ka kabug-at ang pagtuman kang Jehova, kay ang iyang mga lagda samag makapahupay nga mga honi alang kanato.—Salmo 119:54; 1 Juan 5:3.
Magmapasalamaton sa Pulong ni Jehova
17. Ang apresasyon sa pulong sa Diyos magpalihok kanato sa pagbuhat sa unsa?
17 Atong mapamatud-an ang atong pagkamapasalamaton sa pulong sa Diyos pinaagi sa pagtuman niana. (Salmo 119:57-64) Ang salmista ‘nagsaad nga tumanon ang mga pulong ni Jehova,’ ug bisan ‘sa gabii mibangon siya aron sa pagpasalamat sa Diyos tungod sa Iyang matarong nga hudisyal nga mga hukom.’ Kon makamata kita sa gabii, pagkamaayong kahigayonan kana nga ipahayag nato ang pasalamat ngadto sa Diyos diha sa pag-ampo! (Salmo 119:57, 62) Ang atong apresasyon sa pulong sa Diyos magpalihok kanato sa pagpangita sa iyang pagtudlo ug makapahimo kanato nga malipayong ‘mga kauban niadtong nahadlok kang Jehova’—mga tawo nga adunay matahaong kahadlok sa Diyos. (Salmo 119:63, 64) Aduna pa bay mas maayo pang kauban nga atong makaplagan dinhi sa yuta?
18. Sa unsang paagi tubagon ni Jehova ang atong mga pag-ampo sa dihang ‘gilikosan kita sa mga higot sa mga daotan’?
18 Sa dihang moampo kita uban sa tibuok natong kasingkasing ug mapaubsanong mohangyo kang Jehova nga tudloan kita, atong ‘gilukmay ang iyang nawong’ sa tuyo nga matagamtam ang iyang pag-uyon. Kita kinahanglan gayong mag-ampo sa dihang ‘gilikosan kita sa mga higot sa mga daotan.’ (Salmo 119:58, 61) Mahimong putlon ni Jehova ang mga higot sa mga kaaway nga nagpugong kanato aron makapadayon kita sa buluhatong pagsangyaw sa Gingharian ug paghimog mga tinun-an. (Mateo 24:14; 28:19, 20) Makadaghan kining nahitabo diha sa kayutaan nga gidili ang atong buluhaton.
Magbaton ug Pagtuo sa Pulong sa Diyos
19, 20. Sa unsang paagi maayo nga sakiton?
19 Ang pagbaton ug pagtuo sa Diyos ug sa iyang pulong motabang kanato sa paglahutay sa kalisdanan ug sa pagtuman sa iyang kabubut-on. (Salmo 119:65-72) Bisan tuod ang mga mapangahason ‘nagduhig kaniya sa kabakakan,’ ang salmista miawit: “Maayo alang kanako nga gisakit ako.” (Salmo 119:66, 69, 71) Sa unsang paagi maayo alang ni bisan kinsang alagad ni Jehova nga mag-antos sa kasakit?
20 Sa dihang kita mag-antos sa kasakit, sa walay duhaduha kita kinasingkasing nga mohangyo kang Jehova, ug kana makapasuod kanato ngadto kaniya. Mogugol tingali kita ug dugang panahon sa pagtuon sa sinulat nga Pulong sa Diyos ug mas maningkamot sa pagpadapat niana. Moresulta kini sa mas malipayong kinabuhi. Apan komosta kon ang atong reaksiyon sa kasakit magpadayag ug dili-maayong mga taras, sama sa pagkadili-mapailobon ug garbo? Pinaagi sa kinasingkasing nga pag-ampo ug sa tabang sa Pulong sa Diyos ug sa iyang espiritu, atong mabuntog ang maong mga kahuyangan ug mas bug-os nga ‘masul-oban ang atong kaugalingon sa bag-ong personalidad.’ (Colosas 3:9-14) Dugang pa, ang atong pagtuo mapalig-on sa dihang kita moantos sa kalisdanan. (1 Pedro 1:6, 7) Si Pablo nakabenepisyo gikan sa mga pagsulay nga iyang naagoman tungod kay gumikan niini siya labi pang nagsalig kang Jehova. (2 Corinto 1:8-10) Gitugotan ba nato ang pag-antos nga makahatag ug maayong epekto kanato?
Salig Kanunay Kang Jehova
21. Unsay mahitabo sa dihang pakaulawan sa Diyos ang mga mapangahason?
21 Ang pulong sa Diyos naghatag kanato ug maayong pasukaranan nga mosalig kang Jehova. (Salmo 119:73-80) Kon nagsalig gayod kita sa atong Maglalalang, wala kitay katarongan nga maulaw. Apan, tungod sa gibuhat sa uban, kita nagkinahanglag paghupay ug gusto tingaling moampo: “Pakaulawi ang mga mapangahason.” (Salmo 119:76-78) Sa dihang pakaulawan ni Jehova ang maong mga tawo, moresulta kini sa pagkayagyag sa ilang daotang mga dalan ug sa pagbalaan sa iyang balaang ngalan. Makaseguro kita nga ang mga maglulutos sa katawhan sa Diyos wala gayoy mahimo. Pananglitan, sila wala gayod makahimo—ug dili gayod makahimo—sa pagpapha sa mga Saksi ni Jehova, kinsa nagasalig sa Diyos uban sa tibuok nilang kasingkasing.—Proverbio 3:5, 6.
22. Sa unsang diwa nga ang salmista “nahisama sa botelya nga panit nga gipaasohan”?
22 Ang pulong sa Diyos magpalig-on sa atong pagsalig kaniya sa dihang kita ginalutos. (Salmo 119:81-88) Tungod kay ang mga mapangahason nagalutos kaniya, ang salmista mibati nga siya “nahisama sa botelya nga panit nga gipaasohan.” (Salmo 119:83, 86) Sa kapanahonan sa Bibliya, ang mga botelya nga gama sa panit sa mananap gisudlan ug tubig, bino, ug ubang mga likido. Kon dili gamiton, kining mga botelyaha mokulo kon ibitay duol sa dapogan diha sa lawak nga walay panghaw. Tungod ba sa kalisdanan o paglutos gibati nimo nga ikaw ‘sama sa botelya nga panit nga gipaasohan’? Kon mao, salig kang Jehova, ug pag-ampo: “Sumala sa imong mahigugmaong-kalulot tipigi akong buhi, aron makatuman ako sa pahinumdom sa imong baba.”—Salmo 119:88.
23. Unsay atong nahisgotan sa pagsubli sa Salmo 119:1-88, ug unsay mahimo natong isukna sa atong kaugalingon samtang naghinamhinam kita nga tun-an ang Salmo 119:89-176?
23 Ang atong nahisgotan sa unang bahin sa Salmo 119 nagpakita nga si Jehova nagpasundayag ug mahigugmaong-kalulot ngadto sa iyang mga alagad tungod kay sila nagasalig sa iyang pulong ug gikalipay nila ang iyang mga lagda, pahinumdom, sugo, ug mga balaod. (Salmo 119:16, 47, 64, 70, 77, 88) Siya nalipay nga kadtong debotado kaniya padayong nagbantay subay sa iyang pulong. (Salmo 119:9, 17, 41, 42) Samtang naghinamhinam ka sa pagtuon sa ubang bahin niining maanindot nga salmo, mangutana ka tingali sa imong kaugalingon, ‘Gitugotan ba gayod nako ang pulong ni Jehova nga magdan-ag sa akong alagianan?’
[Footnote]
a Ang gihisgotan dinhi mao ang mensahe ni Jehova, dili ang tibuok unod sa Bibliya—ang Pulong sa Diyos.
Unsaon Nimo Pagtubag?
• Sa unsa nagdepende ang tinuod nga kalipay?
• Sa unsang paagi ang pulong ni Jehova makatabang kanato nga magmahinlo sa espirituwal?
• Sa unsang mga paagi ang pulong sa Diyos maghatag ug kaisog ug paghupay?
• Nganong angay kitang magbaton ug pagtuo kang Jehova ug sa iyang pulong?
[Mga Pangutana sa Pagtuon]
[Mga hulagway sa panid 11]
Si Ruth, Rahab, ug ang Hebreohanong mga batan-on nga nadestiyero sa Babilonya ‘padayong nagbantay subay sa pulong sa Diyos’
[Hulagway sa panid 12]
Si Pablo maisogong ‘naghisgot bahin sa mga pahinumdom sa Diyos atubangan sa mga hari’